Dibata Nehken PadanNa, Tetap Ukurta (Josua 21:43-45)

BAHAN PEKAN PENATALAYANAN

GEREJA GBKP

SENIN, WARI II, 19 JANUARI 2015

Invocatio   :    Tek Abraham man Dibata, janah ipasu-pasuNa ia. Bage me pe kerina kalak si tek man Dibata ipasu-pasu bagi Abraham (Galati 3:9).

Ogen         :    Mazmur 65:5-14.

Khotbah    :    Josua 21:43-45.

Tema         :    Dibata Nehken PadanNa, Tetap Ukurta.

 

LATAR BELAKANG

1.      Ndauh ope bangsa Israel jadi sada bangsa, arah nini-nini bangsa Israel, tanah Kanaan nggo ipadanken Tuhan jadi sikerajangan bangsa Israel (Band. Kejadin 12:7). Emaka kenca kesusuren Abraham jadi sada bangsa, Ibaba Tuhan me  bangsa Israel ku Taneh Kanaan, janah ibereken Tuhan taneh Kanaan e man bangsa Israel guna iiani ras ngusahai taneh e.

2.      Taneh Kanaan ibagi sue ras jumlah suku bangsa Israel eme 12 suku bangsa. Kepeken la saja taneh siibereken Tuhan man bangsa Israel tapi pe kerna  keamananna. Emaka ibas bangsa Israel ngiani taneh Kanaan e bangsa Israel nggeluh alu aman, sebab Tuhan kap sinjagai ia. Perlu siteh, amin gia bangsa Israel nggo ngiani taneh Kanaan, tapi  lit denga musuh-musuh bangsa Israel si lenga italuken, emaka musuh-musuh enda me sirusur  ngelawan ras atena naluken bangsa Israel, tapi erkiteken Tuhan sinjaga bangsa Israel, maka kerina musuh-musuh bangsa Israel talu ibahan Tuhan.

3.      Padan Tuhan isehken man Abraham ras kesusuren Abraham (bangsa Israel) adi kesusuren Abraham tetap patuh man Tuhan, Tuhan tuhu-tuhu jadi Tuhanna sedekah geluhna. Enda me palas maka Tuhan mereken keamanan man bangsa Israel sedekah ia tading I taneh Kanaan.

4.      Padan Tuhan la saja mereken taneh Kanaan ras Keamanan man bangsa Israel sedekah tading i taneh Kanaan tapi pe pasu-pasu Tuhan guna kesejahteraan bangsa Israel eme mereken kemajun pertanian ras ekonomi bangsa Israel.

5.      Ibas kesetiaan Tuhan nandangi PadanNa, maka bangsa Isreal nggo banci ngiani taneh Kanaan alu mejuah-juah. Tapi bangsa Israel harus nginget, maka bangsa israel lit ibas perlindungen Tuhan gelah bangsa Israel sadar maka ia eme bangsa Tuhan, bangsa Israel alat Tuhan, siharus ndalanken sura-sura Tuhan i tengah-tengah doni enda. Emaka sipaling penting man bangsa Israel ibas njaga kesetiaan Tuhan, bagepegelah bangsa Israel nggeluh alu mejuah-juah, maka bangsa Israel harus setia ka ibas perpadanan singgo irakut nini-ninina ndube (band. Kejadin 17).

 

APLIKASI

            Adi sinen ibas sejarah perpadanan Tuhan, siibenaken arah Abraham (band. Kejadin 17) seh ku Yesus, bagepe penemani Tuhan man banta arah Kesah Si Badia, maka dat sada kesimpulan, Tuhan la pernah mobah ibas padanNa. Kesetiaan Tuhan ibas PerpadananNa man banta la saja mereken keamaman, tapi pe kejuah-juahen ras ketetapan ukur. Sebab ateNa gelah kita nggeluh ibas keselamatan. Emaka amin gia kita jumpa perbeben ras kiniseran,adi kita erlebuh man Tuhan maka minter isampatiNa. Bagepe adi nggo erdosa, tapi adi reh kita man Tuhan mindo pengalemi dosa, maka ialemiNa nge kita. Jadi ate Tuhan, kita enda tinepaNa, ras kita enda sikerajangenNa, la ateNa kita bene ibas persadan e, tapi sebalikna gelah erteguhna nge persadanta ras Ia. Emaka tetaplah ukurta ibas ndalani wari-wari enda, sebab Tuhan tetap ras kita. PadanNa tetap nemani ras mereken keselamatan man banta. Saja ibas kesetiaan Tuhan tetap nemani ras masu-masu kita, kita pe harus setia ka ersembah man baNa, janah ndalanken kai singena ateNa ibas kegeluhenta tep-tep wari.

