Tutus Erlajar (Amsal 22:17-21)

PEKAN PENATALAYANAN

WARI IV, RABU 22 JANUARI 2014

GEREJA GBKP

Introitus    :     Tep-tep kali kupelajari keputusenNdu alu tutus, kupuji Kam alu ukurku si bersih (Mazmur 119:7).

Ogen         :     Kuan-Kuanen 2:3-5.

Khotbah    :     Kuan-Kuanen 22:17-21.

Tema         :     Tutus Erlajar.

LATAR BELAKANG

1.      Bahan khotbahnta enda eme sada kata persingat man anak singuda denga gelah tetap mperdiateken pengajaran singgo pernah iajarken, sebab tujun pengajaran lit telu hal eme guna kemalemn ate, gelah tek man Tuhan ras gelah banci mereken jabab  sitepat man kalak sinuruh anak singuda. Alu bage anak singuda jadi kalak sipentar, bermoral ras berspiritualitas.

2.       Adi siperdiateken kerna bahanta sekali enda tentuna enda merupaken sada penegasan mulihi man anak singuda, sebab enda nggo pernah ikatakenna ope pasal enda (band. Pasal 10-22:1-16). 

3.      Pengajaran siibereken pengamsal man anak singuda erkiteken anak singuda la terlepas ku bas dua hal eme : 1). Kerna hubungen ras Tuhan, i ja manusia la ngasup berhubungan ras Tuhan alu mehuli adi la lit bas ia kepentaren. Berhubungan ras Tuhan la saja soal ersembah man Tuhan tapi uga manusia banci mengaplikasikan alu mehuli kerna kebenaren situhu-tuhu bas kegeluhen tep-tep wari, emaka ibas pengajaran singgo ipeseh guru-guru (orang tua), anak singuda harus nggeluh ibas moral simehuli ras ngkelengi kebenaren, ula bagi kalak fasik (motu). 2). Selaku anak, tentuna itehna fungsi selaku anak eme anak ibas sada paksa harus isuruh  orang tuana, ntah pe silebih tua asangken ia. Adi isuruh berarti lit erbage-bage hal. Banci ka isuruh guna simehuli banci ka la mehuli. Ibas sie me anak singuda harus itehna mereken jabab, apakah ue ntah lang, bagepe mereken jababan simehuli.  Anak singuda nggo ibekali alu kepentaren, emaka adi simehuli tentuna jababanna ue, tapi adi si la mehuli, anak singuda harus pang ngataken lang, sebab si la mehuli mbaba dosa. Emaka adi anak singuda nggo erdosa maka kegeluhena nggo ndauh ibas pasu-pasu Tuhan nari.

4.      Ibas pihak sideban, kuan-kuanen enda mereken sada penekanan kerna erti geluh manusia I tengah-tengah doni enda, terutama peraten Tuhan siharus idalanken i tengah-tengah kegeluhen tep-tep wari. Erkiteken sie me kuan-kuanen enda menekankan man anak singuda gelah anak singuda tek man Tuhan. Adi tek man Tuhan berarti harus ndalanken peratenNa, harus lit kepatuhan ibas kegeluhen tep-tep wari. Emaka ndalanken simehuli singena ate Tuhan mpedauh anak singuda ibas penghukuman Tuhan nari.

5.      Ibas bahanta enda centralna eme erkiniteken man Tuhan. Emaka kalak sila erkiteken man Tuhan la ndatkenna kepentaren (band, Kuan-kuanen 1:7). Sebab ibas anak singuda nggeluh ibas kepentaren maka ngasup nge ia mengaplikasiken alu mehuli kepentaren e ibas kegeluhenna tep-tep wari. Alu bage anak singuda terhindar ibas dosa si lit i tengah-tengah doni enda.

