Keterkelinen Erkiteken Lias AteNa (Efesus 2:4-9)

PERPULUNGEN JABU – JABU

GEREJA GBKP

TANGGAL 22 – 28 MEI 2016.

Epesus 2 : 4 – 9.

Tema : Keterkelinen Erkiteken Lias AteNa.

LATAR BELAKANG

1.      Ibas penjara nari Paulus mereken sada penjelasan man perpulungen Epesus kerna keselamatan singgo ialoken perpulungen Epesus. Keselamatan sienggo ialoken perpulungen Epesus erkite-kiteken lias ras keleng ate Tuhan, labo erkiteken bekas perbahanen manusia (perpulungen Epesus).

2.      Situhuna ope denga perpulungen Epesus tek man Yesus Kristus, pertendin kalak Epesus mate kap, emaka siilakoken kalak Epesus eme salah ras dosa. Perbahanen sibage patut ngaloken pernembeh Dibata. Tapi erkiteken kalak Epesus nggo tek man Yesus Kristus, maka kiniteken enda me sierbahanca kalak Epesus nggeluh ibas persadan ras Yesus Kristus, emaka ibas lias ate Tuhan, kalak Epesus nggeluh ibas keterkelinen.

3.      Keterkelinen sialoken perpulungen Epesus, erktite-kiteken  lias ate Dibata si la ersibar, janah mbelin kal keleng ateNa man perpulungen Epesus. Ate paulus  ngataken enda gelah perpulungen Epesus meteh uga belinna keleng ate Tuhan siseh man bana. Janah keterkelinen ibere Dibata man kalak si tek man Yesus Kristus ngenca, amin gia ia la kalak Yahudi. Sebab la ngena ate Dibata bangsa ntah pe kalak si la kalak Yahudi nggeluh ibas kiniseran erkiteken pernembeh ate Tuhan.

4.      Kegeluhen perpulungen Epesus kenca tek man Yesus Kristus, la saja bebas ibas pernembeh ate Tuhan, tapi perpulungen Epesus lanai nggeluh ibas kematen pertendin, emaka kematen kula lanai jadi kebiaren, sebab Kristus nggo naluken kuasa kematen, bagepe erkiteken kalak si tek man Yesus Kristus nggo nggeluh ibas persadan ras Yesus Kristus, emaka ibas kekeken Yesus Kristus, kalak si tek man baNa pe pagi ipekeke ibas simate nari. Bagepe kalak si tek ras Yesus kundul ia ras Dibata ibas ingan simeganjangna eme Surga. Ibas erti kata kalak si tek ras nggeluh ibas persadan ras Yesus Kristus ndatken kegeluhen si rasa lalap si la erkeri-kerin.

5.      Keterkelinen singgo ialoken perpulungen Epesus, mereken  pengangkan, maka situhuna erkiteken tek man Yesus nge maka perpulungen selamat, emaka ula meganjang ukur ntah pe muji bana, tapi siarus ilakoken perpulungen eme ngataken bujur ras ndalanken kai singena ate Tuhan. Ibas kegeluhen tep-tep wari ula nari ngelakoken perbahanen-perbahanan dosa, bagi siilakoken perpulungen Epesus ope denga tek man Yesus Kristus.

APLIKASI

              Kegeluhen manusia la saja terjeng ibas doni enda, tapi nggeluh i Surga. Kalak singgeluh i Surga adi kita nggeluh ibas keselamatan. Janah keselamatan e banci sialoken adi tek kita man Yesus Kristus. Janah patut nge kita ngataken bujur man Tuhan sebab ibas lias ras perkuah ateNa kita nggo iselamatkenNa. Dibata nelamatkan kita arah pengorbanenNa i Kayu persilang. Janah ibas kematenNa, ke-akunta, ntah pe dosa-dosanta ikut ibas kematenNa, tapi ibas kekekenNa ibas simate nari, kita pe ikut ibas kekekenNa. Maksudna, kita nggo nggeluh ibas keselamatan. Alu bage ngataken maka keselamatan singgo lit bas kita, erkite-kiteken kiniteken bagepe lias ras perkuah ate Tuhan. Emaka payo nge kai siikataken Marten Luther, keselamatan manusia erkite-kiteken kiniteken ras lias ate (Sola Fide : hanya kerna iman ras sola gratia : hanya kerna anugerahNya).

