Paguh Erkiniteken Man Tuhan (Daniel 3:13-18).

KHOTBAH TANGGAL 1 SEPTEMBER 2013

GEREJA GBKP
=======================================

Introitus   :    Dibata si enggo njadiken doni ras isina, Ia me Tuhan si engkuasai langit ras doni.   
                      Janah   Ia labo ringan i bas ingan sembah-sembahen si ibahan manusia (Perbahanen 
                      Rasul_rasul 17:24).

Ogen        :    Perbahanen Rasul-Rasul 17:-22-28 (Tunggal).

Khotbah   :    Daniel 3:13-18 (Tunggal).

Tema        :    Paguh Erkiniteken Man Tuhan

LATAR BELAKANG

1.      Ibas bahan khotbahnta enda, sada turi-turin telu anak perana siikut ibuang i Babel, tapi ndatken sada pendahin jadi pegawai ibas kerajaan Babel. Tapi amin gia nggo datken dahin ibas lingkungen kerajaan Babel, bagepe gelar telu anak perana e pe nggo isambari jadi gelar kalak Babel (nen = Hananya jadi Sadrah, Misael jadi Mesah ras Azarya jadi Abednego) tapi tetap denga lit tantangan sicukup mberat kerna kinitekenna man Tuhan.

2.      Memang secara umum banci sikataken kitab Daniel enda isuratken ibas rangka mpegegehi kiniteken man Tuhan ras tetap ersembah man Tuhan saja. Sebab paksa sie kalak Israel si lit ibas taneh pembuangen ndatken sada pengujin si cukup mberat guna nadingken Tuhan. Enda jadi erkite-kiteken kalak Babel ersembah man dibata-dibata sideban. Kitab Daniel enda (khusus bahan khotbahta) ngataken uga gia beratna kiniseran e, bagepe  kesah taruhenna, ula kal tadingken Tuhan.

3.      Ipihak sideban kitab Daniel, khususna bahan khootbahta enda mereken sada pemahaman si mendasar ras siberbeda kerna keselamatan. Sadrah, Mesah ras Abednego enggo ikategoriken kalak sipentar (nen = bijaksana). Ibas kerajaan Babel, kalak pentar enda banci dat keduduken erkiteken pemetehna. Tapi kerna keselamatan kalak sierpemeteh ras pentar enda tergantung man  keleng ate penguasa si lit (band. Ayat 8), tapi situhuna man kalak Yahudi keselamaten e la tergantung man sesekalak jelma, tapi man Tuhan. Emaka kiniseran siugapa pe siinanami bangsa Israel la erbahanca sambar kinitekenna, tapi tetap ernalem man Tuhan.

4.      Adi siidah ibas bahan khotbahta enda  raja Nebukadnesar  ernembeh ate man Sadrah, Mesah ras Abednego erkite-kiteken Sadrah, Mesah ras Abednego la nggit mungkuk nembah  man gana-gana emas buatan raja Nebukadnesar (ayat 1), sebab lit sada perintah eme   kenca erkata terompet rikut ras sarune, murdap, gitar, ras kulcapi, bage pe alat-alat musik si deban, kerina kalak minter mungkuk nembah man gana-gana emas e,  janah ise si la mungkuk nembah ku je, la banci lang ibenterken ku bas api ginuhur si gurlah. Janah dibata pe la banci nelamatkenca. Bagepe  gia ibere raja kesempaten sipeduakaliken gelah Sadrah, Mesah ras Abednego enda mungkuk nembah man gana-gana emas e kenca ibegina sora terombet rikut ras sarune, murdap, gitar, ras kulcapi, bage pe alat-alat musik si deban. Amin gia merawa raja, tapi Sadrakh, Mesakh ras Abednego la mbiar. Teluna anak perana enda alu pang ngerana "O Raja, labo lit sura-sura kami mperdiateken diri kami. Adi ngasup kin Dibata si isembah kami e mulahi kami i bas api ginuhur si gurlah e nari ras i bas kuasandu nari, tentu ipulahiNa kami. Tapi adi lang pe, ietehndu min o Raja, maka la kami nggit nembah dibatandu, janah la kami nggit nembah mungkuk kempak gana-gana emas si enggo ipajekkenndu e." Janah adi sioge terdauhen Sadrah, Mesah ras Abednego iambengken ku bas api sigurlah, tapi erkiteken kuasa Tuhan erkuasa maka teluna anak perana enda tetap selamat. Isampati Tuhan ia teluna.

