Kataken Si Tuhu (Yeremia 28:1-17)

BAHAN PJJ GEREJA GBKP

TANGGAL 24 – 30 AGUSTUS 2014.

Yeremia 28 : 1-17.

Tema : Kataken Si Tuhu.

LATAR BELAKANG

1.      Erkiteken kinilapatuhan bangsa Yehuda man Tuhan, maka ihukum Tuhan me ia alu cara iambengken ku Babel ras bangsa Yehuda iteruh kuasa bangsa babel. Tapi kenca piga-piga tahun dekahna bangsa Yehuda ia Babel ras iteruh kuasa babel, nggo mulai igejapna mesera, emaka nggo mulai terjadi pemberontakan-pemberontaken nandangi pemerintahen Babel. Tujun pemberontaken-pemberontaken e me gelah bangsa Yehuda bebas.

2.      I Rumah Pertoton Hananya ernubuat kerna pembebasan bangsa Israel, tapi nubuat e bertentangen ras sura-sura Tuhan. Sebab sura-sura Tuhan, bangsa Yehuda nggeluh iteruh kekuasaan bangsa Babel. Sura-sura Tuhan  selaku tababen, bangsa Yehuda  harus nggejapken kesalahen ras dosa siibahanna, emaka terjadi me pertobaten. Jadi bangsa Yehuda nggeluh selaku tabanen ibas rangka membentuk  bangsa Yehuda selaku bangsa Tuhan, emaka la bias bangsa Yehuda nggeluh i Babel piga-piga tahun saja (band. 29:10). Emaka nubuat nabi Hananya singataken bangsa Yehuda nandangi bebas, janah raja Nebudkanesar nandangi talu, bagepe barang-barang iventaris rumah pertoton singgo irampas/ ibaba bangsa babel iulihken mulihi, bagepe bangsa raja ras kalak Yehuda singgo itaban i babel ipulangkan la payo. Janah tanda ntah pe simbol kekalahan raja Nebukadnesar eme ipenggelken pasangen si lit ibas kuduk Yeremia. Memang harus siteh makna nubuat eme kai sura-sura Tuhan nandangi bangsaNa.

3.      Nubuat enda bertentangan ras sura-sura Tuhan. Bagepe nubuat nabi Hananya merugiken bangsa Yehuda sendiri, sebab kenca bangsa Yehuda megiken kai siikataken Hananya maka banci ertambah motivasi bangsa Yehuda guna memberontak man pemerintah Babel. Erkiteken si e me maka ncukup nterem kalak Yehuda ihukum pemerintah Babel erkiteken pemberotaken e.

4.      Memang nubuat Hananya merupaken sada harapen ras sura-sura kerina bangsa Yehuda eme nggeluh ibas kedamen. Tapi erkiteken la bage sura-sura Tuhan maka ilawan nabi Yeremia me nubuat Hananya e (band. Ayat 6-7, 15-16).

5.      Erkiteken nubuat Hananya palsu, maka ihukum Tuhan me ia, sebab enda nggo ngelawan Tuhan. Hukuman siibereken Tuhan man Hananya eme kematen.

APLIKASI

            Ibas kegeluhenta tep-tep wari, janah enda tempa nggo jadi sada budaya man kalak Karo eme belasken kata tengteng ula kata tuhu. Tentuna enda harus simaknai gelah kalak sideban la nembeh ate man banta, ntah pe tersinggung (bah. Indonesia =  Jaga perasaan). Ibas pihak sideban enda banci teraloken, tapi situhuna enda hal sila payo, sebab enda la mbentuk karakter situhuna.

            Kata tuhu harus ibelasken, gelah kalak sideban banci meteh kerna persoalenna, bagepe kerna perbahanen siilakoken. Persoalenna kita kurang pentar ngataken kata tuhu man kalak sideban. Erkiteken sie me kalak sideban la teralokenna kerna kata tuhu siibelasken kita, sidungna nembeh ia man banta. Kata tuhu harus sibelasken, tapi ibas paksa sitengteng.

Pdt. Steven Kumenit, STh.M.Min.  

Mamre GBKP Si Erkualitas (Kisah Para Rasul 10:1-2)

BAHAN PJJ GEREJA GBKP

TANGGAL 17 – 23 AGUSTUS 2014.