 

Pdt. Steven Kumenit, STh.M.Min 

Idilo Guna Jadi Pasu-Pasu (Kejadian 12:1-3)

BAHAN PEKAN PENATALAYANAN

GEREJA GBKP

MINGGU, WARI I, 18 JANUARI 2015.

==========================================================================

Invocatio   :     Kerina bangsa-bangsa mindo denggo bangKu gelah Kupasu-pasu ia bagi enggo Kupasu-pasu kesusurenndu e me perban kam erkemalangen man perentahKu (Kejadin 22:18).

Ogen         :     Roma 8:28-30
Khotbah    :     Kejadin 12:1-3.
Tema         :     Idilo Guna Jadi Pasu-Pasu.

 

LATAR BELAKANG

1.      Tuhan ndilo Abram paksa Abram  tading  i Haran denga. Sura-sura Tuhan gelah Abram nadingken kuta Haran ras njadiken sada bangsa simbelin. Ibas pendilo Tuhan man Abram enda, lit sada padan Tuhan man bana eme pasu-pasu Tuhan. Pasu-pasu Tuhan lit 4 hal eme : 1). Nterem ibahan Tuhan sinursur Abram. 2). Tuhan masu-masu ras ibahanNa terberita gelar Abram. 3). Arah Abram, nterem kalak dat pasu-pasu. 4). Ipasu-pasu Tuhan kalak simasu-masu Abram, tapi isumpahi Tuhan kalak sinumpahi Abram.

2.      Pendilo Tuhan man Abram ibas rangka gelah kerina manusia ndatken pasu-pasu ibas Tuhan nari, ntah pe ndatken keselamaten. Sebab ate Tuhan manusia tinepaNa e  nadingken dosana, janah nggeluh ibas pasu-pasu Tuhan.

3.      Pendilo Tuhan man Abram, la saja nadingken kutana, tapi pe nadingken  kiniteken siianut Abram ras keluargana tupung i Ur kasdim seh i Haran. Sabab pendilo Tuhan man Abram, ibas rangka njadiken Abram jadi alat Tuhan, emaka gelah ipasu-pasu Tuhan, maka Abram harus nadingken kiniteken ras agamana tupung ia tading i Urkasdim ras Haran janah man Tuhan saja Abram  harus ersembah.

4.      Sura-sura Tuhan simbelin e ipercayakenNa man Abram, tapi gelah tetap ukur Abram ngaloken pendilo Tuhan e, nina Tuhan kupasu-pasu kalak simasu-masu kam, tapi kusumpahi kalak sinumpahi Abram. Enda merupaken sada bentuk penemani Tuhan man Abram. Bagepe gelah gelar Abram terberita.

5.      Pemilihan Abram jadi alat Tuhan guna masu-masu kerina manusia eme hak preogatif Tuhan.Sebab banci saja lit sada penungkunen, ngkai maka la Lut ntah sidebanna. Tentuna enda harus sinen ibas kedaulatan Tuhan. Bagepe kenca Tuhan milih Abram ras mereken padan man Abram, mulai I je nari me pemasu-masun Tuhan man kerina manusia,sebab mulai I je nari Abram nadingken kutana, janah alu demkepatuhen iikutkenna perintah Tuhan.

 

APLIKASI

            Harus sisadari kita enda pe nggo idilo Tuhan selaku anak-anakNa. Kita jadi kristen erkite-kiteken pendilo Tuhan man man banta. Tapi pe harus siinget pendilo Tuhan man banta ibas rangka jadi alat Tuhan gelah kalak sideban pe ndatken pasu-pasu bas Tuhan nari.

            Adi sioge ibas 1Petrus 2:9, I je ikataken kita enda bangsa pilihen Tuhan, bagepe kita idilo Tuhan ibas sigelap nari bengket ku Terang ibas rangka mberitaken perbahanen-perbahanen Tuhan simbelin. Enda me dahinta selaku kalak singgo ipilih Tuhan. Kita harus mberitaken Berita simehuli man kalaksideban. Kita harus mberitaken kerna Yesus Kristus selaku Tuhan ras Juru Selamatta. Alu bage ise sitek man Yesus ndatken keselamatan (Band. Yohanes 3:16). Bagepe tanggungjawabta tole eme mereken sada ketetapan ukur man kalak sideban, kerna Tuhan ras kita (Band. Matius 1:23). Alu bage la aru ateta ndalani kegeluhen I tengah-tengah doni enda. Ibas perbahanen sibageme kalak sideban ipasu-pasu Tuhan arah kita.