5.      Turi-turin enda ngataken, Dibata mperdiateken ise situtus bas kegeluhenna ras tetap ernalem bagepe sitetap mengandalken Tuhan. Sebab ibas situasi siugapape, terancam pe kesahta, Tuhan tetap nampati kalak sisetia man baNa. Kuasa si lit ibas doni enda, la ngasup naluken kuasa Tuhan.

APLIKASI

            Ketutusen ersembah man Tuhan rusur datken tantangan. Janah nterem senina turangta, ntah pe kita talu,  sierbahanca kita lanai ersembah man Tuhan alu bulat ukur, ntah tuhu-tuhu nggo nadingken Tuhan ibas kegeluhenta, nggo sambar kinitekenta. Tantangan-tantangan e banci reh alu erbage-bage dampar (kuasa/jabatan, erta, pasangan nggeluh, penindasa, rsd). Harus siteh adi kerina e (kuasa/jabatan, erta) jadi gelementa ras jadi perayaken geluhta maka situhuna e me kita nggo nembah mugkuk man gana-gana, sebab e kerina banci ipake iblis jadi gana-gana sigenduari). Janah perlu siteh nembeh ate Dibata ibas kegeluhenta sibage, sebab la bp Dibata nggit, Ia inomor duaken, ntah pe la nggit Tuhan adi kita ersembah man dua tuan.

            Kegeluhen sibage la mperehken kemalemen ate, emaka kita selaku kalak sierkiniteken man Tuhan harus tetap ncikep kinitekenta, amin gia jumpa perbeben ras kiniseran. Amin gia kesah taruhenna. Tuhan e erkuasa ras perkeleng emaka ijagaina ras iberekenna serpang pulah ras kegeluhen man kalak situtus ersembah man baNa ras tetap ngelakoken simehuli ibas kegeluhenna tep-tep wari.

Pdt. Steven Kumenit, STh.M.Min.          

Bapa Si Jadi Kemegahen Ibas Jabu (Ayub 1:1-5)

BAHAN PJJ GEREJA GBKP

TANGGAL 25 – 31 AGUSTUS 2013.

JOP 1: 1-5.

Tema : Bapa Si Jadi Kemegahen Ibas Jabu.

LATAR BELAKANG

1.      Sijadi oratenta sendah eme sada turi-turin kerna sekalak perbapan sibayak ras mehuli eme Jop sitading i taneh Us simbiar ras sierkemalangan man Tuhan. Sebab selaku bapa sierkemalangan man Tuhan, janah situhu-tuhu ngkelengi jabuna,  la ia nggit anak jabuna erdosa, maka selaku bapa, tep-tep erpagi-pagi silampas ersembah ia man Tuhan, ipersembahkenna persembahen tutungen guna mpebadiaken anakna sekalak-sekalak, sebab mbiar kal Jop adi anak-anakna nggo erdosa. Sebab adi nggo erdosa merawa me Tuhan man anak-anakna emaka ihukum Tuhan ia kerina.  Enda ilakoken Jop sebab lit sada kebiasaan anak-anakna (pitu dilaki ras telu diberu) erbahan pesta tep-tep berngi. Pengancih-gancih ingan pesta man anak sidilaki, janah anak sidiberu ikut ibas pesta e).

2.      Ibas zaman Jop, kalak erpengakap maka kinibayaken, kesusuren sibayak bagepe kesehaten eme sada tanda maka kalak e ipasu-pasu Tuhan, ngena ate Tuhan man bana. Janah kerina e lit bas Jop, sebab Jop tuhu-tuhu kalak sierkemalangan ras mbiar man Tuhan, Idalankenna kai singena ate Tuhan. La nggit Jop erbahan dosa. Anak-anak Jop si sepuluh (pitu dilaki ras telu diberu) sada simbol kesempurnaan ibas diri Jop. Sebab paksa sie angka pitu ras telu ianggap sempurna, i tambah ka ras asuh-asuhen simelala, emaka semakin lengkap me pasu-pasu Tuhan man bana. 

3.      Selaku bapa, Jop ertugas jadi imam nandangi jabuna gelah ia sendiri singadap man Tuhan guna mindo pengalemi dosa man anak-anakna. Kerina enda ilakoken gelah isi jabuna tetap nggeluh bagi si ngena ate Tuhan. Alu kata sideban selaku bapa sierkiniteken, tuhu-tuhu iperdiatekenna kal kerna kegeluhen spiritualitas isi jabuna, khususna anak-anak. Iperdiatekenna kerna lagu langkah ras gaya hidup anak-anakna, emaka lalap Jop nehken persembahen man Tuhan gelah anak-anakna terhindar ibas penghukumen Tuhan nari. Sebab banci saja lagu langkah ras gaya hidup anak-anak singgit erpesta mbabai ia kerina celus ku bas dosa, alu bage ceda me ukur Tuhan.

