Jabu Siersembah Man Dibata (Yosua 24:14-18)

BAHAN PJJ GEREJA GBKP

TANGGAL 28 OKTOBER – 3 NOVEMBER 2012.

JOSUA 24:14-18.

Tema : Jabu Si Ersembah Man Dibata Saja.

LATAR BELAKANG.

1.      Oratenta sendah eme bagin ibas pidato perpisahan Yosua. Janah inti ibas pidato Yosua eme pembaruan kerna perpadanan Dibata ras bangsa Israel. Perlu lebe siteh kegeluhen bangsa Israel eme kegeluhen ibas perpadanan. Ija bangsa israel banci nggeluh mejuah-juah adi bangsa Israel tetap nggeluh mbiar ras ernalem man Tuhan saja. Tuhan sienggo mbaba bangsa Israel ibas taneh perbudaken Mesir nari ku taneh Kanaan. Bagepe ihukum Tuhan me kalak si la setia man baNa. Janah perlu siteh ibas budaya ras kepercayaan Israel kuno, bagepe ibas zaman bangsa-bangsa Purba kata-kata perpisahan sekalak pemimpin tuhu-tuhu ihargai kal.

2.      Pidato Yosua eme sada kata persinget guna ngenen pasu-pasu Tuhan i tengah-tengah bangsa Israel, ibenai ibas pendilo man nini-ninina seh Dibata naruhken bangsa Israel alu mejuah-juah ku taneh Kanaan. Bagepe ipersingeti Yosua gelah bangsa Israel ula “murtad” ras nembah man dibata-dibata sideban, sebab lit hukuman Tuhan nandangi ise “simurtad” ras ersembah man dibata-dibata sideban. Jadi bangsa Israel harus tutus ersembah man Dibata saja.

3.      Pilihen guna milih pasu-pasu Tuhan ntah pe hukumen Tuhan lit ibas tan bangsa Israel, emaka pilihen enda iendesken Yosua man bangsa Israel. Sipenting Yosua enggo nuriken kerna pasu-pasu Tuhan nandangi bangsa si setia man baNa, ras hukuman Tuhan man bangsa si la setia man baNa. Tapi Yosua ras keluargana Tuhan saja nge siisembahna. Pengakun Yosua kerna Tuhan saja siisembahna, sebab Yosua enggo ngenanami langsung uga kuasa Tuhan e. Pilihen bangsa Israel banci menentuken kegeluhenna tep-tep wari. Tapi siidah i jenda bangsa Israel milih ersembah man Tuhan saja sebab ia pe nggo ngenanami kuasa ras keleng ate Tuhan e. Tapi adi sioge kenca oratenta,  i je ikataken Yosua la kari kam ngasup sebab Dibata siisembah e Dibata si badia ras Dibata sipercemburu, emaka adi bangsa Israel la tutus ersembah man Tuhan, maka ihukum Tuhan me bangsa israel. Tapi nggo bulat ukurna ersembah man Dibata saja.

4.      Ibas pengakun bangsa Israel enda, dungna bangsa Israel enggo perbaharui perpadananna nandangi kinitekenna man Tuhan. Sebab harus siteh kegeluhen bangsa Israel eme nggeluh ibas perpadanan. Adi bangsa Israel tutus ersembah maka ialokenna pasu-pasu idur Dibata nari, tapi adi sebalikna maka penghukumen ibas Dibata nari sialokenna.

5.      Bangsa Israel la saja terjeng mbelasken perpadanenna guna tetap ersembah man Dibata saja, tapi pe konsekwensi ibas ersembah man Dibata harus idalankenna eme nggeluh mbiar man Tuhan, ndalanken kai singena atena ras nggeluh ibas kebadiaan.

APLIKASI

            Pilihen man ise ateta ersembah banci nentuken arah kegeluhenta tep-tep wari. Bagepe nentuken masa depan kegeluhenta. Adi genduari enggo sipilih Tuhan Yesus jadi Tuhanta janah Ia saja siisembah  maka kita harus tutus ersembah man baNa. Memang ersembah man Tuhan melala tantanganna, khususna peraten daging. Tapi adi tek kita maka Kesah Si Badia ngasup naluken peraten daging e maka man Tuhan saja siisembah kita.

