Kalak Kristen Arus Njagai Bekas Tinepa Dibata (Kejadian 1:28-31; 2:15)

BAHAN PJJ GEREJA GBKP

TANGGA 16-22 JUNI 2013.

Kejadin 1 : 28-31; 2:15.

Tema : Kalak Kristen Arus Njagai Bekas Tinepa Dibata.

LATAR BELAKANG

1.      Minggu enda kita ibabai ibas dua pasal guna ngangkai kerna sura-sura Dibata nandangi manusia tinepaNa. Situhuna adi megermet kita nandangi dua pengogen enda, maka i je sidat dua hal si cukup berbeda kerna turi-turin penciptaan ras persuruhen Dibata nandangi manusia. Ibas Kejadin Pasal 1:28-31, je ikataken manusia ijadiken Dibata ibas wari sipeenamken, wari terakhir ibas sejarah penciptaan, janah ipasu-pasu Tuhan manusia e, bagepe lit dua hal persuruhen Tuhan nandangi manusia eme  1). ertuahlah ras jadi nterem. 2). demi dingen taluken doni enda, kuasai kerina nurung, perik-perik i awang-awang, bage pe kerina rubia-rubia i daraten. Bagepe lit sada pemeliharaan Tuhan man manusia eme  Tuhan mereken  pangan arah kasa kai sinuan-sinuan si erbuah i babo doni enda ras kerina batang kayu si erbuah si lit sinuanna i bas buahna. Janah pangan manusia berbeda ras pangan rubia-rubia (band. ayat 30).

2.      Ibas pasal 2: 15, memang i je ikataken Dibata   “itamaken TUHAN Dibata manusia ndai i Peken Eden, guna ngusahai ras njagaisa”, tapi situhuna adi sioge ibas ayat sada nari maka i je dat sada pengertin maka manusia ijadiken ibas wari pemena, janah peken i Eden i jadiken Dibata kenca lit manusia. Dahin manusia ibas peken i Eden e eme ibas rangka njagai ras ngusahai.  Memang tempa lit sada perbedaan turi-turin penciptaan manusia ibas pasal sada ras pasal 2, situhuna, ate penulis ngataken maka manusia eme prioritas ntah pe hal siutama ibas sejarah manusia, sebab manusia perpanjangan Tuhan guna njagai ras ngusahai tinepa Dibata sideban.

3.      Kenca ijadiken Dibata manusia, maka iberekenNa sada keduduken  simeganjang eme “tuan” sierkuasa nandangi kerina tinepa Dibata sideban, tapi pe manusia ibere sada dahin selaku suru-suruhen simeteruk, erkiteken harus ngelai ibas doni enda. Sebab ate Tuhan, kai singgo ijadikenNa ijagai ras ipekena-kena manusia e.

4.      Kenca nggo dung kerina, maka iperdiateken Dibata me kerina tinepaNa simbaba keriahen man baNa, sebab kerina ncidahken sada keharmonisan ras saling mendukung sada ras sidebanna, janah ibas kepuasan e nina Dibata, tuhu-tuhu mehuli.

5.      Peken Eden eme ingan tading manusia, ingan kegeluhen, sekaligus ingan erdahin manusia. Tanggungjawab manusia ibas peken Eden eme njaga ras ngusahai kai singgo ijadiken Dibata e gelah kelangsungen geluh tetap terpelihara.

APLIKASI

            Tugas kita selaku kalak kristen  ibas doni enda eme njagai ras ngusahai tinepa Dibata, sebab e kin ipedahken Tuhan man banta. Tapi siidah genduari amanat e tempa lanai teridah nari man banta, sebab kerangapan ras keegoisen nari ngenca nggeluh bas manusia, emaka lanai lit bas kita karakter patuh man Tuhan, sierbahanca kita banci nggeluh njagai ras ngusahai tinepa Tuhan e. Erkiteken sie me siidahtinepa Tuhan si deban, siseharusna menunjang kegeluhenta ibas doni enda nggo ceda, emaka kegeluhenta ibas doni enda nggo idemi kiniseran, sebab adi musim udan, hampir ibas kerina ingan terjadi banjir, lit ka banjir bandang, adi musim perlego (kemarau), seh kal lasna, rsd.

