Kepastin Keselamatan (Efesus 1:3-7)

PERPULUNGEN JABU – JABU

GEREJA GBKP

TANGGAL 28 OKTOBER – 3 NOPEMBER 2018.

Epesus 1 : 3 – 7.

Tema : Kepastin Keselamatan.

LATAR BELAKANG

1.     Perpulungen Epesus reh ibas latar belakang la nandai Yesus Kristus. Alu kata sideban kalak kafir singgo bertobat. Erkiteken lenga dekah jadi kristen maka pengangkan kerna keselamatan ibas Yesus Kristus lenga mbages kal man perpulungen. Erkiteken sie me Paulus arah surat mereken pengelayasi man perpulungen Epesus kerna keselamatan ibas Yesus Kristus.

2.     Paulus ngingetken man perpulungen la saja erta-erta pertendin singgo ialoken perpulungen Epesus, tapi pe keselamatan. Janah keselamatan enda berhubungan ras pemilihen perpulungen Epesus jadi sikerajangan Tuhan arah persadan ras Yesus Kristus. Perlu siteh siimaksudken erta-erta pertendin eme la saja talenta-talenta si lit man perpulungen, bagepe pasu-pasu materi tapi pe kerna pengalemi dosa singgo ibereken Tuhan arah Yesus Kristus. Bagepe siimaksudken ope denga doni enda ijadiken, perpulungen nggo ipilih jadi sikerajangan Tuhan eme Yesus Kristus eme Tuhan, janah doni enda ijadiken Tuhan, emaka kenca perpulungen tek man Yesus, e berarti perpulungen nggo lit ibas rencana ras rancangan Tuhan.

3.     Adi sinen alu manjar-ajar, situhuna ogenta enda eme sada puji-pujin Paulus man Tuhan erkite-kiteken idahna kerna perkembangan gereja, ntah pe perkembangan perpulungen Epesus si tuhu-tuhu mehuli. Ibas perpulungen Epesus persadan tuhu-tuhu nggeluh. Janah persadan enda melewati batas-batas suku agama, golongan, ras, sebab kalak Jahudi ras non Jahudi nggeluh ras-ras ibas sada perpulungen, la terjadi sician-cianen ntah perubatan. Enda banci jadi erkite-kiteken keleng ate Tuhan arah Yesus Kristus. Janah persadan i tercipta erkite-kiteken sura-sura Tuhan. Bagepe persadan si mehuli e si la erpalaskan suku, agama, golongan, ras merupakan sura-sura Tuhan. 

4.     Pusat persadan ras keselamatan perpulungen Epesus eme Yesus Kristus, sebab erkiteken Yesus Kristus maka perpulungen nggo itebusi ibas dosa-dosa nari. 

5.     Paulus cidahkan kerna mbelinna perkuah ate Tuhan ibas Yesus Kristus gelah perpulungen Perpulungen tetap njaga persadan perpulungen ras tetap nggeluh ibas kerembaken man Yesus Kristus, bagepe nggeluh tek man Yesus saja ras ndalanken kai singena ateNa ibas kegeluhen tep-tep wari.

APLIKASI

            Kita arus ngataken bujur man Tuhan, sebab arah Yesus Kristus kita nggo iselamatkan. Arah Yesus Kristus, bali ras perpulungen Epesus, kita pe ope denga doni enda ijadiken kita nggo ipilih jadi sikerajangenNa. Emaka arah pengurbanan Yesus Kristus kita nggeluh ibas keselamatan.

            Keselamatan man banta merupakan pasu-pasu Tuhan simbelin, sebab adi la erkiteken Yesus Kristus, kita nggeluh iteruh pernembeh ate Tuhan. Kita ihukum Tuhan, sebab upah dosa eme kematen (Roma 6:23).

            Keselamatan kita erkiteken tek man Yesus Kristus ras ndalanken kai singena ate Tuhan. Amnin gia genduari Yesus la ras kita, erkite-kiteken Ia ipermuliaken ibas Surga, tapi situhuna, Yesus merupaken Raja. Janah Yesus la saja Raja ibas Surga, tapi ibas doni enda pe. Emaka Yesus selaku Raja ngerajai i doni bagepe i Surga.

