Pekan Penatalayan GBKP, Wari 4 : Kesah Si Badia Mpengasup Ngawan Ni Perpulungen Guna Ngkelengi Teman Manusia (Galati 6"1-5)

PEKAN PENATALAYANAN

GEREJA GBKP

WARI IV. RABU 23 JANUARI 2013.

Introitus   :    "Ise kin temanku manusia?" (Lukas 10:29b)

Ogen        :    Lukas 10: 25-37).

Khotbah   :    Galati 6:1-5.

Tema        :    Kesah Si Badia Mpengasup Ngawan Ni Perpulungen Guna Ngkelengi Teman Manusia.

LATAR BELAKANG.

1.      Secara umum banci sikataken, perpulungen Galati enda Paulus sendiri simantekisa. Janah anggota perpulungen enda labo kalak Yahudi. Tapi erkiteken dahin pelayanen, Paulus nadingken perpulungen enda. Kenca itadingken Paulus perpulungen Galati enda, la ndekahsa reh kalak kristen siasalna Yahudi nari. Kalak Yahudi siasalna Yahudi nari ngataken maka adi ate selamat  harus ngikuti aturen-aturen taurat.  Ntah pe guna jadi kalak kristen simehuli maka harus ngikuti kai siikataken undang-undang (taurat), Perpulungen Galati harus i sunatken ras ndalanken kai siikataken undang-undang (taurat).

2.      Khusus sijadi oratenta, Paulus ngerana kerna uga seharusna perbahanen kalak si tek man Tuhan. Kegeluhen ibas doni enda harus lit standart moral. Memang bagi kalak Yahudi standart moralna meganjang kal, janah enda simbedaken ia ras bangsa sideban. Janah enda me siitekanken kalak kristen asal Yahudi. Pengajaren kalak kristen asal Yahudi nandangi kalak kristen i perpulungen i Galati eme adi kalak kristen la ngikuti ntah pe ndalanken undang-undang (taurat) maka kalak kristen si bage la lit pedomanna erbahan simehuli (perilaku). Kegeluhen kalak kristen lanai terbedaken ras kalak si la tek man Tuhan (kalak kafir) si lit isekelewetna. Padahal selaku kalak sitek man Yesus Kristus, kegeluhenna enggo nggeluh ibas kemerdekaan, lanai nggeluh ibas kuk undang-undang. Kegeluhen kalak si tek eme ibas Yesus Kristus.

3.      Persinget Paulus nandangi perpulungen gelah perpulungen ndalanken undang-undang Kristus eme sikeleng-kelengen ras sisampat-sampaten adi lit masalah. Erkiteken sie perpulungen iajuk Paulus gelah adi lit anggota perpulungen sienggo erbahan salah, maka perpulungen la banci main hakim sendiri, tapi harus negu ia alu manjar-ajar gelah mulihken ia ku dalan simehuli. Enda berlaku man anggota perpulungen sienggo terikut ibas pengajaren si papak siibaba kalak kristen Yahudi simenekanken kerna keselamaten arah undang-undang (taurat).  Bagepe nandangi anggota perpulungen sienggo nggo ngelakoken kesalahan-kesalahan.

4.      Perbahanen siibahan kalak si tek eme nggeluh sikeleng-kelengen ras sisampat-sampaten eme sada tanggungjawab moral ras kiniteken.  Enda itekanken sebab undang-undang Kristus erdahin ibas persadan.

5.      Isamping sie, Paulus mpersingeti perpulungen gelah tetap mperdiateken perbahanen simehuli singena ate Tuhan. Bagepe tep-tep anggota lit tanggungjawabna masing-masing eme dalanken kai simehuli singena ate Tuhan. Perbahanen simehuli siidalanken kalak si tek mbabai ia ibas kinihagaan. Maksud Paulus gelah tep-tep anggota perpulungen fokus ibas perbahanen simehuli, ula mbeda-bedaken ras kalak sideban.