 

Pdt.Steven Kumenit, STh.M.Min

Liturgi Natal Umum.

LITURGI NATAL UMUM

KLASIS MEDAN KUTA JURUNG TAHUN 2014.

Tema         : IBas Keleng AteNa Reh Yesus Ku Doni Enda (Band. 1 Yohanes 4:9).

Sub Tema : Arah Natal Enda Encidahken Biak Kalak Kristen Eme sikeleng-kelengen. Bagepe                       IBas Semangat Natal sibengketi tahun 2015 ibas Terang Peningkatan Sosial,                                 Budaya Ras Ekonomi Jemaat.

PERSIKAPEN

PENDILO KU BAS KEBAKTIN

Lit   :    Ersuraklah man Tuhan oPertibi kerina. Nembahlah man Tuhan alu ukur meriah, dahilah ku adep-adepenNa janah rende meriah. Sebab Tuhan simada kuasa la pernah ngelupaken kita. Emaka ibas  keleng ateNa maka reh Ia ku doni enda jadi seri ras manusia, gelah kita kerina nggeluh ibas keselamaten. Yesus me ulu kekelengen, emaka nggeluh lah kita ibas keleng ate Kristus gelah nggeluhta teridah biak Kristus.   Emaka  ibas kerina kesibukenta, nggo ndilona kita gelah reh kita ku bas kebaktin enda. Emaka marilah siikuti kebaktin enda alu dem pengataken bujur.

Rende KEE 139:1,3,5. I BETLEHEM NGGO TUBUH

1).   I Betlehem nggo tubuh Tuhanta Yesus e

        Lah jumpa ras merincuh Ukurku pe ku je

        Ukurku pe ku je.

3).   Ateku me ersembah  man si tubuh i je

        Ban si mekuah man si perdosa nge

        Man si perdosa nge

5).   Ota dage sidahi ras kita radu pe

        Lah Ia pegegehi, kinitekenta e,

        Kinitekenta e.

(Prosesi bengket ku bas kebaktin)

VOTUM RAS SALAM

Lit      :    Kebaktin Natal enda ibenaken ibasgelar Dibata Bapa sinjadiken langit, doni ras kerina isina. Ibas gelar Yesus Kristus, Tuhan singgo jadi manusia. Ibas gelar Kesah Si Badia sitetap nemani ras minpin kerina kalak sitekman baNa.

               Mejuah-juah man kam kerina sierkeleng ate man Tuhan. Tuhan  tetap masu-masu  ras mereken kejuah-juahen ras kemalemen ate man kam kerina. Amin.

Perp.  :    Amin ……. Amin ……. Amin …….

INTROITUS

Lit      : Adi ikutkenndu pedah-pedahKu, tetap nge kam Kukelengi, bali ras Aku ngikutken pedah-pedah BapangKu, janah tetap Aku ikelengiNa (Yohanes 15: 10).

Rende PEE 27:1-4. SI ENDEKEN ‘NDE-‘NDEN SI

                                  MERIAH

1).   Si endeken ‘nde-‘nden si meriah

        Man Tuhannta si ‘nggo tubuh bas pelangkah

        Sabab patut nge k’rina kita nembah

        Ban babaNa terang ngaruh ras petuah

              Ref    :     Dage mari kita kerina

                             ‘Lah si puji gelar Dibata

                             Ula nai iukur erbera

                             Tuhan Yesus me kap Rajanta

2).   Tuhan Yesus metunggung dat pujin

        Perban Ia si ngajari kita kin

        Kek’lengenNa la erkeri-erkerin

        Adi pakelah pedahNa seh pagin

              Ref    :     Dage mari kita .......

3).   Gelgel nari suratken nabi-nabi

        Reh me S’kalak si nampati pertibi

        Em pemere idur Dibata nari

        Enggo tubuh i Betlehem tengah berngi

              Ref    :     Dage mari kita .......