            Keselamatan ibas Yesus Kristus merupakan sada kepastin. Sebab Yesus eme Tuhan. Ia me sinjadiken doni ras kerina isina. Emaka kalak si tek man baNa pasti nggeluh ibas keselamatan. Keselamatan singgo iberekenNa man banta tetap njagaiNa, emaka lalap ipersingetiNa kita arah gerejaNa (khotbah, bagepe ngawan ni perpulungen). Bagepe arah Kesah Si Badia iarak-arakNa kita gelah kita tetap ibas persadan ras Ia. 

Tuhu Yesus la ras kita, Ia nggeluh ibas Surga, tapi labo berarti itadingkenNa kita. Lang. Yesus nangkih  ku Surga erkite-kiteken kita. IsikapkenNa ingan man banta. Bagepe Kesah Si Badia simerupakan Dibata jine tetap ras kita. Bagepe  nggo erpadan Yesus maka reh me Ia pagi. Janah ibas kesaksin pustaka si badia jelas ngataken maka Yesus Kristus reh mulihken pagi. Lit piga-piga kesaksin Pustaka si Badia sigambarken kerehenNa eme 1). Bagi penganten (bdk. Matius 25: 1-12). 2). Anak Manusia reh ibas embun (bdk. Markus 13:26). 3). Bagi sekalak tuan si berkat ku ingan sindauh jenari mulihken (Matius 25:14-30), rsd. Alu bagepe kenca reh Yesus Kristus mulihken kita nggeluh ibas persadan ras Yesus i Surga. Jadi penungkunen man banta, apakah kalak si nggo tek man Yesus Kristus nggeluh ibas keselamatan ? secara umum banci sikataken ue. Kalak sitek man Yesus pasti nggeluh ibas keselamatan. Tapi kinitekenta e arus min teridah ibas kegeluhenta tep-tep wari. Kita arus ngelakoken kai singena ate Tuhan. Perlu siteh kita enda eme tinepa Dibata sisempurna tapi erkiteken dosa maka sisempurna e, simerupakan tempas Dibata tempa-tempa ceda. Emaka lanai teridah simehuli ntah pe sisempurna e ibas kegeluhen manusia. Si teridah eme kegeluhen si la ngena ate Tuhan. Keselamatan merupakan pasu-pasu Tuhan simbelin man banta, gelah silanai sempurna e, ntah pe Imago Dei e mulihi nggeluh ras kita. Kesempurnaan Imago Dei e berhubungan ras kiniteken. Emaka kinitekenta arus dewasa (bdk. Epesus 4: 13), gelah teridah Imago Dei e bas kita.  Alu kata sideban Imago Dei (Citra/ tempas Dibata) teridah ibas kita ngelakoken kerna simehuli singena ate Tuhan. Jenari adi lit si la ngena ate Tuhan sibahan kita, maka alu kiniteruken ukur ras dem penyesalan jera kita, reh kita man Tuhan mindo pengalemi dosa, jenari lanai kita nggit ngelakoken sibage rupana.

Pdt. Steven Kumenit, STh.M.Min.                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                               

Paguh Ngalaken Mara (Ayub 1:13-22)

PERPULUNGEN JABU-JABU

GEREJA GBKP

TANGGAL 21 – 27 OKTOBER 2018.

JOB 1 : 13-22.

Tema : Paguh Ngalaken Mara.

