Ertoto Guna Sekelewetta (Markus 7:24-30)

PEKAN DOA

GEREJA GBKP

WARI III, SELASA 19 MEI 2015.

Invocatio    :    Adi iberendu nakan man kalak sikelihen, janah isampatindu kalak si lit ibas kesusahen, adi bage kegelapen si lit sekelewetndu salih jadi terang,seri ras ciger wari (Jesaya 58:10).

Ogen          :    Jesaya 49:5-6.

Renungen   :    Markus 7 : 24-30.

Tema          :    Ertoto Guna Sekelewetta.

LATAR BELAKANG

1.      Kuasa Yesus mpepalem kalak sakit, mpekeke kalak singgo mate, bagepe mpelawes setan, rsd, la saja ibegi ras ieteh kalak Jahudi, tapi pe seh i luar kalak Jahudi eme i daerah Tirus. Jesus ku Tirus ibas rangka peteneng diriNa, emaka bengket Ia ku sada rumah, tapi kepeken kerehen Jesus la terahasiaken, sebab nggo mbar kuasa Jesus. Emaka reh sekalak pernanden mindo penampat man  Jesus, sebab anakna iseluki setan. Tapi jawab Jesus, peturut lebe anak-anak man seh besur, sebab la patut ibuat nakan anak-anak maka iambengken man biang. Tapi jabab diberu ndai, tuhu Tuhan, tapi biang i teruh meja pe kenan nge rimah-rimah sindabuh iban anak-anak e. Ibas jawaban diberu ndai, nina Jesus sebab bage jababndu, mulihlah ku rumahndu, setan nggo ndarat ibas anakndu nari, emaka mulih diberu ndai janah idahna tuhu-tuhu setan nggo ndarat ibas anakna nari.

2.      Arus iangkai maka ikataken Jesus, la patut nakan guna anak-anak ibereken man biang. Sipemena engkai maka Jesus ngataken biang man diberu ndai. Enda erkite-kiteken kalak Jahudi  nggelari kalak si la Jahudi biang. Bagepe ikataken anaka-anak. Maksudna bangsa Israel. Emaka pengertinna kerehen  Jesus guna bangsa Israel, labo guna bangsa kafir.

3.      Diberu Siro Fenisia megi kai siikataken Jesus la merawa, tapi alu meteruk ukur pindona perkuah ate Tuhan. Tapi Perkuah ate Tuhan banci ibereken Jesus man kalak sitek man baNa saja.

4.      Diberu Siro Fenisia enda tuhu-tuhu tek ia man Jesus, emaka nina payo Tuhan, biang pe dat nakan ibas rimah-rimah sindabuh ibas anak-anak e nari. I jenda lit pangakun kerna Jesus eme Tuhan. Bagepe keselamatan situhuna seh me man bangsa sideban. Ibas pengakun enda. Maka Ipepalem Jesus me anak diberu e, maka malem anakna e.

5.      Mujizat siibahan Jesus i daerah Tirus ngataken ise sitek man Jesus, amin gia ia kalak Kafir ndatken perkuah ate Tuhan. Nggeluh ibas keselamaten.

APLIKASI

            Kita idilo Tuhan ibas rangka jadi alatna nelamatken manusia ras doni enda ibas dosa nari. Sebab siidah erkiteken dosa maka terjadi perbahanen-perbahanen si la ngena ate Tuhan. Emaka kehadirenta jadi min sira ras terang doni. Gelah doni enda nggeluh ibas Terang.

            Tentuna ngenen situasi ras kondisi si terjadi ibas doni enda la ngasup kita sisada mperobahisa, tapi ibas perbahanen simehuli siilakoken kita, maka kita lanai seri ras doni enda, bagi nggo siterangi alu Terang Kristus. Bagepe erkiteken lit kuasa Jesus guna mperobahi keadaan ibas doni enda, maka tentuna kita arus mindo penampat man Jesus nari. Ibas kita ertoto man Jesus, lit 2 hal siterjadi eme : 1). Kita ipengasup gelah tetap nggeluh bagi singena ate Tuhan.Kita tetap ngelakoken simehuli nandangi masyarakat isekelewetta. 2). Sipindo gelah Tuhan ikut  erdahin ibas keselamatan. Sebab la lit simetahat i lebe-lebe Tuhan. Kuasa Tuhan lebih asangken kuasa-kuasa si lit ibas doni enda nari. Emaka masyarakat banci meteh perananna ibas doni enda, eme njaga kedamen ras sikeleng-kelengen ras sisampat-sampaten.

