Perpulungen Si Jadi Usihen (1 Tesalonika 1:2-10)

             

KHOTBAH MINGGU 22 JULI 2018.

GEREJA GBKP

Invocatio :    Sebab ibas persadanndu ras Kristus, kam enggo ipebayak ibas kai pe, ibas pengeranandu bagepe ibas pemetehndu (1 Korinti 1:5).

Ogen        :    Heber 5 : 11-14 (Responsoria).

Kotbah     :    1 Tesalonika 1 : 2 – 10 (Tunggal).

Tema       :    Perpulungen Si Jadi Usihen.

LATAR BELAKANG

1.      Perpulungen Tesalonika merupaken ulih pelayanan Paulus tupung perjalanan misi pe duaken. Janah ibas tahun 50/51tupung Paulus i Korinti isuratkenna sada surat man perpulungen Tesalonika kenca Paulus megi berita ibas Silas ras Timotius kerna perkembangen kiniteken ras kegeluhen perpulungen Tesalonika.

2.      Berita siibaba Silas ras Timotus eme kenca Penginjilan Paulus, terjadi me perkembangen kiniteken simehuli. Kata ras perbahanen simehuli teridah man perpulungen Tesalonika. Janah enda jadi enem bulan kenca perpulungen tek man Yesus Kristus.

3.      Ibas surat Paulus ku Tesalonika  nina Paulus:  a). Lalap iinget Paulus perpulungen ibas pertotonna kerna uga kiniteken ras perbahanen perpulungen. b). perpulungen latih erdahin erkiteken keleng ate. c). tetap ukur ras erpengarapen man Tuhan. d). Tuhan jadi sikerajangen Perpulungen. e). Berita simeriah siibaba Paulus labo terjeng arah kata tapi alu kuasa Kesah Si Badia ras alu kiniteken sitetap ibas pengajaren situhu-tuhu. f). Tupung Paulus ringan i Tesalonika Paulus erbahan simehuli janah enda iteh perpulungen. g). Perpulungen nggo ngusih Paulus ras Tuhan. h). Amin gia melala kiniseran siinanami perpulungen tetap perpulungen ngaloken Berita Si Meriah. i). Perpulungen Tesalonika nggo jadi usihen nandangi kalak si tek si ringan i Mekodoni ras Akaya. j). Berita Simeriah ras perpulungen si erkiniteken man Tuhan nggo mbar kujapa pe. Emaka kerina kalak ncakapken kerna perpulungen Tesalonika. k). Perpulungen Tesalonika nggo nadingken sembah-sembahen guna ndahi Dibata jenari nembah man Dibata singgeluh ras situhu-tuhu. l). Perpulungen nimai kerehen AnakNa i surga nari eme si ipekeke Dibata  dingen simulahi kita ibas ukumen ibas Dibata nari.

4.      Ibas surat enda, ate Paulus ngataken maka Berita Si Meriah simengubah kegeluhen perpulungen Tesalonika, janah kegeluhen sibage eme kegeluhen simehuli.

5.      Pertobatan perpulungen merupaken pertobatan situhu-tuhu, janah tuhu-tuhu ersembah man Tuhan saja ras nggeluh ibas nimai kerehen Yesus Kristus. Jadi kiniteken, keleng ate ras erpengarapen man Tuhan icidahken perpulungen Tesalonika.

APLIKASI.

            Gereja GBKP nggo 77 tahun njayo. GBKP nggo njayo benaken tahun 23 Juli 1941. Selaku gereja si nggo dewasa ras mandiri, tentuna harus tetap ncidahken kegeluhen si ersembah man Dibata, bagepe kegeluhen sierpengarapen man Tuhan. Tuhu ibas kegeluhen sibage melala tantangan-tantangan siihadapi gereja GBKP. Janah tantangan-tantangan, subuk kiniteken, keleng ate ras erpengarapen man Tuhan saja banci erbahanca perpulungen pecah  adi la iatasi alu mehuli.

            Siidah amin gia nggo 77 tahun, tapi kita pe harus sadar melala denga siarus man pekenan. Melala denga kita ikategoriken lenga banci jadi guru ras minem susu denga (bdk. ogen). Seharusna min selaku gereja, kita harus ernalem man Dibata saja, sebab ia ulu kepentaren singasup mabai kita jadi gereja sidewasa ras mandiri. Ipihak sideban gereja GBKP nggo jadi usihen khususna kerna diakonia. Tapi ate gelah kerina aspek jadi usihen, maka situtama kita harus tuhu-tuhu ernalem ras ersembahman Tuhan saja. Alu bage kita banci merealisasikan simehuli singena ate Tuhan. Sebab ibas kita merealisasikan aspek kekelengen, pengarapan ras erkiniteken man Tuhan,pasti ipinpin Kesah Si Badia kita.