LATAR BELAKANG

1.   Jop tading i negeri Us janah ia sibayakna i negeri e. Anakna lit 10 kalak, pitu dilaki ras telu diberu. Job ihamati i negeri e. Bagepe spiritualitas Job mehuli kal, sebab ia mbiar ras erkemalangan man Tuhan. Tuhu-tuhu Job ipasu-pasu Tuhan. Keleng kal Tuhan man Job, sebab iidah Tuhan la lit sekalak pe ibabo doni enda si bagi Job patuhna ras ulihna, bagepe tuhu-tuhu Tuhan saja siisembahna ras la ngelakonen kejahatan. Tapi ibas pengidah iblis, Job bage erkiteken ipasu-pasu ras ikawali Tuhan ia. Ibereken Tuhan lembu she dem negeri Us. Tapi coba min la ikawali Tuhan ia ras la ipasu-pasu Tuhan ia, bagepe ibuat Tuhan kerina kai si lit bas Job, ugapa pe isumpahi Job Tuhan i adep-adepen Job. Erkiteken enda pengakap iblis janah tempah-tempah ilawanna Tuhan, maka ibereken Tuhan kesempatan man iblis guna cubai Job. Nina Tuhan kai si lit ibas ia, genduari ibas kuasandu. Tapi Job la banci ikuitndu (bdk. Job 1:1-12). Emaka lawes iblis guna cubai Job, guna meteh tuhu ntah lang kepatuhan Job man Tuhan.

2.   Ibas oratenta sendah siidah kerina anakna mate ras kerina lembu, kelede  irampas kalak Seba. Suruh-suruhen sipermakani lembu ras kelede ibunuhna. Sada ngenca ipelepasna guna mberitaken kejadin enda. Bagepe kerina biri-biri ras permakan mate idumpang perkas. Bagepe kerina unta irampas kalak Kaldea, janah suruh-surehen Job nterem simate.

3.   Sebage orang tua (bapa), bagepe secara manusia, ibas kerina kejadi e tuhu ceda kal ate Job ras merasa kebenen, tapi sebage kalak sierkemalangan man Tuhan, la ipersalahkan Job Tuhan. Icaingken Job cubahna, ras bukna guntingna, jenari erjimpuh Job seh ayonana  ku tanah, janah nina kadeku pe la lit asum aku tubuh nai, mate pe la pedah lit kadeku pe. Tuhan sinai merekenca, genduari nggo ka ibuatna. Terpujilah gelarNa. Siidah amin gia seh kal cedana Job, tapi la ipersalahkanna Tuhan.

4.   Icaingken Job cubahna ras igunting bukna janah erjimpuh seh ayona ku taneh perban ceda kal atena, ncidahken Job e manusia denga. Tapi amin gia manusia, icidahken Job kerna karakter manusia situhuna. Icidahken Job kai si lit bas ia labo erkiteken gegeh ras kepentarenna jine, tapi kerina e pelin-pelin pemere Dibata, emaka la lit hak manusia nahansa adi e kin ibuat Tuhan. Bagepe selaku manusia, amin gia mberat mara e, arus tetap muji Dibata.

5.   Ibas oratenta kai sisedakah e iperkiraken ntah pe iduga ras iharapken iblis la terbukti. Arapen iblis kenca anak-anak Job kerina mate ras kerina asuh-asuhen keri, bagepe suruh-suruhenna nterem si mate, Job mpersalahkan Tuhan. Tapi sebalikna, Job muji Tuhan. Tuhu kepentaren Job icidahken. Sebab amin gia la iteh Job kerna kiniseran siinanamina tetap Job muji Tuhan. Ibas kai siicidahken Job, la saja erkiteken ia kalak sierkemalangan man Tuhan, tapi amin gia la iteh Job kerna tujun kiniseran e, Job tetap megegeh ras muji Tuhan. Tuhu-tuhu paguh Job ngalaken mara singkenai ia. La ipersalahkan Job dirina bagepe Tuhan.

APLIKASI

         Lit sada karakter iblis eme la atena kita nggeluh ibas keriahen ras kemalemen ate. Bagepe la atena kita nggeluh rembak ras Dibata. Emaka ibas kerina cara atena kita sirang ras Tuhan.