Perbahanen Rasul-Rasul 10:1-2.

Tema : Mamre GBKP Si Erkualitas.

LATAR BELAKANG

1.      Kornelius eme kalak Itali sierpangkat perwira janah jabatenna eme kepala pasukan. Kornelius tading i Kaisarea.  Perlu siteh Kaisarea eme kota pelabuhan ras Markas besar tentera (garnisun).

2.      Kornelius la saja tutus ersembah man Tuhan, tapi pe isampatina kalak Yahudi simusil. Bagepe Kornelius rusur ertoto bagi semalna ipraktekken kalak Yahudi. Kalak Yahudi ertoto 3 kali ibas sada wari, eme jam 9, jam 12 ras jam 3 karaben. Amin gia Kornelius kalak situtus ras nggo mpraktekken tuntutan-tuntutan agama eme nampati kalak musil ras tutus ertoto, tapi Kornelius lenga jadi penganut agama Yahudi, emaka  la ia iproselit. Sebab ibas kebiasaan agama Yahudi kalak siatena bengket kubas agama Yahudi harus iproselit (sunat).

3.      Ersembah man Tuhan la saja milik kalak Yahudi, tapi milik kerina jelma siatena ndatken keselamaten. Kornelius bagepe anggota keluargana ngenen keselamaten situhu-tuhu eme ersembah man Tuhan ras ndalanken kai singena atena, enda me siipraktekken Kornelius.

4.      Ketutusen Kornelius ersembah man Tuhan la erkiteken  ipaksa kalak, tapi tuhu-tuhu erkiteken pendilo Tuhan. Emaka mpraktekken tuntutan agama eme ertoto ras nehken kekelengen, ntah pe nampati kalak musil, idahikenna alu meriah ukur. Emaka adi sioge terdauhen, maka siidah i je, erkiteken kegeluhen sibage me ngena ate Tuhan man bana.

5.      Kusus mpraktekken nggeluh ertoto bagi siidalanken kalak Yahudi, ipraktken Kornelius la bagi piga-piga kalak Yahudi (kalak Farisi) sirusur ertoto ibas simpang-simpang pasar gelah idah kalak ia kalak situtus, tapi adi Kornelius la bage. Kornelius ertoto i rumah.

APLIKASI

            Temanta sendah berhubungen ras Mamre erkite-kiteken HUT Mamre. Ibas temanta sendah Mamre ipindo gelah jadi Mamre siberkualitas. Tentuna enda jadi sada harapen, la saja man Mamre e sendiri, tapi pe man jabu ras gereja. Sebab siidah adi Mamre berkualitas maka alu sendiri jabu siipinpin Mamre nggeluh alu ermalem ate, sebab isi jabu e mbiar man Tuhan. Bagepe selaku gereja tentuna nggeluh ibas keriahen ukur sebab litna keterlibaten Mamre ibas pelayanen gereja.

            Mamre siberkualitas berhubungen ras hubungen pribadi Mamre ras Tuhan. Ibas erti kata Mamre harus tutus ersembah ras ertoto man Tuhan, sebab ibas mamre tutus ersembah ras ertoto man Tuhan maka terjadi me spiritualitas simehuli, kiniteken Mamre teridah ibas kegeluhen tep-tep wari. Alu bage keterlibaten Mamre ibas pelayanen gereja semakin terasa. Jadi, inti nggeluh siberkualitas eme mbiar ras erkemalangan man Tuhan.

Pdt. Steven Kumenit,STh.M.Min.

O Bangsa-Bangsa Pujilah Tuhan (Mazmur 67:2-8)

KHOTBAH 17 AGUSTUS 2014

GEREJA GBKP

Introitus    :     Kupesusur kemenangen i langit nari desken udan, janah doni sikap ngalo-ngalosa. Jenari turah ia radu ras kebebasen dingen keadilen; Aku, TUHAN , si mahanca jadi si enda kerina (Yesaya 45:8).

Ogen         :     Matius 16:13-20 (Tunggal).

Khotbah    :     Mazmur 67 : 2-8 (Anthiponal).

Tema         :     O Bangsa-Bangsa Pujilah Tuhan.