APLIKASI

            Santo Agustinus, sekalak bapa gereja, pernah isungkun : kai kin keleng ate e, janah uga bentuk ras rupa keleng ate e? Nina Agustinus :

Kasih memiliki tangan untuk menolong orang lain, Kasih memiliki kaki untuk menghampiri mereka yang miskin, Kasih memiliki mata untuk melihat kebutuhan-kebutuhan orang lain, Kasih memiliki telinga untuk mendengar rintihan mereka yang menderita.

            Jadi teridah i jenda Agustinus la mereken jawaban si rumit kal tapi alu sederhana, gelah banci imengerti.

            Ibas pengertin si lebih praktis, keleng ate teridah ibas perbahanen. Janah keleng ate e nggo lit bas kita selaku kalak kristen, sebab kita kerina nggeluh ibas persadan ras Kesah Si Badia. Janah harus siinget salah sada ulih Kesah Si Badia eme kekelengen (Galati 5:22).

            Man kalak kristen kekelengen la sekedar konsep ras pengajaren, tapi harus idalanken, emaka ibas kita ndalanken kekelengen i tengah-tengah perpulungenta alu la pekulah-kulah, maka kita nggo memproklamirkan man kalak sideban kita enda ipinpin Kesah Si Badia.

Pdt. Steven Kumenit. STh, M.Min.

Pekan Penatalayanan GBKP, Wari 3 : Kesah Si Badia Njemba Perpulungen Guna Ersaksi (Perbahanen Rasul-Rasul 8:26-38)

PEKAN PENATALAYANAN

GEREJA GBKP

WARI III. SELASA 22 JANUARI 2013.

Introitus :    KesahKu Kucurcurken man bangsangKu Israel, janah lanai ndigan pe ia Kutundalken. Aku, TUHAN si Erdolat enggo melasken katangKu." (Esekiel 39:29).

Ogen      :    Esekiel 36:27-30.

Khotbah     :    Perbahanen Rasul-Rasul 8: 26-38.

Tema      :    Kesah Si Badia Njemba Perpulungen Guna Ersaksi.

LATAR BELAKANG

1.    Filipus eme salah sada serayan siiangkat rasul-rasul atas usulen perpulungen guna nampati rasul-rasul ibas ngelai (band. Perbahanen 6:5-7).  Kepeken ibas perkembangen pelayanen, dahin Pilipus la saja guna ngelai meja, tapi pe nehken Berita Si Meriah. Janah enda ilakokenna i kuta Samaria. Tapi kenca dung pelayanenna i kuta Samaria atena ku Yerusalem, tapi reh sekalak malekat Tuhan ndahi Pilipus janah nina : Ersikap janah laweslah kam ku selatan, ku dalan  i Yerusalem ku Gaza, dalan enda melungun. Emaka ersikap ia jenari berkat Pilipus ku ingan siikataken malekat Tuhan. Ibas perdalanenna jumpa ia ras sekalak pegawai Etopia, kalak si lit jabatenna i Etopia (kepala bendahara Kandake, Ratu Etopia), si enggo mulih ibas ersembah i rumah pertoton i Yerusalem. Perlu si teh lebe Kandake eme gelar ratu-ratu  ibas Etopia).

2.    Kalak Etopia, beda kinitekenna ras kalak Yahudi, tapi reh ia ersembah ku rumah pertoton kalak Yahudi i Yerusalem erkite-kiteken i Etopia jumpa ia ras kalak Yahudi, janah ibegina pengajaren kalak Yahudi e, ras menteri Etopia enda enggo ngoge Pustaka Si Badia kalak Yahudi, emaka alu gegeh Kuasa Kesah Si Badia, ibabai Kesah Si Badia menteri e gelah ku Yerusalem. Tapi ibas perdalanen mulih ku Etopia alu sora megang iogena sada kata Dibata si lit ibas kitab Yesaya nari, janah ibegi Pilipus. Ibas paksa sie ka ngerana Kesah Si Badia man Pilipus, gelah Pilipus ndeheri gereta pegawai Etopia e, emaka minter ideheri ka janah isungkun Pilipus ia  iangkana kin kerna kai siiogena, tapi ijabab menteri ndai, la iangkana, emaka ituriken/jelasken Pilipus kai ertina e. Ertina eme kerna Yesus Kristus. Kai siikataken ibas kitab Yesaya e, eme sada nubuat kerna Yesus.  

