Manusia Eme Tempas Dibata (Kejadian 1:26-27)

PEKAN PENATALAYAN

GEREJA GBKP

WARI III, SELASA 23 JANUARI 2018.

Introitus : Janah genduari enggo ipakendu manusia simbaru. Kam genduari manusia si mbaru si tetap ipebebarui Dibatasi njadiken kam rikutken tempasNa jine. Tujunna eme gelah itandaindu alu serta Dibata (Kolose 3:10).

Ogen      :    Epesus 4:17-24.

Kotbah   :    Kejadin 1:26-27.

Tema      :    Manusia Eme Tempas Dibata.

LATAR BELAKANG

1.      Ibas bahan kotbahnta ituriken kerna Dibata jadiken manusia sue ras tempasna (Imago Dei). Ibas Dibata njadiken manusia, sipaling utama eme biak Dibata nggeluh ibas diri manusia. Bagepe erkiteken tempas Dibata enda me maka manusia merupaken mahkluk si iharapken Dibata guna erperan “mengatasnamakan Dibata” ibas doni enda. Erkiteken sie me manusia itugasken ntah pe jadi perpanjangen tangan Tuhan guna njaga ras ngusahai tinepa Dibata si nggo leben lit asangken manusia.

2.      Manusia ijadiken Dibata sue ras tempasNa ngataken maka manusia jadi wakilNa guna ngkuasai  doni ras nggeluh ibas doni nari (dat nakan). Jadi tuhu-tuhu manusia mpunyai hubungan secara istimewa ras Tuhan.

3.      Ibas Dibata njadiken manusia, merupakan sada turi-turin singatakenca maka manusia eme puncak ibas penciptaan Tuhan, janah Tuhan mereken mandat sepenuhna man manusia guna ngkuasai ras njagai tinepa Tuhan. Memang pemeliharaan ciptaan Tuhan, Tuhan sendiri sindahikenca/ngaturkenca, tapi ibas Dibata njadiken manusia, maka enda sebage tanda kehadiranNa ibas doni enda. Perlu siteh makna gambar ibas paksa sie ngatakenca erkite-kiteken sekalak raja la banci hadir ije, maka ikirimken me patung raja ibelang-belang kekuasaanna sebage tanda kehadirenna. Bageme makna kahadiran manusia ibas doni enda sebage wakil Tuhan ibas doni enda.

4.      Erkiteken manusia wakil Tuhan maka lit perintah Tuhan siharus ilakoken manusia eme njagai ras ngusahai tinepa Tuhan sideban. Manusia harus melestarikan tinepa Tuhan gelah la ceda. Bagepe manusia ibere nggeluh ibas kai singgo itepa Tuhan. Selaku wakil Tuhan ibas doni enda, maka manusia harus ndalankan perintah Tuhan e alu meteruk ukur ras dem tanggungjawab.

5.      Tuhan ciptakan manusia memang nggo lit ibas perencanaanNa, emaka kenca nggo dung Dibata njadiken isi doni enda, maka ijadikenNa manusia, emaka kenca manusia ijadiken, maka manusia isuruh Tuhan njagai ras ngusahaisa. Enda sada perintah Tuhan man manusia. Emaka kelangsungan nggeluh tinepa Tuhan sideban lit ibas tan manusia. Guna njaga ras ngusahai enda me manusia harus make karakter Tuhan singgo ibereken Tuhan ibas diri manusia, gelah kai siisuraken Tuhan kerna doni tinepa Tuhan enda banci seh.

APLIKASI

            Kita enda tempas Dibata. Erti tempas Dibata eme Dibata hadir ras njagai doni ciptaanNa. Emaka tanggungjawabta eme uga gelah ciptaan Dibata ibas doni enda nggeluh alu mehuli. Siimaksudken hadir la saja nggeluh sisada-sisada, tapi radu ras temanta manusia ndalanken tanggungjawab singgo iperentahken Dibataman banta. Sebab Dibata njadiken kita labo sendiri, tapi lit manusia si deban eme Hawa. Ertina kita arus nggeluh kerja sama ras temanta manusia guna ndalanken si mehuli si ngena ate Tuhan.    

            Genduari tinepa Dibata sideban si seh kal jilena nggo ceda erkiteken dosa manusia. Bagepe erkiteken dosa manusia nggeluh alu egois ras mementingken diri sendiri. Akibat nggeluh egois ras mementingken diri sendiri, bagepe tinepa Dibata sideban nggo ceda maka lanai berekenna simehuli bas banta. Kita nggeluh lanai teneng ras dame. Sebab siidah ras sigejapken erkiteken lapisen ozon nggo bocor maka seh kal lasna genduari, sebab fungsi lapisan ozon eme melindungi kita ibas sinar cahaya matahari langsung. Genduari erkiteken nggo bocor maka sinar matahari langsung ngkenai kita. Bagepe siidah ras sigejapken adi nggo kenca udan maka turah me bancir. Enda akibat perambahan hutan, lingkungan la i jaga, rsd.