            Adi keterkelinenta erkite-kiteken Tuhan, maka patut nge kita ngataken bujur man Tuhan. Tandana kita ngataken bujur man Tuhan , kita arus ngelakoken kai singena ate Tuhan.

Pdt. Steven Kumenit, STh.M.Min.

Lakokenlah Kai Si Itotokenndu Man Dibata (Mazmur 67:1-8)

KHOTBAH TANGGAL 1 MEI 2016.

GEREJA GBKP

Invocatio    :    Janah adi ipindondu la idatndu, sabap erkiteken tujunndu la mehuli; kai si ipindondu guna pesenangken dirindu saja ngenca (Jakup 4:3).

Ogen          :    Yohanes 14:23-29 (Tunggal).

Khotbah     :    Mazmur 67:1-8 (Responsoria).

Tema          :    Lakokenlah Kai Si Itotokenndu Man Dibata.

LATAR BELAKANG

1.      Sijadi bahan khotbahnta sendah eme ende-enden pengataken bujur, siiendeken ibas rumah pertoton tupung wari raya sapo-sapo. Ibas ende-enden pengataken bujur enda, pemazmur ncidahkan piga-piga hal eme a). Gelah Dibata ncidahkan kiniulinNa alu masu-masu kerina manusia. Alu bage peraten Tuhan itandai kerina kalak, bagepe kerina bangsa meteh maka sada ngenca Tuhan singasup ngkeleni manusia eme Tuhan Dibata. b). Sada harapan gelah kerina bangsa-bangsa muji ras ngataken bujur man Dibata. c). Sada pengajuk gelah kerina bangsa-bangsa ersurak ras rende alu meriah ukur, sebab Dibata bujur ibas erbahan keputusen, bagepe bangsa-bangsa Tuhan kap sinjujurkenca. d). Pasu-pasu Tuhan teridah arah iberekenNa taneh simehuli ras ndatken ulih simehuli.

2.      Pemazmur nggejapkan, janah enda sada ungkapan kiniteken nari, tanah siiani bangsa Israel eme pemere Dibata, enda erkiteken keleng ate Tuhan man bangsa Israel. Janah la saja terjeng taneh simehumur siibereken Tuhan, tapi kai siisuan (juma) bangsa Israel ipasu-pasu Tuhan, emaka bangsa Israel ndatken ulih juma simehuli sierbahanca kesejahteraan ekonomi tercukupi.

3.      Penggejapen pemazmur la lit Dibata sideban seakan Dibata siisembahna sibanci mereken kiniulin man manusia. Erkiteken sie me maka bangsa  Israel arus ngataken bujur man Tuhan saja, alu bage tetap ipasu-pasu Tuhan kegeluhen bangsa Israel, termasuk juma bangsa Israel.

4.      Ibas pasu-pasu Tuhan man bangsa Israel, maka bangsa Israel ndatken kecukupen ras pengajaran kerna keleng ate Tuhan. Alu bage bangsa Israel nggeluh ibas kemalamen ate. Ibas kegeluhen sibagenda, iidah bangsa-bangsa sideban, alu bage bangsa-bangsa sideban banci meteh kerna keleng ate Tuhan, janah nggit ia muji ras ngataken bujur man Tuhan. Ibas bangsa-bangsa si deban muji ras ngataken bujur man Tuhan berarti bangsa-bangsa sideban ngakui kerna kuasa ras keleng ate Tuhan.

5.      Keleng ate Tuhan erdahin arah taneh. I ja Tuhan simasu-masu kerina taneh ibas doni enda, emaka manusia banci ndatken kecukupen arah taneh singgo ipasu-pasu Tuhan e. Alu bage pasu-pasu Tuhan, la saja terjeng man bangsa Israel, tapi pe man kerina bangsa. Bagepe Tuhan siisembah pemazmur, la saja Tuhan bangsa Israel, tapi pe man kerina bangsa-bangsa. Erkiteken sie me maka pemazmur ngajuk kerina bangsa-bangsa gelah muji ras ngataken bujur man Tuhan ras kerina manusia mpehagaken Tuhan.

APLIKASI

            Pasu-pasu Tuhan nggo seh man banta kerina. Pasu-pasu Tuhan teridah ibas kerina dampar, termasuk kegeluhenta, bagepe penemani Tuhan man banta seh genduari, emaka salah nge pengangkanta adi siakap pasu-pasu Tuhan hanya terjeng materi ngenca. Sebab adi terjeng materi ngenca maka banci saja kita kecewa (band. Invocatio).

