Tuhan Mbebasken Bangsanta (Ulangan 6:20-25)

PERPULUNGEN JABU-JABU

GEREJA GBKP

TANGGAL 12 – 18 AGUSTUS 2018

Ulangan 6: 20 – 25

Tema : Tuhan Mbebasken Bangsanta.

LATAR BELAKANG

1.     Tupung bangsa Israel ngadi-ngadi i dataran Moab, nandangi bengket ku taneh Kanaan, janah taneh Kanaan e lit pendudukna, bagepe lit agama ras dibatana, maka ngerana Musa man bangsa Israel. Ipersingeti Musa gelah bangsa Israel ngajarken man anak-anakna kerna undang-undang Tuhan, siisina eme ersembah ras nembah man Tuhan simbebasken bangsa Israel (bdk. Monoteisme = sada Tuhan).

2.     Ibas khotbah Musa man bangsa Israel enda pe, ipersingeti Tuhan gelah adi kune anak-anak nungkun, engkai maka iperentahken Tuhan bangsa Israel ngikutken kerina undang-undangNa, maka orang tua berkewajiban mereken penjelasan sekaligus ngajarken man anak-anak kerna kuasa ras keleng ate Tuhan si nggo seh man bangsa Israel. Orang tua arus nuriken man anak-anak uga tanda-tanda sengget siibahan Tuhan man bangsa Israel. I ja tupung bangsa Israel budak denga i taneh Mesir, janah guna mbebasken bangsa Israel, Dibata mereken sepuluh marah man bangsa Mesir (nen = Keluaren 7:14-11:10). Bagepe ibas perdalanen, ijagai Tuhan bangsa Israel ibas “pengajaran” raja Firaun ras tentara-tenterana, janah tupung bangsa Israel seh ku lawit merah, ibelah Tuhan lawit e, emaka erdalan bangsa Israel i tenga-tengah lawit terbelah, tapi paksa tentera-tentera bangsa Mesir seh i tengah lawit e ibahan Tuhan maler mulihi lau lawit e, emaka mate kerina tentera Mesir singayaki bangsa Israel (Kel. 14:1-28). Bagepe Tuhan  mereken binangun api tupung berngi gelah bangsa Israel la mate bergehen, tapi tupung suari si seh kal lasna, ibereken Tuhan binangun embun (Kel.13:22). Bagepe icukupi Tuhan kebutuhen jasmani bangsa Israel. Tuhan mereken manna ras leto jadi pangan man bangsa Israel (Kel. 16:1-36). Tuhu-tuhu Tuhan simbebasken bangsa Israel ibas taneh perbudaken, Mesir nari.

3.     Makna undang-undang Tuhan, la terjeng pedoman peraturan, tapi mbages kal pengertinna eme bimbingen ntah pe perentah Tuhan man bangsa Israel gelah patuh man Tuhan ras nggeluh badia. Emaka nandai Tuhan la terjeng patuh ngenca, tapi ibas ndalanken undang-undang Tuhan pasti igejapkenna perhatin ras keleng ate Tuhan ibas kegeluhen secara pribadi bagepe sada bangsa.

4.      Ibas orang tua nuriken kerna kuasa ras keleng ate Tuhan man bangsa Israel, alu sendirina orang tua nggo mereken kesaksin man anakna kerna Tuhan sendiri. Bagepe la saja nuriken kerna sejarah keselamatan bangsa Israel, tapi gelah bangsa Israel tetap nggeluh ibas perpadanan eme bangsa Israel njadiken Tuhan simbebasken ia ibas taneh perbudaken Mesir nari jadi Tuhanna, janah Tuhan masu-masu kegeluhen bangsa Israel.

5.     Ngenen enda maka teridah orang tua kalak Israel berkewajiban njaga ras mbelinken anak-anakna alu mbiar man Tuhan, sebab alu inuriken kerna kuasa ras keleng ate Tuhan, maka sijadi man anak-anak eme mbiar man Tuhan ras ndalanken kai simehuli singena ate Tuhan ibas kegeluhen tep-tep wari.