LATAR BELAKANG

1.      Sijadi bahan kotbahnta eme mazmur ende-enden siiendeken ibas kebaktin i rumah pertoton. Ende-enden enda eme sada pemindon gelah Tuhan masu-masu bangsa Israel. Tujun pemindon enda eme gelah arah bangsa Israel, bangsa sideban banci meteh kerna peraten Tuhan ras bangsa sideban meteh Tuhan ngenca sibanci ngkelini manusia. Alu bage maka bangsa sideban reh man Dibata guna ersembah man baNa. Alu kata sideban, bangsa Israel ipasu-pasu Tuhan erkite-kiteken kepatuhen ras kesetiaan siicidahken bangsa Israel man Tuhan. Bentuk pasu-pasu Tuhan eme ibereken Tuhan kebutuhen nggeluh bangsa Israel. Iajari Tuhan bangsa Israel kerna kebenaren ras kebujuren bagepe ialemi Tuhan salah dosa bangsa Israel. Ibas pemasu-msun Tuhan enda me, maka bangsa sideban reh ndahi Tuhan gelah ia pe ndatken pasu-pasu ibas Tuhan nari. Jadi bangsa Israel nggejapken kerna makna pendilo Tuhan man bangsa Israel.

2.      Bagepe ende-enden la saja ngataken kerna keleng ate Tuhan, tapi pe ngataken kerna pemerintahen Tuhan. Pemerintahen Tuhan eme adil ras bujur, janah pemerintahen sibage me siibutuhken bangsa-bangsa. Erkiteken sie me reh ia man Tuhan gelah ndatken pemerintahen sibujur ras adil e. sebab ibas pemerintah (raja) ndalanken keadilen ras kebujuren, maka bangsa siipimpin raja e nggeluh ibas ketenangen ras keriahen, emaka bangsa banci nggeluh ibas kesejahteraan.

3.      Bangsa-bangsa banci nggecapken kerna kemalemen ate siibereken Tuhan, maka termotivasi bangsa-bangsa e ngataken bujur man Tuhan. Lanai bangsa-bangsa e reh ku dibata-dibata sideban, sebab sea-sea akapna e.

4.      Ende-enden enda eme sada harapen gelah kerina bangsa-bangsa reh ndahi Tuhan ras patuh ibas pemerentahen Tuhan. Alu bage kegeluhen bangsa-bangsa nggeluh ibas kedamen. Enda banci jadi erkite-kiteken la lit dibata sideban singasup mereken keadilan ras kebujuren (band. Mazmur 86:8-10).

5.       Ibas kegeluhen siermalem ate erkite-kiteken pasu-poasu Tuhan man bangsa, mabai bangsa e ngataken bujur ras muji Tuhan.

APLIKASI

            Temanta sendah eme sada pengajuk gelah kerina bangsa-bangsa, khususna bangsa Indonesia muji Tuhan. Jadi penungkunen, engkai harus sipuji Tuhan ? erkiteken: 1). Erkite-kiteken Tuhanlah simereken kemerdekaan man bangsa Indonesia. 2).  Tuhan singarak-ngarak bangsa Indonesia seh genduari.

            Pengajuk man bangsa-bangsa gelah puji Tuhan, sebab adi bangsa-bangsa muji Tuhan berarti bangsa-bangsa e la saja ngataken bujur ras, patuh  man Tuhan, tapi pe lit sada pengakun kerna pemerintahen Tuhan. Sebab perlu sisadari bangsa e pemere Tuhan, bagepe pemerintah  e ibas Tuhan nari, janah pemerintah e, Dibata kap sinetapkenca (band. Roma 13).

            Ibas pengakun kerna pemerintahen Tuhan e, maka bangsa-bangsa nggeluh ibas ketenangen ras kedamen. Bangsa-bangsa la nggeluh ibas peperangen. Bangsa-bangsa reh ersembah man Tuhan ras tetap nggeluh ibas kepentaren Tuhan (band. Yesaya 2:3-4).

Pdt. Steven Kumenit, STh.M.Min.

             

Aku Me Sindilo Kam Guna Jadi Terang (Yesaya 42:6-9)

BAHAN PJJ GEREJA GBKP

TANGGGAL 10 – 16 AGUSTUS 2014.

Yesaya 42 : 6 – 9.

Tema : Aku Me Sindilo Kam Guna Jadi Terang

LATAR BELAKANG

1.      Sijadi bahan oratenta sendah eme nubuat nabi Yesaya man bangsa Israel, paksa bangsa Israel nggeluh ibas pembuangen i Babel.