            Ibas situasi sibagenda kita selaku gereja (kalak sitek) harus mpekena-kena mulihi tinepa Tuhan singgo ceda, bagepe si lenga ceda harus tetap sirawat, bagepe sijaga ras sirawat inganta tading, alu pekena-kena parit, la ngambengken sampah alu semberangan, gelah kita banci nggeluh alu dame. Janah harus ka siinget ibas kita njagai tinepa Tuhan e, labo guna kita saja, tapi silakoken ibas rangka mpermuliakan Tuhan.    

Pdt. Steven Kumenit, STh, M.Min.

Kalak Singakuken dosana, Ialemi (Lukas 36-50)

KHOTBAH TANGGAL 16 JUNI 2013.

GEREJA GBKP

Introitus   :    Emaka nina Yesus man diberu e, Dosandu enggo ialemi (Lukas 7:48).

Ogen        :    2 Samuel 12:10-14. (Tunggal).

Khotbah   :    Lukas 7:40-50 – oge mulai ayat 36 (Tunggal).

Tema        :    Kalak Singakuken dosana, Ialemi.

LATAR BELAKANG

1.      Lit sada tradisi kalak Jahudi, khususna kelompok “elite” Jahudi eme saling mengundang ibas acara man-man, gunana eme gelah kalak enda saling mengenal lebih baik. Ibas latar belakang sie me Jesus radu ras kalak sideban itenahken Simon guna reh ku rumahna bagepe man i rumahna. Emaka banci idat sada kesimpulan, maka Jesus sekalak siiperhitungken, ntah pe inen selaku kalak siterpandang, kalak siihamati.

2.      Sangana Jesus i rumah Simon, reh sekalak diberu perdosa guna jumpa ras Jesus, tapi la bo meriah ukur Simon ras kalak sideban e, sebab memang lit sada tradisi ibas kalak Jahudi maka sekalak diberu la banci bengket kubas ruangan man (nen = sada pantangan), erkiteken sie me mbiar diberu perdosa e. Ibas situasi sibage ngandung diberu perdosa e seh naktak pe iluhna i nahe Jesus seh litap, emaka isapuina alu bukna. Iemaina nahe Jesus bagepe iminakina alu minak marmar simerim. Ngidah sienda mecekurak ukur Simon. Simon ras kalak sideban e labo meriah ukurna kerna kai siibahan Jesus man diberu perdosa e. Sebab memang lit sada peraturan sicukup keras nandangi diberu siperdosa, salah sadana eme, la banci ergaul ras kalak perdosa, sebab adi kalak si “la erdosa” bersentuhan ras kalak berdosa maka ia nggo kena najis, janah ia harus ikucilkan ibas masyarakat.

3.      Iteh Jesus nge ukur Simon, emaka ibuat Jesus kesempaten enda guna ngajari Simon kerna etika ngalo-ngalo temue ras uga cara merespon perkuah ate Tuhan. Alu leben Jesus nungkun man Simon soal nasapken utang. Nina Jesus lit me dua kalak sirutang man kalak siperaihken duit. Sekalak rutang lima ratus duit perak, sekalak nari lima puluh duit perak. Duana kalak enda lanai ngasup ngulihken utangna, emaka isasapken perutangenna utangna. Nungkun Jesus siapai ibas si dua kalak enda si lebih erkeleng ate man si perutangenna e. Jabab Simon tentuna simbuena utangna. Payo nina Jesus. Perlu pe siteh anding-andingen enda, situhuna enggo iangkai Simon, khususna kerna minjamken duit, sebab kalak Farisi biasa nge minjamken duit man kalak sideban. Kenca sie iumputi Jesus kerna kai siibahan diberu perdosa e erkiteken ia enggo merespon perkuah ate Tuhan. Tapi Simon lang, sebab amin gia Jesus itenahkenna ku rumahna, tapi tetap denga inenna Jesus alu “sebelah mata”, erkiteken  tradisi ngalo-ngalo temue la bo ibahanna khusus man Jesus. Sebab tradisi kalak Jahudi ngalo-ngalo temue eme 1). Paksa ngalo-ngalo temue apai ka kalak terpandang maka simada rumah harus ndakep (memeluk) ras ngema (mencium) temue e. Tapi sie la ibahan Simon. 2).  Kenca nandangi bengket ku bas rumah, sekalak temue harus mbukaken sendal/sepatuna, kenca sie lit pesekalak budak ngalo-ngalo temue e, janah ibersihkenna me nahe temue e, kenca sie ibasuhna alu lau. Sienda pe la sibahan Simon. 3). Bagepe ibas tradisi Kalak Jahudi, temue siihamati harus “iperciki” (ipir-piri) sekalak budak alu lau simerim. Tapi endape la ibahan Simon.

