Pelepas Anak-Anak E Reh Ndahi Aku (Markus 10:13-16, Matius 18:10)

PERPULUNGEN JABU-JABU

GEREJA GBKP

TANGGAL 1 – 7 APRIL 2018

Markus 10 : 13-16, Matius 18:10.

Tema : Pelepas Anak-Anak E Reh Ndahi Aku

LATAR BELAKANG

MARKUS 10:13-16.

1.      Lit piga-piga kalak maba anak-anak man Jesus. Atena ipasu-pasu Jesus, sebab lit sada arapen kenca ipasu-pasu Jesus anak-anak e dat kegeluhen simehuli. Sura-sura piga-piga kalak enda dat tantangan ibas ajar-ajar Jesus nari, sebab merawa ajar-ajar Jesus man piga-piga kalak e. Merawa ajar-ajar Jesus sebab akapna banci terganggu pelayanan Jesus. 

2.      Merawa Jesus man ajar-ajarNa, emaka nina Jesus man ajar-ajarNa pelepas anak-anak e reh ndahi Aku. Ola ambati ia, sebab kalak sibage nge kap empuna Kinirajaan Dibata. Tole iajari Jesus man ajar-ajarNa kerna kinirajaan Dibata. Nina Jesus, ise pe la banci bengket ku kinirajaan Dibata  adi la bagi anak-anak  ia ibas pengaloken kinirajaan Dibata. Maksudna bengket ibas kinirajaan Dibata labo berarti harus jadi anak-anak, tapi bagi anak-anak min. sebab karakter anak-anak eme polos ras tergantung man orang tua ras mbiar ngelokoken sisalah. Bagepe kerna kinirajaan Dibata labo milik kalak dewasa, tapi milik kerina jelma.

3.      Kinirajaan Dibata eme keselamatan. Perlu siteh kinirajaan Dibata la seri ras kinirajaan si lit ibas doni enda. Kinirajaan Dibata eme kinirajaan siipimpin Jesus. Jesus eme Raja, emaka ise siatena bengket ras nggeluh ibas kinirajaan Dibata arus patuh ras mungkuk nembah man Jesus. 

MATIUS 18 :10

1.      Merupaken kata persinget Jesus man ajar-ajarNa erkite-kiteken ajar-ajarNa mpersoalkan kerna keduduken/pangkat. Emaka isungkunenna man Jesus kerna ise simbelinna ibas kinirajaan Sorga pagi. Sebab enda penting man ajar-ajar Jesus. Janah enda pe merupaken karakter kalak Jahudi. sebab salah sada karakter kalak Jahudi eme megah akapna  ndeher ras siterhormat. Emaka penting man ajar-ajarNa meteh ise simbelinna ibas kinirajaan Sorga pagi.

2.      Jesus la ngataken man ajar-ajarNa ise simbelinna, tapi berekenNa sada pengajaren kerna ise siarus bengket ibas kinirajaan Sorga. Emaka idilo Jesus sekalak danak-danak, janah tedis i lebe-lebe ajar-ajar. Nina Jesus ola la meherga akapndu kalak sikitik enda. Ertina anak-anak pe meherga i lebe-lebe Tuhan, janah labo soal kedudukan/jabatan sipenting ibas Kinirajaan Sorga, tapi kegeluhen singena ate Tuhan. Bali ras karakter anak, adi tehna ia salah, mis ia mbiar, janah akuken salahna ras jera. Bagepe danak-danak polos denga. Bagepe ate Jesus gelah ajar-ajar ula merendahkan kalak sideban, kususna kalak sisederhana, terlebih ia malang man Tuhan, sebab malaikatna si katawari pe natap ku ayo Bapa i Surga. Perlu siteh ibas teologi padan sindekah,malaikat Tuhan melindungi kalak siikelengi Tuan (bdk. Masmur 34:8, 91:11-14).

APLIKASI

            Ibas rangka HUT KAKR pe 128 ken, genduari kita ngerana kerna kedudukan anak-anak ibas Sorga. Perlu siteh anak-anak ras kalak dewasa seri kedudukanna i lebe-lebe Tuhan. Erkiteken sie me maka ibas gerejanta (GBKP), posisi anak-anak tuhu-tuhu iperdiateken. Ibas gereja GBKP anak-anak la saja terjeng objek pelayanan tapi pe subjek pelayanan. Ertina anak-anak la saja i layani, tapi harus ikut ibas pelayanan gereja (bdk. Tata Laksana GBKP Pasal 1:2). Emaka tentuna gereja harus mpersiapkan anak-anak gelah banci terlibat ibas pelayanan-pelayanan gereja, tandana ia pe sada ibas persadan ras Jesus Kristus.

            Guna seh ku je maka lit tanggungjawab orang tua eme naruhken anak-anak ku gereja guna ikut kebaktin KAKR gelah ia pe ipasu-pasu Tuhan. Jenari siergailah anak-anak ibas ia reh ku gereja,ula ambati anak-anak e. Salah sada kita banci ngergai anak-anak ndahi Jesus eme perdiateken gedung ras fasilitas ingan kebaktin anak-anak, bagepe kebutuhen-kebutuhen sideban.

