Pekan Penatalayanan GBKP, Wari 6 : Kesah Si Badia Make GBKP Jadi Aron Dibata Ibas Ndalanken Misi Gereja-Gereja Indonesia (Yohanes 17:21-23)

PEKAN PENATALAYANAN

GEREJA GBKP

WARI VI.  JUMAT 25 JANUARI 2012.

Introitus    :    Ersada min arihndu, sikeleng-kelengen min kam, ersada min geluhndu dingen ersada ukurndu (Pilipi 2:2b).

Ogen          :    2 Korinti 8:1-5

Khotbah    :    Yohanes 17:21-23

Tema         :    Kesah Si Badia Make GBKP Jadi Aron Dibata Ibas Ndalanken Misi Gereja-Gereja Indonesia.

LATAR BELAKANG

1.      Sijadi oratenta eme bagin sila terpisahken ibas pasal 17, janah enda merupaken pertoton Yesus man Bapa sinisurga ope denga Yesus mate. Bagepe pertoton enda banci ibagi jadi telu bagin simbelin eme 1). Ayat 1-5, pertoton Yesus guna dirina sendiri. 2). Ayat 2-19, Pertoton Yesus guna ajar-ajarNa. 3). Ayat 20-26, Pertoton Yesus guna kerina kalak sitek (gereja).

2.      Ertorto Yesus man BapaNa sinisurga sebab enggo iidah Yesus, kenca kematen ras kekekenNa ku Surga, maka tantangen man kalak si tek erberatna, sebab amin gia iblis enggo italuken Yesus, tapi tetap denga iblis gawah-gawah guna ncubai ras naluken kalak si tek, gelah kalak sitek lanai ersembah man Yesus Kristus.

3.      Kuasa iblis idah  Yesus hanya banci italuken, adi kalak sitek nggeluh ibas persadan kekelengen. Sebab ibas persadan kekelengen nggeluh ije kuasa Kesah si Badia. Gegeh Kesah si Badia banci mereken serpang pulah ras nehken berita si Meriah nandangi doni enda. Emaka persadan kalak si tek cukup penting.

4.      Ulih kematen Yesus labo saja guna bangsa Jahudi, tapi guna kerina bangsa ras guna kerina kalak si tek, bagepe guna ndilo ras mpersadaken anak-anak Dibata simerap i belang-belang doni. Janah nggeluh persadan enda, la saja terjadi secara horisontal, tapi pe secara vertikal, janah persadan enda bagi min persadan Yesus ras Bapa.

5.      Ibas persadan alu palas kekelengen, sincidahken nggeluh sikeleng-kelengen, maka iidah doni,  enda kerina erkiteken Tuhan simpersadakan. Enda kerina erkiteken kuasa kekeken Yesus Kristus. Alu bage doni tek maka Yesus Kristus eme persuruhen Dibata ibas doni enda. Gagasan enda icidahken Yohanes, sebab lit kelompok  (gnostik) si la tek maka Yesus Kristus eme persuruhen Dibata, ntah pe Dibata si enggo jadi manusia (band. Yohanes 1:1-18).  Kelompok gnostik lebih menekankan kerna pemeteh, emaka la kap mungkin man kalak enda adi Dibata enggo jadi manusia, ntah Yesus Kristus isuruh Dibata guna nelamatken doni enda.

6.      Yesus Kristus la saja notoken kerna persadan kalak si tek, tapi pe kemulian sienggo ibereken Tuhan man kalak si tek e tetap nggeluh amin gia lit perbeben ras percuban erkiteken iblis, emaka kerina kalak si tek banci nggeluh ras Yesus ibas Surga, ingan Yesus.

APLIKASI.

            Ibas rangka jadi sira ras terang doni, gereja GBKP secara nasional ikut ibas persadan gereja-gereja i Indonesia si tergabung ibas PGI, secara internasional gereja GBKP ikut ibas Dewan gereja Asia ras dewan gereja se dunia. Sebab iidah gereja GBKP kerja sama gereja-gereja banci mbaba hasil simaksimal. Jadi sira ras terang doni maksudna gelah lit min perbahanen siibahan gereja guna mengentasken kemiskinan, nggeluh ibas sikeleng-kelengen, subuk sapih-sapih manusia, bagepe kita ras tinepa Dibata si deban. Jenda me peran Kesah Si Badia, ntah pe bekas Kesah Si Badia erdahin.

            Gereja GBKP mpersadaken gegehna ras gereja-gereja secara nasional ras internasional guna ndalanken misi gereja. Emaka semangat eroikumene harus lit bas gereja GBKP guna jadi sada aron ras gereja-gereja si deban. Ibas jadi sada aron maka sipaling penting bas gereja GBKP eme kiniteruken ukur ras nggeluh ibas sada persadan. Alu bage nggeluh me bas gereja kerna sisampat-sampaten. Ntah GBKP banci nampati ise saja simbutuhken penampat. Jadi kegeluhen pelayanen ras persadan gereja GBKP  jadi erkite-kiteken Kesah Si Badia simerupaken palas pajekna gereja GBKP janah Kesah Si Badia sineguh-neguh gereja guna ndalanken misi gereja radu ras gereja-gereja si deban.

           

Pdt. Steven Kumenit, STh. M.Min.

Pekan Penatalayanan GBKP, Wari 5 : Kesah Si Badia Mpengasup Kita Jadi Pasu-Pasu Man Kalak Karo (Yesaya 32:15-20)

PEKAN PENATALAYANAN

GEREJA GBKP.

WARI V. KAMIS 24 JANUARI 2013.