4.      Nina Jesus,  dosa diberu perdosa e enggo ialemi, sebab perbahanen kekelengen enggo ibahanna. Perkatan Jesus enda erbahanca la senang akap kalak si hadir i rumah Simon (kalak Farisi), emaka isungkunna ise kin Jesus e, maka Ia banci ngalemi dosa kalak.

5.      Kalak Farisi la ngasup nandai Jesus selaku Mesias erkite-kiteken kalak Farisi enda enggo ipepentangken keegoisenna.

APLIKASI

            Secara sederhana ikataken dosa eme kenca kita nggo ngelanggar kai singena ate Tuhan, erkiteken sie kita nggeluh ibas pernembeh ras kemeneken Dibata, kita ndauh ibas keselamaten. Alu kata sideban alu litna dosa ibas dirita maka kita ncedai eksistensita selaku manusia eme “Imago-Dei”.

            Ibas keleng ate Tuhan maka la ateNa kita sirang ras Ia maka Yesus Kristus ngasamken kesahNa gelah kita terkelin. Tapi amin gia kita nggo nggeluh ibas keselamaten, dosa tetap denga ngerimrim kita. Emaka ibas kegeluhenta tep-tep wari, paksa kita lemah, je mekatep reh dosa, janah alu la siisadari silakoken me kai si la ngena ate Tuhan. Memang lit ka kita alu sadar ngeakoken dosa.

            Dosa erbahanca kita lanai metunggung i lebe-lebe Dibata, bagepe erkiteken dosa maka patut nge kita kena hukumen ibas Dibata nari, tapi ibas perkuah ate Dibata la atena kita nggeluh ibas penghukumenNa, tapi ateNa kita nggeluh ras Ia. Tapi nggeluh ras Tuhan, harus nggeluh ibas kebadiaan, emaka dosa harus ibeneken ibas kita nari. Janah kita la ngasup meneken dosa si lit bas kita seakatan Tuhan, emaka kita harus mindo perkuah atena gelah imasapkenna dosa siibahan kita, gelah kita badia mulihi. Kita harus ngakuken dosa man bana. Janah ibas paksa enda me situhuna gereja menfasilitasi, ibas tep-tep kebaktin kita ibereken kesempaten guna ngakuken dosa-dosanta man Tuhan, gelah ialemiNa dosanta. Kenca kita ialemiNa maka harus erpala-pala kita ngelakoken singena ate Tuhan.

Pdt. Steven Kumenit, STh.M.Min.  

             

         

Yesus Kepate Ras Nampati (Lukas 7:11-17).

KHOTBAH TANGGAL 9 JUNI 2013.

GEREJA GBKP

Introitus   :    Langa bo keri keleng ate TUHAN perkuah ateNa tetap nge lit (Perngandungen 3:22).

Ogen        :    1 Raja-Raja 17:17-24 (Tunggal)

Khotbah   :    Lukas 7:11-17 (Tunggal)

Tema        :    Yesus Kepate Ras Nampati.