Catatan :

• Lit sada perbedaan antara Markus ras Matius ngenara kerna pemerintahan Dibata. Adi Markus ngerana kerna pemerintahan Dibata alu gelar Kinirajaan Dibata, tapi adi Matius kinirajaan Sorga.

Pdt. Steven Kumenit, STh.M.Min.

Sepearihen Ras Seperukuren Ibas Perpulungen (Filipi 2: 1- 4)

PERPULUNGEN JABU-JABU

GEREJA GBKP

TANGGAL 25- 31 MARET 2018

Pilipi 2 : 1-4

Tema : Sepearihen Ras Seperukuren Ibas Perpulungen

LATAR BELAKANG

1.      Enda merupaken nasehat rasul Paulus man perpulungen Pilipi, sebab enggo iidah Paulus perpulungen Pilipi enda lit ibas “bahaya perpecahen” (band. Pilipi 4:2-3). Enda ipeseh Paulus labo saja erkiteken perpulungen pilipi cukup mperdiateken Paulus, khususna paksa Paulus lit ibas penjara, tapi idah Paulus selaku gereja, harus nggeluh bagi biak Kristus, Sebab Kristus kepala gereja.

2.      Kai siikataken Paulus man perpulungen Pilipi enda, gelah perpulungen Pilipi banci nginget mulihi kerna biak ras karakter kalak si tek man Yesus Kristus (biak kalak kristen). Bagepe nasehat enda sekaligus mereken motifasi gelah tetap erjuang ras tetap nggeluh erbahan kekelengen. Sebab ibas perbahanen sibage maka terjaga nge persadan si enggo tercipta.

3.      Kekelengen ibas Kristus harus nggeluh bas pusuh ras peraten perpulungen Pilipi gelah perpulungen Pilipi nggejapken maka kalak sideban lebih meherga asangken ia.  Alu bage la lit sideban sibanci ilakokenna asangken nggeluh ibas persadan ras nggeluh ibas sada misi ras visi.

4.      Ijenda Paulus ngataken kerna biak-biak kegeluhen selaku perpulungen Kristen. Selaku kalak kristen harus min lit pengapul ibas Kristus, sikeleng-kelengen ras saling memotivasi sada ras sidebanna, Nggeluh ibas Kesah si Badia , bagepe nggeluh ibas kiniteruken ukur, bagepe nggeluh ibas sada arih,  janah sipaling penting eme nggeluh ibas Kristus. Adi biak kristen enda tetap nggeluh bas perpulungen Pilipi maka sijadi  eme kegeluhen perpulungen Pilipi ngasup ncidahken kegeluhen si la egois ras la lit kiniganjangan ukur tapi alu meteruk ukur, ngenen kalak sideban lebih mehuli janah tetap mperdiateken kalak sideban (lit rasa kepedulian).

5.      Perbahanen sibage merupaken perbahanen Kristus. Emaka Paulus mendorong perpulungen gelah teladan Kristus nggeluh ibas perpulungen. Alu bage perpulungen tetap nggeluh ibas kiniersadan.

APLIKASI

            Musyawarah warga sidi runggun merupaken agenda gereja siilaksanaken sekali setahun eme simelawenna bulan Maret. Sue ras Tata Laksana GBKP Pasal 164, Musyawarah Warga Sidi Runggun eme 1).Sarana bagi warga ras Majelis runggun guna saling memberi masukan mengenai perkembangan kehidupan bergereja i runggun ibas bersekutu, bersaksi ras melayani. 2). Musyawarah warga sidi runggun labo merupaken sarana pengambilan keputusan. 4). Musyawarah warga sidi runggun dilaksanakan untuk mendengar laporan perkembangan jemaat dari BPMR beserta seksi-seksinya, pengurus unit pelayanan dan pengurus PJJ serta pengajuan usul-usul tentang kehidupan bersekutu, bersaksi, dan melayani serta pembinaan guna pertumbuhan jemaat. 5). Usul/masukan tentang kehidupan bersekutu, bersaksi, melayani, dan pembinaan harus ditampung dan ditanggapi oleh Majelis Runggun dalam bentuk keputusan pada sidang majelis runggun yang terdekat.

            Fungsi musyawarah waraga sidi runggun eme penglibatan warga runggun (perpulungen) ibas ngukuri kerna pelayanan i tengah-tengah gereja, bagepe warga runggun banci muat bagin ibas pelayanan. Alu bage erdewasana gereja Tuhan.

            Ibas rangka ngukuri ras muat bagin ibas pelayanan, maka penting ibas musyawarah warga sidi runggun seperarihen ras seperukuren, sebab adi la lit enda tentuna siterjadi, perserta nggeluh ibas kecurigaan, emosional, rubat. Adi nggo bagenda tentuna enda labo merupaken biak gereja. Jenari gereja nggeluh ibas perpecahan. Adi nggo nggeluh ibas perbecahan maka terhambat me perkembangen gereja ku gereja si misioner, sebab lalap kita ndungi persoalan-persoalan ibas gereja, sidungna kita lanai memikirken kerna pelayanan-pelayanan gereja. Emaka marilah ibas kita ikut musyawarah warga sidi runggun kita harus meteruk ukur ras positif thingking, bagepe seperarihen ras seperukuren, sebab enda me karakter gereja situhu-tuhu.