       

4).   Tuhan Yesus kuinget min Kam rusur

        ’Lah babaiNdu pergeluhku ku si bujur

        ’Di bage kiniteken la erkusur

        Enggo paguh gia lit rusur si ngugur

              Ref    :     Dage mari kita .......

KOOR

PENGATAKEN BUJUR IBAS KELENG ATE TUHAN

Lit       :    Ku kataken bujur man baNdu o Tuhan, alu bulat ukurku

Perp.    :    I lebe-lebe dibata-dibata si deban, rende aku muji Kam.

Lit       : Janah muji gelarNdu, erjimpuh aku ngadap ku RumahNdu si badia, erkiteken Kam setia dingen tetap kekelengenNdu.

Perp.    :  Enggo icidahkenNdu maka gelarNdu ras perentah-perentahNdu belinen asangken kai pe.

Lit       :    Tupung kulebuh Kam, ialoiNdu aku, alu gegehNdu, ipegegehiNdu aku.

Perp.    :    Kerina raja-raja i doni ipujina Kam, o TUHAN , erkiteken enggo ibegina padan-padanNdu.

Lit       :    Kerna kemulianNdu si mbelin dingen kai si enggo ibahanNdu, rende me ia kerina.

Perp.    :    Aminna pe Kam si meganjangna, ipekena-kenaNdu nge kalak si meteruk. Kalak megombang la banci cebuni i bas Kam nari.

Lit       :    Tupung aku ikeleweti kiniseran, iampang-ampangiNdu aku maka la aku bene. IlawanNdu imbang-imbangku si sangana ngamuk, alu gegehNdu ikeliniNdu aku.

Perp.    :    IlakokenNdu kai si enggo ipadankenNdu. O TUHAN , keleng ateNdu tetap rasa lalap, bahanlah serta dahin si enggo ibenakenNdu.

Rende KEE N0 178. PUJILAH MIN

Pujilah min, pujilah min !

Dibatanta, Dibatanta si ni datas

Dame ni surga nusur ku doni ngena ate man manusia

Pujilah min Dibatanta, Pujilah min Dibatanta

Dame ni surga nusur ku doni

Dame ni surga nusur ku doni

Ngena ate, ngena ate man manusia

Ngena ate man manusia, man manusia

Pujilah min, pujilah min !

Dibatanta, Dibatanta si ni datas

Dame ni surga nusur ku doni

Ngena ate man manusia

Amin, Amin, Amin

LITANI/PERTOTON NATAL

Lit      :    Ikataken kami bujur man baNdu  o Tuhan sebab reh Kam  i Surga nari ku doni enda, jadi seri ras manusia.

Perp. :    Ibas Kam jadi seri ras manusia, ateNdu gelah kami terkelin.

Lit      :    Kam  Tuhan nusur ku doni enda, ncidahken mbelin kal kekelengenNdu man kami.

Perp. :    La ateNdu kami bene ibas dosa.

Lit      :    Kam Tuhan sierkuasa, bagepe perkeleng arah Natal enda, ipehuliNdu kami tinepaNdu singgo ceda.

Perp. :    Bujur Tuhan Natal mbagai kami nggeluh ersada ras Kam.

Lit      :    Natal mpersingeti kita maka kita enda seri ras tempasNa.

Perp. :    Temani kami Tuhan gelah kai siibahan kami nuduhken kami enda nggeluh ibas Natal.

Rende KEE N0 115:1-3. KERIAHEN SIMBELINNA

1).   Keriahen simbelinna,  sikuberitaken e

Enggo tubuh si permakan. Eme Tuhan Yesus e

        Pujilah min Dibatanta : Ras dame dame dame man banta

        Dibatanta si erkuah ate,  Man kita jelma e

2).   Ibas berngi enda terang bintang si mehelhel e

T’rangna seh ku perukuren si lanai erlayas pe

Pujilah min Dibatanta : Ras dame dame dame man banta

        Dibatanta si erkuah ate,  man kita jelma e

3).   Tuhan Yesus persadanta,  em isuruh Bapa e

Si nasapken k’rina dosa e, ibas Golgota kepe

Pujilah min Dibatanta : Ras dame dame dame man banta

        Dibatanta si erkuah ate,  man kita jelma e

KOOR

NAGANI LILIN

Rende KEE N0.135:1-3. BERNGI E NGGO KEPE

1).   Berngi e, nggo kepe Yesus reh ku doni e

Nusurlah ngangkut dosanta me kin

Jadi kap musillah sangap pagin

Asa si tek Tuhan e. Asa si tek Tuhan e.