            Pilihen jabunta ersembah man Yesus selaku Tuhan enggo tepat, sebab arah Yesus me keselamaten e. Memang tuhu lit ajaren siberkembang genduari kerna keselamaten lit ka bas agama-agama sideban. Tapi adi kita Tuhan Yesus ngenca dalan ku keselamaten (band. Yoh. 14:6). Janah enggo siidah pe ibas sejarah keselamatenta, ibas lias ras perkuah ate Tuhan maka Yesus Kristus mate guna keselamatenta, janah ibas penegu-negu Kesah si Badia kita ipengasup guna ndalanken kai singena ateNa. Bagepe padan Tuhan ise sireh ras mindo man baNa pasti iberekenNa (band. Matius 7:7-9). Genduari siharus lit man banta eme ketutusenta ersembah man Dibata. Ersembah man Dibata la saja terjeng kita reh ku kebaktin secara formal ibas gereja bagepe ibas PJJ ras PA, tapi pe harus teridah ibas perbahanenta tep-tep wari. Bagepe keluarga siersembah man Tuhan harus teridah lit kebaktin ibas keluargana, bagepe nggeluh ibas keharmonisan. Kerina anggota keluarga tutus ersembah man Tuhan. Emaka peran sekalak Bapa (nen = imam ibas keluarga) ntah pe orang tua harus berfungsi. Alu bage kita tetap jadi jabu sierkemalangan man Dibata janah ngaloken pasu-pasu idur Dibata nari (band. Maz.128).

Pdt. Steven Kumenit, STh.M.Min.

Dibata Mpelimbarui Perukuren Manusia (Roma 12:1-2)

BAHAN PJJ GEREJA GBKP

TANGGAL 21-27 OKTOBER 2012

Roma 12:1-2

Isi   :    Dibata Mpelimbarui Perukuren Manusia.

LATAR BELAKANG

1.     Secara umum banci sikataken perpulungen Roma labo Paulus simantekisa, tapi lit piga-piga alasan engkai Paulus nulis surat man perpulungen Roma, bagi siibahanna man perpulungen-perpulungen siipantekina,d iantara alasen si lit eme ate Paulus mpersiapken kerehenna ku perpulungen Roma, Bagepe gelah perpulungen Roma banci lebih nggejapken kerna perkuah ate Tuhan si mbelin siisehkenNa man perpulungen Roma. Tujunna eme gelah perpulungen Roma termotivasi erbahan simehuli singena ate Tuhan, selaku kalak sitek man Yesus Kristus. Ibas erti kata “pembenaran” sienggo ibereken Tuhan harus teridah ibas kegeluhen tep-tep wari.

2.    Lit dua hal siitekanken Paulus ibas oratenta sendah eme : 1).  Endesken kulandu selaku persembahen singgeluh rikutken singena ate Tuhan. Maksudna eme kerina (totalitas) kegeluhen perpulungen Roma, subuk perukuren, pengerana ras perbahanen, ntah pe kerina “kemampuan” ras “kegiatenta” tep-tep wari harus iendesken man Tuhan. Jadi lit penyerahan total. Enda tentuna berhubungan ras Dibata, sebab labo pemerenta siiharapken Tuhan, tapi ateNa kulanta e nge si jadi persembahenta. 2).  Ola pelepas dirindu jadi seri ras doni enda. Maksudna  lit dua bentuk eme : a).  Olasipediat dirinta enda jadi seri (sepola) ras doni enda, sebab doni enda enggo ikuasai dosa ras la sempurna. b). lit perubahen si terus-menerus, khususna lagu langkah perpulungen Roma. Erkiteken sie, Paulus nekanken  kerna perukuren  sipelimbarui. Alu bage perpulungen banci meteh kerna sura-sura Dibata. Jadi ibas ndalanken kai singena ateNa, eme ndalanken kekelengen ras nggeluh mehuli merupakan sada bentuk persembahen singena ate Tuhan.

3.      Ijenda Tuhu-tuhu Paulus mbedaken kerna ibadah menurut Injil ras ibadah menurut padan sindekah. Ibas padan si Ndekah, memang lit iaturken persembahen kurban siibaba eme asuh-asuhen. Ibas erti kata mpersembahken kurban  eme bagin sipenting ibas kegeluhen agama Yahudi, janah enda merupaken sada tuntutan ibas hukum taurat. Tapi ibadah menurut Injil eme totalitas nggeluh manusia silebih itekanken.