3.    Erkiteken jelas kal penuriken Pilipus maka nina menteri e man Pilipus peridiken aku. Tapi nina Pilipus kam banci iperidiken adi tuhu-tuhu kam enggo tek man Yesus. Nina menteri e, aku enggo tek, emaka iperidiken Pilipus me meteri e.

4.    Perjumpan Pilipus ras menteri i Etopia nari, bagepe menteri e nggit iperidiken merupaken sada pendahin Dibata arah Kesah Si Badia. Jadi manusia la bo lit peranen kai pe. Manusia ibas hal enda Pilipus merupaken sada alat Tuhan ngenca.

5.    Keselamaten ibereken Tuhan man tep-tep manusia, adi ia tuhu-tuhu tek man Yesus Kristus. Bagepe keselamaten bersipat universal. Keselamaten la ikhususken man salah sada jelma ntah pe kelompok saja, tapi terbuka man ise saja, termasuk man kalak Etopia.

APLIKASI

            Ersaksi eme salah sada tugas gereja. Lit telu tugas gereja eme Koinonia (persadan), Merturia (ersaksi) ras Diakonia (pelayanen).  Janah dahin ersaksi eme tanggungjawab kita kerina selaku kalak si tek. Dahin ersaksi merupaken dahinta erkiteken dahin e persuruhen Tuhan man banta (band. Matius 28:18-20; 1 Petrus 2:9; rsd). Persoalenna si maketep turah bas kita, eme mekisat kita ersaksi, ntah pe kita isibukken alu erbage-bage dahinta. Emaka dahin ersaksi bagi terabaikan.    

            Adi siperdiateken ibas oratenta, Pilipus ersaksi kerna Yesus man menteri i Etopia nari, alu bage, ersaksi siimaksudken i jenda eme ersaksi ku darat. Ersaksi man kalak si lenga nandai Dibata. Janah adi siperdiateken ibas kegeluhenta, situhuna nterem jelma tehna Yesus Kristus e ise, tapi lenga kal iangkana alu mbages. Emaka dahinta jelaskenca ise Yesus e. Harus si teh kita ngasup ngelakoken dahin mberitaken Berita Si Meriah, sebab Kesah Si badia lit ras ringan bas pusuhta. Kesah Si Badia ngasup njemba kita gelah siberitaken kerna Yesus e. Janah harus ka siteh Mberitaken Berita Si Meriah ibas paksa si genduari  la saja terjeng ngerana, tapi arah perbahanen.

            Harus siinget, apai ka genduari kita ibas solidaritas eksternal. Uga bentukta ersaksi ibas bentuk solidaritas eksternal. Adi mehuli perbahanenta nandangi kalak si deban, tentuna bagi menteri i Etopia nari me kalak e, eme nggit iperidiken. Ia sendiri simindo gelah iperidiken, labo kita simindo. Tapi inget tahun solidaritas enda labo guna ndarami domba, tapi nehken simehuli singena ate Dibata, eme bentuk kita ersaksi.

Pdt. Steven Kumenit, STh, M.Min.

Pekan Penatalayanan GBKP, Wari 2 : Kesah Si Badia Erbahanca Reh Belinna Kiniteken Perpulungen (Perbahanen Rasul_rasul 9:31).

PEKAN PENATALAYANAN

GEREJA GBKP

WARI II, SENIN 21 JANUARI 2013.

Introitus   :    Ma ietehndu kin maka kam me Rumah Pertoton Dibata dingen Kesah Dibata ringan i bas kam? (1 Korinti 3:16).

