Tanggungjawab Kalak Sitek Nandangi Gereja Tuhan (Ibrani 13:16-21)

PEKAN KELUARGA

GEREJA GBKP

WARI V. KAMIS 5 JUNI 2014.

Introitus   :    Gelah kula e la erbelah-belah, tapi sada-sadai ringring e radu seri mperdiateken ringring sideban (1 Korinti 12:25).

Ogen        :    1 Korinti 16:1-4.

Khotbah   :    Heber 13:16-21.

Tema        :    Tanggungjawab Kalak Sitek Nandangi Gereja Tuhan.

LATAR BELAKANG

1.      Secara umum kitab Heber enda khusus itujuken man kalak Yahudi singgo tek man Yesus Kristus, janah singana ndatken perbeben ras kiniseran. Perbeben ras kiniseran e erbahanca kiniteken kalak kristen nggo mulai kendor. Janah salah sada sebab kalak kristen ndatken kiniseran eme ibas pemerintah nari. Erkiteken sie me penulis mereken sada pergegeh man kalak kristen alu tetap ncikep Yesus Kristus selaku Tuhan ras ula kiniteken. Tapi secara khusus penulis mpersingeti gelah kalak kristen harus tetap nggeluh ibas keleng ate ras kepatuhen, subuk man Tuhan bagepe man pemimpin.

2.      Penulis mereken kata persinget man kalak kristen gelah mpraktekken kekelengen ibas kegeluh tep-tep wari, sebab nehken kekelengen bali kap ras nehken persembahen man Tuhan. Alu kata sideban ate penulis mereken sada pengertin man kerina kalak kristen kerna erti ibadah ras nehken kurban persebahen. Bagi penulis ibadah eme kegeluhen tep-tep wari (band. Roma 12:1), tapi nehken kekelengen ras mereken penampat eme sada bentuk mereken kurban persembahen. Sengaja penulis ngataken kerna kurban persembahen, sebab man kalak Yahudi nehken persembahen eme sada kewajiban siharus ilakokenna. Bagepe lit ulihna ibas nehken persembahen eme pasu-pasu Tuhan.

3.      Kiniteken banci ertumbuh erkiteken lit peminpin i tengah-tengah perpulungen, sebab tugas peminpin eme ngepkep perpulungen. Janah iajarina kerna kata Dibata man perpulungen, janah enda idalanken alu meriah ukur, emaka kewajiban anggota perpulungen eme patuh nandangi peminpin. Jadi ibas litna kepatuhen anggota perpulungen man peminpin maka lit dua aspek sijadi eme kiniteken anggota perpulungen erdewasana, bagepe peminpin perpulungen ndahikenna alu tutus ras meriah ukur. Tapi adi anggota perpulungen la lit kepatuhen man peminpin, maka sada kerugin man anggota perpulungen. Anggota perpulungen banci ijola-joleken erbage-bage pengajaren sipapak, bagepe adi jumpa perbeben ras kiniseran, anggota perpulungen banci ndabuh kubas dosa.

4.       Bagepe kewajiban anggota perpulungen eme notoken Penulis, gelah penulis lit ibas sehat-sehat, emaka banci penulis reh ndahi perpulungen. Enda sada harapen penulis nandangi perpulungenna. Tujun gelah penulis banci reh mulihi i tengah-tengah perpulungen, la saja erkiteken tedeh ate, tapi gelah penulis banci ngajari anggota perpulungen erbagesna kerna Kata Dibata, emaka kiniteken anggota perpulungen tetap ras paguh.

5.      Penulis ndungi   kata persingetna alu pasu-pasu ibas Tuhan nari. Tujun pasu-pasu e gelah Tuhan erdahin i tengah-tengah anggota perpulungen, gelah anggota perpulungen nggeluh ibas kedamen ras ngelakoken kerna kai simehuli singena ate Tuhan. Enda banci ilakoken adi anggota perpulungen nggeluh ibas kepentaren. Janah anggota perpulungen banci ndalanken simehuli singena ate Tuhan adi isampati Tuhan. Tuhan sierdahin man perpulungen e. Emaka erkiteken simehuli ras  singena ate Tuhan siilakoken anggota perpulungen kedungenna Tuhan termulia seh rasa lalap.