4.  Kenca manusia enggo itebusi Tuhan, janah Yesus Kristus jadi imam simbelin, maka persembahen asuh-asuhen lanai jadi sentral ibas keselamaten. Tuhu nai ibas ibadah kalak Yahudi lit persembahen pengalemi dosa, tapi ibas kegeluhen sienggo ibereken Tuhan man kalak si tek man baNa, maka persembahen geluhta eme sijadi sentral penembahenta. Maksudna kalak sitek harus tetap ersembah man Tuhan alu njaga kebadiaan geluh tep-tep wari. Kalak sitek ula terikut arus doni enda.

5.     Kalak si tek lanai perlu mpersembahken asuh-asuhen (binatang sienggo mate) ibas rangka menyenangkan hati Tuhan, tapi harus mpersembahken totalitas dirina.

 APLIKASI

            Keselamaten siibereken Dibata man banta la saja terjeng keselamaten pisik, tapi pe keselamaten ibas kerina totalitas geluh, termasuk perukurenta. Nai Perukurenta ikuasai dosa, emaka lalap ateta erbahan dosa, tapi erkiteken keleng ate Tuhan maka arah Keselamaten perukurenta enggo ipelimbaruiNa. Kita enggo nggeluh ibas kepentaren Dibata, emaka siharus iukuri kalak si tek eme uga ndalanken singena ate Tuhan, janah erpala-pala gelah kegeluhena la ikusai dosa, ntah pe la jadi seri ras doni enda. Kegeluhen si tetap njaga kebadiaan eme sada bentuk uga kita merespon keleng ate Tuhan sienggo iberekenna man banta. Bagepe kita enggo mpersembahken dirinta man Tuhan. Perkuah ate Tuhan sienggo nelamatken kita, harus sigejap tetap nemani kita arah Kesah Si Badia gelah kita tetap jadi sikerajangenNa, bagepe tetap mpersembahken kulanta enda jadi persembahen singgeluh rikutken singena ate Tuhan, emaka la kita nggit ncedai ntah pe erbahanca melket kulanta enda alu ndalanken si sia-sia. Kepentaren nge sibanci erbahanca maka kita ngasup ndalanken kai singena ate Tuhan.

Pdt. Steven Kumenit, STh, M.Min.

Nggeluhlah Ibas Kemulian Dibata (1 Tesalonika 2:9-12)

BAHAN PJJ GEREJA GBKP

TANGGAL 14-20 OKTOBER 2012.

1 TESALONIKA 2:9-12.

Tema : Nggeluhlah Ibas Kemuliaan Dibata.

LATAR BELAKANG.

1.    Ibas perpulungen Tesalonika nggo lit kelompok singajuk-ngajuk perpulungen gelah ngelawan Paulus. Cara kalak enda ngelawan Paulus eme alu ngataken kerasulan Paulus la tuhu ras motivasi Paulus ngelai eme ibas rangka ndarami keuntungen pribadi. Erkiteken sie me arah surat enda Paulus mbela dirina. Ibas pembelaan diri Paulus i je ikataken maka pelayanenna tuhu-tuhu murni, janah ibas rangka ncukupi kebutuhenna tep-tep wari Paulus harus erdahin suari ras berngi.

2.    Pendahin Paulus eme erbahan tenda. Hasil ibas pendahin enda ipakena guna ncukupi kebutuhenna tep-tep wari. Enda ibahanna gelah perpulungen siilayanina, termasuk perpulungen Tesalonika la iberatken. Janah pendahin Paulus enda enggo iteh perpulungen pe (band. Ayat 9). Pendahin enda sengaja itonjolkan Paulus man perpulungen Tesalonika gelah perpulungen banci meteh kerna sie, bagepe ate Paulus gelah perpulungen banci mbedaken ia ras perberita si reh i tengah-tengah perpulungen sipelin-pelin ndarami keuntungen pribadi arah pelayanenna.

3.     Perpulungen  ras Tuhan sendiri sijadi saksi kern pelayanen situhu-tuhu si la ndarami keuntungen siilakoken Paulus. Enda idalanken Paulus guna ngaloken pendilo ras pengutusen Tuhan man dirina guna mberitaken Berita si Meriah man kalak si la kalak Jahudi.

4.      Bagepe ituriken Paulus uga bentuk pelayanenna man perpulungen i Tesalonika. Paulus bagi sekalak bapa man perpulungen (anak), mabai dingen ipetetap Paulus ukur perpulungen, bage pe ipindo Paulus gelah perpulungen nggeluh rikutken si ngena ate Dibata, e me Dibata si ndilo kam gelah ikut ngenanami kemalemen ate i bas KinirajanNa ras KemulianNa. Jadi dahin Paulus la saja terjeng manteki perpulungen, tapi kenca sie lit sada perawaten man/pendampingen perpulungen, subuk ibas moral, ajaren, bagepe kiniteken. Enda kerina ibahan Paulus erkiteken keleng ate.