Ogen        :    Yoel 2:28-32.

Khotbah   :    Perbahanen Rasul-Rasul 9:31

Tema        :    Kesah Si Badia Erbahanca Reh Belinna Kiniteken Perpulungen.

LATAR BELAKANG

1.      Kenca Yesus mate ras terangkat ku surga, situasi perkembangen kalak si tek man Yesus tetap nggeluh ibas penindasan. Pemimpin-pemimpin agama Yahudi, termasuk pe nterem kalak Yahudi, bagepe lit piga-piga kalak si muat “semacam surat tugas” gelah ia banci ipercayaken guna ikut ngayak-ngayak kalak si tek man Yesus, tujunna guna nangkap, ipenjaraken ras muneh (band. Saul ope denga jadi Paulus). 

2.      Saul sienggo tek man Tuhan ngajar ia ibas gelar Tuhan ras ersoal jabap ia ras kalak Jahudi simake cakap Yunani, tapi ibas ukur kalak e lit sura-sura guna munuh Saul, emaka ibaba perpulungen me Saul gelah lawes ibas Jerusalem nari. Kenca Saul la nai i Jerusalem teridah lit sada keamanan i je. Enda kerina tentuna Kesah Si Badia singajarisa gelah perpulungen nggeluh kepentaren.

3.      Isamping sie Perpulungen i Yudea, Galilea ras Samaria nggeluh ibas aman, Maksudna erkiteken erteremna kalak si tek man Yesus, maka erpengangkanna ia uga ertina nggeluh sikeleng-kelengen. Perpulungen erdewasana nggeluh selaku perpulungen Tuhan. Isamping sie perpulungen nggeluh ibas pengajaren rasul-rasul, emaka selain perpulungen nggeluh alu kekelengen, perpulungen pe nggeluh alu mbiar man Tuhan. Enda kerina iajari Kesah Si Badia. Ibas perpulungen nggeluh ibas persadan ras Kesah Si Badia, maka kiniteken perpulungen reh belinna. Jadi amin gia lit penghambaten ras penganiayaan, tapi tetap saja perpulungen nggeluh ibas erkemalangen man Tuhan.

4.      Telu perpulungen eme Yudea, Galile ras Samaria itekanken i jenda, erkiteken i telu perpulungen enda perpkembangen perpulungen mehuli kal, isamping sie Tuhan Yesus sendiri singatakenca ajar-ajarNa menjadi saksi ibas telu ingan enda, ras kerina enda Kesah Si Badia sipengasup kerina ajar-ajar ersaksi ibas telu ingan enda (Band. Perbahanen 1:8). Janah enda jadi tanda uga perpulungen nggeluh i teruh pinpinen Kesah Si Badia. Perpulungen nggeluh selaku keluarga kristen, janah nggeluh saling mperdiateken sada ras sidebanna. Kerna status sosial si lit bas ia, tuhu-tuhu lanai lit jadi sada penghalang, sebab lanai ibelinken, ntah pe status sosial itangtangi gelah nggeluh selaku keluarga kristen.

5.      I Yudea, Galilea ras Samaria teridah perkembangen kuantitas kalak si tek. Enda jadi erkiteken perpulungen nggeluh ibas pengenalan man Tuhan alu payo, janah tetap nggeluh ibas pinpinen Kesah Si Badia, emaka Berita Si Meriah reh barna, janah ngena ate kalak nandangi persadan perpulungen e.

APLIKASI

            Perkembangen ntah pe penambahen jumlah perpulungen labo erkiteken gegeh ras kepentaren peminpin perpulungen/gereja, tapi pelin-pelin gegeh ras pinpinen Kesah Si Badia. Kesah Si badia sierdahin ibas peminpin perpulungen gereja ras Kesah Si Badia sindilo kalak si deban guna reh ku bas persadan e.

