Kemulian Dibata Ibas Manusia (Roma 2:1-11)

PEKAN PENATALAYANAN

GEREJA GBKP

WARI 1, 21 JANUARI 2018

Invocatio :    Arah Ia ersinalsal terang kemuliaan Dibata, janah Ia tuhu-tuhu gambar Dibata. Ia me sinatang kerina sinasa lit alu kataNa si erkuasa. Kenca ibersihkenNa manusia ibas dosa-dosa nari, kundul Ia i Surga arah kemuhen Dibata simada kuasa si meganjangna (Heber 1:3).

Ogen         :    Mazmur 8:1-10.

Kotbah     :    Roma 2:1-11.

Tema        :    Kemulian Dibata Ibas Manusia.

LATAR BELAKANG

1.       I perpulungen Roma lit sada masalah eme kalak kristen siasalna la kalak Jahudi nari (kalak kafir), ikataken kalak kristen asalna kalak Jahudi nari la selamat erkite-kiteken perbahanen-perbahanenna ope denga ngaloken Kristus eme melket. Lagu langkahna la sue ras peraten Dibata, emaka erdosa ras najis ia. Erkiteken erdosa ras najis maka la banci ideheri ras bengket i rumah kalak kristen siasalna la kalak Jahudi nari, sebab adi ndeher ras bengket i rumah kalak kristen siasalna la kalak Jahudi nari jadi najis. Alu bage kalak kristen Jahudi nggo ngukum kalak kristen siasalna la kalak Jahudi nari.

2.       Ibas palas enda ipersingeti Paulus kalak kristen siasalna Jahudi nari, gelah banci ngenen ise kin ia situhuna. Tuhu kalak Jahudi merupaken bangsa pilihen Tuhan ras nggeluh ibas perpadanen ras Dibata. Tapi ibas perbahanen-perbahanenna tep-tep wari la teridah kalak Jahudi nggeluh ibas perpadanen Dibata. Lagu langkahna la ngena ate Dibata. Emaka kegeluhen kalak kristen asal Jahudi nari bali nge ras kegeluhen kalak kristen siasalna la kalak Jahudi nari (kafir). Alu bage kalak kristen siasalna Jahudi nari sitetap mpertahanken Taurat ras nggejapken dirina badia iukum Dibata pagi. Ibas perbahanen sibage rupana, kalak kristen siasalna Jahudi nari alu la igejapna nggo mpepulungna pernembeh ate Tuhan.

3.       Kalak kristen asal Jahudi nari arus ngenen kerna kiniulin ras keleng ate Tuhan. Mehuli ras keleng ate Tuhan, bagepe kesabaren Tuhan arus iergai, sebab ibas kiniulin, keleng ate  ras kesabaren Tuhan gelah manusia jera ibas kegeluhenna si la ngena ate Tuhan, termasuk kalak kristen si asalna Jahudi nari.

4.       Penghukumen ras keselamaten merupaken hak preogatif Tuhan. Emaka kalak kristen asal la kalak Jahudi nari ras kalak kristen si asalna Jahudi nari arus la erleja-leja erbahan simehuli singena ate Tuhan gelah datna kegeluhen si tuhu-tuhu si la ermasap-masap. Emaka ula kepentingen diri saja siiukuri. Jadi kalak sindalanken simehuli alu la erleja-leja ndatken kemulian, kehamaten ras kemalemen ate.

5.       I lebe-lebe Dibata la lit manusia sikusus, tapi seri kerina. Emaka kalak singelakoken simehuli alu la erleja-leja me ibereken Dibata kemulian, kehamaten ras kemalemen ate.

APLIKASI

            Adi ngerana kita kerna Kemulian Dibata, berarti kita ngerana kerna keagungan, kuasa, mejile, kiniulin, kebadian, bagepe kerna kehadiran Dibata i tengah-tengah kegeluhen manusia (kita). Janah kemulian Dibata e, man Ia ngenca si lit.

            Apakah kemulian Dibata lit bas manusia. Tangtangna nari kemulian Dibata lit man manusia. I ja kenca Dibata njadiken manusia sentudu ras tempasNa, bagepe i hempusken Tuhan kesahNa man manusia, emaka nggeluh manusia e, je me situhuna kemulian Tuhan ibas manusia. Bagepe ibas kerehen Jesus Kristus ibas doni enda merupakan kemulian Tuhan sebab i je kita banci ngidah kuasa ras keleng ate Tuhan secara langsung. Bagepe i selamatkenNa kita ibas dosa arah kayu persilang merupakan tanda kemulian Tuhan. Jadi kita nggo ibereken Tuhan kemulian (kuasa, mejile, kiniulin ras keagungan), e  maka kita harus ngataken bujur man baNa.  Tapi ibas Roma 2:7 nina Paulus man kalak sindarami kemulian ras kehamatan labo guna kegeluhen sigenduari enda saja tapi pe guna kegeluhen si reh, eme alu la erleja-leja erbahan simehuli, man kalak sibage ibereken Dibata kegeluhen situhu-tuhu si la ermasap-masap. Situhuna kemulian Tuhan nggo lit bas kita, tapi i jenda, ate Paulus guna ndatken kegeluhen situhu-tuhu arus nggeluh ibas tek man Jesus Kristus ras nggeluh ibas keselamatan singgo iberekenNa man banta. Alu bage situhuna kemulian Dibata nggo nggeluh bas kita eme keselamatan. Emaka kemuliaan Dibata ibas manusia eme nggeluh badia, meteruk ukur ras saber, bagepe nggeluh ibas kiniulin eme ndalanken kai singena ate Tuhan siteridah ibas kegeluhenta tep-tep wari eme mpekena-kena lingkungan ras ncidaken keleng ate man temanta manusia.

