Pesehlah Berita E (Kisah Para Rasul 8:26-40).

BAHAN PJJ GEREJA GBKP

TANGGAL 7 – 13 JULI 2013.

Perbahanen Rasu-Rasul 8:26-40.

Tema : Pesehlah Berita E.

LATAR BELAKANG

1.    Filipus eme salah sada serayan siiangkat rasul-rasul atas usulen perpulungen guna nampati rasul-rasul ibas ngelai (band. Perbahanen 6:5-7).  Kepeken ibas perkembangen pelayanen, dahin Pilipus la saja guna ngelai (pelayanan) meja, tapi pe nehken Berita Si Meriah. Janah enda ilakokenna i kuta Samaria. Tapi kenca dung pelayanenna i kuta Samaria atena ku Yerusalem, tapi reh sekalak malekat Tuhan ndahi Pilipus janah nina : Ersikap janah laweslah kam ku selatan, ku dalan  i Yerusalem ku Gaza, dalan enda melungun. Emaka ersikap ia jenari berkat Pilipus ku ingan siikataken malekat Tuhan. Ibas perdalanenna jumpa ia ras sekalak pegawai Etopia, kalak si lit jabatenna i Etopia (kepala bendahara Kandake, Ratu Etopia), si enggo mulih  ersembah ibas i rumah pertoton i Yerusalem. Perlu si teh lebe Kandake eme gelar ratu-ratu  i Etopia).

2.    Kalak Etopia, beda kinitekenna ras kalak Yahudi, tapi reh ia ersembah ku rumah pertoton kalak Yahudi i Yerusalem erkite-kiteken i Etopia enggo jumpa ia ras kalak Yahudi, janah ibegina pengajaren kalak Yahudi e, ras menteri Etopia enda enggo ngoge Pustaka Si Badia kalak Yahudi, emaka alu gegeh Kuasa Kesah Si Badia, ibabai Kesah Si Badia me menteri e gelah ku Yerusalem. Tapi ibas perdalanen mulih ku Etopia alu sora simegang iogena sada kata Dibata si lit ibas kitab Yesaya nari, janah enda me siibegi Pilipus. Ibas paksa sie ka ngerana Kesah Si Badia man Pilipus, gelah Pilipus ndeheri gereta pegawai Etopia e, emaka minter ideherina janah isungkun Pilipus ia,  iangkandu kin kerna kai siiogendu e, tapi ijabab menteri ndai, la iangkana, emaka ituriken/jelasken Pilipus kai ertina e. Ertina eme kerna Yesus Kristus. Kai siikataken ibas kitab Yesaya e, eme sada nubuat kerna Yesus. 

3.    Erkiteken jelas kal penuriken Pilipus maka nina menteri e man Pilipus peridikenlah aku. Tapi nina Pilipus kam banci iperidiken adi tuhu-tuhu kam enggo tek man Yesus. Nina menteri e, aku enggo tek, emaka iperidiken Pilipus me meteri e.

4.    Perjumpan Pilipus ras menteri i Etopia nari, mabai menteri e nggit iperidiken, enda merupaken sada pendahin Kesah Si Badia. Janah Pilipus merupaken sada alat Tuhan ngenca.

5.    Keselamaten ibereken Tuhan man tep-tep manusia, adi ia tuhu-tuhu tek man Yesus Kristus. Bagepe keselamaten bersipat universal. Keselamaten la ikhususken man salah sada jelma ntah pe kelompok saja, tapi terbuka man ise saja, termasuk man kalak Etopia.

APLIKASI

            Keselamatan eme pemere Dibata siiberekenNa man kerina jelma, emaka merupakan sada kewajibenta guna peseh berita keseamatan e man kerina jelma gelah ia banci terkelin. Tapi persoalan si lit genduari eme uga carana peseh berita keselamatan e, sebab  siteh nterem jelma genduari nggo beragama, emaka ajaran kerna keselamatan pe lit bas ia. Tapi amin gia bage, keselamatan siipeseh kita enda berbeda, sebab bagi kita kalak kristen keselamatan e ibas Yesus ngenca, janah Yesus eme Tuhan , emaka berita si meriah siipeseh kita man jelma sinterem intina eme ibas Yesus Kristus. Kematen ras kekekenNa mereken keselamatan man ise saja si tek man baNa. Bagepe siidah situasi doni jahat erkite-kiteken kejahatan manusia, tentuna harus siidah enda kerina akibat dosa, emaka kalak si la nggeluh ibas keselamatan, ntah pe la mpraktekken keselamaten ibas kegeluhen si tep-tep wari la bo itehna ntah pe memang sengaja ibahanna praktek-praktek si la ngena ate Tuhan. Emaka kita si tek man Tuhan harus mpeseh berita keselamaten e, gelah itehna kerna Yesus. Ula kita sangsi ras mbiar sebab Kesah Si Badia nampati kita alu mereken gegeh ras pengertin peseh berita e. Kesah Si Badia ngajari kita ibas kita peseh berita e arah kata bagepe arah perbahanen. Siimaksudken arah perbahanen, la saja ncidahken moral ras etika simehuli, tapi uga kita selaku kalak si tek mpraktekken kegeluhen simehuli ibas kerina dampar.