LATAR BELAKANG

1.      Kenca dung Yesus mpepalem sekalak suruh-suruhen perwira Roma i Kapernaum, lawes,  Yesus ku kuta Nain, janah ibas karabangen kuta simbel Ia ras rombongan si ngelanja kalak mate. Si Mate e sekalak anak perana, eme anak sada diberu balu-balu. Nterem kal anak kuta ikut naruhkenca. Ngenen sienda megogo ate Yesus ngidah  sikepaten e, emaka ipegeluh Yesus anak si mate e, janah iberekenNa man nandena e. Perlu siteh kuta Nain eme kuta sikitik janah terletak i sebelah selatan kota Galilea . Bagepe perlu ka siteh kerna nterem kalak si naruhken anak si mate ku kuburen, i je pe lit sada kelompok si ertugas guna ncidahken kecedan ate keluarga alu ngandung, serko alu sora megang,  ipekpekina pipina ntah pe icigatina uisna segedang-gedang dalan. Janah kelompok enda sengaja kin isewa keluarga sierceda ate selaku kelompok peratap.

2.      Mujizat siibahan Yesus e iidah jelma sinterem, emaka nina kalak enda nggo reh sekalak nabi si mbelin ku tengah-tengahta. Enda ngatakenca kerna perbahanen ras mujizat siibahan sekalak nabi eme nabi Elia iinget denga, i ja sangana i kuta Sarfat lit sekalak diberu balu-balu, sada ngenca anakna, janah anakna mate. Emaka ertoto Elia man Dibata, janah ipegeluh Dibata anakna e mulihi (1 Raja-raja 17:17-23). Jadi pengangkan jelma sinterem sibanci erbahan si bage eme pegeluh kalak si nggo mate eme nabi si mbelin ngenca.   

3.      Lit sada tradisi paksa sie adi lit si mate, janah simate e la kesusuren Daud maka ia harus ikuburken i darat kota, erkiteken sie me anak diberu balu-balu e ikuburken i darat kota Nain.

4.      Mujizat siibahan Yesus e ilakoken Yesus erkiteken mekuah ate Yesus ngenen diberu balu-balu e, sebab anakna sada ngenca simerupaken penerus ntah pe tulang punggung ras harapen keluarga nggo mate. Emaka perbahanen siilakoken Yesus ngatakenca maka Yesus ikut ibas kecedan ate keluarga.

5.      Lit sada undang-undang ibas kalak Yahudi eme kerna kenajisan. I je ikataken sekalak singgeluh la banci bersentuhan ras kalak si nggo mate, sebab adi “bersentuhan” maka kalak si nggeluh e nggo najis, maka ia harus ikucilken ras la banci ikut ibas upacara-upacara keagamaan, kecuali kalak e nggo ibersihken mulihi ((Im 21:11  Bil 5:2  6:6,11  9:6,7,10  19:11,13,16,18). Perbahanen siilakoken Yesus la ngenen kerna kenajisan e, tapi idorong kerna ate mekuah.

APLIKASI

            Salah sada karakter Yesus eme erkeleng ate, janah keleng ate iberekenNa man banta alu la mperdiateken ise kita ntah pe status sosial. Bagepe keleng ate enda me simendorong Yesus guna nampati kita. Apai ka kita sangana nggeluh ibas perbeben ras kiniseran, khususna nggeluh ibas kecedan ate. Emaka perlu siteh Yesus selaku Tuhan tetap natap man banta guna nampati kita gelah kita banci megegeh geluh i tengah-tengah doni enda. Ibas kuasa ras perkuah ateNa tetap nge Ia ras kita, emaka sipaling penting bas kita eme mari sidahi Yesus, sebab Ia me penampat situhu-tuhu ras si banci mereken kemalemen ate man banta. Ula erkiteken dat perbeben ras kiniseran, nggeluh kita ibas frustrasi, bagepe kiam kita ku hal-hal doni. Sie  la mereken serpang pulah man banta, Yesus ngenca si banci nampati kita emaka isampatina kita adi kita ertoto ras mindo penampat man baNa (band. 1 Raja-raja 17:17-24).

Pdt. Steven Kumenit, STh.M.Min.