4.      Kai siicidahken Jop nandangi keluargana eme la kal atena keluargana e nggeluh ibas dosa, enda me sada bukti Jop tuhu-tuhu kalak sierkemalangan man Tuhan. Erkiteken kegeluhen sibage me maka ngena ate Tuhan man Jop (band. Jop 1:8; 2:3).

5.      Nehken persembahen tutungen guna pebadiken anak-anak, situhuna semal ilakoken masyarakat paksa sie. Tapi siibahan Jop eme mereken sada pengertin maka kegeluhen manusia “tergantung” man Tuhan saja. Sebab adi ise singelakoken kai singena ate Tuhan, maka ialokenna pasu-pasu Tuhan. Tapi ise si la ndalanken kai singena ate Tuhan, ihukum Tuhan me ia.

APLIKASI

            Ngkai rusur sibegi maka bapa eme sekalak imam ibas jabu. Sebab bapa eme pemimpin, la saja ibas pengertin organisasi, tapi pe pemimpin rohani. Ibas pemimpin rohani enda me siikataken imam, sebab selaku imam, bapa harus njaga kiniteken keluargana gelah keluarga e nggeluh ibas kebadiaan. Janah piga-piga hal siharus ilakoken bapa eme mbabai isi jabuna erkemalangan man Tuhan. Guna sie me siharus  ilakoken sekalak bapa eme harus tutus ras erkemalangan man Tuhan. Bagepe bapa harus tutus ertoto guna isi jabuna, gelah jabuna tetap nggeluh ibas singena ate Tuhan. Sebab adi jabu lalap itotoken janah bapa nggeluh ibas simehuli singena ate Tuhan, maka ngena ate Tuhan man isi jabunta e. Emaka bapa tuhu-tuhu jadi kemegahan man keluarga.

Pdt. Steven Kumenit, STh.M.Min.

Kebebasan Si Ertanggungjawab (Yosua 24:13-21)

BAHAN PJJ GEREJA GBKP

TANGGAL 18 – 24 AGUSTUS 2013.

YOSUA 24:13-21.

Tema : Kebebasan Si Ertanggungjawab.

LATAR BELAKANG.

1.      Sijadi bahan oratenta sendah eme sada bagin ibas pidato Yosua i lebe-lebe pertua-pertua, pemimpin-pemimpin, hakim-hakim ras kepala-kepala pasukan Israel. Ingan pidato Yosua enda i Sikhem. Engkai maka ipepulung Yosua ia kerina i Sikhem? sebab  Sikhem eme ingan bersejarah man bangsa Israel, sekaligus ingan ersembah man bangsa Israel (band. Kej.12:6-7; 33:20; 35:1-4; 50:25; Yosua 24:1; Yosua 24:32).

2.      Ibas pidato Yosua enda, Yosua mpeseh kai siikataken Tuhan man bana guna bangsa Israel. Salah sada siikataken Tuhan man bangsa Israel eme uga keleng ate Tuhan man bangsa Israel emaka itaruhkenNa bangsa Israel ku taneh Kanaan alu mejuah-juah, taneh si la bekas  bangsa Israel ndahikenca, janah ngenanami hasil pertaninan, buah anggur ras buah Zaitun si la bekas ia nuankenca. Enda kerina ikataken Yosua gelah bangsa Israel meteh maka sehna bangsa Israel ku taneh Kanaan la lit sitik pe campur tanna, tapi pelin-pelin keleng ate Tuhan man bangsa Israel, erkite-kiteken padan Tuhan man Abraham.

3.      Kenca kuasa ras keleng ate Tuhan ipeseh Yosua man kerina pertua-pertua, pemimpin-pemimpin, hakim-hakim ras kepala-kepala pasukan Israel, iumputi Yosua pidatona nina sembahlah Tuhan  Ia alu tutus ate ras patuh, Janah pedauhlah dibata-dibata siisembah nini-ninndu i Mesopotami ras i Mesir. Tapi adi la akapndu mehuli ersembah man Dibata pilihlah sendah ise atendu siisembahndu, dibata-dibata siisembah nini-ninindu i Mesopotami eme Marduk, dibata kalak Mesir eme lembu suci simelambangkan Apis eme dewa kesuburan ntah dibata kalak Amori. Tapi Yosua ras keluargana kerina Tuhan saja siisembahna. Enda ikataken Yosua gelah bangsa Israel lit sada padan siibelaskenna i lebe-lebe Dibata, emaka iteh Dibata ukur ras sura-sura bangsaNa.