           

Pdt. Steven Kumenit, STh.M.Min.

Tutus Ras Bujur Ibas Pendahin (Matius 25: 14 - 30)

PERPULUNGEN JABU – JABU

GEREJA GBKP

TANGGAL 22 – 28 JULI 2018.

Matius 25 : 14-30.

Tema : Tutus Ras Bujur Ibas Pendahin.

LATAR BELAKANG

1.     Tupung Yesus ras ajar-ajar kundul i uruk seton, isungkun ajar-ajar man Yesus kerna tanda-tanda kerehen Yesus peduakaliken ras tanda kedungen jaman. Gelah jelas ras ngasup ajar-ajar ngangkaisa, Yesus make perumpamaan kerna telu kalak juak-juak (oratenta sendah).

2.     Kerehen Yesus peduakaliken ras kedungen jaman bali ras Kinirajan Surga. Sebab inti kinirajaan Surga eme pemerintahen Yesus. Yesus jadi Raja ibas Kinirajaan Surga e. Emaka kenca seh Kinirajaan Surga e, je me terealisasi Kinirajaan Surga situhu-tuhu janah kalak sindalanken sura-sura Dibata ngenca sibanci bengket ibas Kinirajaan Surga. Maksudna Yesus la mereken sada jawaban sipasti kerna wari, tanggal kerehenNa pagi, tapi alu perumpamaan enda ate Yesus ngatakenca gelah ajar-ajar harus erjaga-jaga ras erdahin ibas nimai Kerajaan Surga.

3.     Ibas perumpamaan kerna Kinirajan Surga teridah ise sibanci bengket ibas Kinirajan Surga eme tutus ras bertanggungjawab ndalankenna pemere Dibata (Tuan). Janah perlu siteh talenta siimaksudken ibas ogenta eme “pendahin/kengasupen” siibereken Tuhan man sesekalak jelma guna ipake alu bertanggungjawab ras guna keselamatan ibas doni enda. Emaka “pendahin/kengasupen” banci berbeda-beda siibereken Tuhan. Lit 5 talenta, lit 2 talenta ras 1 talenta. Amin gia teridah nominal (5,2,1), labo berarti nuduhken sada kehebaten sesekalak jelma, ntah pe Dibata rayo-ayo man manusia tinepaNa. Tapi siitekanken i jenda eme pemanfaatan pemere Dibata ibas kegeluhen manusia tep-tep wari. Emaka amin gia lit sidat 5, lit sidat 2 ras lit sidat 1, i lebe – lebe Tuhan seri nilaina.

4.     Ibas kerehen Yesus peduakaliken simerupaken nggeluh ibas Kinirajan Surga i je lit pengadilen. Ibas pengadilen siilakoken Yesus, pagi kalak situtus ndahiken persuruhen Dibata (Tuan) singgeluh ibas ibas Kinirajan Surga. Janah nggeluh ibas Kinirajan Surga, nggeluh alu meriah ukur ras senang sebab nggeluh ras Yesus Kristus. Tapi kalak si la tutus, si la nggit ndalanken persuruhen Dibata (Tuan), ihukum Dibata. Jenis penghukumenna eme : a). Ia igolongkan kalak jahat ras perkisat. b). la terpake. c). Talenta siibereken Tuanna ndube ibuat Tuanna mulihi. d). Isampetken ku ingan sigelap.

5.     Keselamatan siibereken Tuhan man manusia tergantung kegeluhen manusia ibas mempertanggungjawabkan kesempatan ras pemere Dibata man manusia e.

APLIKASI

            Harus sigejapken lit talenta siibereken Tuhan man banta, janah erbage-bage talante siibereken Tuhan man banta. Bagepe la seri mbuena talenta siibereken Tuhan man banta. Ibereken Tuhan talenta sue ras kengasupenta. Janah labo kita sinentuken talenta e, tapi Tuhan. Idah Tuhan piga talenta singasup kita ndahikenca. Jadi enda merupaken hak preogatif Tuhan. Emaka la banci kita kecewa ntah pe nembeh man Dibata. Sipenting man banta sipergunaken talenta e guna kemulian Tuhan. Gelah paksa reh Yesus pagi, kita banci nggeluh alu senang ibas surga. 

            Temanta sendah eme Tutus ras bujur ibas pendahin. Banci saja kita erpengakap maka bahan PJJnta sendah khusus man kita si umurna produktif denga. Lang. Memang sada pihak kita siproduktif denga ibas erdahin harus tutus ras bujur. Sebab tupung kita tutus ras bujur maka teridah bekas pendahinta mejile, alu bage banci saja kita ngaloken upah simehuli, apakah kenaikann pangkat ntah jabatan, ntah hasil sicukup melala. Tapi ketika kita la tutus ras la bujur, maka kita lanai ipercayakan guna ndahiken dahin sideban, ntah kita ipecat, ntah kita itangkap KPK erkiteken korupsi. Ipihak sideban kita harus ngenen kerna pelayanan secara umum, khususna ibas gereja GBKP. Ibas gereja GBKP subjek pelayanan eme kerina anggota perpulungen. KAKR, Permata, Moria, Mamre, Saitun harus ikut ibas pelayanan. Jadi kai talenta siibereken Tuhan man banta harus sidahiken alu tutus ras bujur. Emaka ibas kerehen Yesus Kristus pagi, kita banci atan ibas Kerajaan Surga.