APLIKASI

            Temanta eme tutus erlajar. Emaka adi kita ngerana kerna erlajar berarti lit dua hal eme 1). Erlajar secara formal (sekolah), 2). Erlajar secara non formal ibas pergaulan ntah pe kegeluhen tep-tep wari. Dua hal enda ermakna mereken kepentaran man banta, subuk secara pemeteh bagepe secara karakter/moral. Sehubungan ras sie maka erlajar la lit waktuna guna ngadi gelah pemetehta bagepe karakter/moral tetap ertambah-tambah. Tapi persoalenna nterem denga kita simekisat erlajar, emaka pemetehta kerna piga-piga hal kurang, apai ka kerna Tuhan. Sebab adi ateta meteh kerna Tuhan maka kita harus tutus erlajar (nen : ngoge ras megiken pengajaran kalak). Padahal adi siangkailah kerna Tuhan maka kegeluhenta nggeluh ibas kemalemen ate.

            Kita erlajar gelah pentar, emaka tutuslah kita erlajar. Erlajar melala metode, apakah arah formal, bagepe ibas bentuk sideban, sipenting pemetehta harus sitingkatken gelah berkualitas kita, la gampang ibodohi kalak kita. Tapi lebih asangken sie, adi nggo tambah pemetehta ula kita meganjang ukur, tap tetaplah nggeluh mbiar ras erkemalangan man Tuhan, maka sipuji Tuhan arah geluhta.

Pdt. Steven Kumenit, STh.M.Min.

             

Disiplin Nggeluh (Markus 1:35-39)

PEKAN PENATALAYANAN

WARI III, SELASA 21 JANUARI 2014

GEREJA GBKP

Introitus    :     Ise ngayaki pemeteh, ikelengina kap dirina, dingen ise si nginget kai si ipelajarina jumpa kap ia si mehulina (Kuan-Kuanen 19:8).

Ogen         :     Daniel 6:1-10.

Khotbah    :     Markus 1:35-39.

Tema   :           Disiplin Nggeluh.

LATAR BELAKANG

1.  Bahan oratenta sendah eme i kuta Kapernaum. i kuta Kapernaum enda me  melala tanda-tanda sengget ibahan Yesus Kristus : pepalem kalak sakit ras pelawes setan.  Tuhu-tuhu Yesus ialo-alo alu meriah ukur i Kapernaum, emaka ntarem kalak reh ku Yesus guna mindo penampatNa. Janah perlu siteh i Kapernaum Yesus tading i rumah Simon.

2.   Kebiasaan Yesus, erpagi-pagi silampas Ia ertoto man BapaNa sinisurga. Kepeken sangana Yesus lawes ertoto ibas ingan simelenget. Nggo nterem jelma i rumah Simon, tujunna eme guna mindo penampat Tuhan, gelah Tuhan banci pepalem kalak sakit. ,  bagepe guna ngenen pribadi Yesus. Ibas paksa sie me berkat Simon ras teman-temanna guna ndarami Yesus, kenca jumpa minter ikataken Simon situasi siterjadi i rumahna, alu sada arapen gelah pedas Yesus reh ku rumahna sebab nggo nterem kalak sinimai Ia. Tapi arapen  bagepe sua-sura Simon ras teman-temanna la tersehi, sebab minter iajak Yesus ia kerina guna miser ku kuta-kuta sideban i Galilea guna mberitaken Berita Simeriah.

3. Makna sideban Yesus ertoto ibas jam erpagi-pagi eme gelah la lit simengganggu Ia tupung berkomunikasi ras BapaNa sinisurga. Selain sie ibas keadaan Yesus selaku manusia, Yesus membutuhken semangat ras kesehaten simbaru guna melayani.

4. Tempa teridah i jenda Yesus menolak ras la nggit reh ku rumah  Simon guna njumpai jelma sinterem si ersura-sura jumpa ras Ia, guna mindo penampat. Padahal enda ilakoken Yesus gelah Berita si Meriah pedas mbar ras ialoken kalak ibas ingan sideban. Jadi la banci Yesus ndekah-ndekah i kuta Kapernaum. Bagepe dahin Yesus eme nehken keselamatan man kerina jelma. Bagepe lit pengenehen sideban siidah Yesus kerna kerehen jelma sinterem i rumah Simon eme pendahin setan/iblis. Sengaja setan/iblis mperehken jelma sinterem guna menghalangi pendahin keselamatan silakoken Yesus. Bagepe lit sura-sura sideban eme gelah Yesus banci jadi pemimpin sibanci mulahi kalak Yahudi ibas kuasa bangsa Romawi nari.