4.      Amin gia nggo lit sada pengakun bangsa Israel, tapi Yosua mereken sada kata persinget man bangsa Israel kerna kinilasetiaan. Kinilasetiaan mbabai bangsa Israel ibas penghukumen, janah penghukumen enda la saja ngkenai sesekalak jelma tapi pe bangsa Israel banci kernep sebab Dibata e Dibata si badia ras sipencimberu, emaka siharus lit man bangsa Israel eme nggeluh badia ras setia. Mungkin enda me si la ngasup  bangsa Israel ndalankensa. Tapi konsekwensi kinilasetiaan nggit bangsa Israel ngalokenca. Ibas sienda ngatakenca Tuhan saja siisembah bangsa Israel. Alu Tuhan saja siisembah bangsa Israel, konsekwensina dibata-dibata sideban la  banci isembah bangsa Israel, ntah pe bangsa Israel harus mpedauh dibata-dibata sideban.     

5.      Padan i Sikhem siibelasken bangsa Israel enda la ipaksaken Yosua, tapi Yosua selaku pemimpin bangsa Israel mereken sada kebebasan guna milihsa, tapi pilihen bangsa Israel eme ersembah man Tuhan saja. Emaka padan enda igelari alu “pembaharuan perpadanan”. Enda ilakoken sebab isekelewet bangsa Israel ersembah man dibata-dibata sideban, bagepe lit pengalaman sila mehuli siilakoken bangsa Israel paksa bangsa Israel nimai Musa i deleng Sinai, bangsa Israel erbahan patung lembu emas. Bagepe nini-nini bangsa Israel pernah ersembah man dibata-dibata sideban paksa i Mesopotamia.

APLIKASI

            Pengakunta man Dibata, selaku Dibata sitelu sada, nggit ersembah man Tuhan saja,bagepe nggit ngelawan dosa, sibelasken paksa kita ingawanken. Tapi ope sie sanga kita iperidiken kita nggo ibaba ibas persadan ras Tuhan. Alu bage maka kita situhuna nggo imerdekaken ibas dosa nari. Kita lanai nggeluh ibas kuk perbudaken dosa nari”, tapi amin bage gia isingetken mulihi maka kebebasenta e la banci rate-ate. Kebebasenta nggeluh i tengah-tengah doni enda harus tetap lit ibas kepatuhen man Tuhan saja. Bebas/merdeka kita eme bebas ibas dosa emaka ula sirusur-usur erbahan dosa, sebab kalak sierbahan dosa pagi ihukum Dibata me ia.

            Bagepe kita selaku kalak singgo merdeka ibas dosa, janah nggo siakuken Tuhan saja me siisembah, maka harus min kita ncidahken kegeluhen erkiniteken man Tuhan ibas kerina dampar kegeluhenta. Sienda me mekatep la lit bas kita, emaka ula heran adi lit denga kita si la pang ncidahkenna dirina maka ia kalak kristen i lebe-lebe jelma sinterem, khususna siberagama sideban, apai ka agama sideban e agama simayoritas.

            Kita singgo merdeka panglah kita ncidahken kinitekenta ibas situasi siapai pe, janah nggeluh lah ras Tuhan gelah kita ipasu-pasuNa.

Pdt. Steven Kumenit, STh.M.Min.

           

Jadilah Pemimpin Singelakoken Persuruhen Tuhan (Yosua 5:2-12).

BAHAN PJJ GEREJA GBKP

TAGGAL 11-17 AGUSTUS 2013.

Yosua 5 : 2 – 12.

Tema : Jadilah Pemimpin Singelakoken Persuruhen Tuhan.

LATAR BELAKANG

1.      Kenca bangsa Israel gepari lau Yordan, erkemah me ia i Gilgal, janah Gilgal enda daerah si nggo  bengket ku wilayah/ taneh Kanaan. Sangana bangsa Israel erkemah i Gilgal ngerana Tuhan man Yosua. Nina Tuhan, sunatkenlah kerina bangsa Israel. Enda ikataken Tuhan sebab bangsa Israel sierkemah e lenga isunat.

