Dibata Sierdolat (Mazmur 93:1-5)

PEKAN DOA

GEREJA GBKP

WARI I, MINGGU 21 SEPTEMBER 2014.

Introitus    :    TUHAN si Erdolat reh alu kinimbisanNa, lako jadi raja si dem alu kuasa. Nehenlah, radu ras kerehenNa, ibabaNa upah man bangsaNa (Jesaya 40:10).

Ogen         :    Keluaren 3: 1-6.

Khotbah    :    Mazmur 93:1-5.

Tema         :    Dibata Sierdolat.

LATAR BELAKANG

1.     Bahan khotbahnta sekali enda eme sada pengakun kiniteken (credo) kerna Tuhan. Ija Tuhan igambarken sebage Raja sierkuasa, simelebihi kuasa-kuasa siapai pe si lit ibas doni enda.

2.     Tuhan selaku Raja ngataken maka la lit Tuhan sierkuasa seakan Tuhan siisembah bangsa Israel. Tuhu lawit lit kuasana. Enda teridah ibas galumbang. Galumbang lawit banci naluken ise saja si lit ibas lawit. Tapi adi ras Tuhan maka galumbang lawit e la erkuasa. Janah enda nggo ibuktiken Tuhan, uga Tuhan naka lawit gelah bangsa Israel banci erdalan, tapi tentra Firaun mate erkiteken galumbang lawit e.

3.     Ibas pengakun Tuhan selaku Raja, ate pemazmur ngataken maka Tuhan sierkuasa ras memerintah kerina doni enda. Memang ibas doni lit pemerintahen (raja), termasuk bangsa Israel, tapi kerina e terjeng wakil Tuhan ngenca. Emaka bangsa Israel harus ncidahken keadilen ras kebenaren ibas doni enda gelah teridah kemulian Tuhan. Raja bangsa Israel simerupaken wakil Tuhan ibas doni enda harus mendorong para imam gelah memelihara ibadat situhu-tuhu. Bagepe selaku wakil Tuhan, adi lit ancaman bahaya i darat nari, maka harus mindo penampat man Tuhan saja.

4.     Ngidah kerna kuasa Tuhan, maka secara la langsung, pemazmur ngataken maka manusia la lit ertina adi ibandingken ras Tuhan. Emaka selaku manusia  tek min man Tuhan saja, janah bangsa Israel tek min man undang-undang Tuhan. Sebab ibas bangsa Israel tek man undang-undang Tuhan, maka bangsa Israel nggeluh ibas keselamaten. Bagepe bangsa Israel harus ngenen maka Rumah Pertoton si merupaken Rumah Dibata harus jadi ingan ersembah man Tuhan. Bagepe harus ibadiaken seh rasa lalap.

5.     Mengandalkan Tuhan eme palas keselamaten bangsa Israel. Bangsa Israel harus tuhu-tuhu ndalanken undang-undang Tuhan ibas kerina kegeluhenna tep-tep wari.

APLIKASI

            Dibata siisembah kita eme Dibata sierdolat. DolatNa teridah ibas kuasaNa. Kuasa Tuhan ngasup naluken  kuas-kuasa si lit ibas doni enda. Emaka man baNa saja kita harus ersembah. Kedolaten Tuhan e harus pe teridah  man banta. Maksudna kita selaku kalak kristen harus njaga kebadian geluhta, ula kita erbahan si la mehuli man Tuhan. Bagepe Kata Tuhan harus jadi gelemen man banta ras sipakeken ibas kegeluhenta tep-tep wari. Ibas kita makeken kataNa, tentuna lit upahta siisikapken Tuhan.

Pdt. Steven Kumenit, STh.M.Min.

           

Ula Erpekat Erbahan Pertakin (Nehemia 6:1-13)

BAHAN PJJ GEREJA GBKP

TANGGAL 14 – 20 SEPTEMBER 2014.

Nehemia 6 : 1-13.

Tema : Ula Erpekat Erbahan Pertakin.

LATAR BELAKANG

1.      Ibas kegeluhen bangsa Israel, tembok Yerusalem merupakan sada hal sipenting, sebab fungsi tembok Yerusalem eme sada pelindung ibas serangan musuh nari. Emaka ibas tembok Yerusalem ceda erbahanca bangsa Yahudi lanai lit sada pertahanan. Bangsa Yahudi banci iserang musuh. Ibas palas enda me Nehemia selaku pelayan pribadi raja Artasasta, raja Persia, mindo man raja Artasasta gelah ia banci mulih ku Yerusalem guna mbangun tembok Yerusalem mulihi.

