Cara (Strategi) Pelayanan (1 Korintus 9:19-23)

BAHAN PJJ GEREJA GBKP

TANGGAL 26 MEI – 1 JUNI 2013.

1 Korinti 9 : 19 – 23.

Tema : Cara (Strategi) Pelayanen

LATAR BELAKANG.

1.      Lit kelompok simenghasut perpulungen gelah perpulungen menolak Paulus ibas pelayanenna. Kelompok enda ngataken Paulus labo rasul, bagepe pelayanen Paulus pelin-pelin guna ndarami keuntungen pribadi eme eme guna ndatken sen/duit. Bagepe Paulus makeken kata Dibata guna pebayak diri sendiri. Jadi la bo murni Paulus mberitaken Berita Si Meriah.

2.      Ibas situasi ija enggo lit anggota perpulungen si enggo terpengaruh, Paulus tetap tedis alu megegeh, janah la bo nembeh atena man perpulungen e, la lit apriori kai pe bas ia, tapi justru Paulus mereken pengertin man perpulungen kerna eksistensina selaku rasul ras motivasina ngelai perpulungen, termasuk ngelai mperpulungen Korinti.

3.      Isamping sie, apologet (pembelaan) Paulus enda menyerang kelompok si enggo “meracuni” anggota perpulungen. Alu tegas Paulus ngataken maka pelayanenna eme murni guna melayani, amin gia situhuna efek ibas pelayanen e lit nge dat upah (band. Bilangan 18:8-31; Ul. 18:1-5), tapi labo e siiharapken Paulus. Tapi kalak si la murni melayani tuhu e nge siidaramina.

4.      Pelayanen Paulus eme murni guna mberitaken Berita Si Meriah. Sebab ibas Berita Si meriah lit keselamaten. Emaka ibas Paulus jadi rasul berarti ijadikenna dirina jadi budak nandangi kerina jelma, gelah imenangkan ibas Kristus. Enda ibahanna erkiteken ia pe “budak” Kristus. Maksudna, Ibas rangka keselamaten man kerina jelma, Paulus “siap” menyesuaiken dirina ibas kerina situasi si lit.

5.      Gelah Injil Kristus imenangken, maka strategi pelayanen Paulus eme “pelayanen bagi bindoran”. Nandangi kalak Yahudi, bagi kalak Yahudi Paulus. Maksudna Kalak Yahhudi eme kalak si patuh nandangi hukum taurat, gelah injil teraloken kalak Yahudi maka ibahanna injil la bertentangan ras hukum taurat. Contoh : isuruhna Timotius gelah isunatken (Perbahanen 16:3). Enda ibahan Paulus gelah la turah penolakan ntah pe nembeh ate bas kalak Yahudi. Janah ijadiken Paulus dirina tempa lit i teruh kuasa Hukum taurat labo berarti icidahkenna solidaritasna nandangi budaya kalak Yahudi, bagepe labo guna mempromosiken hukum taurat eme palas kebenaren kerna Dibata, tapi ibahan Paulus e ibas rangka jadi sekalak budak Kristus guna nelamatken kalak Yahudi. Bagepe nandangi kalak si la lit bas ia undang-undang Musa (kalak non Yahhudi), bagi ia e ka Paulus. Maksudna kemerdekaan ibas Kristus la lit hubungenna ras undang-undang (taurat), sebab nggeluh ibas hukum Kristus eme nggeluh ibas kegeluhen simbaru siipinpin Kesah Si Badia. Tapi amin gia la nggeluh ibas hukum taurat, tapi la banci nggeluh rate-ate. Enda ibahan Paulus gelah kalak non Yahudi banci imenangken ibas Kristus. Bagepe nandangi kalak simerampek kinitekenna, bagi ia e ka Paulus. Maksudna lit denga kalak si tek man Yesus si tetap ndalanken kebiasaan si ndekah eme adi kalak Yahudi ia, ipakena peraturan ke – Yahudian-na, tapi adi la kalak Yahudi ia (kalak kafir), dalankenna kebiasaan-kebiasaan kalak kafir, contoh ipanna denga pangan-pangan ienggo ipersembahken man berhala. Paulus tuhu-tuhu mperdiateken kegeluhen kelompok enda. Emaka nina kita simegegeh kinitekenta harus nampati kalak simerampek kinitekenna (Roma 15:1). Maksudna i jenda gelah kalak nggo megegeh kiniteken la meremehkan kalak si marempek denga kinitekenna. Ijadiken Paulus diri tempa merampek kinitekenna gelah Paulus banci bergaul ras kalak si bage.