            Pendahin Kesah Si Badia la terjeng ibas ndilo sesekalak gelah bengket ku bas perpulungen e, tapi pe Kesah Si Badia njaga persadan perpulungen e. Bagepe Kesah Si Badia negu-negu perpulungen gelah perpulungen banci nggeluh ibas pengangkan sipayo kerna nggeluh selaku perpulungen ras pengangkan sipayo kerna ise kin Yesus e. Ibas pengangkan sipayo kerna Yesus selaku Tuhan e maka kegeluhen kinitekenta tep-tep wari erdewasana. Emaka situhuna uga gelah erdewasana kinitekenta, maka sipaling penting bas kita eme nggeluh mbiar ras erkemalangen man Tuhan. Sebab ibas kita nggeluh mbiar ras erkemalangen man Tuhan, maka kegeluhenta nggeluh ibas kepatuhen ras tutus ersembah man Tuhan, janah ibas kita ersembah man Tuhan, i je sibegi berita keselamaten, berita kerna Yesus Kristus selaku Tuhan singkelengi kita. Bagepe  Kegeluhenta nggeluh alu ngoge Pustaka Si Badia. Sebab  ibas kita megi ras ngoge pustaka Si Badia, iajari Kesah Si Badia kita uga kita ngertiken kerina e, e maka erpayona pengangkanta kerna Tuhan e. Ibas kegeluhen sibage Kesah Si Badia tetap ringan bas pusuh ras peratenta, emaka tep-tep wari erdewasana kinitekenta man Tuhan Dibata. Emaka kegeluhenta selaku perpulungen erdamena.

Pdt. Steven Kumenit, STh. M.Min.

Pekan Penatalayanan GBKP, Wari 1 : Kesah Si Badia Erbahanca Perpulungen Ersada (Perbahanen Rasul-Rasul 2:

PEKAN PENATALAYANAN

GEREJA GBKP

WARI 1, MINGGU 20 JANUARI 2012.

Introitus :    Kukuseken me KesahKu man anak-anakndu, ras pasu-pasungKu man kesusurenndu (Yesaya 44:3b).

Ogen      :    Yesaya 44:1-6.

Khotbah     :    Perbahanen Rasul-Rasul 2:1-15-; 40-42.

Tema      :    Kesah Si Badia Erbahanca Perpulungen Ersada.

LATAR BELAKANG

1.    Lit piga-piga wari raya bangsa Yahudi, salah sadana eme wari raya pentakosta. Ibas wari raya pentakosta enda, ntah pe wari raya pitu minggu eme wari raya “sindabuh ibas wari pe lima puluhken kenca Paskah kalak Yahudi. Ibas wari raya enda,  kalak Yahudi harus ngataken bujur man Tuhan i rumah pertoton  i Yerusalem. Sebab man bangsa Yahudi Dibata ringan i Rumah pertoton i Yerusalem. Emaka selain wari raya Paskah, Wari Raya Pentakosta pe, kalak Yahudi harus reh ku Yerusalem. Paksa sie me i Yerusalem pulung kalak Yahudi si reh ibas erbage-bage daerah/bangsa nari. Jadi wari raya Pentakosta tangtangna la iertiken kerna nusurna Kesah Si Badia. Tapi wari raya kenca rani.

2.    Ibas paksa sie rempet lit sora terbegi reh ibas langit nari bagi sora angin rembus erdeso ndemi ingan pulung rumah kalak si tek. Kenca sie lit bagi dilah api merap ku jah-kujeh  ncinepi kalak si tek sada-sadai. Emaka kalak si tek idemi Kesah Si Badia, janah ngasup ia kerina ngerana alu erbage-bage cakap. Emaka mamang ate kalak Yahudi si reh ibas erbage-bage bangsa sipulung i je. Sebab kalak sitek ngasup ngerana alu bahasana jine. Tapi memang lit ka sinawaisa janan nina mabuk kap ia (ayat 12).