              

Wariskenlah Simehuli Man Anak-Anakta (Amsal 4:1-10).

BAHAN PJJ GEREJA GBKP

TANGGAL 9 – 15 JUNI 2013.

Kuan-Kuanen 4:1-10.

Tema : Wariskenlah Simehuli Man Anak-Anakta.

LATAR BELAKANG

1.      Adi siperdiateken kerna kitab kuan-kuanen enda maka siteh kitab enda ngerana kerna kepentaren ras kepatuhen. Emaka gelah sidat kepentaren, khususna anak-anak harus kepe patuh ia megiken kai siiajarken orang tuana. Orang tua patut ibegiken sebab orang tua nggo ianggap lebih berpengalaman ibas kegeluhen, janah orang tua nggo leben meteh kerna kejadin-kejadin ibas doni enda. Bagepe anak-anak la saja terjeng megiken kai siiajarken orang tuana tapi pe harus idalankenna ibas kegeluhenna tep-tep wari.

2.      Pengajaren orang tua nandangi anak tujunna gelah anak jadi mehuli, emaka isaranken orang tua/guru gelah anak nggeluh ibas kepentaren, sebab ibas kepentaren lit penguasan diri, bagepe lit pengertin guna ndalankenca.

3.      Pengajaren kerna kepentaren itekanken man anak-anak, gelah anak-anak pagi banci sukses/berhasil. Adi sukses maka teridah i je pemasu-masun Dibata nandangi anak e. Janah ibas pengertin sideban pemasu-masun Tuhan man manusia (anak) erkiteken manusia e erkemalangen man Tuhan, eme sebabna pengamsal menekanken kal gelah ibas ndatken kepentaren harus lebe erkemalangen man Tuhan (band. Kuan-kuanen 1:7).

4.      Ngidah sienda kuan-kuanen ngataken (menyarankan) gelah anak ngaloken pengajaren orang tua alu semangat, emaka lit upaya guna ndarami kai siiajarken orang tua eme kepentaren. Adi nggo ndatken kepentaren maka kepentaren eme sinjaga ras singkawali anak e. Alu bage kalak pentar ngaloken pasu-pasu, kemalemen ate ras kebayaken. Jadi ibas  pengajaren orang tua ertujun gelah anak la jadi bodoh piah dungna la ia petuh nandangi Tuhan.

5.       Enda pengajaren sekalak orang tua/guru nandangi anakna kerna nggeluh alu erpalasken kepentaren, sebab orang tua anak e nggo leben ngelakoken e, emaka sukses orang tua e, erkiteken sie me iwariskenna ka man anakna gelah anakna e pe sukses ka.

APLIKASI

            Tanggungjawab orang tua nandangi anak la saja terjeng pebelin-belin, nekolahken anak  ras mereken keperlun anak secara materi, tapi uga maka gelah anak e banci sukses ibas kegeluhenna, janah siimaksudken sukses ibas kegeluhenna eme anak e bermoral ras beretika, emaka sipaling penting man orang tua ngajarken anak kerna simehuli. Janah gelah anak banci “sukses/berhasil” ibas kegeluhenna, lit minimal dua hal siharus ilakoken orang tua eme : 1). Ngajarken man anak kerna nggeluh mbiar ras erkemalangan man Tuhan, arah  naruhken anak ku kebaktin minggu (KA-KR/Permata), ras ibas rumah. Bagepe sedini mungkin nekolahken anak, khususna ibas sekolah kristen si lit i je pengajaren kerna mbiar ras erkemalangan man Tuhan. Khusus enda mari sitaruhken anak ku PAUD ntah TK kristen GBKP. Guna sie me penting anggota jemaat mengembangken PAUD ntah TK GBKP gelah PAUD ras TK banci jadi alat Tuhan nandangi anak-anak. 2). Mereken contoh simehuli : orang tua harus nggeluh siangkan, litna etos erdahin simehuli, tutus ku gereja, melumbar mere, rsd. sebab sienda khotbah singgeluh man anak.

Pdt. Steven Kumenit, STh.M.Min.