APLIKASI

            Gereja banci erkembang adi anggota perpulungen aktif ibas gereja. Erkiteken sie rusur ipersingeti gereja gelah lit min keterlibatan anggota gereja ibas erbage-bage kegiaten gereja. Bagepe harus isadari anggota perpulungen, selaku anggota gereja lit tanggungjawabta guna kemajun ras pelayanan itengah-tengah gereja. Tanggungjawabta lit ibas telu  bentuk eme sipemena selaku anggota gereja kita harus njaga persadan ras kiniersadan gereja, alu bage kita jadi gereja simegegeh si la banci icedai erbage-bage pengajaren sipapak. Bagepe selaku gereja simegegeh maka kita nggeluh ibas kekelengen ras sisampat-sampaten. Sipeduaken : kita harus naggung tangungenta. Janah enda nggo siakuken paksa kita ingawanken ibas gereja. Sebab perlu siteh pelayanen-pelayanen gereja selain harus isampati arah pertoton, tapi pe arah dana, emaka anggota perpulungen nggo min meteh kerna sie. Alu bage nggo lit dana sirusur isikapken guna pelayanen gereja. Sebab ibas kita ngelakoken si bage maka teridah man banta kerna kedewasaan kinitekenta. Sipeteluken : anggota perpulungen harus notoken serayan Tuhan singelai ibas perpulungen, gelah serayan Tuhan ngelai alu meriah ukur ras tetap ukur.

Pdt. Steven Kumenit, STh.M.Min

Keluarga Sierkoinonia, Erdiakonia ras ermarturia (Mazmur 112:1-6)

PEKAN KELUARGA

GEREJA GBKP 

WARI IV, RABU 4 JUNI 2014.

Introitus   :    Kenca tiap pesta enggo dung, lampas erpagi-pagi keke Jop, jenari ipersembahkenna persembahen tutungen guna pebadiaken anakna e sekalak-sekalak. Si e ilakokenna sebab rukur ia, banci jadi anakna e nggo erbahan dosa si la teridah, janah erkiteken si e ceda ukur Dibata alu la iarapna (Jop 1:5).

Ogen        :    Kolose 3: 12-17.

Khotbah   :    Mazmur 112:1-6.

Tema        :    Keluarga Sierkoinonia, Erdiakonia ras ermarturia.

LATAR BELAKANG

1.      Bangsa Israel eme bangsa singgeluh ibas ikaten-ikaten perpadanan ras Tuhan. Ibas ikaten perpadanan e,  i je ikataken, adi bangsa Israel patuh man Tuhan ras ndalanken kataNa ibas kegeluhen tep-tep wari, maka bangsa Israel ndatken pasu-pasu ibas Tuhan nari. Janah erbage-bage pasu-pasu sierbereken Tuhan, banci umur gedang, erta, kemalemen ate ras perlindungen Tuhan.

2.      Bahan khotbanta sekali enda eme ncidahken uga malemna bangsa simbiar ras ndalanken perintahNa sebab kegeluhenna ipasu-pasu Tuhan. Enda ikataken Pemazmur, sebab iidah ras igajepken pemazmur kerna keleng ate Tuhan e tetap. Bagepe iidah pemazmur manusia bali kap ras batang kayu siturah itepi lau sitetap nggeluh ras erbuah ibas paksana (band. Mazmur 1:3)

3.      Ibas bangsa Tuhan mbiar ras ndalanken peintah Tuhan, la saja ndatken erta tapi pe bangsa Tuhan nggeluh ibas kinipangen nggeluh. Bangsa Tuhan la mbiar jumpa musuh, sebab lit Tuhan tetap nampati bangsaNa. Sebab ibas pengalaman pemazmur, idahna la lit kuasa ibas doni enda sibanci naluken kuasa Tuhan.

4.      Ibas bangsa Tuhan mbiar ras ndalanken perintah-perintahna maka lit bas bangsa Tuhan kepentaren. Kepentaren enda mbaba bangsa Tuhan erdiate ras nampati  kalak sideban simbutuhken penampat. Sebab man bangsa Tuhan, la akapna meriah adi lit kalak si nggeluh ibas perbeben ras kiniseran, emaka iberekenna penampat man kalak simbutuhken penampat, labo erkiteken keterpaksaan, tapi ilakokenna erpalasken meriah ukur. Sebab kalak si mbiar man Tuhan, la saja ikelengina Tuhan tapi pe ikelengina kalak sideban bagi dirina jine. Memang ibas kegeluhen bangsa Israel soal nampati man kalak musil harus idalankenken sebab enda perintah Tuhan

5.      Pemazmur ngataken enda, gelah bangsa Israel tetap termotivasi nggeluh mbiar man Tuhan. Sebab inti nggeluh ibas kemalemen ate ras keriahen eme nggeluh mbiar ras ndalanken perintahNa.