Pdt.Steven Kumenit, STh.M.Min.

Tema : Mere Erpalasken Kai Si Lit Ibas Kita (2 Korintus 8 : 12-15)

PERPULUNGEN JABU – JABU

GEREJA GBKP

TANGGAL 18-24 MARET 2018

2 Korinti 8 : 12 – 15

Tema : Mere Erpalasken Kai Si Lit Ibas Kita

LATAR BELAKANG.

1.      Kenca kita tek man Yesus Kristus selaku Tuhan, maka kita la saja jadi gereja siteridah (nen = lembaga), tapi kita pe jadi gereja si la teridah. Janah kita nggeluh ibas sada persadan. Ikatan sada persadan “menembus ruang ras waktu”. Ibas erti kata, kalak sitek man Yesus Kristus nggo nggeluh ibas sada kula. Emaka adi lit anggota kula simesui, maka anggota kula sideban ikut nggejap kinisuin e. Ibas palas enda me maka rasul Paulus mpersingeti mulihi, bagepe mereken sada motivasi man perpulungen Korinti gelah perpulungen Korinti mereken penampat man senina turangna i Yerusalem si sangana nggeluh ibas kiniseran.

2.      Kalak Kristen Yahudi sitading i Yerusalem sangana nggeluh ibas kelihen erkite-kiteken lit “penganiayaan/penindasan ras perjarahan”.  Emaka tanggungjawab kiniteken kalak kristen sitading i daerah Akaya ras Makedoni eme nampati alu materi. Alu sisampati kalak kristen si lit i Yerusalem, maka bebanna jadi menahang, emaka lanai teralang kerna persadan ras mberitaken Berita Si Meriah.

3.      Ibas perpulungen Korinti lit sada persoalan, khususna kerna mpepulung dana guna nampati senina turangna si lit i Yerusalem. Persoalanna labo erkiteken perpulungen Korinti la lit sen. Perlu siteh perpulungen Korinti eme perpulungen sicukup bayak. Saja siterjadi eme ndekasa akap Paulus perpulungen mpepulung dana e.

4.      Ibas palas enda ipersingeti Paulus mulihi perpulungen Korinti, bagepe imotivasiken Paulus  gelah perpulungen Korinti banci mereken lebih asangken perpulungen-perpulungen si lit i Makedoni. Erkiteken sie me itekanken Paulus maka tujun mere, la saja terjeng nampati, tapi gelah lit keseimbangan nggeluh. Bagepe ibas perpulungen nehken pemerena, maka nggeluh me sisampat-sampaten. Bagepe labo erkiteken mere maka perpulungen Korinti jadi musil. Situhuna ibas nehken penampat, maka undang-undang kekelengen nggo isehken perpulungen Korinti.

5.      Nggeluh enda bagi roda pedati, emaka banci saja, ibas wari – wari sireh perpulungen Korinti ka siberkekurangan ntah pe nggeluh ibas kemusilan. Emaka tanggungjawab kalak Kristen i Yerusalem ka nampati perpulungen Korinti. Enda me respon kiniteken ibas kegeluhen kalak kristen.

APLIKASI

            Teologi mere man kalak kristen eme sada pengataken bujur man Tuhan erkite-kiteken Tuhan nggo nelamatkan kita, bagepe nggo ibereken Tuhan man banta kecukupan-kecukupan, isamping sie ibas rangkasi sampat-sampaten. Jadi pemere Tuhan si lit bas kita ibas rangka jadi pancur kekelengen Tuhan, gelah lit pembebasan nandangi temanta manusia. Ibas erti kata ibas kita mere terjadi me perubahan ekonomi nandangi senina turangta.

            Ipihak sideban ibas kita mere berarti kita nggo muat bagin ibas pelayanan Tuhan arah gereja, emaka mari si buka mata ras cupingta, kepeken nterem denga si perlu man sampaten. Emaka selaku kalak sierkiniteken man Tuhan ibas  pendilo Tuhan guna muat bagin ibas pelayananNa cidahken dage arah kita nggit mere. Sipindo Tuhan ibas pemerenta e labo arah kai si la lit bas kita, tapi arah kai si lit bas kita. Emaka la lit situhuna kalak kristen si la ngasup mere. Jadi erkiteken kai si lit bas kita, maka kita banci mere, maka la itentuken mbuena, tapi kai si lit bas kita. Adi kin ngasup kita mere erkiteken melala pemere Tuhan man banta, siberekenlah alu meriah ukur. Janah mari ibas kita mere, merelah alu meriah ukur, bagepe ula bagi perpulungen Korinti siterlalu memikirken hal-hal praktis ras teknis. Alu bage ibas kita mere nterem kalak sitersampati janah kita pe ipasu-pasu Tuhan.

Pdt. Steven Kumenit, STh.M.Min.