         Kita harus ngataken bujur man Tuhan, sebab ibas perkuah ras keleng ateNa man banta maka la saja keselamatan singgo berekenNa man banta, tapi arah Kesah Si Badia iteguh-teguhNa kita ibas perdalanen geluhta tep-tep wari. Tuhu ibas perdalanen geluhta kepeken la saja keriahen siijumpai kita, tapi pe erbage-bage perbeben geluh. Secara umum meriah ukurta adi jumpa kita ras keriahen, emaka banci kita muji Tuhan ras mereken pengataken bujur man Tuhan ibas gereja. Tapi adi kita jumpa perbeben ras kiniseran lit denga kita si jungut-jungut ras mpersalahkan dirina bagepe Tuhan. Ibas erti kata secara umum kita lenga ngasup ngalaken mara singkenai kita. Perlu siteh, janah enda siarus isadari, la pernah Tuhan nadingken kita, bagepe perbeben ras kiniseran singkenai kita, ngasup kinitekenta tahan ngalakenca, janah enda merupaken sada kesangapen man banta, emaka tetaplah kita megenggeng adi reh perbeben ras kiniseran. Tapi siidah erkiteken kurang pentarna kita maka reh jungut-jungut man banta. Nina Jakup adi kurang kepentarenta kerna sie, maka ertotolah kita man Tuhan (bdk. Jakup 1:2-6).

         Kepentaren ngangkai perbeben ras kiniseran si reh man banta, babai kita ernalem ras muji Tuhan. Sebab ibas kepentaren e kita ngasup muat sada kesimpulan, sipemena: lit rencana iblis siatena nirangken kita ras Tuhan. Ipake iblis perbeben ras kiniseran guna naluken kita gelah kita lanai ersembah ras muji man Tuhan. Sipeduaken: kinitekenta arus tetap isepuh bagi emas gelah sidat kiniteken sipaguh ras murni, janah kita tetap nggeluh ras Tuhan.

         Arah perenungen enda, kita ipersingeti selaku kalak sierkiniteken man Tuhan, arus paguh ngalaken erbage-bage mara gelah kita tetap nggeluh ibas keselamatan, janah ibas kerehen Yesus sipeduakaliken, kita nggeluh ras Yesus ibas Surga.

Pdt. Steven Kumenit, STh.M.Min.      

Laweslah Beritaken Kinirajan Dibata (Lukas 9 : 1-6)

PERPULUNGEN JABU-JABU

GEREJA GBKP

TANGGAL 14 – 20 0KTOBER 2018.

Lukas 9 : 1- 6.

Tema : Laweslah Beritaken Kinirajan Dibata.

LATAR BELAKANG

1.   Sijadi bahan oratenta sendah eme Yesus ngutus ajar-ajarNa si sepuluh dua kalak guna mberitaken Kinirajaan Dibata. Ope iutus Yesus ajar-ajar sisepuluh dua kalak, ibereken Yesus kuasa guna mpelawes setan-setan dingen pepalem penakit.  Enda ibereken Yesus sebab manusia banci la bengket ibas Kinirajaan Dibata erkite-kiteken setan ras penakit. Perlu siteh Kinirajaan Dibata eme pemerintahan Dibata. Dibata jine singerajai pemerintahan e. Janah nggeluh ibas kinirajaan Dibata eme nggeluh alu teneng, meriah ukur, dame ras nggeluh ibas kemalemen ate. Tujun setan eme gelah manusia la ngikuti perentah Dibata ras la atena nggeluh ibas kedamen, kemalemen ate, rsd. Emaka arus ipelawes ia ibas manusia nari. Bagepe adi manusia idendeni pinakit, biasana manusia stres, nggeluh la teneng, rsd. Emaka harus ipepalem penakit e.  