            Perlu siteh maka kegeluhenta la saja terjeng ibas doni enda, tapi nggeluh ras Yesus Kristus i Surga. Emaka ibas rangka kita banci nggeluh i surga maka penting ibas kegeluhenta nggeluh alu ngataken bujur man Tuhan ras ngelakoken kai sibujur ras singena ate Tuhan. Janah ula sangsi ras mbiar sebab Kesah Si Badia pengasup kita guna ngelakoken sibujur ras singena ate Tuhan. Bagepe adi keleng kal ateta man Tuhan maka siarus lit bas kita eme sikeleng-kelengen sapih-sapih kita manusia, bagepe ndahiken dahinta erpalaskan mbiar man Tuhan. Alu bage banci kita ngaloken kemalemen ate ibas Tuhan nari.

            Lakoken kai siitotokenndu man Tuhan, ertina maka Tuhan saja siiandalkan, bagepe silakoken kai sitotoken kita alu erpalaskan kebujuren ras singena ate Tuhan. Kita arus tutus erdahin, bagepe tutus nandangi kai sitotoken kita.

            Perlu siteh, ertoto eme sada tanda maka kita tuhu-tuhu bergantung man Tuhan saja. Bagepe mari kita erlajar ibas kita ertoto. Kita pe arus ertotoman Tuhan  kerna si la bagi ukurta si seh man banta, sebab arus siimani banci saja sura-sura Tuhan sangana erdahina ibas kegeluhenta. Alu bage banci kita ngataken bujur ibas keadaan ras situasi siuga pe si lit man banta.

Pdt. Steven Kumenit, STh.M.Min.

           

Kenangkihen Yesus Ku Surga Jadi Keriahen Ukur (Lukas 24:50-53)

PERPULUNGEN JABU – JABU

GEREJA GBKP

TANGGAL 1 – 7 MEI 2016.

Lukas 24 : 50 – 53.

Tema : Kenangkihen Yesus Ku Surga Jadi Keriahen Ukur.

LATAR BELAKANG

1.      Kematen Yesus Kristus erbahanca ajar-ajar Yesus nggeluh ibas kebiaren. Tapi kenca Yesus keke ibas simate nari, janah Yesus ncidahken baNa man ajar-ajarNa, siperpudina eme Yesus ncidahken diriNa man ajar-ajarNa, tupung ajar-ajarNa pulung i salah sada rumah i Yerusalem, erbahanca Meriah kal ukur ajar-ajar. Tapi isamping sie mamang ka atena. erkiteken sie me ajar-ajar la tek  adi si tedis i lebe-lebena kerina eme Yesus singgo keke ibas simate nari. Tapi kenca ibukaken Yesus perukuren ajar-ajarNa, maka tek ia kerina, tuhu Yesus nggo nggeluh sue ras kai siinggo ikatakenNa ibas  Pustaka Si Badia.

2.      Kenca dung Yesus ncidahken diriNa man kerina ajar-ajarNa, ibaba Yesus ajar-ajarNa ku Betani jenari ipasu-pasuNa, janah asum Yesus masu-masu ajar-ajarNa, sirang ia ras ajar-ajarna, jenari nangkih Yesus ku Surga. Alu bage Yesus mulih ku inganNa ndube (band. Yohanes 3:13), jenari ibas pasu-pasu Yesus man ajar-ajarNa, Yesus mereken sada ketetapan ukur (keyakinan) man ajar-ajarNa guna ndalankan persuruhenNa eme guna mberitaken Berita si Meriah.

3.      Kenangkihen Yesus ku Surga siisaksiken ajar-ajarNa eme pemuliaan man Yesus singgo keke ibas simate nari. Pemuliaan man Yesus, erkite-kiteken Yesus patuh man BapaNa sinisurga ibas ndalanken pelayanan keselamatan i doni enda. Amin gia Yesus arus ngenanami kiniseran ras mate, tapi tetap peraten Bapa siidahikenNa. Emaka pemuliaan Yesus ngatakenca Yesus nggo menang ibas kuasa kematen nari, jenari kundul me Yesus arah kemuhen Bapa i Surga (band. Mazmur 68:19a, 110:1; Perbahanen 7:56).