2.      Ibas izin raja Artasasta, Nehemia minpin pembangunan tembok Yerusalem, gelah bangsa Yahuda singgo mulih i tanah pembuangan nari i Babel, erkiteken ihukum Tuhan banci nggeluh teneng. Tapi pembangunan tembok Yerusalem e ndatken perlawanan, khususna arah musuh-musuh kalak Yahuda Tobi ras Sanbalat. Amin gia lit tantangan, tapi Nehemia ertetap ukur guna  mbangun tembok Yerusalem e.

3.      Erbage-bage upaya penggagalan mbangun tembok Yerusalem ibas musuh-musuh nari, tapi kerina e gagal. Emaka adi sinen bahan oratenta, eme salah sada upaya musuh-musuh Yehuda guna nggagalken tembok Yerusalem e. Janah sekali enda musuh-musuh Yehuda berencana guna munuh Nehemia. Alasan munuh Nehemia eme, adi nehemia mate maka bangsa Yehuda lanai semangat ras termotivasi mbangun tembok Yerusalem. Sebab Nehemia me sedekah enda sitetap mereken semangat man bangsa Yehuda guna tetap mbangun tembok Yerusalem ras pintu gerbangna.

4.      Ibas oratenta teridah lit telu kali upaya guna munuh Nehemia eme 1). Itenahken musuh-musuh Nehemia gelah Nehemia erjumpa ras musuh-musuhna i Kefirim, i lembah Ono. Daerah enda letakna i dataren pantai sebelah tenggara kota Yafo. Daerah enda la daerah Yehuda. Tujunna perjumpan enda gelah Nehemia ibunuh i je. Tapi rencana enda iteh Nehemia, emaka la nggit Nehemia ku je. 2). Erbahan perjumpan sebab lit sada isu Nehemia mbangun tembok Yerusalem ras nggit jadi raja gelah mberontak man kerajaan Persia. Sura-sura enda nandangi seh man raja Persia. Alasan enda isehken Sanbalat ras musuh-musuhna, alu sada sura-sura, Nehemia minter mbiar, alu bage nggit erjumpa ras musuh-musuhna guna erbahan arih-arih ras musuh-musuhna, gelah adi seh berita enda man raja Persia banci lit sada alasen guna ngataken man raja Persia, enda kerina la tuhu. Tapi sura-sura musuh-musuh e gagal. Sebab iteh Nehemia siding musuh-musuhna. 3). Ibas perjumpan Nehemia ras nabi Semaya, isuruh Semaya gelah ia duana cebuni ibas ingan si Badia i Rumah Pertoton. Cara enda pe gagal. Sebab nggo iteh Nehemia maka Semaya enda nggo isogok Tobia ras Sambalat. Bagepe adi iikuti Nehemia pengajuk Semaya, maka sue ras hukum agama Yahudi, Nehemia harus ihukum mati (band. Bilangan 18:1-7), sebab nggo bengket ibas ingan si Badia, siikhususken imam simbelin saja sibanci bengket i je. La banci kalak si deban, apai ka si la imam, jadi Nehemia nggo erdosa.

5.      Sura-sura musuh-musuh Yehuda enda iteh Nehemia kerina sebab Nehemia mbiar ras erkemalangan man Tuhan, emaka lit kepentaren man bana. Bagepe iteh Nehemia kerina e guna mengagalkan pembangunan tembok Yerusalem ras pintu gerbangna, sebab atena nerang bangsa Yehuda.

APLIKASI

            Pertakin eme sada perbahanen singelawan Tuhan, sebab pertakin eme sada kejahaten. Emaka kita selaku anak-anak Tuhan ula erbahan pertakin, api ka erpakat erbahan pertakin.

            Memang sisadari ibas kegeluhenta bersekutu, berorganisasi mekatep la bagi sura-suranta, mekatep identa la dalan.Konsekwensina maka program pelayanan ibas gereja harus erdalan bagi ide temanta. Identa labo berarti la mehuli, tapi lit ide temanta si lebih mehuli asangken identa. Ibas hal enda ula kita merawa janah erpakat kita erbahan pertakin.Adi enda silakoken maka tentuna program pelayanan i tengah-tengah gerejanta terganggu ntah pe la erdalan. Sienda la program si rugi tapi pelayanan guna keselamaten terhambat, emaka kita nggo ersalah ras erdosa man Tuhan.

Pdt. Steven Kumenit, STh.M.Min

Metengetlah Nandangi Pengajuk Si La Mehuli (Bilangan 13:25-14-23).

SERMON PJJ GBKP KAMPUNG SUSUK

TANGGAL 7 SEPTEMBER – 13 SEPTEMBER 2014

Bilangan 13:25-14:23.

Tema : Metengetlah Nandangi Pengajuk Si La Mehuli.