APLIKASI

            Nggeluh ibas kemalemen ate ras keriahen eme sada sura-sura kerina jelma. Tapi mekatep salah kita ndatkenca. Memang ibas doni enda melala tawaran-tawaran guna ndatken kemalemen ate ras keriahen. Tapi selaku kalak kristen harus siteh kemalemen ate ras keriahen situhu-tuhu lit man Dibata ngenca. Emaka guna ndatken kemalemen ate ras keriahen situhu-tuhu e harus kita mbiar man Tuhan ras ndalanken perintah-perintahNa. Erkiteken sie me ibas perintah Tuhan salah sada i je ikataken kelengilah Tuhan Dibatandu asa ukur, tendi ras gegehndu. Bagepe ngkelengilah manusia, bagi kam ngkelengi dirindu jine (band. Ulangan 6:5; Matius 22:37-40).

            Ngkelengi Tuhan ras manusia harus teridah ibas telu aspek (tri tugas gereja). Janah enda la saja program grereja secara konstitusi siharus idalanken, tapi pe man banta kerina kita kalak kristen. Janah ibas dalanken enda harus alu ukur meriah.

            Mbiar man Tuhan alu bulat ukur mbaba kita nggeluh ibas ndalanken perintah-perintah Tuhan, khususna tri tugas gereja (Koinonia, Diakonia ras Merturia). Emaka lit bas pusuhta erburak-burak ndalanken perintah Tuhan. Emaka kai pe kesibukenta, ateta tetap reh ku perpulungen sebab ibas kita ersembah man Tuhan lit i je perjumpan kita ras Tuhan, bagepe  banci berkomunikasi ras Tuhan, bagepe ras sapih-sapihta manusia. Bagepe tentuna la meriah ukurta adi lit temanta manusia silit ibas perbeben, emaka terdilo kita guna nampatisa. Bagepe adi lit temanta si erceda ate, reh kita ngapulisa. Sebab enda salah sada ujung tombak gereja nehken pelayanan man anggotana. Bagepe kita harus muat bagin ibas ermarturia. Apai ka genduari lit program-program gereja kerna kerjasama antar runggun, enta pe er-PI ibas ingan-ingan tertentu. Mari ibas pusuh siersuruh nggit kita muat bagin ikut ibas pelayanan er-PI. Alu bage la saja kita ndatken kemalemen ate, tapi kalak sideban pe nggeluh ibas kemalemen ate.

Pdt. Steven Kumenit, STh.M.Min.

           

           

Anak (KA-KR. Permata) Sierkualitas (1 Timotius 4:12-15)

PEKAN KELUARGA

GEREJA GBKP

WARI III, SELASA 3 JUNI 2014.

Introitus     :    Jusup pe berkat i kuta Nazaret i Galilea nari ku kut Betlehem i daerah Judea, kuta ketubuhen Raja Daud; sabab Jusup kesusuren Daud kap (Lukas 2:4).

Ogen          :    1 Samuel 3:1-10.

Khotbah     :    1 Timotius 4:12-15.

Tema          :    Anak (KA-KR. Permata) Sierkualitas

LATAR BELAKANG

1.      Secara umum kitab Timotius enda igelari kitab pastoral, sebab isina mpegegehi ras pengelayasi man Timotius sitading i perpulungen Epesus sicukup kompleks masalah ras pelayanen i je. Enda isehken Paulus man Timotius erkiteken Timotius nguda denga. Bagepe Timotius enda anak Paulus ibas kiniteken.

2.      Kiniteken perpulungen Efesus harus berkembang emaka ajaran-ajaran sipapak sicukup berkebang i Efesus harus ilawan ras kata Dibata. Emaka Timotius amin gia nguda denga harus tutus ngajari perpulungen erpalasken pengajaren situhu-tuhu eme Kata Dibata.