5.  Sijadi oratenta sendah la saja merupaken sada pembelaan Paulus, tapi pe mereken motivasi man perpulungen gelah tetap tutus erkiniteken man Tuhan. Sebab kenca perpulungen tek man Yesus Kristus, berarti perpulungen enggo idilo ku bas KinirajaanNa ras kemulianNa. Maksudna gelah perpupulungen banci meteh maka kerina kalak sienggo ipilih Dibata ipermuliakan ibas KinirajanNa.

APLIKASI

            Kita harus ngataken bujur man Tuhan sebab  arah perkuah ateNa ipilihNa kita jadi anak-anakNa, emaka kita enggo nggeluh ibas keselamaten. Gelah tetap nggeluh ibas keselamaten maka ijaga ras ipekena-kena Tuhan kita gelah kita tetap nggeluh ibas kemuliaanNa. Nggeluh ibas kemulian Tuhan berarti kita harus tetap ndalanken kai singena ateNa. Enda me mekatep si kurang ibas kita, emaka siidah lit kita sitetap ndalanken kai si la ngena ate Tuhan.

            Ibas minggu enda kita ngerana kerna HUT Moria pe 55 tahunken. Teridah i jenda pengarak-ngarak Tuhan man gerejaNa, khususna man Kategorial Moria. Siniharapken tole man perpulungen gelah Moria tetap jadi nande man kategorial Moria gelah moria banci nggeluh ibas kemulian Tuhan.  

Pdt. Steven Kumenit, STh, M.Min.

Dibata Mereken Ingan Sinteguh Ibas Kristus Man Kalak Si Tek (2 Korinti 1:12-24)

BAHAN PJJ GEREJA GBKP TANGGAL 7 – 13 OKTOBER 2012. =======================================
2 KORINTI 1:12-24.

Tema : Dibata Mereken Ingan Sinteguh Ibas Kristus Man Kalak Si Tek.

 LATAR BELAKANG.

1. Sijadi oratenta sendah eme surat Paulus man perpulungen Korinti, khususna surat simereken penjelasan engkai maka la ia sempat reh ku perpulungen Korinti. Enda isuratken Paulus, sebab ibas perpulungen Korinti enggo lit sierpengakap Paulus rayo-ayo (la tulus hati) ibas hubunganna ras perpulungen Korinti. 
2. Situhuna maka lit bage pengangkan perpulungen Korinti erkite-kiteken lit kelompok siercian ate man Paulus janah iajuk-ajukna perpulungen gelah ikut memusuhi Paulus. Memang lit rencana Paulus reh mulihi ku perpulungen Korinti, tapi erkite-kiteken lit denga pelayanenna sideban maka Paulus la surung reh ku perpulungen Korinti. Isamping sie ate Paulus reh ku Korinti gelah ia banci jumpa ras kelompok si ercian ate man bana e. 
3. Gelah ola salah pengangkan perpulungen Korinti maka nina Paulus ibas suratna (nen = oreatenta) la ia reh erkiteken pelayanen. Memang tuhu rencanana e eme ope denga Paulus ku daerah Makedonia, singgah atena lebe ku Korinti, emaka arah Korinti nari terus ia ku daerah Makedonia, bagepe mulih i daerah Makedoni nari singgah ka mulihi ku perpulungen Korinti, jenari itaruhken perpulungen me Paulus guna nerusken perdalanenna ku Judea, tapi enda kerina la surung, labo erkiteken Paulus mbiar ras rayo-ayo nandangi perpulungen Korinti, tapi pelin-pelin erkiteken pelayanen ras njaga keharmonisan perpulungen. Siimaksudken Paulus njaga keharmonisan perpulungen (band. Ayat 23) gelah perpulungen la ceda kinitekenna ras tetap nggeluh ibas persadan. Sebab adi ceda kiniteken ras lanai nggeluh ibas persadan erkite-kiteken rubat-sapih-sapih ia maka tentuna perpulungen kena hukumen ibas Dibata nari, sebab lanai ncidahken biak gereja situhu-tuhu. Bagepe la atena ngatur ntah pe mengintervensi cara geluh perpulungen. 
4. Labo erkiteken Paulus la surung reh ku Korinti ngataken ia sekalak sigampang erjanji/percakap longgar ntah bagi sanggar uruk-uruk, sebab e labo biak sekalak si tek man Yesus. Kristus eme ulu keselamaten siiberitaken Paulus man perpulungen Korinti. Janah keselamaten si lit ibas Yesus sipatna tetap ras pasti. 
5. Erkiteken kiniteken perpulungen man Yesus Kristus maka perpulungen enggo itangkuhken Dibata gelah dat ingan sinteguh ibas Yesus Kristus. Enda la banci bene erkite-kiteken ajaren-ajaren sipapak sireh, janah ngajuk perpulungen guna tek ibas ajaren e. Perpulungen Korinti harus tetap jemak ajaren sibenar kern Yesus Kristus. 