5. Pendahin keselamatan siilakoken Yesus, simerupaken dahin utama Yesus i tengah-tengah doni ilakokenNa ibas erbage-bage ingan ras ibas erbage-bage cara. Adi siperdiateken siilakoken Yesus i kuta-kuta i daerah Galilea, lit kap dua cara silakoken Yesus eme 1). Yesus ngajar i rumah pertoton kalak Yahudi, berarti ibas wari sabat. Sebab ibas wari sabat e maka reh kalak ku rumah pertoton guna ersembah man Tuhan. Janah biasana kenca ersembah lit kesempatan man sireh guna megiken pengajaran. Ibas paksa sie me isehken Yesus kerna berita keselamatan. 2). Pelawes setan-setan. Keselamatan harus seh ku kerina jelma, emaka setan harus ipelawes.   

APLIKASI

            Erdahin perlu, sebab arah kita erdahin maka kita banci ndatken kai siiperluken kita. Tapi pe perlu siinget ibas inganta erdahin mekatep melala kal percuban, apakah soal waktu, bagepe soal keuangan, rsd. Perlu siinget, selaku kalak kristen ingan erdahin eme salah sada ingan siitempatken/siibereken Tuhan man banta guna nehken keselamatan, bagepe I je me pengrealisasian ibadah situhu-tuhu. Emaka perlu kal kita pentar, gelah kita tetap erdahin alu mehuli. Ibas hal enda kita harus disiplin makeken waktu, bagepe disiplin ibas  erdahin. Guna ndatken sienda kerina la banci silupaken Tuhan. Adi sinen bahan khotbahnta, ugapa pe melalana dahin siidahinken Yesus la Ia lupa ertoto. Bagepe kerna Daniel. Daniel berhasil erkiteken disiplin ibas erdahin, la ia terpengaruh kubas hal-hal doni. Emaka kenca ndatken perbeben, minter ia ertoto man Tuhan. Arah enda kita ipersingeti guna ndatken simehuli ras tetap disiplin ibas erdahin, kita harus ertoto man Tuhan, gelah ndatken kepentaren, bagepe ikawaliNa kita, sebab la ate Tuhan kita anak-anakNa ndatken kemalun ibas inganta erdahin. Emaka amin gia kitik inganta erdahin disiplinlah kita erdahin, sebab ibas pustaka sibadia ngataken, adi tutus kita ibas sikitik, maka ibere Tuhan sitergalangan. Alu kata sideban, kita harus displin er-Dibata, emaka amin gia jumpa perbeben tetap kinitekenta la surut. Kita tetap mindo penampat man Tuhan.

Pdt. Steven Kumenit, STh.

Pakeken Paksa - Paksa Alu Mehuli (Pengkhotbah 12:1-7)

PEKAN PENATALAYANAN

WARI II, SENIN 20 JANUARI 2014

GEREJA GBKP

Introitus    :     La lit kai pe si terligen man Dibata. Kerina si nasa lit tangkas dingen talang i lebe-lebeNa. Man baNa me sipertanggung jabapken kerina perbahanen-perbahanenta (Heber 4:13).

Ogen         :     Epesus 5:15-17

Khotbah    :     Pengerana 12:1-7.

Tema         :     Pakeken Paksa-Paksa Alu Mehuli

LATAR BELAKANG

1.      Sijadi bahan khotbahnta sekali enda eme kata ajar man anak singuda. Tujun kata ajar eme gelah anak singuda banci memanfaatkan kinigudaanna alu keriahen ukur ras optimis, sebab lit paksana anak singuda jadi metua sierbahanca lanai banci erkaipe, sebab kegeluhen kalak singgo metua nggeluh ibas kiniseran eme mata terganggu, tan ras nahe pe lanai megegeh, ipen lanai lit, cuping nggo lanai erpemegi, pertunduh lanai ntabeh, mbiar, dungna mate. Emaka ibas situasi sibage lanai lit keriahen.