3).   Ibas pengangkan si salah enda me (nen = kalak sinawaisa), tedis Petrus janah nina,  kalak enda la mabuk, sebab enda jam siwah denga, tapi enda eme perbahanen Dibata. Dibata ncucurken KesahNa man kerina anak manusia (band. Ayat 17). Emaka iterusken  Petrus ngerana, janah inti Petrus ngerana ntah pe khotbah eme kerna Yesus Kristus. Petrus ngerana ise kin Yesus e ras engkai maka Ia mate, rsd. Ibas penghujung khotbah Petrus e, iajuk petrus gelah kalak Yahudi e jera, sebab kalak Yahudi enda me si la ngasup ngaloken Yesus selaku Mesias,  emaka ibunuh ras ipakukenna Yesus i kayu persilang i uruk Golgota.  Nterem kalak simegi kata Petrus jadi jera ras mindo gelah iperidiken. Ibas wari e lit kira-kira telu ribu kalak tambah ku bas perpulungen e.

4.   Kenca ia enggo iperidiken, tutus ia ibas pengajaren rasul-rasul, janah nggeluh ibas sikeleng-kelengen bagi siersenina. Kalak si enggo tek, eme kira-kira 300 kalak ras-ras ia ncepik-ncepik roti ras ertoto man Dibata. Maksud enda kerina eme tanda sada peringeten kerna keleng ate Yesus si mbelin siisehkenNa man manusia. Jadi enda merupaken sada pengajaren kerna keselamaten siibahan Yesus arah  ncepik-ncepik roti.

5.    Wari pentakosta sitangtangna lit pengertin wari raya pengataken bujur kenca rani gandum, erkiteken ibas paksa e reh Kesah Si Badia, maka maknana eme nusurna Kesah Si Badia.

APLIKASI

Kesah Si Badia eme Dibata sendiri. Kesah Si Badia me sigenduari erdahin ras kita gelah kita tetap jadi anak-anak Dibata. Kesah Si Badia si ringan bas kita, mbaba kita guna tetap nggeluh ras Dibata, ras tetap jadi sikerajangenNa. Bagepe Kesah Si badia mbabai kita guna lebih nandai ise kin Yesus ibas kegeluhenta tep-tep wari. Ibas sada kesimpulan ras enda merupaken inti kinitekenta, ngataken maka Yesus eme Tuhan. Erkiteken sie me maka kegeluhen kalak sitek harus nggeluh ibas persadan ras Yesus Kristus. Nggeluh ibas persadan ras Yesus berarti kita nggeluh ibas keleng ate. Sebab adi la kita nggeluh ibas keleng ate maka la kap mungkin kita ngasup ngkelengi Dibata.  Tandana kita ngasup ngkelengi Dibata, berati kita pe harus ngasup ngkelengi temanta manusia, ngkelengi temanta sisada perpulungen (band. Matius 22:37-40).

            Kesah Si badia simerupaken Dibata sendiri nggeluh ras kita. Emaka adi kin tuhu Kesah Si Badia e nggeluh ras kita maka sijadi bas geluhta eme nggeluh sikeleng-kelengen ras sisampat-sampaten. Nggeluh ibas persadan. Erkiteken Kesah Si Badia erdahin ibas pusuhta maka persadan, ntahpe nggeluh sikeleng-kelengen e tuhu-tuhu murni, la pekulah-kulah. Jadi penungkunen man banta, ningen gereja e persadan kalak si tek, tapi engkai lit perubaten ntah pe perpecahen ibas gereja. Adi bage i ja Kesah Si Badia ?  Perlu siteh litna perubaten/perpecahanen ntah pe la lit kekelengen ibas persadan gereja, labo erkiteken la lit Kesah Si Badia, tapi ndahin Kesah Si Badia situtupi salu egois ras emosinta. Tapi adi sipediatlah Kesah Si Badia erdahin bas pusuh ras peratenta maka ibabaNa kita nggeluh alu sikeleng-kelengen ras dame.

Pdt. Steven Kumenit, STh, M.Min.