APLIKASI.
Kita harus ngangkai maka ibas Yesus lit kuasa si la ersibar, janah kuasana la saja terjeng ibas doni enda saja tapi pe ibas Sorga (band. Matius 28:18). Emaka kuasa siapai pe si lit ibas doni enda, termasuk kuasa iblis, talu ibahan Yesus. Erpalasken enda tentuna jadi sada keriahen man banta, sebab ibas perkuah ate Tuhan kita idilona guna banci tek ras erpengarapen man Yesus saja selaku ulu keselamatenta. Keselamaten sienggo ibereken Tuhan man banta, mpereh tanggungjawab guna ngelai, gelah kalak sideban pe banci nggejapken keselamaten si lit bas diri Yesus Kristus. Ngelai enggo jadi biak ibas kita kalak kristen, emaka ibas ngelai la banci rayo-ayo ntah pe bagi sanggar uruk-uruk, tapi ngelai harus sidalanken alu ukur meriah dingen lit ibas ketetapen ukur, amin gia la bagi ukurta. Bagepe selaku kalak kristen adi lit perbeben ras kiniseran si reh man banta, sierbahanca kita ndabuh ku bas dosa, enda jadi erkite-kiteken la lit ingan sinteguh sibanci jadi gelementa guna ngalaken kerina perbeben ras kiniseran e. Ibas paksa enda kita isingetken maka Kristus eme inganta sinteguh. Emaka ibas kita ngandalken Kristus maka kita banci pulah ibas perbeben ras kiniseran. Janah kinitekenta tetap nggeluh, emaka tetap kita erpengarapen man Yesus saja.

 Pdt. Steven Kumenit, STh, M.Min.

Rencana Dibata Pasti Seh Ibabo Kerina Sura-Sura Manusia (Kejadian 27:5-10)