LATAR BELAKANG

1.      Sijadi oratenta sendah eme turi-turin bangsa Israel nandangi bengket ku tanah Kanaan. Ibas rangka bangsa Israel bengket ku taneh Kanaan, reh Tuhan man Musa, janah  isuruh Tuhan gelah Musa mengutus 12 kalak pemimpin ibas tep-tep suku guna jadi mata-mata i tanah Kanaan. Tujun mata-mata e gelah bangsa Israel nggo lit sada gambaran kerna situasi ras keadaan tanah Kanaan, alu bage bangsa Israel banci mpersiapken diri guna bengket ku tanah Kanaan.

2.      40 wari dekahna mata-mata bangsa Israel i tanah Kanaan tapi kenca mulih, melapor 12 mata-mata enda man Musa. Lit 2 bentuk laporan eme 10 kalak ngatakenca tuhu tuhu mehuli tanah e, tapi kalak siringan i je kalak raksasa ras lit musuh Israel eme kalak Amalek, bagepe kuta-kutana mbelin ras bentengna megegeh, erkiteken sie la kap ngasup bangsa Israel bengket ras naluken bangsa-bangsa si lit i tanah Kanaan e. Laporan 10 kalak enda ncidahkan pesimistis ras kebiaren. Tapi Kalep alu sora optimis ngatakenca genduari harus iserang janah sikuasai taneh e sebab bangsa Israel cukup megegeh guna ngkuasaisa. Lapaoran kalep enda mesera teraloken si 10 kalak e, emaka ihasutna kalak Israel, emaka jungut-jungut bangsa Israel man Tuhan emaka ate bangsa Israel milih sekalak pemimpin simbaru guna mbaba ia kerina mulih ku Mesir, sebab mbiar kal kalak enda mate, erkiteken sie merawa Tuhan man bangsa Israel, amin gia situhuna Josua ras Kalep nggo mereken kata pengapul ras pergegeh gelah termotivasi bangsa Israel guna bengket ku tanah Kanaan tapi tetap saja la ibeginap ras Yosua, emaka ate Tuhan ngukum bangsa Israel. Penghukumunan Tuhan, tangtangna arah sada pinakit maka bangsa Israel banci kernep, tapi erkiteken lit sada pemindon Musa maka ialemi Tuhan dosa bangsa Israel, tapi tetap nge Tuhan ngukum ia alu la banci bengket ku taneh Kanaan seakan Kalep , Yosua ras kesusurenna.

3.       Merawa Tuhan man bangsa Israel erkite-kiteken bangsa Israel  la tek ibas kepemimpinen Tuhan. Padahal ibas perdalanan, Tuhan tetap nemani ras njagai ia, ibas suari Tuhan erdalan arah lebe eme tiang embun, janah berngi tiang api, bagepe paksa bangsa Israel ngadi, Tuhan tetap tading i kemah Perjumpaan, bagepe ise atena nggagalken rencna Tuhan, ntah pe nerang bangsa Tuhan, maka Tuhan sendiri siminpin bangsa Israel erperang ras musuh e, emaka bangsa Israel ndatken kemenangen, termasuk menang ngelawan bangsa Amalek.

4.      Jungut-jungut man Tuhan erbahanca bangsa Israel la banci bengket ku taneh Kanaan, tapi tek ibas kepeminpinan ras kuasa Tuhan mabai Kalep ras Yosua ipasu-pasu Tuhan.

5.      Isuruh Tuhan gelah iselidiki tanah Kanaan, sebab enda ibas rencana Tuhan.  

APLIKASI

            Nggeluh ibas kebiaren erbahanca kita lanai pang nggeluh ibas optimistis, bagepe lanai pang kita ndalanken simehuli singena ate Tuhan. Enda kerina jadi erkite-kiteken la sitandai kerna Tuhan ras kepeminpinanna man banta.

            Ibas kegeluhenta tep-tep wari, banci saja sijumpai pengajuk si la mehuli (sesat), erkiteken sie kita harus metenget. Sebab adi terpengaruh ibas pengajuk-pengajuk si la mehuli e maka kita banci erdosa. Kalak si mpraktekken pengajuk si la mehuli ras ngajuk kalak guna ikut ia, kalak sibage igolongkan kalak jahat ras pendosa, emaka adi siikuti pengajuk si lamehuli e erbahanca geluhta la nggeluh ibas kemalemen ate.

            Metenget berarti kita harus mbentengi diri kita gelah la terikut ibas pengajuk si lamehuli e, sebab adi terikut  berarti ihukum Tuhan kita pagi. Emaka pengajaren simehuli harus siteh, erkiteken sie kita harus tutus ngoge Pustaka Si Badia, sebab Pustaka Si Badiaeme sumber kebenaren, bagepe tutus kita ku perpulungen, bagepe kita harus mpediat Kesah Si badia ngajari kita,gelah siteh kerna kebenaren situhu-tuhu e.