4.      Kesirangan Yesus ras ajar-ajarNa, la erbahanca ceda ate ajar-ajar, tapi ajar-ajar nggeluh ibas keriahen ukur, sebab nggo idahna maka Yesus eme tuhu-tuhu Mesias ntah pe Tuhan, jenari kenangkihen Yesus ku Surga ibas rangka nikapken ingan man kerina kalak si tek man baNa (band. Yohanes 14:3).

5.      Erkite-kiteken Yesus eme Tuhan maka isembah ajar-ajarNa Ia, bagepe gedang-gedang wari, ipujina Dibata ibas Rumah Pertoton. Ajar-ajar Yesus lanai mbiar ncidahken dirina man pemimpin-pemimpin kalak Yahudi, imam-imam kepala. Bagepe perlu siteh ajar-ajar Yesus muji Tuhan i rumah pertoton, erkite-kiteken rumah pertoton eme ingan Dibata.

APLIKASI

            Kenangkihen Yesus ku Surga maba keriahen man banta, sebab kita tek man baNa. Bagepe keriahenta la saja terjeng ipegeluhNa mulihi ibas simate nari  adi kita mate ope kerehen Yesus peduakaliken ku doni enda. Tapi ibabaiNa kita nggeluh ras Ia ibas Surga. Sebab kenangkihen Yesus ku Surga eme guna nikapken ingan man banta (Yohanes 14:3; Efesus 2:4-6).

            Tanda keriahen ukur arus teridah ibas : 1). Kita arus ersembah man baNa i gereja. Bagi ajar-ajar Yesus ipujina Dibata gedang-gedang wari i rumah Pertoton, maka kita pe arus muji Dibata i Gereja. 2). Arus ncidahken kebujuren ras ersaksi kerna Yesus eme Tuhan ibas kegeluhenta tep-tep wari.

            Yesus nggo nangkih ku Surga, tapi erpadan Ia guna reh mulihi ku doni enda. ibas kerehenNa sipeduakalikan, tentuna berhubungan ras penghakiman. Emaka adi tuhu meriah ukurta erkite-kiteken kenangkihen Yesus ku Surga, maka kita arus tetap ncidahkan ras ndalankan kai singena ate Tuhan. Adi lang maka ibas penghakiman Tuhan e, kita lanai iatanken nggeluh ras Ia i Surga. Emaka ope terlambat, marilah sidalankan kai singena ate Tuhan ibas kegeluhenta tep-tep wai.

Pdt. Steven Kumenit, STh.M.Min.

Kekelengen Si Serta (Matius 5:38-47)

PERPULUNGEN JABU-JABU

GEREJA GBKP

TANGGAL 24 – 30 APRIL 2016.

Matius 5 : 38 – 47.

Tema : Kekelengen Si Serta.

LATAR BELAKANG

1.      Ibas oratenta sendah, eme sada bagin ibas khotbah Yesus i datas uruk. Janah sekali enda iajarkan Yesus kerna eksistensi anak-anak Dibata. Anak-anak Dibata arus berbeda kalak jahat

2.      Ibas kegeluhen kalak Yahudi lit hukum pembalasan (band. Kel.21:23-24). Janah makna hukum pembalasan enda eme membatasi balas dendam ras kekerasan sue ras aturen silit. Emaka kenca ibalas kejahatan e, persoalan si lit banci dung. Tapi situhuna hukum pembalasan enda erbahan lanai lit ingan nandangi perbahanan keleng ate. Padahal kekelengen eme undang-undang siarus idalankan anak-anak Dibata (band. Matius 22:37-40).

3.      Pengajaran Yesus nandangi jelma sinterem kerna kekelengen eme  anak-anak Dibata arus patuh nandangi aturen pengalemi ibas Dibata nari. Janah ibas pengajaran Yesus kerna kekelengen, labo berarti anak-anak Dibata “la banci ngelawan”. Tapi selaku anak-anak Dibata pembalasan siibereken anak-anak Dibata eme arah keleng ate. Sebab hukuman pembalasan eme hak Dibata.