2.   Ibas pengutusan man ajar-ajar Yesus, lit telu hal siikataken Yesus eme sipemena: ula baba perbekalan pangan (ola baba ciken, gajut-gajut, roti, duit, ras ula baba baju man ose). Sipeduakan: Ibas sada kuta adi lit sialo-alo ajar-ajar kesilang i rumahna maka ajar-ajar arus tading i rumah e. Ibas rumah e ajar-ajar man, minem bagepe medem sedekah i kuta e. Perbahanan singalo-ngalo ajar-ajar kesilang ibas rumah e berarti simada rumah dat pasu-pasu ras kuta e dat keselamatan, ntah pe nggeluh ibas Kinirajaan Dibata. Sipeteluken: Adi ibas sada kuta labo lit kalak ngalo-ngalo ajar-ajar, tadingken kuta e, apusi abu sileket ibas nahendu. Enda pagi tanda bukti si jadi saksi man bana. Enda ngataken kalak e nggo itulak ibas Kinirajaan Dibata. Perlu siteh apusi abu sileket ibas nahe (mengebaskan debu kaki) merupaken kebiasaan masyarakat setempat, janah enda siipake Yesus gelah ajar-ajar ras masyarakat setempat banci ngangkai kerna makna e.

3.   Ibas ajar-ajar mberitaken Kinirajaan Dibata i kuta-kuta, kerina penakit ipepalem, enda ngatakenca kuasa Yesus silit man ajar-ajar sipepalem kerina penakit e.

4.   Pengutusan ajar-ajar Mberitaken Kinirajaan Dibata, erkite-kiteken idah Yesus tupung ngelai idah Yesus nterem siarus ilayani.  Bagepe siidah ibas pelayanan Yesus, sireh mindo penampat man Yesus eme salah sada kalak si sakit. Nterem kalak sisakit reh man Yesus, janah erbage-bage bentuk penakitna. Bagepe rusur Yesus pelawes setan-setan. Tuhu mekuah ate Yesus ngidah sie, emaka iutus Yesus ajar-ajarNa gelah erteremna kalak singelai ras singgeluh ibas Kinirajaan Dibata.

5.   Ajar-ajar Yesus lit sepuluh dua kalak. Pengutusan man ajar-ajar ilakoken Yesus alu bagi kelompok. Sada kelompok dua kalak (bdk. Markus 6:7). Bagepe makna pengutusan e me bentuk Yesus mereken mandat man ajar-ajar gelah ngelakoken dahinNa. Alu bage Ajar-ajar jadi wakil Yesus ibas beritaken Kinirajaan Dibata. 

APLIKASI

         PJJ nta sekali enda berhubungan ras minggu Zending. Bagepe adi ngerana kita kerna Zending, berarti kita ngerana kerna perberita si meriah (Pekabaran Injil), khususna ibas gereja GBKP. Siidah salah sada dahin gereja eme Marturia. Alu bage la banci lang gereja harus Er-PI sebab alu gereja er-PI maka erteremna kita bengket ibas Kinirajaan Dibata.

         Siidah lit dua model siibahan gereja GBKP ibas er-PI eme PI ke dalam ras keluar. Makna  PI ke dalam eme gelah perpulungen ertetap ukurna nggeluh ras Yesus. Yesus ngenca siisembahna. Bagepe ibas kegiaten-kegiaten gereja anggota perpulungen merincuh ngikutisa. Erkiteken sie me lit bas GBKP kerja sama pelayanan antar runggun ibas klasis ras antar klasis. Runggun simegegeh ngelai ku runggun sikurang megegeh, bagepe klasis simegegeh ndarami runggun sikurang megegeh i luar klasis guna sisampat-sampaten ibas pelayanan. Tapi PI keluar, upaya gereja GBKP ndarami senina turangta si lenga nandai ras tek man Yesus Kristus guna iselamatkan. 

         Jadi perenungen man banta, kita ras nterem kalak Karo jadi kristen erkite-kiteken semangat pelayanan para Zending (kalak si er-PI). Pelayanan para zending tuhu-tuhu guna keselamatan jelma sinterem. Emaka siilakokenna eme udan la tampil udan, las la tampil las. Metode pelayananna pe lit nge, emaka nggit kalak megi ras ikut pelayanan para Zending. Semangat pelayanan Zending enda me siarus lit man banta.