Pdt. Steven Kumenit, STh.M.Min.

Tutus, Bujur Ras Itemani Tuhan (1 Samuel 3:15-21)

BAHAN PJJ GEREJA GBKP

TANGGAL 31 AGUSTUS – 6 SEPTEMBER 2014.

1 Samuel 3:15-21

Tema : Tutus, Bujur Ras Itemani Tuhan.

LATAR BELAKANG

1.      Eli eme sekalak imam  i Rumah Pertoton i Silo, janah umur Eli nggo metua. Ibas pudi-pudi kegeluhen Eli, nggo merak-rak Tuhan ncidahken baNa man sekalak Imam, termasuk Eli. Tapi iteh Eli adi reh Tuhan man sesekalak jelma (nabi, imam) berarti lit sura-sura Tuhan siateNa ipeseh man bangsaNa ntah man ise saja.

2.      Ibas jam erpagi-pagi, kenca nggo dung Samuel nalangi kerina pintun Rumah Pertoton, sebab ibas Rumah Pertoton Samuel medem, idilo Eli si Samuel, janah isungkunna kerna kai siikataken Tuhan man Samuel. Iteh Eli reh Tuhan man Samuel erkite-kiteken ibas erberngi nai telu kali Samuel reh ndahi Eli, akapna Eli sindilo ia (band. Ayat 5-8).

3.      Erkiteken isungkun Eli kerna sura-sura Tuhani, maka ikataken Samuel sura-sura Tuhan e. Sura-sura Tuhan eme ngukum keluarga Eli, janah la lit persembahen gelehen ntah pe persembahen sideban  sibanci nangtangi dosa keluarga Eli e  sebab nggo mejin kal dosa-dosa siibahan keluarga Eli (ayat 14). Perlu siteh ibas kegeluhen beragama bangsa Israel, adi sesekalak jelma nggo erdosa, maka arah persembahen gelehen ntah pe persembahen tutungen ras pengalemi dosa, dosa e banci ialemi Tuhan. Dosa keluarga Eli la teralemi Tuhan erkite-kiteken anak-anak Eli eme Hopni ras Pinehas nggo   nangko kai siseharusna jadi sekerajangen Tuhan eme persembahen gelehen siharusna ipersembahken bangsa Israel man Tuhan. Bagepe Hopni ras Pinehas erbahan erlua-lua ras diberu-diberu singelai i dalan bengket ku  Rumah Pertoton. Perbahanen simejin ras kemali  kegeluhen Hopni ras Pinehas e, maka  nggo jadi batu antuken man kalak Israel, emaka ilaporken bangsa e perbahanen Hopni ras Pinehas e man Eli, tapi siibahan Eli terjeng negor saja. I lebe-lebe Dibata perbahanen siibahan Eli nandangi anak-anakna berarti Eli lebih mpehagaken anak-anakna asangken Tuhan.

4.      Berita penghukuman Tuhan man keluarga Eli siipeseh Samuel teraloken Eli sebab tehna Tuhan e erkuasa ras la ngena ate Tuhan kerna sijahat, janah hak Tuhan ngukum kalak sierbahan jahat.

5.      Tuhan tetap ras Samuel, emaka kai ate Tuhan nandangi bangsa Israel, ipsehe Tuhan arah Samuel janah ipeseh Samuel man bangsa Israel, emaka tuhu-tuhu bangsa Israel meteh maka Tuhan ras Samuel, bagepe iikutina kai siikataken Samuel. Jadi tuhu-tuhu  kebenaren ibas Tuhan nari sipeseh Samuel, janah lagu langkah samuel pe la erpandangen i lebe-lebe Tuhan.

APLIKASI

            Pembahasenta sekali enda berhubungen ras HUT Permata pe 66 ken. Sengaja iangkat figur Samuel erkite-kiteken Samuel paksa sie nguda denga. Isamping sie kegeluhen samuel ngana ate Tuhan erkite-kiteken samuel nggeluh ibas kebujuren ras terteki. Enda me me siniharapken ibas kegeluhen Permata.

            Kegeluhen mbiar man Tuhan harus teridah ibas kegeluhenta tep-tep wari, termasuk ibas pendahinta. Ibas kegeluhenta tep-tep wari harus mpraktekken kebujuren, sebab arah kebujuren e ngena ate Tuhan man banta. Memang tuhu, ibas perkembangen sigenduari enda, termasuk pe ertambahna kebutuhenta, mekatep kita la jujur ras bujur ibas kegeluhenta tep-tep wari, termasuk ibas pendahinta. Sekali enda kita isingetkenken, adi ateta ngena ate Tuhan man banta, maka nggeluhlah bujur ras erkemalangen man Tuhan saja.

Pdt. Steven Kumenit, STh.M.Min.