APLIKASI

            Siteh hampir kerina jelma nggo beragama (nen. Agama siiakui pemerintah). Tapi siteh ka nterem kalak siberagama, termasuk kalak si tek man Yesus tetap denga dalanken kai si la ngena ate Tuhan. Bagepe ibas paksa enda nggo nterem mulihken ku agama sindekah (band. kepercayaan Parmalinras agamana sipemena). Bagepe adi siperdiateken kerna dogmata singajari maka arah Yesus Kristus ngenca kita selamat. Maka tentuna dua hal enda sijadi perhatinta. Emaka  pelayanen siuga nge siisehken maka kalak kristen, jadi tuhu-tuhu kalak kristen, simbiar ras erkemalangen man Tuhan, ras kalak si la kalak kristen banci tek ia man Tuhan.

            Adi siperdiateken kerna pelayanen rasul paulus maka strategi pelayanenta harus tepat. Gereja, termasuk kita la banci alergi nandangi budaya/adat. Kita harus muat bagin ibas budaya/adat, tapi budaya/adat si bertentangan ras kinitekenta harus sitolak. Bagepe nandangi siberbeda agama ras kita,  harus kita nggeluh bertoleransi ras nggeluh ibas keleng ate. Jadi pelayanen ntah pe pekabaran injil secara konvesional (mengumpulkan masa ras mpetandakaen Yesus man kalak si deban, banci mpeturah perubatan. Enda banci silakoken adi masa e kalak kristen kerina, janah tujunna ibas rangka mbangun ras mpegegehi kiniteken).

            Bagepe gereja harus tetap membina anggota gereja arah pelayanen kebaktin minggu, PA kategorial ras perkunjungan keluarga, rsd.

Pdt. Steven Kumenit.STh.M.Min.

Kesah Si Badia Erbahanca Kita Terus Erberita Kerna Ia (Roma 8:1-17)

BAHAN PJJ GBKP GEREJA GBKP

TANGGAL 19 – 25 MEI 2013.

Roma 8:1-17.

Tema : Kesah Si Badia Erbahanca Kita Terus Erberita Kerna Ia

LATAR BELAKANG

1.      Adi siperdiateken kerna oratenta,  Paulus ngerana kerna uga makna kegeluhen ibas persadan ras Yesus Kristus. I ja kegeluhen ibas persadan ras Yesus erbahanca kalak lanai nggeluh ibas ukumen, sebab Yesus nggo mbebasken kalak si lit ibas persadan ras Ia ibas kayu persilang. Bagepe kenca kalak si tek nggeluh ibas persadan ras Kristus maka kalak si tek nggeluh ras ndatken kemalemen ate  erkiteken Kesah Di Bata, sebab pusuh kalak si tek ikuasai Kesah Dibata. Emaka kegeluhen kalak singgeluh ibas persadan ras Kristus nggeluh rikutken sura-sura Kesah.

2.      Enda itekanken Paulus man perpulungen Roma, sebab perpulungen Roma banci sikataken mayoritas kalak kristen asal Jahudi nari, emaka cara rukur, khususna kerna keselamaten tetap denga make cara rukur kalak  Jahudi. Ija kalak Jahudi jadi anak erkiteken pengangkatan Dibata, emaka kenca kalak Israel tubuh, minter ia jadi anak Dibata. Bagepe keselamatan sisempurna adi ndalanken hukum Taurat, khususna kerna  sunat, sebab sunat merupaken perpadanan antara manusia ras Dibata (band. Kej. 17). Bagepe enda ikataken ras itekanken Paulus gelah ula sempat kalak kristen siasalna labo kalak Jahudi jadi bingung, bagepe mpengaruhi kinitekenna sierbahanca jadi bingung ras lanai idalankenna status kalak sienggo nggeluh selaku anak Dibata.