APLIKASI

            Selaku masyarakat kita harus ngataken bujur man Tuhan, sebab bangsanta nggo berumur 73 tahun. Bangsanta nggo merdeka. Selaku bangsa singgo merdeka teridah min ibas kegeluhenta tep-tep wari. Ibas erti kata kita harus mengisi kemerdekaan enda alu dem pengataken bujur arah saling menghargai sada ras sidebanna, bertanggungjawab selaku masyarakat, janah sihindari bas pusuh ras ukur sierpengakap “kita” saja sibanci nggeluh ibas Indonesia enda. 

            Ibas sejarah bangsa Indonesia alu jelas ikataken maka kemerdekataan Indonesia idat erkiteken perjuangan rakyat Indonesia, labo erkiteken pemere bangsa sideban, ntah pe erkiteken piga-piga jelma ras kelompok tertentu. Amin gia ulih perjuangan kerina bangsa Indonesia, tapi situhuna Tuhan seberkarya ras mulahi bangsa Indonesia ibas perbudaken/ jajahan bangsa sideban nari.

            Erkiteken kita nggo merdeka, janah kemerdekaan bangsa Indonesia iakui bangsa internasional, maka la banci bangsa sideban menjajah bangsanta. Sebab adi ijajahna, maka bangsa e pasti berhubungan ras bangsa internasional. Tapi amin gia kita nggo merdeka tapi melala denga siharus ipekena ras ibangun gelah kita nggejapken kerna kemerdekaan situhu-tuhu.

            Gelah kita merdeka situhu-tuhu maka kita selaku orang tua harus erkemalangan man Tuhan, janah selaku orang tua berkewajiban nuriken kerna kuasa Tuhan simbebasken ras memerdekakan Indonesia. Harus sisadari secara angkatan perang kita talu, tapi erkiteken pasu-pasu Tuhan man banta maka kita banci mbebas/ merdeka. Emaka marilah selaku bangsa singgo merdeka, mental kemerdekaan e harus teridah eme ngelakoken pembangunan, nggeluh kerjasama. Ula lit bas kita negatif thingking simenghambat laju pembangunan.

Pdt. Steven Kumenit, STh.M.Min.

Momokenlah Kiniulin Dibata (Mazmur 52:10-11)

PERPULUNGEN JABU-JABU

GEREJA GBKP

TANGGAL 5 – 11 AGUSTUS 2018.

Mazmur 52:10-11.

Tema : Momokenlah Kiniulin Dibata.

LATAR BELAKANG

1.      Sijadi bahan oratenta sendah merupaken bagin si la terpisahken ibas ayat sada nari. Tapi khusus bahan oratenta sendah, pemazmur eme Daud ncidahken kerna keleng ate Tuhan sinemani ia. Erkiteken keleng ate Tuhan sitetap nemani ia maka ate Daud momoken man kalak situtus ate man Tuhan.

2.      Ipeseri Daud dirina ras batang saitun si meratah bulungna. Maksudna, kalak singikutken perentah Tuhan tetap nggeluh, adi pe itabah kalak batang saitun e, lit tunas mbaru simereken kegeluhen. Kalak sirusur nggeluh ibas rumah pertoton, tentuna ipasu-pasu Tuhan (bdk. madin sada wari ibas rumah Tuhan asangken seribu wari ibas ingan sideban. Madin tedis ibas gerbang Rumah Dibatangku asangken ringan ibas rumah kalak jahat – Mas. 84:11).

3.      Iangka Daud tuhu-tuhu arah ernalem man Tuhan saja maka lit kegeluhen. Janah kegeluhen e kegeluhen si la ermasap-masap. Erkiteken sie me ate Daud momoken kiniulin Tuhan man kalak erkeleng ate man Tuhan, gelah kalak sierkeleng ate man Tuhan tetap nggeluh mengandalkan Tuhan.