2.      Ibas situasi sibakal ihadapi anak singuda eme jadi tua, maka pengerana mereken sada motivasi man anak singuda gelah nginget Tuhan singgo nepa manusia (anak singuda). Adi anak singuda nginget Tuhan maka anak singuda lanai menyia-nyiakanken kegeluhenna, sebab itehna Tuhan sinepa ia, ersura-sura gelah tetap ndalanken kegeluhen i tengah-tengah doni enda ras tetap ndahiken dahin Tuhan. Ibas kata sideban manusia harus berkarya i tengah-tengah doni enda. Apalagi nandangi anak singuda situhu-tuhu lit potensina guna ngelakoken simehuli singena ate Tuhan. Bagepe anak singuda harus nginget maka Tuhan tetap masu-masu ras nemani ia ibas aktivitasna tep-tep wari. La saja kerna nginget Tuhan, tapi pe ingetlah maka lit kap paksana manusia harus mate, emaka anak singuda harus makeken paksa ngudana alu mehuli ras optimis nggeluh.

3.      Pengerana (keholet) ngenen bas paksa umur nggo metua manusia lanai lit nggeluh ibas keriahen, tapi nggeluh ibas kiniseran, kebiaren, rsd. Emaka gelah ula mentas bage-bage saja kinigudaan e sidem alu optimis ras melala siharus ilakoken, maka alu la langsung kohelet mpersingeti anak singuda gelah memanfaatkan kinigudaan e alu ndalanken kai singena ate Tuhan.

4.      Ipihak sideban ate kohelet, gelah anak singuda tuhu-tuhu makeken kegeluhenna e alu bertanggungjawab, ula nimai seh paksa ia nggo metua.

5.      Guna ndatken simehuli ras singena ate Tuhan, maka anak singuda harus nggeluh ibas kepentaren. Erkiteken sie me Kohelet mpersingeti anak singuda gelah ibas kegeluhenna la sirang ras Tuhan. Tuhan harus jadi sentral kegeluhenna. Adi enda nggo ilakoken anak singuda maka kegeluhenna paksa nguda denga pe pasti ngelakoken simehuli saja.

APLIKASI

            Memang bahan khotbahnta itujuken man anak singuda, tapi situhuna kata persinget enda itujukan man banta kerina. Janah isingetken maka lit paksana kari kitalanai banci erkai pe erkite-kiteken piga-piga alasan. Apakah erkiteken sakit, pensiun ibas pendahinta, umur singgo metua, rsd. Emaka nina waktu e meherga. Bagepe harus siteh maka kegeluhenta la saja guna dirinta sendiri, tapi guna kalak sideban, terlebih guna Tuhan. Itempatken Tuhan kita I tengah-tengah doni enda gelah kita banci ngelakoken kai singena ate Tuhan. Ibas rangka sie me kita nggo ibereken Tuhan kepentaren, ras itemaniNa kita gelah kita banci ngelakoken kai simehuli ras singena ate Tuhan. Ibas arti kata, adi kita banci denga erdahin, ras produktif denga, kita harus memanfaatken e alu mehuli. Kalak sila nggit erdahin ibas paksa produktif denga, banci ia gelari kalak motu. Sebab adi la ia nggit erdahin, kai sibanci iberekenna man dirina sendiri ras man keluargana, subuk paksa sigenduari bagepe ibas paksa sipepagin.

Pdt. Steven Kumenit, STh.M.Min.

Mejingkat Erdahin (Kejadian 3:16-21)

PEKAN PENATALAYANAN

WARI I, MINGGU 19 JANUARI 2014

GEREJA GBKP

Intoritus    :      Asum kami ras kam usur ikataken kami man bandu, "Kalak si la nggit erdahin ola bere man (2 Tesalonika 3:10).

Ogen         :     Perbahanen Rasul_rasul 18:1-11.

Khotbah    :     Kejadin 3:16-21.

Tema         :     Mejingkat Erdahin.

LATAR BELAKANG

1.      Kinilapatuhen manusia man Dibata , ija Manusia sipemena eme Adam ras Hawa la megiken kerna larangan Tuhan eme la banci man buah batang kayu si lit i tengah peken (band. Kejadin 3:2-3), erbahanca manusia harus ihukum Tuhan.