         Genduari la saja terjeng kita nggo jadi kristen, tapi lebih asangken sie eme kita idilo ras iutus Tuhan guna mberitaken Kinirajaan Dibata. Siangka min kerna sie, alu bage nggit kita ikut ibas pelayanan er-PI. Guna sie me majelis runggun gereja arus nganggarken biaya PI ibas pelayanan, bagepe memprogramkan pembinaan ras pelatihan-pelatihan man warga gereja gelah nggit er-PI, sebab ibas perkembangan sigenduari, kita harus meteh kerna bentuk/ metode er-PI. Beda zaman, beda ka bentuk/ metode PI na. Emaka marilah kita muat bagin ibas er-PI.

Temanta Laweslah Beritaken Kinirajaan Dibata. Tuhu kita idilo ras iutus Tuhan ibas beritaken Kinirajaan Dibata, tapiu mekatep lit denga kendala-kendala man banta. Padahal nterem senina turangta siarus iselamatkan. Emaka marilah kita lawes kita beritaken Kinirajaan Dibata. Mbelang man peranin tapi kurang siranisa. Mari siaturken dahinta gelah kita banci muat bagin ibas pelayanan beritaken Kinirajaan Dibata.

Pdt. Steven Kumenit, STh.M.Min.

Mpekena-Kena Si Nggo Ceda (Amsal 29:15-18)

PERPULUNGEN JABU-JABU

GEREJA GBKP

TANGGAL 7 – 13 OKTOBER 2018.

Kuan – Kuanen 29 : 15-18.

Tema : Mpekena-Kena Si Nggo Ceda

LATAR BELAKANG

1.     Secara umum kitab kuan-kuanen eme kitab simereken nasehat ntah pe kata ajar man manusia ibas ndalani kegeluhen tep-tep wari gelah sukses. Emaka kepentaren perlu lit/ nggeluh man sesekalak jelma. Alu kata sideban alu makeken kepentaran maka kegeluhen manusia (anak), nggeluh alu kemalemen ate ras meriah ukur.

2.     Kuan-kuanen ngajarken man banta ibas kegeluhen enda lit sebab ras akibat, janah sebab ras akibat enda reh ibas kita nari. Banci sikataken kita sierbahanca. Emaka penting man banta meteh kerna sie. Erkiteken sie me kitik-kitik nari anak-anak harus iajarken kerna simehuli gelah ilakokenna simehuli nibas kegeluhenna tep-tep wari. Bagepe adi nggo ilakoken anak-anak si la mehuli, banci ia jerah, janah ilakokenna simehuli singena ate Tuhan. Kerna simehuli arus jadi bagin man anak-anak, janah ngajarken simehuli arus orang tua. Pengamsal ngenen pedah ras ajar merupakan bentuk simehuli siarus ilakoken orang tua sebab alu pedah ras ajar, anak iajarken ras isingetken kerna kegeluhen simehuli siarus idalankenna tep-tep wari. Jadi persinget man orang tua eme ibas pebelin-belin anak-anakna, ula anak-anak itami-tami, sebab ibas anak itami-tami kepeken banci maba kecedan man anak e sendiri, sebab anak la tehna kerna simehuli ras benar ibas kegeluhenna tep-tep wari, emaka siilakokenna eme si la mehuli. Bagepe la lit bas anak rasa bersalah ntah pe mindo maaf adi nggo banna kesalahan bas dirina.

3.     Pedah ras pengajaran la ilakoken orang tua man anak, anak jadi bodoh, alu bage ijurukenna orang tuana (nandena), sebab siilakokenna tep-tep wari eme si la mehuli ras si langena ate Tuhan. Bagepe erkiteken anak jadi bodoh berarti la lit kepentaren bas ia. Padahal adi anak ngaloken pedah ras ajar ibas orang tua nari berarti anak jadi pentar. Alu bage anak jadi mbiar man Tuhan. Tanda anak mbiar man Tuhan eme simehuli ras singena ate Tuhan ilakokenna ibas kegeluhenna tep-tep wari. Tapi erkiteken anak bodoh, maka la lit bas anak e mbiar man Tuhan alu bage la saja dirina si ceda tapi bangsa pe jadi rontang. Engkai ? erkite-kiteken i je lit kejahatan, egois, kemiskinan, la lit persadan, ibodohi kalak sideban, penindasan, penipuan, rsd.