            Tuhu tempas Dibata bas kita pernah “kabur” erkiteken dosa.Tapi erkiteken Dibata arah Yesus Kristus nggo nelamatken kita, maka tempas Dibata teridah mulihi bas dirinta. Kita nggo nggeluh selaku manusia mbaru. Janah selaku manusia simbaru, nggo iajarken Yesus uga nggeluh alu mehuli.

Selaku manusia simbaru ras nggeluh alu mehuli teridah min arah mpekena-kena doni enda singgo ceda jadi mehuli mulihi. Sebab ibas kita njaga ras mpekena-kena doni enda maka kita banci nggeluh ibas kesejahteraan. Tandana kita nggeluh ibas kesejahteraan eme lingkungan njaga kita. Berekenna ketenangen man banta. Kita bebas ibas pinakit si reh arah lingkungen sikotor nari. Bagepe perekonomianta bertambah.

Bagepe adi kita selaku pemimpin (pemerintah), ntah pagi kita jadi pemimpin maka tanggungjawabta eme ndalanken simehuli ibas doni enda.Tapi sipaling penting bas kita, eme selaku tempas Dibata arus ngelakoken simehuli singena ate Tuhan ibas kegeluhenta tep-tep wari. Hubungen sosialta arus teridah eme radu ras temanta manusia mpekena-kena doni enda singgo ceda, bagepe alu ukur meriah ras pendilo guna nampati nandangi temanta manusia simbutuhken penampatta nggit kita nampati ia.  

Pdt. Steven Kumenit. STh.M.Min.  

Politik: Erti Ras Ulihna (Kejadian 41:48-57)

PEKAN PENATALAYANAN

GEREJA GBKP

WARI II, SENIN 22 JANUARI 2018.

Introitus :    To pepulunglah kerina kalak Jahudi si lit I kuta Susan enda; ertoto dingen erpuasalah kam kerina guna aku. Ola kai pe pan the inemndu telu wari telu berngi dekahna. Aku ras suruh-suruhenku sidiberu pe bage ibahan kami. Kenca bage lawes aku ndahi raja, aminna gia e ngelanggar aturen. Adi terpaksa kin aku mate kerna si e; mate pe labo dalih (Ester 4:16).

Ogen      :    Matius 2:16-18.

Kotbah   :    Kejadin 41: 48-57.

Tema      :    Politik: Erti Ras Ulihna.

LATAR BELAKANG

1.      Yusup labo kalak Mesir, tapi erkiteken kepentaren si lit bas ia, khususna ngasup ngoge kai erti nipi raja maka Yusup iangkat jadi wakil raja. Jabatan selaku Wakil raja cukup penting, sebab Jusup bertanggungjawab langsung man raja, jenari selaku wakil raja,  ise pe la banci erbahan kai pe adi la nungkun lebe man Yusup.

2.      Pengangkatan Yusup jadi wakil raja Mesir ertujun guna ngaturken bangsa Mesir gelah nggeluh adil ras makmur, apai ka ibas menghadapi sada kiniseran ibas 7 tahun si reh, eme kelihen si mesangat. Sebab ibas nipi raja Mesir, singgo ioge ntah pe iantusi Yusup ngataken maka bangsa Mesir 7 tahun nggeluh alu riba-iba pangan, janah pitu tahun kenca sie, bangsa Mesir nggeluh ibas kiniseran.

3.      Selain Yusup iangkat jadi wakil raja ras nggo ibereken raja otoritas penuh (kuasa) guna merentah, bagepe gelar Yusup isambari alu gelar kalak Mesir  eme Sapnat Panea, siartina Dibata ngerana, Ia nggeluh, bagepe ibereken raja sekalak diberu guna jadi ndehara Yusup eme Asenat, siertina Milik Neit (Dewi kalak Mesir).