2.      Yesaya alu terang ngataken kerna erti pemilihan bangsa Israel ndube. Pemilihan Tuhan man bangsa Israel eme hak preogatif Tuhan, janah pemilihan e ibas rangka keselamatan kerina bangsa.  Jadi bangsa Israel ipake Tuhan guna jadi alatNya.

3.      Bangsa Israel  i taneh pembuangen i Babel nggejapken Tuhan la erkuasa i je, erkiteken sie, Tuhan la banci nampati ia. Ibas pemikiran bangsa Israel, kuasa Tuhan terbatas ngenca i Israel. Kuasa Tuhan la seh ku Babel. Ibas situasi sibagenda me reh nabi Yesaya ngataken kerna kuasa ras keleng ate Tuhan man bangsa Israel ras man kerina bangsa. Yesaya mereken sada pengangkan mulihi kerna kehadiran bangsa Israel ibas doni enda. Alu ngataken maka Tuhan similih bangsa Israel, ras sinegu-negu bangsa Israel ibas kegeluhenna tep-tep wari. Penegu-negu Tuhan man bangsa Israel tentuna seh ku Babel. Tuhan la pernah ingkar kerna perpadanenNa ras bangsa Israel. Bagepe isingetken Yesaya maka selaku alat Tuhan, lit siharus idahikenna, janah enda sura-sura Tuhan man kerina jelma ras bangsa. Tugas simereken terang (keselamatan) man bangsa-bangsa. Pemedakken mata kalak pentang, mulahi kalak sitertutup ibas penjara sigelap.  Alu bagenda ibahan bangsa Israel maka igejapken kerina jelma/bangsa Tuhan e mehuli (band. Mazmur 145:9a).

4.      Bangsa Israel ibas kegeluhen i taneh pembuangen, babel, nggejapkenken lit sada hambatan ibas ia ersembah man Tuhan, enda erkiteken beban kiniseran siinanamina ibas taneh pembuangen.  Bagepe lit penggejapen sisalah bas bangsa Israel, eme ija lit sierpengakap maka Tuhan nggo nadingken ia. Erkiteken sie me maka nggo nterem kalak Israel ersembah man gana-gana bangsa Babel. Erkiteken sie me ipersinngeti Yesaya bangsa Israel kerna Tuhan. Tuhan bangsa Israel sada ngenca. Erkiteken sie bangsa Israel ersembah man Tuhan ngenca, la banci lit dibata-dibata sideban man bangsa israel.

5.      Kemulian hanya milik Tuhan, la lit man gana-gana. Ibas erti kata sinjadiken doni enda Tuhan ngenca, ras sinelamatken bangsa Israel, Tuhan ngenca. Gana-gana sitik pe la ikut muat bagin ibas sie. Emaka kemulian e milik pribadi Tuhan. Erpalasken enda, maka bangsa Israel harus ersembah man Tuhan saja.

APLIKASI

            Pendilo kalak sitek ibas doni enda eme jadi Terang i tengah-tengah doni enda. Pengertin jadi Terang eme kita jadi alat Tuhan guna nelamatken doni enda. Arah  kita kalak sideban banci ngidah keselamatan situhu-tuhu. Emaka sipaling penting bas kita, gelah kita nggeluh ibas terang, maka kegeluhenta nggeluh min ersada lebe  ibas Terang situhu-tuhu eme Yesus (band. Yohanes  9:5).

            Kegeluhen terang singgo ibereken Tuhan man banta, teridah min ibas kegeluhenta tep-tep wari. Ibas perbahanen simehuli singena ate Tuhan; ndalanken kebujuren, keadilan i tengah-tengah kita berbangsa ras bernegara merupaken sada bukti terang nggo ersinalsal isekelewetta.

            Kegeluhen terang merupaken sada bentuk guna mpehuli ras mbaba bangsa Indonesia ku kegeluhen silebih mehuli ras sejahteran.

            Marilah kita jadi terang i tengah-tengah bangsa indonesia, gelah kemerdekaan Indonesia banci sinanami alu meriah ukur. Bagepe marilah sitotoken gelah bangsa Indonesia enda nggeluh ibas kedamen ras kemajun.

Pdt. Steven Kumenit, STh.M.Min.