3.      Paulus menekanken kerna status anak ras Bapa, tentuna labo berarti Paulus ngerana kerna hubungan secara biologis, tapi paulus ngerana kerna makna kiniteken, bagepe  sipat ras karakter kalak sitek harus seri ras sipat ras karakter Bapa. Hubungen anak ras Bapa harus nggeluh akrab, perukurenna harus seri ras Bapa e, emaka kai siidahiken Bapa harus e ka siidahiken anak. (band. Yohanes 5:17-27).

4.      Nina Paulus kerina kalak siipinpin Kesah Dibata eme anak Dibata. Tentuna siimaksudken Paulus eme kalak si enggo tek man Jesus Kristus, sebab kalak si enggo tek man Jesus tentuna ia enggo iperidiken, emaka kegeluhenna ikuasai ntah pe ipinpin oleh Kesah Si Badia. Ipinpin Kesah Si Badia labo berarti meneken aktivitas manusia e sendiri. Manusia tetap beraktivitas,  saja ia ipinpin Kesah Si Badia gelah kai siibahan kalak si tek e tetap ngena ate Dibata.  Emaka kalak si tek si ipinpin Kesah Si Badia, nggeluh ibas kemerdekaan. Kalak sitek lanai nggeluh ibas kebiasaan kalak Jahudi, eme ndalanken hukum taurat, ntah pe sunat, sebab kalak sindalanken hukum taurat berarti tetap denga ia nggeluh ibas perbudaken. Lebih asangken sie kalak sitek lanai nggit nggeluh ibas perbudaken dosa.

5.      Harus siteh penggelaren Kesah Dibata ibas oratenta, e bali ras penggelaren Kesah Si Badia. Sebab Kesah Dibata eme Kesah Si Badia kap.  Emaka Kesah Sibadia singgeluh bas kalak sitek mpengasup guna erlebuh man Dibata eme Bapa, ya Bapa. Maksudna kalak si tek banci berkomunikasi secara langsung ras Dibata. Bagepe ibas kita banci ngerana ras Dibata maka kalak sitek banci ngakuken Yesus Kristus eme Tuhan, ibas kematen ras kekekenNa, Jesus enggo nasapken kerina dosa-dosa kalak sitek, ras enggo iperdamekenna kita ras Dibata. Ibas perbahenen Dibata man doni enda me, dungna ibas penegu-negu Kesah Si Badia, kalak sitek ngasup ersaksi kerna sie. Ersaksi kerna kalak si tek eme anak-anak Dibata

APLIKASI

            Adi siperdiateken kerna sejarah keselamaten, maka tepatna tanggal 19 Mei kita ngerayaken nusurna Kesah Si Badia, ntah pe wari Pentakosta. Kesah Si Badia eme oknum si deban ibas Dibata. Kesah Si Badia berfungsi guna nampati kita gelah kita tetap nggeluh selaku anak-anak Dibata bagepe nggeluh ndalanken sura-sura Dibata, emaka Kesah Si Badia erdahin ibas pusuhta gelah kita ngasup ndalanken sura-sura Dibata e. Emaka kita selaku kalak sitek harus meteh kerna sienda. Sijadi persoalen man banta, nterem denga kita si la dalanken sura-sura Dibata. Ise si la dalanken sura-sura Dibata berarti ia ikuasai sura-sura manusia denga kap. Janah kegeluhen sibagenda erbahanca kita mate, sebab kita nggo erdosa man Tuhan (band. Roma 6:23).

            Kita enda sikerajangen Kristus kap, janah pusuhta nggo ikuasai Kesah Sibadia, emaka cidahkenlah man ise saja tandana kita enda ikuasai Kesah Sibadia, alu bage kai siibahan eme ibas rangka mberitaken kerna Yesus Kristus. Uga kin kalak siipinpin Kesah Si Badia ? secara sederhana kalak siipinpin Kesah Sibadia mehuli ia sebab ulih Kesah Si Badia lit bas kita (band. Galati 5:22-23).

Pdt. Steven Kumenit, STh.M.Min.

Kesah Si Badia Empelimbarui Kegeluhen Kalak Si Tek (Imamat 23:15-21; Perbahanan Rasul-Rasul 2:38-42.)

BAHAN PJJ GEREJA GBKP

TANGGAL 12 – 18 MEI 2013.

Imamat 23:15-21; Perbahanan Rasul-Rasul 2:38-42.