            Ipihak sideban kita selaku kalak sierkiniteken, gelah tuhu-tuhu beluh ras ngasup kita nuriken kerna berita keselamaten e, maka kita pe lebe harus tutus ngoge pustaka si Badia/ erlajar kerna Kata Dibata, adi serayan Tuhan harus tetap mperlengkapi dirina arah sermon ras buku-buku teologi, rsd. Alu bage ibas pengarak-ngarak Kesah Si Badia ngasup kita nuriken kerna keselamatan e man kerina jelma alu mehuli, emaka nggit ia tek man Yesus, bagepe si nggo tek man Yesus janah idalenkenna si la mehuli kenca ibegina berita e lanai idalankenna si la mehuli e.

Pdt. Steven Kumenit, STh.M.Min.

Kita Me Sada Aron Ibas Kristus (Efesus 2:11-22)

BAHAN PJJ GEREJA GBKP

TANGGAL 30 JUNI – 6 JULI 2013.

Epesus 2:11-22.

Tema : Kita Me Sada Aron Ibas Kristus.

LATAR BELAKANG

1.      Perkembangen kekristenen i perpulungen Epesus ndatken sada tantangan kerna keselamaten. Sebab paksa sie lit kalak kristen asal Yahudi ngatakenca kalak kristen asal non Yahudi lenga selamat secara seratus persen, amin gia nggo tek man Yesus Kristus selaku Tuhan ras Juru selamat. Keselamaten situhu-tuhu adi isunatken, sebab sunat eme sada perpadanen manusia ras Tuhan (band. Kejadian 17). Bagepe si la kalak Yahudi si atena jadi kalak Yahudi harus isunatken.  Erkiteken sie, kalak kristen si la kalak Yahudi “bigung”, sebab ibas pengajaren rasul Paulus ngatakenca kalak selamat adi ia tek man Yesus Kristus.

2.      Ipihak sideban keterpelihen bangsa Israel jadi bangsa Dibata ras nggeluh ibas padan Dibata, mbabai bangsa Israel nggeluh ibas kiniganjangan ukur, sierpengakap maka ia ngenca bangsa Dibata, janah bangsa-bangsa sideban  la atan ibas kerajaan Dibata. Emaka adi lit kalak si la kalak Yahudi ersura-sura jadi bagin ibas bangsa Israel, maka ia harus isunat, maka sah ia bagin ibas kalak Israel. Jadi bagi kalak Yahudi sunat eme syarat guna nggeluh ibas kerajaan Dibata ras ngaloken keselamaten. Ibas pengangkan sibage dungna mbaba permusuhen antara kalak si la Yahudi ras kalak Yahudi.

3.      Ibas perbeben siterjadi i tengah-tengah perpulungen Epesus, reh Paulus arah suratna man perpulungen Epesus guna njelasken kerna makna keselamaten singgo ialokenna. Perpulungen Epesus nggo nggeluh ibas keselamaten erkiteken Yesus Kristus. Ibas kematen Yesus i kayu persilang perpulungen Epesus nggeuh ibas keselamaten. La e saja, tapi pe kematen Kristus ndameken kalak Yahudi ras kalak si la kalak Yahudi. Ibas kematen Kristus tembok-tembok penghalang iruntuhken. Janah imasapken Kristus undang-undang agama alu pedah-pedahNa ras aturen-aturenNa. Salah sada pedah ras aturen e me harus nggeluh ibas keleng ate.

4.      Ibas kematen Kristus kalak Yahudi ras la kalak Yahudi nggeluh ibas kerajaan Tuhan, ras dat bagin ibas padan-padan Dibata. Kalak Yahudi ras la kalak Yahudi dat hak si seri i lebe-ebe Tuhan. Ndat hak ngadap i ebe-lebe Dibata arah Kesah Si Badia.