2).   Anak e bujur pe singena me aku e

KiniulinNdu tadingken Kam kap

Bengket ku doni lah t’rang si gelap

Aku daramenNdu e. Aku daramenNdu e

3).   Berngi e, nggo kepe Tuhan reh ku doni e

Padan Dibata teridah tetap

KinikelengenNa banta me kap

Tuhan sipuji gelah. Tuhan sipuji gelah

KHOTBAH

PENGAKUN KINITEKEN

PERSEMBAHEN

Lit    :    Meriah ukurta sebab Natal eme Tuhan si reh ku doni enda. Bagepe ibas Natal reh guru-guru i Timur nari ipersembahkenna man Yesus emas, kumenen ras umur. Emaka marilah kita mpersembahken persembahenta tanda kita ngataken bujur man Tuhan.

Rende KEE N0. 114:1-3. SENDAH JUMPA KITA WARI

                                           RAYA E.

1).   Sendah jumpa kita wari raya e,

Peringeten tubuh Tuhan Yesus e

Nusur ndahi kita manusia e,

Keriahen kap e

        Ermulia me Tuhanta,  E sipuji me GelarNa

        Perdamen ib’re Dibata, Tuhan Yesus kap e

2).   Mari kita ku kuta Betlehem e

Muji nembah man Tuhanta Yesus e

E tinenges Tuhan si perkuah e

Dibata Bapa e

Ermulia me Tuhanta, e sipuji me GelarNa

Perdamen ib’re Dibata, Tuhan Yesus kap e

3).   Sembah kami man bandu situbuh e,

Kam simaba dame ku pertibi e

Bengket min ku tendi ukur kami e,

DameNdu o Yesus

Ermulia me Tuhanta, e sipuji me GelarNa

        Perdamen ib’re Dibata, Tuhan Yesus kap e.

PERTOTON PERSEMBAHEN

KOOR

PERTOTON SYAFAAT

TEKAD NATAL

Lit      :    Natal eme keleng ate Tuhan man manusia. Kai dage sibanci sibahan ibas kegeluhenta ?

Perp. :    Ate Kami nggeluh sikeleng-kelengen, subuk ibas jabu, bagepe ibas perpulungen.

Lit      :    Natal ncidahken, Tuhan nadingken kerina si lit bas Ia, nggeluh bagi sekalak juak-juak, janah meteruk ukurNa.

Perp. :    Ate kami nggeluh ibas meteruk ukur ras ate nggeluh ibas persadan.

Lit      :    Natal mereken man banta kegeluhen simbaru,gelah kita banci nggeluh selaku tinepaNa simbaru. Kai dage sibanci ilakoken ibas kegeluhenta ?

Perp.  : Ate Kami, ndalanken kai singena ateNdu ibas kegeluhen kami tep-tep wari. Bagepe ate Kami mpersiapken diri kami bengket ibas tahun peningkatan sosial, budaya ras ekonomi jemaat.

======= Perpulungen Tedis =======

ENDE-ENDEN PENDUNGI

Rende KEE N0 193:1-3. ‘BAS SI NASA TINEPANA

1).   ‘Bas si nasa tinepaNa. Tetap k’rina rende t’rus

‘Nde-enden pujin badia. Muji gelar Penebus

Glooooooooooria Muliaken Tuhan!

Glooooooooooria Muliaken Tuhan

2).   ‘Bas ingan si meganjangna, bala Tuhan i surga

Rende m’riah ia k’rina man Tuhan Penebusta

Glooooooooooria Muliaken Tuhan!

Glooooooooooria Muliaken Tuhan

3).   K’rina ginemgem Dibata, pehaga si tubuh e,

Surga doni rende iaK’rina alokenNa pe

Glooooooooooria Muliaken Tuhan!

Glooooooooooria Muliaken Tuhan.

PERTOTON TUHAN

PEMASU-MASUN

Lit      :    Mulihlah alu mejuah-juah, ras alokenlah pasu-pasu idur Tuhan nari :

               IPASU-PASU JANAH IKAWALI DIBATA KAM SIANG AYO DIBATA ERSINALSAL IBABONDU. JANAH MELIAS ATENA NGENEHEN KAM. ITATAP DIBATA KU KAM. JANAH MALEM ATENDU IBAHANNA. AMIN.

Perp.  :    Amin ……. Amin ……. Amin …….

0000000@@@@@@@0000000