Tema : Kesah Si Badia Empelimbarui Kegeluhen Kalak Si Tek.

LATAR BELAKANG

Adi siperdiateken kerna sejarah Pentakosta ibas Padan Sindekah nari seh ku Padan Simbaru, maka siidah terjadi perubahan/pergeseran erti/makna. Mari sinen ibas dua kitab enda :

A.    Imamat 23:15-21.

1. Enda salah sada wari raya siharus irayaken bangsa Israel kenca bengket ras nggeluh i taneh Kanaan. Janah wari raya enda itetapken Tuhan jine. Bagepe wari raya enda irayaken ibas rangka njaga kebadiaan geluh bangsa  Israel, sebab bangsa Israel harus mbaba persembahen man Tuhan sisipatna  persembahen ibas ulih peranin sipemena,   persembahen tutungen, persembahen pengalemi dosa ras persembahen keselamaten.
2. Persembahen siibaba bangsa Israel ku Dibata pe lit aturenna, la banci mbaba persembahen alu ate-ate bangsa Israel,  janah peraturen e harus iikuti. Janah kerina persembahen lit maknana. Adi persembahen roti si lit ragina, erkite-kiteken bangsa Israel man roti make ragi emaka erti teologisna eme bangsa Israel  ngataken man Tuhan  enda me kebutuhen pokok tep-tep wari ibas bangsa Israel. Janah mindo tole gelah Dibata masu-masu kerna jumana e. Adi mpersembahken pitu anak biri-biri si umurna sada tahun, sada jenggi lembu, dua kambing si la erpandangen guna jadi persembahen tutungen. Enda ngataken bangsa Israel mindo man Tuhan gelah  Dibata ngalemi dosa-dosa umum siibahan bangsa Israel alu la isengaja. Adi persembahen sada bajar kambing jadi persembahen pengalemi dosa, eme gelah Dibata ngalemi dosa-dosa khusus siibahan bangsa Israel (harus iteh ibas kegeluhen bangsa israel lit pembagin dosa eme dosa umum ras dosa khusus). Janah enda kerina tujunna eme mindo gelah ipasu-pasu Tuhan kegeluhenna. Adi persembahen keselamaten eme ngataken bujur, janah enda bentukna persadan.
3. Wari raya siirayaken bangsa israel enda gelarna eme Pentakosta, sebab irayaken kenca rani ras ibas wari pelimapuluhken. Emaka situhuna Pentakosta eme wari raya rani. Janah wari raya pentakosta enda ikira kenca wari Paskah.

A.    Perbahanan Rasul-Rasul 2:38-42.

1. Tupung sie nterem kalak Yahudi pulung i Yerusalem erkite-kiteken ngerayaken wari raya Pentakosta kalak Yahudi. Janah paksa sie me reh Kesah Si badia ncinepi ajar-ajar Yesus, janah ajar-ajar Yesus banci ngerana alu erbage-bage cakap (nen. cakap Partia, Media, Elam, Mesopotami, Judea, Kapadokia, Pontus, Asia, Perigia, Pampilia, Mesir, Libia ndeher kirene, Rum, Yahudi ras singgo i Yahudieken, Kreta ras Arab), kerina kalak enda ngangkai kai siituriken ajar-ajar Yesus. Tapi lit pengangkan negatif ibas jelma sinterem nari,  nina ajar-ajar Yesus sangana mabuk. Erkiteken sie me tedis Petrus janah iturikenna kerna kejadin enda. Kejadin enda eme sada nubuaten ibas kitab nabi Joel nari siintina eme njelasken kerna Ise kin Yesus. Emaka erkadiola kalak enda, janah isungkunna man Petrus kai siharus ibahanna. Nina Petrus harus me kam jera ras  iperidiken ibas gelar Yesus gelah dosa-dosandu ialemi Dibata. Emaka iberena dirina guna iperidiken. Janah kenca iperidiken tutus kalak enda megiken pengajaren rasul-rasul ras nggeluh sikeleng-kelengen bagi siersenina, ras tutus kalak enda pulung ncepik-ncepik roti, dingen ras-ras ia ertoto.
2. Ibas kejadin enda, Pentakosta iertiken alu makna nusurna Kesah Si Badia. Janah kerna persembahen siharus ibaba lanai bagi bangsa Israel mbaba persembahen ku Dibata. Tapi persembahen siharus ibaba kita nggo igantiken Yesus Kristus. Yesus simpersembahken diriNa selaku persembahen sisempurna, janah sipatna sadakali ngenca. Bagepe Pentakosta i kira kenca keke Yesus ibas si mate nari ntah pe wari pelimapuluhken kenca Yesus keke ibas simate nari.