3.      Isamping sie Timotius harus tutus erdahin gelah la lit ise pe simapas man Timotius, sebab ibas pelayanan ras pengertin kerna Kata Dibata, Timotius nggo mbeluh. Jadi ate Paulus gelah igejapken Timotius aminna umurna nguda denga tapi   ula jadi hambatan ibas pelayanan.

4.      Timotius harus membekali dirina arah Kata Dibata gelah kinitekenna erdewasana, bagepe spiritualitas Timotius erdewasa, emaka Timotius harus tutus ngoge kata Dibata, bagepe pe ndalanken Kata Dibata ibas kegeluhena tep-tep wari, emaka moral ras lagu langkah Timotius la jadi batu antuken man perpulungen.

5.      Tujun pengelayasi  Paulus enda eme gelah Timotius megegeh ibas erbage-bage persoalen si lit i tengah-tengah perpulungen Epesus ras ngasup ndat serpang pulah. Alu bagepe la saja kiniteken Timotius sierdewasana tapi pe kiniteken perpulungen ermajuna . Alu bagepe la lit ingan man pengajaren-pengajaren sipapak sibanci mpengaruhi kiniteken perpulungen, sebab perpulungen hanya tek ibas pengajaren kerna Kata Dibata ngenca

APLIKASI

            Sue ras ogen ras bahan khotbahta enda adi ateta anak-anakta nggeluh erkualitas, subuk kiniteken, moral ras lagu langkahna, maka la banci lang anak harus iajari kerna kata Dibata ras nggeluh ibas Kata Dibata, alu bage ngena ate Tuhan man bana. Tapi siidah cukup nterem orang tua la mperdiateken sienda, emaka perkembangen spiritualitas anak agak lambat, ntah pe la lit, emaka ibas pergaulan anak, mekatep ia ndabuh ku bas dosa arah nggeluh ibas pinakit sosial.

            Ibas perkembangen zaman sigenduari enda, nggo seharusna orang tua mperdiateken perkembangen spiritualitas anak. Orang tua harus naruhken  anak ku gereja, bagepe orang tua harus ngajari anak ngoge Pustaka Si Badia tep-tep wari. Jadi alu kata gendek lit min ibas keluarga, khususna orang tua ngkelengi anakna, emaka kebaktin keluarga harus ipegeluh. Emaka amin gia anakta nguda denga, moral ras lagu langkahna dewsaa, sebab lit bas anak-anakta kepentaren. Emaka la lit si mapas nandangi anakta e. Bagepe amin gia anakta e nguda denga, ia nggo banci jadi pancur pasu-pasu Tuhan nandangi anak-anak sideban, bagepe si lebih dewasa asangken ia.

Pdt. Steven Kumenit, STh.M.Min.

Orang Tua (Bapa, Nande Siberkualitas) (Ulangan 6:1-9)

PEKAN KELUARGA

GEREJA GBKP

WAI II, SENIN 2 JUNI 2014.

Introitus   :    Ajarkenlah man anak uga kearusen nggeluh, maka ikutkenna asa umurna nggeluh (Kuan-K.uanen 22:6).

Ogen        :    Kuan-Kuanen 31:20-31

Khotbah   :    Ulangan 6:1-9.

Tema        :    Orang Tua (Bapa, Nande Siberkualitas)

LATAR BELAKANG

1.      Bahan khotbahnta sekali enda, eme  pidato Musa man bangsa Israel, paksa bangsa Israel ngadi i dataran Moab. Pidato enda isehken man bangsa Israel erkiteken 1). Musa la ibere Tuhan bengket ku taneh Kanaan. 2). Bangsa Israel si lit i dataran Moab, eme bangsa Israel angkatan simbaru. Angkaten simbaru enda eme angkatan si la secara langsung megi kerna undang-undang siisehken Tuhan man bangsa Israel, paksa bangsa Israel ndarat i taneh Mesir nari, janah ngadi i Deleng Sinai. Ibas deleng Sinai enda lit ikaten ras undang-undang siipeseh Tuhan man bangsa Israel. Itaneh Kanaan tentuna lit penghunina ras lit agamana, janah tentuna lit dibatana Erkiteken sie me bangsa Israel sinandangi bengket ku  taneh Kanaan, ipersingeti Musa gelah bangsa Israel ngikuti undang-undang ras erkemalangan man Tuhan saja, sedekah nggeluh i taneh Kanaan.