BAHAN PJJ GEREJA GBKP TANGGAL 30 SEPTEMBER – 6 OKTOBER 2012. ====================================================================== Kejadin 27:5-10. Tema : Rencana Dibata Pasti Seh Ibabo Kerina Sura-Sura Manusia. LATAR BELAKANG. 1. Ibas bahan oratenta sekali enda eme sada bagin simbelin ibas pemilihen “bapa leluhur (Abraham Isak ras Jakup)” bangsa Israel. Bicara ibas ogenta teridah maka Jakup sijadi bagin ibas salah sada “bapa leluhur” bangsa Israel enda idatkenna arah nipu. Janah enda berbeda ras Abraham simerupakan bapa leluhur bangsa Israel. Tapi adi sinen terbagesen maka enda merupaken sada hak preogatif Dibata guna milih ise sibanci jadi alatNa guna njadiken mulihi doni enda jadi mehuli. 2. Perlu siteh ibas “dunia kuno” (band. Masa Abraham – Jakup), kerna pemasu-masun sekalak bapa sinandangi mate ipercaya masyarakat paksa sie “tuhu-tuhu manjur”, bagepe guna mendukung terlaksana pemasu-masun sekalak bapa man anakna, salah sada cara siipake eme alu mbaba pangan. Pangan ijenda merupakan sada kebadiaan. Isamping sie ibas masyarakat simenganut patria hart simenonjolkan garis keturunan man sekalak anak dilaki, terutama anak sintua siharus nggantiken posisi sekalak bapa, adi bapana enggo mate. Pemasu-masun sekalak bapa ertujun gelah anak nggantiken posisi bapa ngaloken ras nerusken padan Dibata. 3. Ibas oratenta ituriken uga Isak sienggo metua janah matana pe enggo seleng ersura-sura gelah posisina igantiken anakna sintua eme Esau, sebab bage kin tradisi tupung sie. Emaka ibas tradisi dunia kuno adi lit pengalihen sada keduduken ibas rumah maka lit ka sada tradisi upacara pengalihan siharus ibahan alu man ras nehken pasu-pasu. Tapi siidah arah turi-turin enda i ja Isak selaku kepala keluarga siatena masu-masu Esau anakna sintua la isetujui Ribka ndeharana. Emaka kenca ibegina lit sura-sura perbulangenna nandangi anakna si Esau, minter Ribka ndahi anakna si Jakup ras nurikenna sura-sura bapana e man si Jakup. Tapi erkiteken ate Ribka gelah si Jakup nge sigantiken posisi si Esau emaka isuruhna gelah Jakup muat dua kambing gelah itasakkan, jenari ibereken man bapana gelah arah sie Isak masu-masu Jakup. Harus ka pe siteh kerna pasu-pasu ntah pe kutuk/sumpah sekalak bapa man anakna hanya banci ilakoken sekali ngenca. Jadi adi sekalak bapa enggo masu-masu anakna maka la bo nari banci iulihi, amin gia situhuna alamat pasu-pasu salah. 4. Hak anak sintua siharus ngaloken pasu-pasu bapa selaku kepala keluarga, ate Ribka ialihken ku Jakup. Palas enda eme erkiteken 1). Hak kesulungen enggo berpindah ku Jakup (band. Kejadin 25: 30-34). Jadi bicara Esau anak sintua, tapi situhuna hakna enggo pindah ku Jakup. Emaka pasu-pasu Isak harus ku Jakup la bo man Esau. 2). Keberpihakan Ribka man Jakup. 3). Keberpihakan Tuhan man Jakup. 5. Kai siilakoken Jakup kerna pasu-pasu man anak sintua gelah litna sada kesinambungan guna jadi sada bangsa simbelin (band. Kejadin 21: 18). APLIKASI Tema kita sekali enda ngingetken kita ku kata Dibata ibas Yesaya 55 : 8 eme Nina TUHAN , "PerukurenKu la bali ras perukurenndu, dalanKu labo seri ras dalanndu. Adi siangkai enda maka situhuna kita enggo banci sadar maka dalan Tuhan silebih mehuli asangken dalan ras rencananta. Emaka sijadi penungkunen man banta engkai maka perukuren ntah pe sura-sura manusia si lebih meninjol asangken sura-sura Tuhan ? sebabna banci erkiteken sura-sura manusia pada umumna lebih bersipat jasmani/doni, tapi sura-sura Tuhan lebih bersipat rohani. Emaka kalak si nggeluh ibas sura-sura daging mesera kal akapna ngikuti sura-sura Tuhan. Rusur ibas kegeluhenta enda, tempa mehuli ras mejile siakap adi sidalanken sura-sura ukurta, tapi situhuna ibalik sie lit sada siding sibanci mbaba kita ku bas dosa. Memang la bo kap salah adi lit pe sura-suranta, tapi sisungkunlah man Tuhan lebe gelah sura-suranta e bali ras sura-suraNa. Bagepe gelah kai silakoken ras si sura-sura kita e erpalasken kai singena ate Tuhan. Harus siteh maka kerina geluhta lit ibas rancangan Tuhan. Sura-sura Tuhan nggeluh bas kita, eme guna njadiken doni enda nggeluh ibas kedamen ras kebadiaan, emaka kita enda ipakeNa jadi alatna. Jadi marilah sipelebeken sura-sura Tuhan, asangken sura-suranta. Pdt. Steven Kumenit, STh,M.Min.

Kam Kap Si Mada Kuasa (Matius 6:13b).