Pdt. Steven Kumenit, STh.M.Min.  

Ertoto Guna Nggeluh Sepenggejapen Ibas Perpulungen (Ayub 29: 12-17)

PEKAN DOA

GEREJA GBKP 

WARI II, SELASA 18 MEI 2015.

Invocatio    :    Geluhndu arus erpalasken keleng ate, bagi Kristus nggo ngkelengi kita, dingen ngendesken KesahNa man gunanta. Ia nggo mpersemban diriNa jadi persembahen simerim singena ate Dibata (Epesus 5:2).

Ogen          :    Ulangan 24:17-22

Renungan   :    Jop 29:12-17.

Tema          :    Ertoto Guna Nggeluh Sepenggejapen Ibas Perpulungen.

LATAR BELAKANG

1.      Adi sioge alu manjar-anjar kerna bahan renungenta maka i je dat Jop ngerana kerna keleng ate Tuhan nandangi dirina ras isi jabuna. Emaka amin gia situhuna Jop lit ibas kiniseran simesangat erkite-kiteken tapi Jop tetap inget kerna keleng ate Tuhan. Kiniseran siinanami Jop eme :  1). Kerina anakanakna mate. 2). Kerina asuh-asuhen Jop mate ras irampok kalak. 3). Turah ugahen simekelek i bas daging Jop. 4).  Teman-teman Jop mpersalahken  ia. 5). Ndehara Jop mpersalahken Dibata.

2.      Jop ngerana uga penampat Tuhan man bana tupung ia sehat denga. Erkiteken Tuhan maka Jop mulahi kalak musil sitertindas. Anak melumang si la ersima-sima isampatina. Nandangi diberu balu-balu isampatina. Bagepe perbahanen Jop kerina bujur ras adil nandangi kerina jelma. Erkiteken sie me iergai ras ihamati kalak ia. Enda ikataken Jop erkite-kiteken temanna si Elipas menuduh  Jop nggo erdosa ras ersalah man Tuhan. Dosa siibahan Jop nina,  Jop la pernah nampati kalak musil, anak melumak, diberu balu-balu,erbahan penindasan ras mekeken kuasa guna nindas kalak, dll (band. Jop 22:3-11).

3.      Ibas Jop nerangken kerna uga perbahanen siilakokenna ope denga ia nggeluh ibas kiniseran, maka ate Jop mereken sada pengangkan man temanna Elipas, kerna kai siinanamina genduaru la bo erkite-kiteken dosa masa lalu. Sebab adi erpalasken masa lalu, justru Jop jadi “idola” masyarakat setempat, jadi harapen kalak musil ras diberu balu-balu,  bagepe jadi ingan penggurun. Alu bage, ibas penuriken Jop, Jop ngataken salah kal tuduhen Elipas e.

4.      Ibas pihak sideban ate Jop gelah temanna Elipas sadar min kerna tuduhan-tuduhan si salah e.

5.      Siilakoken Jop nandangi masyarakat isekelewatna, erkite-kiteken pendilo kiniteken, ntah pe erpalasken  Jop mbiar ras erkemalangan man Tuhan.

APLIKASI

            Kegeluhen ibas gereja eme nggeluh ibas persadan. Ibas bahasa Paulus kegeluhen anggota perpulungen nggeluh min bagi sada kula (band. 1Korinti 12:13). Emaka kegeluhen ibas sada kula, la banci nggeluh sisada-sisada. Sebab adi kita nggelus sisada-sisada tentuna pendilo kita selaku kalak kristen banci terabaikan, eme nggeluh sikeleng-kelengen, bagepe simegegeh nampati sikurang megegeh.