2.      Bengket ras nggeluh i taneh Kanaan eme sada pasu-pasu man bangsa Israel sebab 1). Tanah Kanaan eme tanah siipadanken Tuhan man bangsa Israel, janah i je melala dadih ras tengguli. 2). Bangsa Israel banci nggeluh alu meriah ukur sebab bangsa Israel nggo mbentasi 40 tahun dekahna nggeluh ibas perdalanan. Tapi ibalik kerina enda, bangsa Israel harus metenget, sebab isekelewet bangsa Israel nggeluh bangsa si la nandai Tuhan. Tentuna adi bangsa Israel la metenget, maka bangsa Israel banci erdosa.

3.      Ipersingeti Musa bangsa Israel, erkiteken bangsa Israel eme bangsa Dibata. Maka selaku bangsa Dibata harus nggeluh erkemalangan man Tuhan, simpedarat bangsa Israel ibas taneh perbudaken nari ras ngkawali bangsa Israel ibas perdalanen nari janah naruken bangsa Israel ku taneh Kanaan. Erkiteken sie me ibas undang-undang (sepuluh pedah Dibata), ibas pedah sipemenah ras sipeduaken ngataken gelah ola lit dibata-dibata sideban ras ula bahan gana-gana ras ersembah man bana. Erkiteken sie me bangsa Israel harus ngkelengi Tuhan asa ukur, tendi ras gegehna.

4.      Ngkelengi Tuhan harus teridah ibas kegeluhen bangsa Israel tep-tep wari. Erkiteken sie secara pribadi kalak  Israel harus ngiketken undang-undang ibas pergelangen tan ras iikat ibas perdempaken. Bagepe selaku orang tua (bapa), penanggungjawab kiniteken keluarga maka tanggungjawabna eme 1). Ngajarken man anak-anak ibas kerina kesempaten gelah anak-anak ngkelengi Tuhan ras erkemalangan man Tuhan saja. 2). Suratken ibas binangun pintun rumah ras ibabo puntu gerbang.

5.      Tujun Musa mpersingeti bangsa Israel eme gelah bangsa Israel ras kesusurenna ipasu-pasu Tuhan eme gedang umur, nggeluh mejuah-juah, jadi bangsa simbelin. Ngiani taneh simehumur sue ras singgo ipadanken Tuhan.

APLIKASI

            Selaku keluarga kristen, kita harus ngenen ras merefleksi kegeluhen keluarga kristen ibas Putaka si Badia nari. Adi sinen ibas pustaka Si Badia maka kegeluhen keluarga harus nggeluh ibas erkemalangen man Tuhan. Amin gia situhuna nggeluh erkemalangan man Tuhan cukup melala ndatken tantangan ibas lingkungen sekelewetta. Erkiteken sie me peranan pendidikan kristen i tengah-tengah keluarga harus megegeh, gelah keluarga, khususna anak-anak terhindar ibas kejahatan-kejahatan ras dosa. Sebab siidah ibas kegeluhenta tep-tep wari cukup melala silit isekelewetta sibanci mpengaruhi perkembangen kiniteken anak. Ngidah sie, maka peranan orang tua harus megegeh. Orang tua la cukup mpebelin ras ngasuhi anak arah mereken kecukupen materi ras pendidikan formal saja, tapi lebih asangken sie eme gelah anak-anak ngkelengi ras erkemalangen man Tuhan saja. Orang tua, bapa ras nande harus meteh tanggungjawab masing-masing i tengah-tengah keluarga. Emaka salah me adi mpebelin ras ngasuhi anak tanggungjawab nande saja, tapi tanggungjawab ras-ras. Emaka ibas rangka sie orang tua harus lit visi ras misi. Ibas erti kata keluarga kristen harus nggeluh ras erkemalangen man Tuhan. Emaka ibas ncapai misi e maka 1). Bapa ras nande harus harmonis. 2). Orang tua harus ngajarken man anak kerna Kata Dibata ras erkemalangan man Tuhan. 3). Orang tua harus nikapken waktu ras keluarga. 4). Keluarga harus tutus ersembah, subuk irumah bagepe i gereja. Gelah kerina keluarga ngkelengi ras erkemalangan man Tuhan saja.

Pdt. Steven Kumenit, STh.M.Min.