4.      Kegeluhen siernalem man kuasa ras jabatan ugapa pe mate me ia erkiteken ihukum Tuhan.  Enda merupaken bentuk  langsung ngataken Saul simembentengi dirina ibas penghukumanTuhan nari mate me pagi ihukum Tuhan. Perlu siteh Saul nggo itulak Tuhan jadi raja. Daud ipilih Tuhan jadi raja bangsa Israel. Keputusan Tuhan e la teraloken Saul, emaka ate Saul mbunuh Daud. Erkiteken sie me Daud cebuni. Daud erpindah-pindah ingan seh Daud i karangen Heret janah reh Daud ku imam Ahimelek guna mindo man, sebab biasana selaku imam lit persediaan nakan erkiteken lit bagin imam ibas kalak ersembah i rumah pertoton. Janah tupung sie i je lit Doek kalak Edom sekalak tentra (perwira) Saul. Ipebetehkenna man Saul kerna Daud si lit i rumah Ahimelek. Nina man Saul, reh Daud men Ahimelek guna mindo pasu-pasu ibas Tuhan nari. erkiteken sie merawa Saul janah idilona Ahimelek ras imam-imam sideban, janah ibunuhna Ahimelek ras imam-imam e. lit 85 imam simate, bagepe kerina kalak si lit i kuta Nop, subuk dilaki bagepe diberu, danak-danak bagepe simbaru tubuh, lembuh, kelede ras biri-biri kerina ibunuh. Erkiteken sie me iandingken Daud, baba Doek e bagi piso cukur sintelap (bdk Masmur 52:4). Akap Saul alu bunuhna imam-imam ras anak kuta Nop, ia banci selamat ibas penghukumen Tuhan nari. Lang.

5.      Keleng ate Tuhan simerupaken kiniulin Tuhan mbentengi Daud, emaka ate Daud rasa lalap ngataken bujur man Tuhan ras momoken kerna sie man kerina kalak ertutus ate man Tuhan.

APLIKASI

            Ibas minggu enda kita ngerana kerna HUT Saitun. Secara  kategorial umur Saitun 3 tahun denga, tapi adi sinen terdauhen ope denga gelarna Saitun, gelarna lansia denga, nggo lit aktivitas lansia tahun 1991 nari. Jenari me ihitung umur lansia. Emaka umur lansia genduari eme 27 tahun.

            Tupung gelarna lansia denga, lansia iteruh bidang diakonia, emaka lansia merupaken salah sada objek pelayanan gereja. Lansia isampati ras ilayani, emaka adi lit natal, subuk natal umum, PJJ ras natal lansia, majelis runggun ras panitia natal mereken luah man lansia. Tapi kenca gelar lansia nggo jadi Saitun janah ia iteruh bidang Koinonia, maka Saitun lanai jadi objek pelayanan tapi nggo jadi subjek pelayanan. Ertina lansia pe selaku warga gereja harus ikut ibas pelayanan. Saitun bali ras kategorial sideban siikut terlibat langsung ibas pelayanan gereja. Tapi siidah perubahan enda lenga erdalan alu mehuli.

            Lenga kerina kita banci seh umur saitun, emaka man kam orang tua kami Saitun harus ngataken bujur man Tuhan, sebab enda merupaken pemere Tuhan simbelin ibas kegeluhen Saitun. Keleng ate Tuhan simbelin enda me harus simomoken man kerina kalak siertutus ate man Tuhan. Bagepe momoken  sebab Tuhan mereken kesempaten man Saitun guna ngelai Tuhan asa ngasup ras gegeh si lit man Saitun. Bagepe gelah tuhu-tuhu nggeluh bagi Saitun simerata bulungna, simelala manfaatna maka Saitun harus nggeluh erngena ate man Tuhan. tutus ku gereja, PJJ ras PA Saitun.

            Secara psikologi, lit sura-sura sierbahanca malem ate orang tuanta (Saitun), emaka tanggung jawab kita bagepe gereja eme erbahan malem ate orang tua, banci arah mereken kue ulang tahun, man ras-ras, bagepe gawa-gawa ras orang tua, rsd.

Pdt. Steven Kumenit, STh.M.Min.           

Tanggungjawab Nandangi Gereja (1 Timotus 4:11-16)

PERPULUNGEN JABU-JABU

GEREJA GBKP

TANGGAL 29 JULI – 4 AGUSTUS 2018.

1 Timotius 4 : 11-16

Tema : Tanggungjawab Nandangi Gereja.