5.       Ibas pemahaman si bage berarti si la kalak Yahudi erkiteken Kristus la nai kalak asing ntah pe pertandang, sebab subuk kalak kristen asal Yahudi ras kalak kristen si la kalak Yahudi ipajekken  ibabo palas siitamakan rasul-rasul ras nabi-nabi janah Kristus me palas persukina, janah subuk kalak Yahudi bagepe la kalak Yahudi ibas nggeluh sada persadan terbentuk me gereja ntah pe rumah pertoton. Emaka siharus nggeluh ibas perpulungen, khususna si la kalak Yahudi eme nggeluh ibas sikeleng-kelengen. Kalak si la kalak Yahudi erkiteken berita si meriah siiberitaken rasul-rasul ras nabi-nabi maka kalak si la kalak Yahudi jadi tek. Subuk kalak Yahudi ras la kalak Yahudi jadi gereja, janah selaku gereja harus nggeluh ras berkembang

APLIKASI

            Ibas gereja, kita kerina seri i lebe-lebe Tuhan, status sosial si lit bas kita la banci jadi tembok penghalang guna kita banci nggeluh ibas sada persadan. Status sosial si lit bas kita harus sisadari ipake guna ndukung pelayanan i tengah-tengah gereja, sebab adi status sosial sipeganjang i tengah-tengah gereja maka pelayanan gereja terhambat, padahal kita kerina idilo Tuhan ras ijadiken Tuhan ibas sada gereja guna ngelai i tengah-tengah gereja ras masyarakat, janah banci sikataken kita enda sada aron. Emak adi ngerena kita kerna sada aron, maka siharus lit bas kita eme nggeluh sisampat-sampaten, simegegeh harus nampati si kurang megegeh, gelah kerina anggota gereja banci berkembang ras tetap muji ras mpermuliakan Tuhan, khususna  ibas kebaktin. Adi enda sidalanken maka ergegehna gereja.

            Salah sada sijadi penghalang gereja Tuhan kurang muat bagin ibas pelayanan erkite-kiteken kurangna keuangan gereja. Salah sada sierbahanca kurangna keuangan gereja eme pendapatan keuangan anggota perpulungen kurang, emaka kurang ia mere ntah pe nehken persembahen man Tuhan arah gereja. Ipihak sideban gereja la banci tutup mata ngenen anggota perpulungen sikurang mampu, simesera mbiayai kebutuhen keluargana. Ibas sienda siharus ilakoken gereja eme peningkaten ekonomi jemaat, salah sadana arah credit union.

Pdt. Steven Kumenit, STh.M.Min.      

           

           

             

Tulaklah Perbahanen Si La Ngena Ate Dibata (Efesus 4:17-31)

BAHAN PJJ GEREJA GBKP

TANGGAL 23-29 JUNI 2013.

Epesus 4:17-31.

Tema :  Tulaklah Perbahanen Si La Ngena Ate Dibata

LATAR BELAKANG

1.      Latar belakang kegeluhen Epesus eme kalak si la tek man Yesus selaku Tuhan ras Juru Selamat manusia. Kegeluhen paksa sie ncerminken kegeluhen kota Epesus paksa sie. Kota Epesus eme ibu kota Asia, salah sada provinsi kerajaan Roma, kota Epesus eme kota sistrategis ibas pelayanen rasul Paulus, sebab banci Paulus lawes nehken pelayanen ku ja pa pe, khususna i Asia kitik ras Eropa, subuk arah darat bagepe arah laut, erkiteken sie me cukup ndekah  Paulus tading i je. Janah kota Epesus eme pusat penembahen agama kafir, sebab i je lit kuil dewi Artemis (Diana) si galang, simerupaken salah satu keajaiban dunia paksa sie, janah melala (nen = ratusan) diberu perdenggal ngelai i kuil e. Bagepe melala ilmu sihir i kota e.

2.      Ibas penjara nari, Paulus nuratken surat janah ikirimkenna man perpulungen Epesus, surat enda merupaken sada kata persinget man perpulungen Epesus gelah ulanai perpulungen Epesus bagi kalak si la nandai Dibata, si la erguna perukurenna, dingen gelap pengertinna, bagepe nggo ipermersikna ukurna bana, emaka kegeluhen sibage la dat bagin ibas kegeluhen siibereken Tuhan. Engkai ? sebab kegeluhen kalak si la nandai Dibata (nen =  kafir) nggeluh ibas “kefanaan” ras kesesatan. Perukuren kalak si la nandai Dibata menyesatken erkite-kiteken la iakuina Dibata sinepa langit ras doni enda ras la nggit mpermuliaken Dibata ibas kegeluhenna, tapi sebalikna akapna dirina pusat ibas kerinana, janah nggeluh guna mpermuliaken dirina sendiri. Kegeluhen si bage la sue ras Dibata, emaka jadi imbang Dibata me ia, bagepe ibas kegeluhen sipepagin, ialokenna penghukumen ibas Dibata nari (band. Matius 22:13).

3.      Gelah perpulungen Epesus tetap nggeluh ibas persadan ras Dibata, ntah pe nggeluh ibas keselamaten maka perpulungen Epesus harus tetap ndalanken  pengajaren simehuli siiajarken Paulus kerna Kristus. Kristus pusat kerinana, keselamaten lit ibas Kristus.