BAHAN PEKAN DOA GEREJA GBKP WARI VII. SABTU 29 SEPTEMBER 2012. ================================== Introitus : Jenari nina Dibata man bana, "Aku kap Dibata Si Erkuasa (Kejadin 35:11a.) Ogen : Mazmur 150:1-6. Khotbah : Matius 6: 13b. Tema : Kam Kap Si Mada Kuasa. LATAR BELAKANG 1. Adi sinen alu manjar-ajar kerna pertoton Tuhan siiajarken Yesus man ajar-ajarNa maka situhuna “Kam kap simada kuasa” eme kalimat pendungi ibas pertoton Tuhan e, janah sipatna eme pengakun. Ija Bapa sinisurga e erkuasa ibas kerinana, subuk i surga bagepe i doni. 2. Yesus ngajarken gelah jelma sinterem ngasup ngenen maka situhuna bicara melala gia kuasa-kuasa ibas doni enda, termasuk pe kuasa manusia, tapi adi ibandingken ras kuasa Dibata la bo lit bandingna. Kuasa-kuasa silit ibas doni enda termasuk kuasa manusia talu ibahan Dibata, sebab kerina e lit batasna. 3. Ibas pihak sideban kuasa-kuasa si lit ibas doni enda merupaken penjelmaan ibas siiblis nari, la bo kita ngasup nalukenca, adi la kin ras kuasa Dibata. Guna sie me adi sinen ku bas kitab Yohanes kerna pertoton, i je Yesus ertoto gelah kalak sitek ula ipedarat ibas doni enda nari tapi gelah ikawali ras i tegu-tegu Bapa (band. Yohanes 17:15). Sebab enda enggo idah Yesus kerna gegeh si lit bas manusia. Pengalamen si lit, manusia sipemena ndabuh ku bas tipu muslihat si iblis. Guna njaga si eme Yesus mindoken man BapaNa sinisurga gelah njaga ras ngkawali kerina kalak sitek. Sebab erkiteken kuasa Dibata nge maka kalak sitek banci megegeh ras naluken erbage-bage perbeben ras kiniseran. 4. Kuasa Bapa sinisurga teridah ibas diri Yesus Kristus. Ibas pelayanenNa i tengah-tengah doni enda guna majekken kinirajan surga ncidahken kuasaNa arah mujizat-mujizat, ipepalem Yesus kalak sakit, ipekekeNa kalak sienggo mate, ipelawes Yesus kerina setan-setan siatena ngkuasai manusia, bagepe uga Yesus berpihak man kalak sitertindas ras silatih dingen beraten, rsd. Ibas diri Yesus, kuasa iblis talu ibahan Bapa sinisurga. 5. Situhuna ibas naskah asli pertoton Tuhan, kalimat enda la lit, saja ibas perbeben gereja mula-mula maka kalimat enda itambahkan. Sebab gereja mula-mula ngenen kuasa Bapa si lit ibas Yesus Kristus ngasup naluken kerina kuasa-kuasa si lit ibas doni enda (iblis), khususna ibas kematen Yesus i je iakap iblis menang, janah enggo talu Yesus, tapi ibas wari sipeteluken Yesus keke. Enda mbuktiken Kuasa Dibata lebih erkuasa. Bagepe igejapkenna uga kalak sitek ibas gereja mula-mula amin gia ndatken perbeben ras kiniseran tapi erkiteken kuasa Bapa maka gereja mula-mula ngasup ndahiken dahin singana ate Tuhan, megegeh ras megenggeng ia kerina ibas ngenanami perbeben ras kiniseran. Emaka situhuna kalimat Kam kap si mada kuasa tujunna eme guna muji Tuhan, sebab la lit kuasa si lit ibas doni enda siseri ras kuasa Bapa e. APLIKASI. Ibas pertoton Tuhan enda ngajarken man banta guna banci ngenen kerna kuasa Tuhan si melebihi kuasa-kuasa si lit ibas doni enda, termasuk kuasa iblis. Emaka si harus lit bas kita eme nggeluh ibas keriahen ras muji Tuhan la saja arah alat-alat musik tapi pe ibas perbahanenta sitep-tep wari. Ibas litna perbeben ras kiniseran, kita tetap nggeluh erkiniteken man Yesus Kristus selaku Tuhan, sebab adi kinitekenta megegeh, sijadi eme kita tetap nggeluh ibas pengarapen. Sebab adi ndabuh kita ku bas dosa, berarti sia-sia kap sedekah enda kita nggeluh erkiniteken man Tuhan. Kuasa Bapa si enggo lit bas diri Yesus Kristus, banci pe iberekenNa man banta selaku anak-anakNa guna naluken kerina kuasa iblis. Alu bage kita tetap nggeluh ibas keselamaten sienggo ibereken Tuhan man banta. Pdt. Steven Kumenit, STh,M.Min.

Ola Min Kami Ibaba Kam Kubas Percuban. Tapi Olangilah Kami Idur Si Ilat Nari (Matius 6:13a).