APLIKASI

            Kesah Si Badia eme Dibata jine, janah biak/fungsi Kesah Si Badia eme guna nampati kita gelah nggeluh selaku kalak kristen situtus ras erlagu langkah simehuli. Guna banci kalak kristen nggeluh sibage, Kesah Si Badia erdahin ibas pusuhta. Emaka kai siibahan/ilakoken kalak kristen eme pencerminan Kesah Si Badia nari, bagepe nggeluh bas kita ulih Kesah Si Badia (nen. Galati 5:22-23).

            Ibas geluhna Kesah Si Badia maka tep-tep wari kegeluhen kalak si tek, nggeluh alu bujur ras mehuli. Ntah pe terjadi pembaharuan nggeluh terus menerus. Bagepe Erpangna kita nggeluh bagi singena ate Tuhan, eme tutus pulung ibas kebaktin, ras megiken pengajaren Tuhan, ertoto ras nggeluh alu sikeleng-kelengen bagi siersenina.

Pdt. Steven Kumenit, STh.M.Min.

             

Gegeh Toto Kalak Si Tek (Roma 12:9-12)

KHOTBAH TANGGAL 5 MEI 2013.

GEREJA GBKP

Introitus   :    Pindolah, tentu ngalo me kam; daramilah, tentu idatndu; tuktuklah, tentu italangi pintun man bandu (Matius 7:7).

Ogen        :    Matius 7:7-10 (Anthiponal)

Khotbah   :    Roma 12:9-12 (Tunggal).

Tema        :    Gegeh Toto Kalak Si Tek.

LATER BELAKANG

1.    Sijadi bahan khotbah sekali enda eme sada kata persinget rasul Paulus man perpulungen i Roma kerna nggeluh ibas persadan. Janah kegeluhen sibagenda eme sada penerapen kerna kebenaren Dibata ibas kegeluhen kalak si tek man Yesus Kristus, bagepe merupaken sada bentuk uga kalak kristen ersembah man Tuhan Dibata. Enda itekanken Paulus gelah kegeluhen perpulungen nggeluh ibas keharmonisan. Ntah pe nggeluh selaku gereja situhu-tuhu. Amin gia talenta anggota perpulungen pelain-lain, ula enda sierbahanca anggota perpulungen meganjang ukur. Emaka mengantisipasi enda, sada ngenca siharus ilakoken perpulungen eme nggeluh ibas keleng ate. Sebab keleng ate eme pengerakut ibas persadan.

2.    Terdauhen nina Paulus keleng ate ola min alu pekulah-kulah ras cigalah atendu kerna sijahat. Maksud Paulus eme kegeluhen kalak sitek man Dibata ula bagi main sandiwara. Tapi transparan min, sebab keleng ate eme perwujudan ibas Kesah Si badia nari (band. Galati 5:22).  Alu bage maka keleng ate e reh ibas Dibata nari kap. Emaka keleng ate e harus murni. Sebab kalak singelakoken keleng ate alu pekulah-kulah berarti nggo ncedai pusuh Dibata. Erkiteken keleng ate la banci pekulah-kulah maka kalak si tek harus nggeluh ibas ikaten hubungen simehuli sada ras sidebanna, bagepe kalak si tek la banci bergaul ras nggeluh ibas kejahaten. Ciga ateta min kerna kejahaten, emaka kalak si erbahan kejahaten harus i ipersingeti. Alu bage kegeluhen simehuli ras ngena ate Tuhan me siidalanken kalak si tek man Yesus Kristus.

3.    Sada pengangkan ras pengrealisasian kerna keleng ate eme kalak si tek harus nggeluh sikeleng-kelengen ras sipehagan pekepar. Kalak si tek ibas sada perpulungen bertanggungjawab “menghormati sesamanya” lebih dari pada dirinya. Ibas kegeluhen si bagenda me ate Paulus gelah  anggota perpulungen harus nggeluh ibas kiniteruken ukur. Sebab kiniteruken ukur eme sada biak kalak si tek man Yesus Kristus. Bagepe sada bentuk kegeluhen ibas sada kula.