4.     Ibas kegeluhen kalak Israel, janah enda iatur ibas undang-undanmg musa (hukum taurat), adi anak bodoh (gutul, ngelawan, la nggit ngikutken kata orang tua, mbuang-mbuang duit saja dahinna, pemabuk-mabuk), banci ia ihukum mati oleh pemimpin kuta. Enda banci jadi adi orang tua lanai ngasup ngajarken ana-anakna, maka orang tua baba anakna ku pemimpin-pemimpin kuta gelah iadili pemimpin-pemimpin kuta e (bdk.Ulangan 21:18-21).

5.     Hukum ras disiplin orang tua nandangi anakna merupakan salah sada cara ngajarken anakna gelah anakna terhindar ibas kebodohan sibanci ncedai dirina ras kalak sideban. Bagepe pedah dingen ajar merupaken alat kepentaren nari gelah anak jadi pentar. Jadi ibas orang tua mereken pedah dingen ajar man anak, maka orang tua nggo mbimbing anak-anak ku simehuli singena ate Tuhan. Alu bage erkiteken anak nggeluh ibas kepentaren maka sialoken anak ibas kegeluhenna eme kesangapan ras keriahen nggeluh.

APLIKASI

            Siidah genduari pinakit sosial nggo melala nggeluh i tengah-tengah masyarakat. Janah panakit sosial enda pe lanai ikataken  pinakit tapi nggo merupakan bencana sosial. Adi kita ngerana kerna bencana berarti kita ngerana kerna sesuatu yang menyebabkan/menimbulkan kesusahan, kerugian ntah pe penderitaan man masyakat. Jadi penungkunen man banta, bencana sosial kai saja sibanci ngkenai kita ras bangsanta. Bencana singkenai kita eme pelaku LGBT, Judi ras Narkoba banci kena pinakit HIV/AIDS. Pinakit enda lenga lit tambarna. Pinangko, penodongan ras pembunuhan nggeluh. Banci jadi pe lit keluarganta si kena bencana sosial (LGBT, Judi ras Narkoba). Kerna judi ras narkoba, kita kerina nggo meteh tapi LGBT eme singkatan ibas lesbian, gay, biseksual (ketertarikan cinta man dilaki ras diberu. Jadi banci ia bercinta ras diberu ras dilaki) ras transgender/transeksual (operasi kelamin : dilaki jadi diberu).

            Bencana sosial enda nggeluh subur i tengah-tengah masyarakat. Menam-menam la banci siatasi bencana sosial enda. Tuhu ibas rangka menanggulangi bencana sosial enda nggo erbage-bage cara ilakoken pemerintah, mulai ipedarat undang-undang Narkoba ras judi she ku pelaku ras pengedar narkoba itangkap, ipenjaraken ras ibunuh. Bagepe pelaku  judi itangkap ras ipenjarakan. Bagepe pemerintah melarang lit kawin sesama jenis, rsd. Agama pe melarang ras mereken pembinaan, subuk arah khotbah bagepe ceramah-ceramah. Tapi tetap denga bencana sosial enda nggeluh. Tempah-tempah kerina siilakoken pemerintah ras agama la lit ertina. Memahami kerna penanganan bencana sosial enda, la banci pemerintah, agama saja, harus lit keterlibatan keluarga (orang tua).

            Orang tua harus sadar kerna penting keluarga guna mbentuk anak jadi mehuli ras negara simegegeh. Emaka pendidikan agama, bagepe pedah ras ajar orang tua harus ibereken man anak-anak, gelah anak-anak banci terhindar ibas bencana sosial enda nari. Ntah pe adi nggo ilakokenna, banci ia jerah, sebab nggo lit kepentaren bas ia. Alu bage kekuatan keluarga cukup menentukan keberhasilan anak ras kemajun bangsa ras negara. Alu kata sideban erkiteken megegeh peran pendidikan ibas keluarga maka kai singgo ceda genduari erkiteken bencana sosial banci ipekena mulihi.

                                                                     Pdt. Steven Kumenit, STh.M.Min.