4.      Ibas umur telu puluh tahun Yusup nadingken istana raja guna erdahin mpesikap gelah rakyat Mesir la kelihen kenca bangsa Mesir bengket ku bas pitu tahun kiniseran (nggeluh ibas kelihen). Cara kerja ntah pe teknik siilakoken Yusup e me bagi siikatakenna man raja eme mpepulung seperlima ibas ulih peraninna guna jadi persediaan. Ipepulung Yusup kerina bahan pangan e,  janah itamaken ku lumbung si lit ibas tep-tep kuta. Emaka kenca reh bencana kelihen singkenai bangsa Mesir ras bangsa-bangsa sidebanna, bangsa Mesir nari ngenca sitetap lit persedian panganna, bangsa Mesir la nggeluh ibas kelihen sebab lebih nggo persediaan panganna.  Erkiteken tersedia kerina bahan pangan ibas bangsa Mesir, maka situasi enda terberita seh ku bangsa – bangsa sideban, emaka reh me  kerina bangsa-bangsa sideban  guna nukur nakan ku Mesir.

5.      Ngenen kai siilakoken Yusup nandangi bangsa Mesir, situhuna pengrealisasian ibas sura-sura Dibata nandangi bangsa Mesir, khususna man Yusup. Sebab alu la igejap raja Mesir, peraten Tuhan nggo erdalan. Tuhan make bangsa Mesir guna mengrealisasikan rencana Tuhan simbelin eme pemeliharaan man anak-anakNa (nen 45:5-8; 50:19-20).

APLIKASI

            Ngerana kerna politik bas gereja GBKP situhuna nggo dung, sebab nggo lit pengakun iman gereja GBKP kerna politik, janah salah sada point eme politik merupakan upaya untuk menata kehidupan masyarakat demi kesejahteraan bersama. Tapi persoalenna genduari eme lit kalak sindalanken politik e me guna kepentingen pribadi ras la guna kesejahteraan masyarakat. Jadi penungkunen man banta ngkai maka nterem kita sisalah ngertiken politik e. Selaku kalak kristen enda arus ngenen ibas kaca mata kiniteken. Nterem kalak sisalah ngertiken politik e erkite-kiteken lenga bages bas ia kiniteken e. Sebab adi nggo mbages kiniteken bas ia maka lit bas ia kepentaren ibas Dibata nari. Alu bage iangkana maka tanggungjawab kita, khususna pemimpin eme guna mensejahterahkan masyarakat.

            Selaku pemimpin, lit kuasa bas ia. Arah kuasa enda tentuna ergampangna ndalanken politik guna kesejahteraan masyarakat. Sebab kuasa e si lit bas pemimpin pasti ibegiken masyarakat. Emaka penting man pemimpin ngenen kuasa si lit bas ia eme erkiteken pemere Dibata janah guna kepentingan masyarakat. Emaka selaku pemimpin ula kuasa negatif siipakena eme kuasa otoriter ras kuasa “membunuh” masyarakat, i ja adi la seh sura-surana nembeh ras merawa pemimpin e, bagepe masyarakat si la mendukung ia nembeh ras merawa atena masyakat e, dungna la iperdiatekenkerna kesejahteraan masyarakatna. Tapi siarus lit eme kuasa simbangun ras mperdiateken kesejahteraan masyarakat luas, amin gia lit si la senang ras tempa-tempa la milih ia tupung pemilihen ndube.

            Nggeluh ibas kesejahteraan berarti masyarakat sejahtera ibas kesehatan ras ekonomi. Emaka adi masyarakat sejahtera tentuna bangsanta pe ikut sejahtera.

            Guna ndatken kesejahteraan penting kal man pemimpin ndalanken politik alu mehuli.

Pdt. Steven Kumenit, STh.M.Min.

Kemulian Dibata Ibas Manusia (Roma 2:1-11)

PEKAN PENATALAYANAN

GEREJA GBKP

WARI 1, 21 JANUARI 2018

Invocatio :    Arah Ia ersinalsal terang kemuliaan Dibata, janah Ia tuhu-tuhu gambar Dibata. Ia me sinatang kerina sinasa lit alu kataNa si erkuasa. Kenca ibersihkenNa manusia ibas dosa-dosa nari, kundul Ia i Surga arah kemuhen Dibata simada kuasa si meganjangna (Heber 1:3).

Ogen         :    Mazmur 8:1-10.

Kotbah     :    Roma 2:1-11.

Tema        :    Kemulian Dibata Ibas Manusia.

LATAR BELAKANG

1.       I perpulungen Roma lit sada masalah eme kalak kristen siasalna la kalak Jahudi nari (kalak kafir), ikataken kalak kristen asalna kalak Jahudi nari la selamat erkite-kiteken perbahanen-perbahanenna ope denga ngaloken Kristus eme melket. Lagu langkahna la sue ras peraten Dibata, emaka erdosa ras najis ia. Erkiteken erdosa ras najis maka la banci ideheri ras bengket i rumah kalak kristen siasalna la kalak Jahudi nari, sebab adi ndeher ras bengket i rumah kalak kristen siasalna la kalak Jahudi nari jadi najis. Alu bage kalak kristen Jahudi nggo ngukum kalak kristen siasalna la kalak Jahudi nari.