LATAR BELAKANG

1.      Timotius eme anak ibas kiniteken Paulus sisangana melayani i perpulungen Epesus. I perpulungen Epesus melala tantangan si banci erbahanca surut kiniteken Timotius si dungna banci ia kiam ibas pelayananna nari.   Apai kah umur Timotius nguda denga. Padahal lit sada harapan Paulus eme Timotius jadi penerus Paulus ibas nehken Berita Si Meriah. Bagepe perpulungen lanai nggeluh ibas kiniteken situhu-tuhu.  Persoalan si lit ibas perpulungen Epesus melala eme a). ajaren Judaisme (hukum taurat ras sunat). b). asketik eme keselamatan banci sidat arah pertapaan alu mengikuti teladan Kristus. Jadi la perlu tek ras ndalanken kai siiajarken Tuhan ibas kegeluhen tep-tep wari. c). Makanan ras seksual. d). Gnostik. Jadi siidah i jenda erbage-bage pengajaren si la tuhu berkembang ibas perpulungen Epesus.  

2.      Ibas rangka sie me Paulus mereken pergegeh gelah Timotius tetap semangat ras megegeh ibas pelayananna. Timotius harus suruh ras ngajarken ajaren situhu-tuhu man perpulungen. Timotius ula mbiar kerna sie sebab kemampuan ras teologi Timotius ngasup ngelakoken sie kerina. Sebab Timotius nggo ibekali ibas bimbingan ras pengajaren Paulus. Sebab Timotius ikut Paulus nggo cukup ndekah. Mulai umur 15 tahun. Janah “genduari” Timotius nggo berumur 33 tahun.

3.      Pergegeh ras motivasi sideban eme ula kal pelepas ise pe mapas man Timotius. Gelah la lit ise pe simapas man Timotius amin gia nguda denga, maka pengerana, lagu langkah, keleng ate ras kiniteken Timotius harus teridah mejile. Kata ras perbahanen sierpalasken kiniteken harus teridah ibas pelayanan Timotius. Sebab guna “mbungkam” kesangsin/keragun perpulungen khususna pertua – pertua si lit i je si lebih dewasa asangkan Timotius maka melayani alu tuhu-tuhu erpalaskan kiniteken arus icidahken Timotius.

4.      Kinipangan melayani nggo inubuatkan nabi-nabi ras nggo itangkuhken pertua-pertua. Maksudna ibas penumpangan tan pertua-pertua Timotius nggo itangkuhken jadi pemimpin guna ngepkep perpulungen Epesus, alu bage Kesah Si badia mpengasup Timotius guna ngelai i perpulungen eme iah-iahi ras ajarken perpulungen. Emaka kai siikataken nabi-nabi man Timotius harus ipeseh man perpulungen. Sebab fungsi nabi-nabi eme mpeseh kata Dibata.

5.      Kemajun spritualitas perpulungen bagepe kedewasaan perpulungen teridah adi pelayanan harus isehken alu tutus ras ibas pengajaren situhu-tuhu alu bage keselamatan banci ialoken perpulungen bagepe Timotius.

APLIKASI

            Ibas rangka minggu GBKP njayo kita isingetken kerna tanggungjawabta nandangi gereja. Perlu siteh tepatna tanggal 23 Juli 2018, GBKP nggo 77 tahun njayo.

            Siidah ibas perkembangan gereja GBKP nggo melala kemajun gereja GBKP, tapi amin bage gia lit ka siarus ipekena ras itingkatken, khususna kerna pengajaren, koinonia (persadan) ras nehken persembahen/mere. Sebab siidah erkiteken kurang mbages denga pengajaren (teologi) man perpulungen maka koinonia (persadan) perpulungen kurang, bagepe kurang denga perpulungen nehken persembahen/mere. Adi siidah tercatat rata-rata pulung ku gereja eme 36 persen. Janah adi sibandingken ras tahun-tahun sebelumna, maka lit terjadi penurunan, sebab tahun-tahun silewat rata-rata kita pulung ku gereja mencapai 40 persen. La perlu man ndaramen kai sisalah, tapi ibas GBKP njayo, mari kita ngenen kerna tanggungjawab kita ibas gereja. Perlu siteh kita sendiri siarus mendewasakan gereja GBKP, labo kalak sideban. Emaka siarus lit man banta eme mari kita tutus ibas pengajaren situhu-tuhu ras nggeluh saling mperdiateken ras ngergai kalak sideban. Bagepe marilah kita nggeluh ibas ketedehen ate sada ras sidebanna ras marilah siah-iahi temanta ku perpulungen.

Pdt.Steven Kumenit, STh.M.Min.