BAHAN PEKAN DOA GEREJA GBKP WARI VI. JUMAT 28 SEPTEMBERB 2012. ====================================== Introitus : Nina, "Kadeku pe la lit asum aku tubuh nai, mate pe aku la pedah lit kadeku pe. TUHAN nai si merekenca, genduari enggo ka ibuatNa. Terpujilah gelarNa." (Jop 1:21). Ogen : Jop 2:1-10. Khotbah : Matius 6:13a. Tema : Ola Min Kami Ibaba Kam Kubas Percuban. Tapi Olangilah Kami Idur Si Ilat Nari. LATAR BELAKANG. 1. Ibas pertoton Tuhan, i je iajarken Yesus uga ertina nggeluh bergantung man Tuhan saja. Bagepe gelah ajar-ajar meteh maka Bapa/Dibata ngenca singasup njagai kegeluhen anak-anakNa. Erkiteken sie me ajar-ajar harus mindo man Bapana sinisurga gelah ula ibaba kubas percuban dingen ipulahi ibas sijahat nari. 2. Pertoton Tuhan sibersipat pengajaren enda, la bo saja terjeng paksa “genduari”, maksudna paksa ajar-ajar ras Yesus Nggeluh denga, tapi kenca Yesus lanai ras ajar-ajar pe. Sebab iblis terus gawah-gawah ndarami ise siman jerngemenna. Janah kerina kalak sitek merupaken “sasaran empuk”. Ngkai ? sebab 1). Kalak sitek secara pisik lanai ras Yesus. Adi ras Yesus, maka Yesus me sinjaga ras singkawali ajar-ajar. 2). La ate iblis ajar-ajar nggeluh ibas persadan ras Yesus, bagepe ndalanken kai singena ate Dibata. 3. Pertoton enda mpersingeti ajar-ajar kerna litna sada bahaya ibas kegeluhen ajar-ajar, ija ajar-ajar banci “isesatken” iblis seh maka banci lanai setia man Tuhan. Sebab adi ajar-ajar lanai setia man Tuhan maka siterjadi eme ajar-ajar nggeluh ibas dosa emaka kegeluhen ajar-ajar lanai nggeluh ibas keselamaten. Guna sie me ate Yesus gelah ajar-ajar la ndabuh ku bas dosa. Emaka sada ngenca dalanna eme tetap mindo penampat man Tuhan, gelah isampatiNa. 4. Memang percuban banci mpegegehi kiniteken kalak si tek man Yesus Kristus, tapi adi ajar-ajar la megenggeng ras la megegeh kinitekenna maka siterjadi percuban e banci meneken ntah pe nirangken ia Yesus. Guna sie me ajar-ajar harus mindo gegeh ras kepentaren ibas Dibata nari. 5. Yesus ngajarken man ajar-ajarNa gelah katawari paksa pe ajar-ajar mindo man BapaNa sinisurga gelah ipedauh idur siilat nari. Sebab iteh Yesus melala kal godaan sibanci erbahanca ajar-ajarNa jadi “murtad” emaka adi ikuasai Bapa banci ajar-ajar terhindar ibas sijahat nari. Enda erkite-kiteken inen Yesus sijahat enggo nggeluh ibas erbage-bage dampar kegeluhen, enda me sibanci ngkuasai kegeluhen ajar-ajar. Bali ras kalak Parisi singgeluh alu pekulah-kulah, erkiteken tergoda ia ku bas hal-hal doni, emaka kegeluhenna dem alu dosa. Ajar-ajar la banci bage, emaka perlu kal pusuh ras peraten ajar-ajar harus ikuasai Dibata. APLIKASI. Litnas percuban ibas doni enda, sada pihak banci nge jadi sarana guna mpegegehi kinitekenta, tapi isada pihak banci ka meneken kita. Erkiteken sie me kita selaku kalak kristen sitek man Yesus Kristus harus tetap nggeluh ibas kepentaren ras tetap mindo gegeh ibas Dibata nari gelah ipengasup ras iajariNa kita uga seharusna nggeluh ngalaken pencuban. Bagepe kita harus tetap mindo man Tuhan gelah kita ipedauh ibas sijahat nari. Tuhu manusia sindube si nggeluh ibas dosa ras kejahaten enggo ndatken perkuah ate, emaka pulah ibas dosa ras kejahaten e. Emaka kita genduari nggeluh ibas keselamaten. Tapi harus lah sisadari labo berarti la nai lit percuban ras kejahaten sibanci silakoken ibas kegeluhenta enda, sebab iblis katawari pe erdahin gelah kita ndabu ku bas dosa. Tentuna la ateta bage, janah tedeh ateta ndalanken sibenar singena ate Tuhan, sebab kita la nai nggeluh ibas kuk perhambaan dosa. Pdt. Steven Kumenit, STh, M.Min.