2.      Sunat man bangsa Israel eme sada tanda “jasmaniah” perpadanen antara Tuhan ras Abraham. Isi perpadanen eme ipasu-pasu Tuhan Abraham ras kesusurenna, adi Abraham ras kesusurenna erkemalangen ras tetap ngikutken kai singena ate Tuhan. Bentuk pasu-pasu Tuhan eme Abraham jadi nini nterem bangsa-bangsa, nterem kesusuren Abraham, sinursur Abraham jadi raja, Ibereken Dibata taneh Kanaan man Abraham ras kesusurenna. Perpadanan enda harus ipatuhi Abraham ras kesusurenna. Emaka ise si la isunat berarti la kap ia bangsa Tuhan (band. Kejadin 17: 1-14). Ibas palas enda me maka isunatken Yosua bangsa Israel alu make piso batu. Emaka bangsa Israel tetap jadi bangsa Tuhan ras banci ngiani tanah Kanaan.  Bagepe ibas rangka ngerayaken Paskah maka kerina bangsa Israel harus isunatken, sebab kalak siisunatken saja nge sibanci ngerayaken paskah (band. Kel. 12: 47-48).

3.      Sangana bangsa Israel i taneh Mesir, bagepe ibas perdalanen ku taneh Kanaan, megombang kalak man Yosua, sebab Yosua bagepe bangsa Israel eme budak i taneh Mesir nari, tapi kenca Yosua nggo i taneh Kanaan (Gilgal), maka lanai lit kalak simegombang man Yosua, sebab Yosua lanai budak, tapi nggo bebas ibas perbudaken nari, bagepe nggo banci ngiani taneh sendiri. Bagepe musuh-musuh singelawan bangsa Israel ibas perdalanen nggo italuken Yosua kerina. Bagepe alu pinpinan Tuhan,  Yosua minpin bangsa Israel ngepari lau Yordan. Kerina sie mpehagaken Yosua, janah enda kerina erkiteken perbahanen Tuhan. Erkiteken sie me, kenca dung bangsa Israel isunatken, ngerana Tuhan man Yosua maka lanai lit kalak simegombang man Yosua, sebab nggo iagui Tuhan kerinana.

4.      I Gilgal bangsa Israel ngerayaken Paskah. Perayaan Paskah eme sada bentuk peringet-ingeten kerna keleng ate Tuhan man bangsa Israel, khususna ibaba Tuhan bangsa Israel ndarat i bas taneh Mesir nari ku taneh Kanaan.

5.      Ibas perayaan paskah i Gilgal enda me bangsa Israel man pangan si turah ibas tanah Kanaan eme buah gandum siisauk ras roti si la itamaken ragi. Janah mulai je nari me bangsa Israel lanai man manna. Manna eme pangan siipan bangsa Israel sedekah bangsa Israel erdalan ibas taneh mesawang ku taneh Kanaan (band. Kel.16). I Gilgal (kanaan) lanai ipan bangsa Israel Manna sebab bangsa Israel nggo ngiani tanah Kanaan si dem alu dadih ras tengguli. Kerina pangan nggo sikap i taneh Kanaan.

APLIKASI

            Adi siperdiateken kegeluhen berbangsa ras bernegara rusur pemimpin bangsanta jadi sorotan, menam tep-tep wari media massa (nen = cetak ras elektronik) mberitaken kerna amoral pemimpin bangsanta. Nterem pemimpin bangsanta lanai bagi pemimpin, sebab siidah la bo iperdiatekenna bangsanta. Erkiteken sie me melala terjadi penyimpangan moral (KKN, Hedonisme, sex, la lit kebujuren, rsd).  Padahal siidah paksana negaranta lit ibas perbeben, emaka butuh kal kita pemimpin siserius memimpin negaranta enda.

            Ibas pemahaman kinitekenta maka pemimpin enda ibas Tuhan nari,  janah ia isuruh Tuhan guna erdahin ibas rangka kiniulinta (band. Roma 13: 4).  Emaka adi lit pemerintah si la dalanken persuruhen Dibata e, ia erdosa man Tuhan.  Janah pemimpin sibage harus itulak. Tapi adi lit pemimpinta sibujur ras erkemalangan man Tuhan, maka tanggungjawabta eme megiken ras ngikutken kai siikatakenna.

            Genduari umur bangsanta nggo seh ku 68 tahun. Harapenta man pemimpin bangsanta eme nggeluh ibas kebujuren ras keadilan gelah kegeluhen bangsanta mengalami perubahan ku kemajun. Emaka mari sitotoken gelah pemimpin bangsanta tuhu-tuhu jadi persuruhen Tuhan.

Pdt. Steven Kumenit, STh. M.Min.