            Gelah megegeh kegeluhen ibas persadan, maka arus lit man banta kegeluhen sada penggejapen. Janah kegeluhen sibage arusna nggeluh bas kita, sebab kita selaku kalak kristen nggo nggeluh ibas persadan ras Yesus Kristus. Yesus amin gia lit bas Ia biak Dibata, erkuasa dingen ermulia, tapi la pertahenkenna kerina e. Emaka gelah tetap nggeluh kegeluhen sepenggejapen, perukurenta arus nggeluh bali ras Kristus (Band. Pilipi 2:5-6). Uga carana. Carana kita arus ertoto man Tuhan, gelah terjadi internalisasi (kegeluhen persadan) antara kita ras Tuhan. Emaka nggeluh spiritualitasta. Jenari teridah ibas kegeluhenta eme la  meriah ukurta adi lit senina turangta lit bas perbeben ras kiniseran. Emaka asa gegeh ras kengasupenta, sisampati senina turangta e. Emaka marilah kita tutus ertoto gelah lit bas kita kegeluhen sepenggejapen.

Pdt. Steven Kumenit, STh. M.Min. 

Ertoto Guna Kegeluhen Pertendin (1 Korintus 2:13-16)

PEKAN DOA

GEREJA GBKP

WARI I, MINGGU 17 MEI 2015.

Invocatio     :    Enggo kuajarken man bandu kepentaren dingen dalan kegeluhen si payo (Kuan-Kuanen 4:11).

Ogen            :    1 Raja-Raja 19:1-9a

Renungan    :    1 Korinti 2:13-16.

Tema : Ertoto Guna Kegeluhen Pertendin.

LATAR BELAKANG

1.      Surat Paulus man perpulungen i Korinti, isuratken Paulus i kota Epesus nari, erkiteken ibegina i Korinti lit masalah. Masalah siterjadi eme nggeluh ibas kelompok-kelompok, penyombongan rohani, ras la lit nari kekelengen, bagepe tingkat kiniteken siberbeda-beda, rsd.

2.      Tingkat kiniteken mpengaruhi penerimaan Kata Dibata. Bagepe mpengaruhi ngangkai kerna Dibata ras pendahinna. Ibas erti kata adi tingkat kiniteken “bayi” denga maka tentuna njelasken kerna Kata Dibata arus manjar-anjar ras dem kesabaran, sebab lenga kal ngasup iangkaina, khusuna kerna kepentaren Dibata. Tapi adi anggota perpulungen nggo dewasa kegeluhen pertendinna (rohani) maka mesukah ngajarken kerna kepentaren Dibata. Tapi labo berarti iterangken alu meros, ntah alu kepentaren manusia. Lang. Tetap iajarken alu pengajaren Kesah Si Badia. Kesah Si badia singajari gelah kalak si nggo dewasa pertendinna tetap nggeluh ibas erpengarapen man Dibata saja. Kalak singgo dewasa kegeluhen pertendinna ngasup ia ngangkasa pengajaren e, khususna kerna kematen Yesus Kristus. Sebab lit paksa sie sierpengakap bodoh kap Tuhan. Ngkai maka Ia bodoh, sebab adi Tuhan Ia, engkai maka nggit ia mate i kayu persilang. Searusna min Yesus siarus naluken e kerina.

3.      Lain halnya ras kalak si la lit bas ia Kesah Si Badia. Kalak sibage tentuna la ia ngasup ngertikan kerna pendahin Tuhan (Kepentaren Tuhan) simereken keselamatan man manusia. Kalak si lalit bas ia Kesah Si Badia hanya mengandalkan kepentaren manusia saja. Padahal kepentaren manusia berbeda kal ras kepentaren Tuhan. Kepentaren manusia/doni hanya bersifat simasuk akal. Terpahami oleh akal manusia. Kematen Yesus sulit kal terpahami oleh akal manusia. Emaka nandangi kalak sibage tentuna pengajaren ntah pepemberitaan kerna Berita Si Meriah lenga mbages kal.

4.      Enda itekanken Paulus gelah perpulungen Korinti banci memahami kerna kepentaren ibas Dibata nari, sebab adi perpulungen Korinti tetap denga mengandalken  pemahamanna sendiri kerna keselamaten, e berarti perpulungen Korinti nggeluh ras ikuasai kepentaren doni denga, emaka kegeluhen si egois (band. Singataken  ia enggo ibas tingkat sisempurna ibas kegeluhen  rohani), bagepe ndarami kepuasan jasmani  arah logika, bagepe sada pengakap maka erta labo penting ras etika mekatep la iakuina  merupaken sada kesalahan.