Pdt. Steven Kumenit, STh.M.Min.

                        

Doni Seh Kal Ulihna (Mazmur 104: 1 - 24)

PERPULUNGEN JABU – JABU

TANGGAL 1 – 7 JULI 2018.

GEREJA GBKP

Masmur 104 : 1-24.

Tema : Doni Seh Kal Ulihna.

LATAR BELAKANG

1.      Pemasmur kenca inenna alam raya ras kegeluhen doni enda, maka respon kinitekenna eme Tuhan sinjadiken kerina enda. Erkiten sie pemasmur ngajuk tendina guna muji Tuhan. Gelah tendina muji Tuhan pencipta langit ras doni kerina.

2.      Ijadiken Tuhan langit bagepe kerina isina tuhu-tuhu mejile janah ibabo lau i datas langit lit rumah Tuhan. Bagepe embun ras angin situpung sie kalak Kanaan tek dewa singendarai ras simereken udan, tapi kerina enda ipake Tuhan guna jadi suruh-suruhenNa. Kai siisuruh Tuhan em siilakoken embun ras angin. Adi kin lit udan ras angin, berarti e erkiteken Tuhan sinuruhsa. Kerina ia patuh man Tuhan.

3.      Langit doni ras kerina isina ijadiken Tuhan   mehuli kerina, kerina saling membutuhken ras lit fungsina. Erkiteken mehuli ras lit fungsina, maka kerina nggeluh alu dame. Bagepe kebutuhen-kebutuhen mahluk hidup, subuk asuh-asuhen ras manusia  tercukupi. Manusia erdahin alu la ncedai tinepa Tuhan sideban.

4.      Tuhu mehuli ras mejile tinepa Tuhan. Enda kerina ijadiken Tuhan alu kepentarenNa. Tuhu-tuhu Tuhan merupaken arsitek Agung.

5.      Mazmur puji-pujin enda selain ncidahken kerna keagungan ras kuasa Tuhan, tapi pe ngataken la lit kuasa dewa, bagepe kuasa angin, lawit ras ibas doni enda, manusia la banci nembah man tinepa Tuhan sembahlah Tuhan pencipta langit ras doni.

APLIKASI

            Situhuna masmur 104 enda merupaken bahasa puisi ibas kejadin 1 nari. Tuhu mejile kerina. Erkiteken sie ijadiken Tuhan manusia gelah kita sinjagai tinepa Tuhan sideban. Tapi sijadi genduari eme manusia alu keegoisan ras kerangapenna, kai simehuli siijadiken Tuhan nggo ceda. Emaka kita ka singenanamisa.

            Adi siperdiateken, labo hutan, terumbuh karang si nggo ceda saja, tapi pe lapisan oson simerupaken pelapis atmosfir nggo bocor. Emaka adi las wari, tuhu-tuhu melas kal, sebab lapisan oson simerupakan “penahan” sinar matahari langsung nggo bocor, emaka sinar matahari lanai sinahansa.

            Langit bagepe doni enda nggo ceda erbahanca musim – musim nggo berganti, lanai tentu musim-musim e. Biasana ibas bulan-bulan tertentu je musim perudan, genduari lanai tentu. Janah adi udan pe la bancir, sebab lau e nggo lit inganna.  Emaka kita nggeluh lanai dame ras teneng. Jadi penungkunen man banta. Apakah tetap kita nggit nggeluh bage?. Tentuna lang. Emaka harus sipehuli doni  singgo ceda enda. adi la kita ise nari. Tuhu enda butuh waktu, tapi adi nggo mehuli mulihi ras mejile tentuna kita ras anak kempunta singenanamisa.

            Guna pehuli tinepa Tuhan singgo ceda harus imulai ibas diri kita sendiri. Ibas erti kata, arus lebe kita mbiar man Tuhan, ras ngertiken tuhu ibereken Tuhan kerina enda man banta, tapi labo berarti  guna icedai, tapi ijaga ras irawat. Ipake Tuhan kita guna njagai tinepaNa. Tuhu “kerina e” guna kebutuhen kita, emaka mari sijaga. Ula erkiteken kebutuhen ekonominta maka ceda siban lingkungenta.

Pdt. Steven Kumenit, STh.M.Min.