4.    Tole, ibas kata ajar enda paulus mpersingeti kerna hakekat kalak si tek (gereja) eme ngelai man Tuhan ntah pe ndahiken dahin Tuhan. Dahin pelayanen enda la banci kendor, ntah pe kalak si tek la banci mekisat. Janah gelah kalak si tek la mekisat maka kalak si tek harus ndahiken dahin Tuhan tempa-tempa erdahin guna Tuhan labo guna manusia (nen. Koloes 3:23) Alu bage ergiah-giah me kalak si tek ndahiken dahin Tuhan. Bagepe Kesah Si badia si lit bas kalak si tek mereken kengasupen guna banci ngangkai sura-sura Tuhan, janah uga nggeluh ibas kekelengen, bagepe guna banci ndahiken erbage-bage dahin i tengah-tengah perpulungen. Enda itekanken Paulus, sebab semangat ngelai kalak si tek banci surut erkiteken piga-piga hal eme 1). Mekisat. 2). La lit persadan ibas perpulungen. 3). Penindasan, rsd. Ate Paulus mereken motivasi enda gelah perpulungen tetap nggeluh guna mbangun kula ni kristus.

5.    Kata persinget si perpudina ibas kegeluhen persadan i tengah-tengah kalak si tek eme nggeluh ibas keriahen ukur ibas erpengarapen, ras megenggeng ibas kiniseran, janah ertotolah man Dibata alu la erngadi-ngadi. Enda itekanken Paulus gelah perpulungen banci meteh maka kegeluhen kalak sitek eme nggeluh ibas pengarapen. Pengarapen harus idalani alu meriah ukur, labo alu ceda ate. Sebab kai siniarapken kalak si tek ibas sada paksa terealisasi me. Emaka ibas nimai pengrealisasian pengarapen e, banci saja kalak si tek nggeluh ibas kiniseran erkite-kiteken doni enda. Sebab perlu siteh doni enda la bo erngena ate nandangi kalak si tek si nggeluh rembak ras Tuhan. Emaka ibas ebage-bage kesempaten ras bentuk, pasti icubaina kalak sitek e si dungna kalak si tek nggeluh ibas kiniseran. Emaka gelah kalak si tek tetap nggeluh ibas keriahen ukur ibas pengarapen ras nggeluh megenggeng ibas kiniseran. Kalak si tek harus tutus ertoto. Sebab alu tutus ertoto man Dibata, kalak si tek ndatken gegeh guna tetap nggeluh ibas pengarapen ras ngasup megenggeng ibas kiniseran.

APLIKASI

            Nina Yohanes Calvin : manusia ndauh ibas kerina  simehuli, bagepe  la bo lit sarana kai pe bas manusia guna ndatken keselamaten. Manusia e lemah. Emaka ibas rangka nampati kinilangasupen manusia e, maka manusia harus ndarami siidarat dirina. Ibas kinitekenta ngatakenca, penampat e lit man Dibata si lit bas Yesus Kristus. Gelah kita isampatina maka kita harus ertoto mindo penampat man baNa. Sebab pertoton eme penghubung antara manusia ras Tuhan.

            Sisadari, ibas kegeluhenta sigenduari adi la kita ernalem man Tuhan alu tutus banci kita ndabuh ku bas dosa. Sebab sisadari ka kita enda manusia lemah, kita banci megegeh adi kita isampati Tuhan. Ipihak sideban, ibas perkembangen doni sigenduari enda kita iperhadapken alu erbage-bage tuntutan nggeluh, janah siidah nterem denga manusia ndabuh ku bas dosa erkiteken la ngasup  nulak kerincuhan daging, ras man ise inganna minda penampat. Harus siteh la bo pernah ipediat Tuhan kita nggeluh ibas doni enda, tetap iperdiatekenNa nge kita. Emaka selaku kalak si tek, terlebih kita enda anak-anakNa, maka mari ertotolah kita man Tuhan, pindo gegeh ras sehkenlah man Tuhan kai sijadi pemindonta, alu tetap megenggeng nimai penampatNa.

Pdt. Steven Kumenit, STh,M.Min.