Pdt. Steven Kumenit, STh.M.Min.

Dibata Si Erkuasa Nelamatken Kita(Keluaran 6:1-7)

KOTBAH MINGGU, 14 JANUARI 2018

GEREJA GBKP

Invocatio   :    Aku kap Dibata si meganjang dingen badia si erkuasa seh ras lalap (Jesaya 57:15a).

Ogen         :    Johanes 10:24-30 (Tunggal)

Kotbah      :    Keluaren 6:1-7 (Tunggal)

Tema         :    Dibata Si Erkuasa Nelamatken Kita.

LATAR BELAKANG

1.      Tangtangna bangsa Heber tading i Mesir alu senang, tapi erkite-kiteken pergantin raja, janah raja simemerintah bangsa Mesir lanai ingetna perbahanen Jusup nandangi bangsa Mesir, bagepe nggo nterem kalak Heber, maka raja mesir nuruh kalak Heber erdahin (kerja paksa). Emaka bangsa Heber nggeluh mesera. Ibas kegeluhen sibage me iutus Tuhan Musa guna mimpin bangsa Heber ndarat i Mesir nari ku taneh singgo ipadanken man bana. Tapi kenca Musa ras Harun ngadap man raja Mesir, mindo gelah raja mere bangsa Heber ndarat i Mesir nari, ersuina kegeluhen kalak Heber ibahan raja Mesir. Emaka jungut-jungut kalak Mesir man Musa.

2.      Situasi ras keadaan bangsa Heber singgeluh mesera e ituriken Musa man Tuhan, tapi ijabab Tuhan, tuhu nggo Ku petandaken ise situhuna Aku man Abraham, Isak ras Jakup. Aku me Dibata sierkuasa, tapi man bangsa Heber lenga. Bagepe sada padan mereken taneh Kanaan man bana pe lang. Emaka isuruh Tuhan man Musa gelah kataken man bangsa Heber kerna penderkuhna nggo ibegi Dibata. Nggo inget Dibata padanNa ndube emaka ate Tuhan nelamatken ia ibas bangsa Mesir nari janah ngukum bangsa Mesir. Jenari, ate Dibata njadiken bangsa Heber jadi bangsaNa.

3.      Tuhu bangsa Heber nembeh ras merawa man Musa, bagepe mbiar ia man raja Mesir sebab ate raja Mesir munuh kalak Heber si la erdahin alu tutus, erkite-kiteken kalak Heber lenga nandai Dibata situhu-tuhu alu payo.

4.      Ate Tuhan kenca Musa mpetehken ise situhuna Tuhan e janah nggo iperdiateken Tuhan kerna kiniseran ras penderkuhna, maka bangsa Heber lanai jungut-jungut ras la nai mbiar, sebab isampati Tuhan ia. Kegeluhen bangsa Heber isalihken Tuhan. Kegeluhen budak isalihkan jadi bangsa simerdeka. Jadi kalak Heber termotivasi mulihi nggeluh alu mengandalkan Tuhan. Memang kegeluhen ibas keniseran tuhu-tuhu ncedai semangat nggeluh, emaka tempa-tempa nggo pasra ia ibas kegeluhenna sibage.

5.      Dibata mpetandaken kuasaNa man bangasa Heber gelah bangsa Heber meteh la lit kuasa sideban sibanci nampati ia asangken Dibata jine. Kuasa ibas doni enda termasuk kuasa raja italuken Dibata. Emaka ernalem ras erpengarapen man Dibata saja. Bagepe mindo penampat man Dibata saja.

APLIKASI

      Dibata e Dibata sierkuasa janah ngasup nelamatken kita. Ibas sejarah keselamatan manusia, Dibata ngenca singasup nelamatken kita. La lit Dibata sideban ntah pe kuasa-kuasa si deban sinelamatken kita. Termasuk iselamatkenNa kita ibas dosa-dosa nari.

      Keselamatan kita memang ibas rencana Dibata. Emaka reh me Ia ku tengah-tengahta ibas rangka nelamatkan kita. Emaka nina Jesus man kalak Jahudi, kam la biri-biringku erkiteken kam la tek. Tapi biri-biri Jesus eme itandaina soraNa janah iikutkenna Jesus alu bage dat me ia kegeluhen si rasa lalap.