2.       Ibas palas enda ipersingeti Paulus kalak kristen siasalna Jahudi nari, gelah banci ngenen ise kin ia situhuna. Tuhu kalak Jahudi merupaken bangsa pilihen Tuhan ras nggeluh ibas perpadanen ras Dibata. Tapi ibas perbahanen-perbahanenna tep-tep wari la teridah kalak Jahudi nggeluh ibas perpadanen Dibata. Lagu langkahna la ngena ate Dibata. Emaka kegeluhen kalak kristen asal Jahudi nari bali nge ras kegeluhen kalak kristen siasalna la kalak Jahudi nari (kafir). Alu bage kalak kristen siasalna Jahudi nari sitetap mpertahanken Taurat ras nggejapken dirina badia iukum Dibata pagi. Ibas perbahanen sibage rupana, kalak kristen siasalna Jahudi nari alu la igejapna nggo mpepulungna pernembeh ate Tuhan.

3.       Kalak kristen asal Jahudi nari arus ngenen kerna kiniulin ras keleng ate Tuhan. Mehuli ras keleng ate Tuhan, bagepe kesabaren Tuhan arus iergai, sebab ibas kiniulin, keleng ate  ras kesabaren Tuhan gelah manusia jera ibas kegeluhenna si la ngena ate Tuhan, termasuk kalak kristen si asalna Jahudi nari.

4.       Penghukumen ras keselamaten merupaken hak preogatif Tuhan. Emaka kalak kristen asal la kalak Jahudi nari ras kalak kristen si asalna Jahudi nari arus la erleja-leja erbahan simehuli singena ate Tuhan gelah datna kegeluhen si tuhu-tuhu si la ermasap-masap. Emaka ula kepentingen diri saja siiukuri. Jadi kalak sindalanken simehuli alu la erleja-leja ndatken kemulian, kehamaten ras kemalemen ate.

5.       I lebe-lebe Dibata la lit manusia sikusus, tapi seri kerina. Emaka kalak singelakoken simehuli alu la erleja-leja me ibereken Dibata kemulian, kehamaten ras kemalemen ate.

APLIKASI

            Adi ngerana kita kerna Kemulian Dibata, berarti kita ngerana kerna keagungan, kuasa, mejile, kiniulin, kebadian, bagepe kerna kehadiran Dibata i tengah-tengah kegeluhen manusia (kita). Janah kemulian Dibata e, man Ia ngenca si lit.

            Apakah kemulian Dibata lit bas manusia. Tangtangna nari kemulian Dibata lit man manusia. I ja kenca Dibata njadiken manusia sentudu ras tempasNa, bagepe i hempusken Tuhan kesahNa man manusia, emaka nggeluh manusia e, je me situhuna kemulian Tuhan ibas manusia. Bagepe ibas kerehen Jesus Kristus ibas doni enda merupakan kemulian Tuhan sebab i je kita banci ngidah kuasa ras keleng ate Tuhan secara langsung. Bagepe i selamatkenNa kita ibas dosa arah kayu persilang merupakan tanda kemulian Tuhan. Jadi kita nggo ibereken Tuhan kemulian (kuasa, mejile, kiniulin ras keagungan), e  maka kita harus ngataken bujur man baNa.  Tapi ibas Roma 2:7 nina Paulus man kalak sindarami kemulian ras kehamatan labo guna kegeluhen sigenduari enda saja tapi pe guna kegeluhen si reh, eme alu la erleja-leja erbahan simehuli, man kalak sibage ibereken Dibata kegeluhen situhu-tuhu si la ermasap-masap. Situhuna kemulian Tuhan nggo lit bas kita, tapi i jenda, ate Paulus guna ndatken kegeluhen situhu-tuhu arus nggeluh ibas tek man Jesus Kristus ras nggeluh ibas keselamatan singgo iberekenNa man banta. Alu bage situhuna kemulian Dibata nggo nggeluh bas kita eme keselamatan. Emaka kemuliaan Dibata ibas manusia eme nggeluh badia, meteruk ukur ras saber, bagepe nggeluh ibas kiniulin eme ndalanken kai singena ate Tuhan siteridah ibas kegeluhenta tep-tep wari eme mpekena-kena lingkungan ras ncidaken keleng ate man temanta manusia.

Pdt. Steven Kumenit, STh.M.Min.