4.      Situhuna hukum pembalasan enda, eme tanggungjawab hakim. I ja kenca sesekalak jelma ia ipekpek seh ipenna penggel, ntah pe matana ceda, maka ibas pengadilan, hakim berhak ngukum alu penggelken ipen, ntah ncedai mata simekpek ndai. Tapi dungna ibas kegeluhen tep-tep wari kalak Yahudi, enda nggo jadi tempa-tempa sada keharusan siarus ilakoken kalak Yahudi. Tapi ibas perkembanganna, kalak siihukum erkiteken ersalah ia, janah ipen arus ipenggelkan, bagepe mata arus igancih, banci igancih alu sen. Bagepe perlu siteh adi lit kalak simekpek pipi,  merupakan sada penghinaan si mbelin man kalak Yahudi.  Bagepe erkiteken kalak Yahudi lit iteruh kuasa bangsa Romawi, maka ibas aturen/hukum Roma, tentera Romawi banci memaksa sesekalak jelma maba barang bawaanna sejauh 1,5 km.

5.      Adi siperdiateken ibas kegeluhen Yesus, pengajaran Yesus kerna kekelengen nandangi jelma sinterem la tuhu, sebab tupung Yesus itangkap, janah i lebe-lebe imam si mbelin, lit sekalak imam marap Yesus, tapi la ibere Yesus kurum/pipiNasi deban iparap, tapi itegurNa (band. Yohanes 18:22-23). Ibas palas enda, kita arus ngenen hukum kekelengen enda ibas 2 hal, eme lit keleng ate silembut ras keras. Kerina enda ibas rangka mperbaiki sesekalak jelma. Bagepe pengajaran enda, ibas rangka gelah anak-anak Dibata dem kesabaran ras keleng ate nandangi kalak jahat. Alu bage lit perbedaanna anak-anak Dibata ras kalak jahat. sebab adi seri anak-anak Dibata ras kalak jahat, guna kai Tuhan mbalas keleng ate anak-anak Dibata e. Sebab keleng ate anak-anak Dibata la banci terjeng sapih-sapih anak-anak Dibata ngenca, tapi pe arus seh ku kalak jahat, termasuk simusuhi, simekpek kita ras sierbahan kejahatan man banta, sierbahanca kita nggeluh ibas kiniseran. Perlu siteh keleng ate Tuhan seh man kerina jelma termasuk man kalak jahat, enda teridah arah Tuhan mereken matawari man kalak jahat, ras udan man kalak si la bujur. Ibas perbahanan simehuli, sabar, megenggeng ras dem keleng ate maka serta me keleng ate anak-anak Dibata. Enda me siarus icidahkan anak-anak Dibata, sebab anak-anak Dibata eme Imago-Dei. Jadi, keleng ate si seri ras Dibata, situhuna lit bas  kita.

APLIKASI

            Kekelengen eme karakter Tuhan singgo nggeluh ibas kegeluhenta selaku anak-anak Dibata. Sebab kekelengen siserta si lit ibas Dibata nari nggo berekenNa man banta. Sebab tupung Dibata njadiken kita sentudu ras tempasNa, bagepe iembuskenNa napas kegeluhen (band. Kej.1:27; 2: 7), maka kekelengen Tuhan e nggo nggeluh bas kita. Persoalanna, kekelengen e lanai teridah man banta erkite-kiteken dosa. Erkiteken dosa me maka kita lanai nggeluh bagi Imago – Dei.

            Ibas keleng ate Tuhan, kita nggo ipelimbaruiNa. Emaka ate Tuhan kekelengen siserta silit bas kita arus nggeluh mulihi. Tandana nggo nggeluh kekelengen e, ibas kita mpraktekkan kekelengen e ula alu pekulah-kulah. Sebab perlu siteh ibas kita ncidahkan kekelengen alu serta, maka kita nggo nampati temanta, bagepe nggo kita nelamatkan ia, termasuk man simusihi kita. Tuhu banci saja ninta mesera ndalankenca e. Payo, adi la  nggit kita ndalankenca. Tapi adi nggitlah, pasti kepentaren ibas Tuhan nari singajari kita, ras Kesah Si Badia ngasup ngkuasai pusuh ras peratenta. Emaka ngasup sidalanken kekelengen si serta e. Kekelengen siserta mabai kita nggeluh sikeleng-kelengen ras sisampat-sampaten. Alu bage kegeluhen ibas jabu, gereja ras masyarakat, nggeluh alu harmonis.

Pdt. Steven Kumenit, STh.M.Min.