      Genduari kita nggo nggeluh ibas keselamatan, janah pe nggo nggeluh ibas tahun pemere Tuhan, tahun 2018. Tentuna ibas kita ndalani wari-wari ibas tahun 2018 enda banci saja sijumpai sila bagi ukurta, tapi ula kita mbiar sebab Dibata sierkuasa pasti nampati kita. Bagepe ibas kita ndalani wari-wari enda ula siandalkan kuasa-kuasa sideban, tapi marilah kita andalkan kuasa Dibata si banci nelamatkan kita ibas erbage-bage persoalan ras kiniseranta. Tapi kita banci ngandalkan Tuhan adi tek ras nandai Jesus Kristus selaku Tuhan alu payo.

Pdt. Steven Kumenit, STh.M.Min.    

Dibata Reh Me! (Yesaya 64:1-9)

KHOTBAH TANGGAL 3 DESEMBER 2017.

GEREJA GBKP

Invocatio   :    Emaka erjaga dingen ersikaplah, sebab la itehndu ndigan Tuhanndu reh (Matius 24:42).

Ogen         :    Markus 13:24-37 (Tunggal).

Khotbah    :    Jesaya 64:1-9 (Responsoria).

Tema         :    Dibata Reh Me!

LATAR BELAKANG

1.      Kenca bangsa Juda mulih ibas pembuangan Babel nari, bangsa Juda mbangun mulihi kutana ras Rumah pertoton. Tapi ibas mbangun rumah pertoton singgo ceda terjadi me la siangkan, rubat sapih-sapih ia. Keegoisan pribadi ibelinkan. Kalak bayak lebih mementingkan pembangunan rumahna. Kepentingan dirina saja silebekenna. Perbahanen sibagenda rupana la lit sigenjapkan ia nggo ersalah ras erdosa. Akapna kai siibahanna tuhu. Bagepe rumah pertoton simerupakan pusat kegeluhen bangsa Juda, tempa-tempah ikuasai musuh. Musuh la mehamat ras ngergai rumah pertoton.

2.      Jesaya ngenen manusia la ngasup nampati masalah sisangana terjadi man bangsa Juda, emaka ertoto ia man Tuhan gelah Tuhan nusur ras ncidahken kuasana guna nampati bangsaNa. Tanda kerehen Tuhan teridah arah icaingken Tuhan langit. Perlu siteh penampakan Tuhan teridah arah guntur kilat ras gempa bumi. Adi nggo reh Tuhan maka kerina musuh-musuh nggirgir. Perbahanen sibagenda rupana pernah ibahan Tuhan, sierbahanca musuh-musuh Tuhan nggirgir (bdk.Mazmur18:10).

3.      Perbahanan Tuhan simejin e, bagepe keleng ate Tuhan nandangi manusia singarap man Tuhan la lit man dibata-dibata sideban. Amin gia Tuhan e iteh bangsa Juda,Tuhan sierkuasa ras perkeleng tapi tetap denga ia lalap erbahan dosa. Bangsa Juda tetap denga erbahan si la ngena ate Tuhan, emaka la lit bangsa Juda ertoto man Tuhan guna mindo pengalemi dosa ras jera ibas perbahanen si la ngena ate Tuhan.

4.      Dosa erbahanca reh penghukuman Tuhan, nggo pernah inanami bangsa Juda.Janah meserah akapna nggeluh ibas penghukuman Tuhan. Erkiteken sie me Jesaya ertoto gelah Dibata la nginget dosa-dosa bangsaNa ras ula Dibata nembeh ibas perbahanen singgo ibahan bangsa Juda. Lit 3 alasan maka ipindo Jesaya gelah ula Dibata ngukum bangsaNa, eme : a). Bangsa Juda eme anak-anak Dibata, janah Dibata eme bapa. b). Bangsa Juda taneh dah kap. Dibata selaku pade kudin sangana nepa bangsa Juda ku simehuli. c).Bangsa Juda eme bangsa Tuhan.

5.      Ibas pertoton enda, lit 3 hal siate ipindoken ras iarapken nabi Jesaya eme: a). Nusur min Tuhan ncidahken kuasaNa simejin gelah musuh-musuh nggirgir. b). Ula Dibata ngukum bangsa Juda. c). Bangsa Juda jera ibas dosa-dosana nari

APLIKASI

            Temanta sendah eme Dibata reh me. Ngatakenca Yesus Kristus sebagae Tuhan reh mulihken ku doni enda. Kerehen Jesus mulihken kita kerina la metehsa, Saja tanda-tanda kerehenNa lit. Emaka kita arus metenget nandangi kerina e gelah ibas kerehen Jesus Kristus mulihken kita banci atan ibas persadanNa ibas surga. Sebab Tuhan Jesus tetap ngenen ras ngaloken anak-anakNa singarap man baNa.

            Minggu Adven sipemena enda, ngataken maka ibas kita nimai kerehen Jesus mulihken, arus aktif eme tetap erdahin ras beraktifitas, bagepe tetap njaga kebadian nggeluh. Adi lit salah dosanta maka kita arus ngadap man baNa guna ngakuken salah dosanta. Alu bage ibas kerehenNa si radu ras penghukuman la kita kena hukumanNa.   

Pdt. Steven Kumenit, STh.