2.      Lit 2 hukumen siibereken Tuhan man  manusia eme 1). Man diberu eme itambahi Tuhan kiniseranna sanga mehuli kulana ras paksana mupus. 2). Man sidilaki eme Isumpahi Tuhan taneh sierbahanca dilaki e harus latih erdahin ngusahai taneh kidekah  geluhna gelah taneh banci mereken ulihna. Enda jadi erkiteken tangtangna itepa Dibata taneh e mehuli, iberekenna man manusia kerina kebutuhen man manusia alu la erdahin sebab nggo tercukupi kerinana, tapi erkiteken dosa maka taneh e lanai mereken hasil simehuli kecuali manusia e siharus erdahin, sebab ibas taneh e nggo turah dukut-dukut ras sinuan-sinuan sierduri. Bagepe kenca latih erdahin manusia harus mate ras mulihken ku taneh, asalna ndube.

3.      Dosa erbahanca hubungan manusia ras Tuhan terganggu, erkiteken dosa manusia harus berjuang i tengah-tengah doni enda, termasuk ncukupi kebutuhen geluhna, sebab adi la erjuang, maka la tercukupi kebetuhenna, apai ka keadaan taneh nggo beubah secara 180 derajat. Emaka la banci lang manusia (Adam) simerupaken penanggungjawab mereken kecukupen man keluargana harus latih erdahin guna ndatken kebutuhen keluargana.

4.      Amin gia manusia nggo erdosa, ras nggo ihukum Tuhan, tapi tetap denga Dibata ngkelengi mausia. Tanda Dibata ngkelengi manusia e, ibahan Dibata me uisna ibas kulit rubia-rubia nari jenari ipakekenNa man manusia e (Adam ras Hawa).

5.      Hukuman siibereken Tuhan man manusia, bagepe Dibata tetap ncidahken keleng ate man manusia, ngataken gelah manusia tetap ngenen maka perbahanen Tuhan e erkiteken salah manusia, janah Dibata tetap erkeleng ate man manusia, emaka manusia harus nggeluh ibas ketergantungan man Dibata saja.

APLIKASI

            Adi siperdiateken kerna turi-turin manusia, maka tentuna la banci sikataken erkiteken dosa maka manusia erdahin, sebab ope sie pe, nggo isuruh Dibata nge  manusia e erdahin ibas rangka ncukupi kebutuhen geluhna (band. Kej. 1:28). Emaka arah enda banci sikataken erdahin eme sada tanggungjawab manusia (kita) guna banci ndatken kebutuhen geluhta.

            Erkiteken erdahin eme bagin ibas geluhta guna ndatken kebutuhen geluhta maka perlu kal man banta sada etos kerja ntah pe semangat erdahin, apa ka ibas menghadapi kerina tantangan geluh. Sebab siidah ibas paksa sigenduari adi la kita erdahin maka la bo banci kita ndatken kebutuhenta, emaka perlu kal man banta persepsi ula nari milih-milih dahin. Bagepe amin gia kita isuruh mejingkat erdahin, labo berarti kita harus terus tanpa beristirahat (band. Kej. 2:2-3) seh maka kita erdahin melupaken kesehatenta, bagepe keluargana. Maksud mejingkat erdahin i jenda eme gelah kita selaku kalak kristen harus ncidahken maka karakter Tuhan lit bas kita eme siterus erdahin (Yoh. 15:17). Maksudna, Dibata si seh genduari erdahin, teridah min man banta. Jadi alu mejingkatna kita erdahin berarti nggo sicidahken man doni enda kerna Tuhan e. Berarti arah kita mejingkat erdahin berarti kita pe nggo mpermuliakan Tuhan. Emaka ipasu-pasu Tuhan kita. Jadi la sia-sia kita erdahin alu mejingkat, sebab itabahkan Tuhan kerna kebutuhen geluhta seh ibas wari sipepagi pe. Jadi kai pe bentuk dahinta, dahikenlah alu tutus ras mejingkat gelah kita tetap ipasu-pasu Tuhan.

Pdt. Steven Kumenit, STh.M.Min.