5.      Kesah Si Badia si nggeluh bas pusuh anggota perpulungen mereken pengangkan situhu-tuhu kerna rencana karya keselamaten Tuhan bas doni enda. Emaka man manusia doni, Kesah Si Badia merupaken sada kebodohan, sebab Kesah si Badia erdahin diluar batas-batas kengasupen  nalar manusia guna ngangkaisa. Iantarana eme adi Yesus Kristus eme Mesias ras Tuhan engkai maka Ia harus enggeluh ibas kiniseran ras mate. Erkiteken sie Kesah Si Badia si enggeluh bas dirinta, la banci ikacauken alu kesah doni enda eme  penalaran, spekulasi manusia, rsd. Kesah Si Badia berbeda ras kesah doni enda. Kesah Si Badia reh Ibas Dibata nari guna mereken pengangkan kerna pemere-pemere Dibata.

APLIKASI

            Secara sederhana banci sikataken adi kita ngerana kerna kegeluhen pertendin, maka kita ngerana kerna ketenangen nggeluh. Memang sisadari ibas kegeluhenta mekatep erkite-kiteken pereben ras kiniseran, bagepe melala sura-sura erbahanca kita la teneng. Ibas situasi si bage, janah la terkuasai kita kerna situasi ras keadaan “siberkecamuk” ibas dirinta, maka banci saja hal-hal si la mehuli si la ngena ate Tuhan silakoken. Tapi adi terkuasai kita kerina e maka turah kemalemen ate bas geluhta. Jadi penungkunen man banta, alu cara uga nge kita banci peteneng tendinta, ntah pe banci kita nggeluh ibas kemalemen ate ? melalakesaksin-kesaksin putaka Sibadai, sintina sibanci mereken ketenangen nggeluh eme Tuhan ngenca (band. Mazmur 62:2,6) Tuhan ngenca sibanci mereken ketenangen man banta. Erkite-kiteken Tuhan ngenca sibanci mereken ketenangen maka kita arus ertoto man bana gelah kita banci ngerana-ngerana ras Ia, jenari isampatiNa kita, ras berekenna ketenangen man banta. Emaka ibas kegeluhenta ngasup kita ngangkai ras dalanken kai siisura-suraken Tuhan, eme la meganjang ukur ras tetap nggeluh ibas persadan.   

           

Pdt. Steven Kumenit, STh.,M.Min.

Sakramen Ibas GBKP (Matius 28:19; 1 Korintus 11:24-26)

PERPULUNGEN JABU-JABU

GEREJA GBKP

TANGGAL 10 – 16 MEI 2016

Matius 28:19; 1 Korinti 11:24-26.

Tema : Sakramen Ibas GBKP

LATAR BELAKANG

A.    Matius 28: 19.

1. Sijadi oratenta sendah eme perjumpan Yesus ras ajar-ajarNa i ururk i Galilea. Janah perjumpaan enda kenca Yesus keke ibas simate nari, ras nandangi Yesus i angkat ku Surga. Ibas perjumpaan e, lit sada perintah siisehken Yesus man ajar-ajarNa. Janah perintah enda itandai alu gelar “ Amanat Agung”.
2. Ibas Amanat Agung e, lit 2 hal siarus ilakoken ajar-ajarNa eme Ajar-ajar arus lawes ku kerina bangsa manusia ras njadiken manusia e jadi ajar-ajar Yesus. Tandana manusia e jadi ajar-ajar Yesus eme arah peridin. Janah peridin enda arus ibas gelar Bapa,Anak ras Kesah Sibadia.
3. Makna Amanat Agung enda eme Ajar-ajar Yesus jadi gancih Yesus guna ndahiken dahin keselamatan ibas doni enda. Janah keselamaten man manusia e adi ia iperidiken ibas gelar Bapa, Anak ras Kesah Si Badia.