4.      Guna sie me perpulungen la banci nggeluh ibas dua karakter eme nggeluh ibas karakter manusia si male eme ngelakoken kai si la ngena ate Dibata, ras nggeluh ibas manusia simbaru. Tapi perpulungen harus nggeluh ibas manusia simbaru, manusia si tek man Yesus Kristus. Memang nai perpulungen nggeluh alu la nandai Dibata, tapi kenca nggo jera, maka seharusna min kegeluhen singena ate Dibata siiukurina ras siidalankenna. Emaka erbual, nuriken si la tuhu, merawa, ola ergaul ras iblis, nangko, ula mekisat tapi harus erdahin alu mehuli, egois, ncedai Kesah Si Badia (siimaksudken ncedai Kesah Si Badia eme ngelakoken perbahanen ras ngerana sibertentangan ras sura-sura Kesah Si Badia eme perbahanen si la mehuli. Janah perlu siteh ncedai Kesah Si Badia la seri ras ncekuraki/menghujat Kesah Si Badia. Adi bage, ncedai ate Kesah Si Badia banci ialemi Dibata ),  nggeluh sielem-elem, siisak-isaken ras cekurak,  kerina enda harus iambengken, tapi harus nggeluh sikeleng-kelengen, meteruk ukur, erdahin alu mehuli ras nggeluh guna mpesenangken Dibata.

5.      Ate Paulus mpersingeti perpulungen Epesus gelah perpulungen tetap nggeluh ibas keselamaten ras tetap nggeluh ibas pengertin siterang, situhu-tuhu ikuasai Kesah Si Badia, alu bage, perpulungen ersembah man Yesus ngenca, emaka kegeluhen sibermoral ras beretika kristen e siidalanken perpulungen Epesus.

APLIKASI

         Dosa mbaba kita ku perbahanen-perbahanen si la ngena ate Dibata, janah erkiteken sie me kita ndauh ibas keselamaten, tapi erkiteken keleng kal ate Tuhan man banta maka arah Yesus Kristus kita ipebadiaken arah kayu persilang, kita nggo jadi manusia mbaru, kita enda nggo i teruh kuasa Kesah Si Badia. Tapi amin gia kita nggo nggeluh selaku manusia simbaru, perbahanen-perbahanen si la ngena ate Tuhan tetap denga silakoken. Emaka la heran adi paksa genduari nterem kalak kristen si terlibat ras mpraktekken kai si la ngena ate Tuhan eme pinakit masyarakat. Memang adi kita ngerana kern pinakit masyarakat melala, termasuk i je “Narkoba”. Janah siidah kena Narkoba melala, banci sikataken nggo nkenai kerina status sosial si lit ibas masyarakat (kalak bayak, musil, kalak terpelajar, Pegawai negeri Sipil/Swasta, TNI/POLRI, rsd). Penyalahgunaan Narkoba  berbahaya sebab banci mpengaruhi susunan syaraf, sidungna ketagihan ras ketergantunan. Akibatna eme la sadar diri, lalap berhalusinasi, janah banci mate pe. Bagepe ibas rangka terpenuhi ketergantungen Narkoba e, maka siterjadi eme nangko, penodongan, pembunuhan, rsd. banci sikataken litna peningkaten kriminalitas. Bagepe melala denga efek-efek sideban. Enda kerina jadi erkite-kiteken kita ikuasai peraten daging denga, dingen gelap pengertinta. Perbahanen si bage erbahanca nembeh ate Tuhan, janah pagi sialoken me penghukumen Tuhan. Tapi kerina enda banci sihindari adi situlak  kerina perbahanen-perbahanen si la ngena ate Tuhan, alu nggeluh ibas pengertin si terang kerna Yesus Kristus, ras tetap ikuasai Kesah Si Badia. Gelah sidat pengertin si terang, maka kita harus megiken pengajaren si tuhu-tuhu kerna Yesus Kristus arah ngoge Pustaka Si Badia, reh ku kebaktin minggu, PA kategorial, rsd. Bagepe ibas rangka menanggulangi penyalagunaan Narkoba, maka peran keluarga, khususna orang tua harus lit. Orang tua harus mengontrol anak-anak, gelah anak-anak banci terhindar ibas penyalahgunaan Narkoba. Bagepe ibas rangka mereken penyadaran kerna penyalahgunaan Narkoba, gereja harus kerja sama ras kerina elemen termasuk pemerintah, ras pe gereja harus mereken seminar ntah pe penyuluhan kerna akibat penyalahgunaan Narkoba.

Pdt. Steven Kumenit, STh.M.Min.