B.     1 Korinti 11: 24-26

1. Paulus ngerana kerna Sakramen. Janah pengajaren kerna sakramen ialoken Paulus ibas Tuhan nari. Siimaksudken  ialoken ibas Tuhan nari eme ope denga Yesus mate, Yesus erbahan sada lakon persadan ras ajar-ajarNa (band. Lukas 22:19-20). Janah makna lakon persadan enda guna mperingeti kerna kematen Yesus Krisus.
2. Pengajaren Paulus enda nandangi perpulungen Korinti, gelah perpulungen Korinti meteh Lakon Persadan lit hubungenna ras Yesus Kristus. Ibas lakon persadan enda simbol ntah pe tanda kerna daging ras dareh Yesus. Emaka perpulungen Korinti banci meteh ibas daging ras dareh Yesus lit pengalemi dosa. Bagepe ibas daging ras dareh Yesus, perpulungen nggo nggeluh ibas persadan ras Yesus. Emaka kegeluhen persadan e pe arus teridah ibas persadan sapih-sapih ia manusia. Alu bage anggota perpulungen lanai nggit erbahan salah ras dosa.

APLIKASI

            Gereja Protestan, termasuk i je GBKP ngelakoken 2 sakramen saja eme Lakon Peridin ras Lakon Persadan Si Badia. Makna sakramen enda eme sada tanda kerna perkuah ate Tuhan man banta. Bagepe ibas sakramen merupaken sada khotbah singgeluh, emaka alu ngenen kerna sakramen enda maka kinitekenta erteguhna.

            Ibas gereja-gereja ngelakoken Sakramen,  sirusur jadi persoalan man gereja-gereja eme kerna Lakon peridin. Lit 2 hal sijadi persoalen eme 1). Lit ka gereja, amin gia kita nggo iperidiken ibas gereja, tapi adi ateta bengket ntah pe jadi anggota gereja si A, maka arus iperidiken mulihi. 2). Lit gereja la nandai peridin kitik. Sebab nina : anak sikitik siperidin e lenga bo ngangkai kerna makna peridin e. Sehubungen ras enda, gereja GBKP ngelakoken  peridin sekali ngenca, emaka adi kita singgo iperidiken ibas gereja sideban, janah ateta jadi anggo gereja GBKP, maka kita lanai perlu iperidiken. Bagepe gereja GBKP ngelakoken Peridin man anak kitik, gelah secepat mungkin, ntah pe kitik-kitik nari kita nggo nggeluh ibas persadan ras Yesus Kristus. Erkiteken sie me maka adi lit orang tua lenga naruhken anakna ku gereja, padahal anakna nggo berumur 1 tahun, maka runggun gereja berkewajiban mpersingeti orang tua e, tapi kenca ipersingeti pe, orang tua e lanai nggit, maka orang tua e banci ikenaken pengepkepen khusus.

            Lakon persadan si badia enda ibereken man kerina anggota perpulungen singgo ngawan. Bagepe adi lit anggota ngawan lanai ia ngikuti lakon persadan sedekah sada tahun (band. Gereja GBKP ngelakoken lakon persadan Si Badia 1 tahun, 4 kali), maka anggota ngawan e ipersingeti, tapi adi la ia jera maka anggota e ikenaken pengepkepen khusus.

            Si Banci muat bagin ibas lakon persadan Si Badia eme si la ikenaken pengepkepen khusus. Bagepe lit pengangkan sisalah man perpulungen kerna muat bagin ibas lakon persadan si Badia. Sebab lit anggota perpulungen la ia nggit ikut ibas Lakon Persadan Si Badia adi  sangana lit masalahna. Padahal adi kita sangana lit ibas perbeben/ masalah , i je nge kita banci ndatken kemalemen ate arah kita ngikutiLakon Persadan Si Badia, sebab i je kita banci meteh kerna perkuah ate  Tuhan. Arah Lakon Persadan Si Badia kita ipersingeti, Tuhan siisembah kita eme Tuhan si banci ndungi pergumulenta.

            Ibas kita ngikuti ras muat bagin ibas sakramen, maka terjadi me internalisasi (kegeluhen persadan) kita ras Yesus, alu bage teridah min ibas kegeluhenta tep-tep wari. Kegeluhen singgeluh ibas keselamatan.

Pdt. Steven Kumenit, STh.M.Min.