Introitus     :    E maka berekenlah man bangku kepentaren ngerajai bangsaNdu alu kebujuren ras kebeluhen mbedaken si bujur ras si jahat (1 Raja-Raja 3:9a).

Ogen          :    Yohanes 4: 28-30.

Khotbah     :    Yesaya 32: 15-20.

Tema          :    Kesah Si Badia Mpengasup Kita Jadi Pasu-Pasu Man Kalak Karo.

LATAR BELAKANG

1.      Kegeluhen bangsa Israel enggo nggeluh alu erbana-bana. Bangsa enda lanai nggeluh  erkemalangen man Tuhan Dibata. Emaka terjadi me kiniladilan ras “jurang pemisah” si cukup ndauh antara kalak bayak ras kalak musil. Enda teridah  ibas diberu-diberu kalak bayak sincidahken kinilitenna, janah geluhna alu ersenang-senang (band. Yes. 32:9), rsd. Kegeluhen sibagenda mpereh pernembeh ate Tuhan, emaka arah nabi Yesaya, ate Tuhan ngukum bangsa Israel. Ibas nubuat nabi Yesaya nina, kira-kira sada tahun nari reh me penghukuman ibas Tuhan nari (Yes. 32: 10).

2.      Ibas keleng ate Tuhan, ateNa mereken kesempaten sekali nari man bangsaNa guna jera, emaka ate Tuhan mereken KesahNa man bangsaNa, sebab kuasa Tuhan e ngasup mpelimbarui bagepe mpegeluhken mulihi kai si enggo ceda, bagepe mereken kemalemen ate ras kedamen. Enda teridah : taneh tenggiring jadi mehumur,  lit mbal-mbal simeratah,  juma pe lit hasilna, nggeluh me kebujuren ras keadilen erkiteken kerina kalak ngelakoken sibujur. Bagepe kesusahen lanai lit ibas bangsa e.

3.      Kesah Tuhan  tuhu-tuhu mereken perobahen ibas cara rukur ras perbahanen. Cara rukur ras perbahanen kerina mehuli ras ngena ate Tuhan, erkiteken si me terjadi perubahen si mbelin, simbabai bangsa Israel tuhu-tuhu jadi bangsa Dibata. Sebab paksa sie bangsa Israel siseharusna min ncidahken maka ia ipilih ras ikhususken guna jadi alat Tuhan, bagepe cermin nggeluh selaku bangsa Tuhan, tapi sie lanai teridah. Emaka nembeh ate Tuhan, janah bangsa si deban pe lanai mehamat ras mbiar man bana. Padahal adi si nen ibas sejarah bangsa Israel. I ja tupung bangsa Israel patuh ku bas pimpinen Tuhan, bangsa Israel enda tuhu-tuhu nggeluh ibas bujur ras teneng. Bagepe bangsa sideban mehamat ras mbiar man bangsa Israel, sebab Tuhan ikut “berperkara” ibas kerina kegeluhen bangsa Israel.

4.      Kai siikataken nabi Yesaya, mperjelas kerna  situasi ras keadaan bangsa Israel paksa sie. Emaka ate nabi Yesaya ibas nubuatna gelah bangsa Israel nggeluh ibas kedamen ras kemalemen ate. Janah nggeluh ibas kedamen ras kemalemen ate e, la bo banci jadi adi la kin Tuhan  “turun tangan”, bagepe bangsa Israel harus nggeluh ibas kerembaken man Tuhan, ras  ndalanken kai singena ate Tuhan. Nggeluh ras Tuhan berarti nggeluh alu teneng ras dame, janah kerina nggeluh ibas kecukupen.

5.      Ate Yesaya gelah iangkai bangsa Israel min kerna nggeluh ibas ketenengen ras kedamen situhu-tuhu, bagepe litna pemulihen kerna alam e erkite-kiteken karya Dibata simereken KesahNa man bangsa Israel.

APLIKASI

            Kita enda la saja nggeluh selaku gereja secara institusi, tapi kita enda gereja secara personal. Bagepe kita idilo Tuhan guna jadi alatNa ntah pe pancurNa nandangi kalak si deban. Kita selaku gereja harus min lit rasa kepedulianta nandangi kalak sideban khususna man kalak Karo. Jadi penungkunen man banta, engkai man kalak Karo saja, padahal gereja ntah pe kita idilo guna kerina jelma ras suku bangsa. Memang kita idilo guna kerina suku bangsa, tapi sekali enda mari sifokusken lebe guna kalak karo, kenca bage ku kalak si deban.

            Genduari enda tantangen  siihadapi kalak Karo nggo reh beratna, khususna kalak Karo sitading ibas taneh Karo ras sekitarna, sebab juma lanai menghasilkan secara maksimal, i tambah ka     melala pinakit/hama simenyerang sinuan-sinuan. Bagepe cukup nterem genduari kalak karo si kena pinakit HIV/AIDS, bagepe judi nggo semakin “marak”. Khusus kalak Karo siberagama kristen (GBKP), nterem denga si la ku gereja. Isamping sie lit denga peminpin-pemimpin si kurang mperdiateken kegeluhen masyarakatna, emaka lit denga nge peminpin-peminpin siterlibat KKN.

            Kita harus ngenen enda kerina, emaka nggo seharusna min kita enda jadi pancur pasu-pasu  nandangi kalak Karo. Kita harus erdiate nandangi kegeluhen kalak Karo. Alu erbage-bage cara/ bentuk sibanci bereken man senina turangta. Tentuna enda harus sue ras profesi, kiniliten ras keadaanta. Ipihak sideban kita harus mpersingeti senina turangta sierbahan salah, bagepe lit min bas kita  pertoton syafaat nandangi senina turangta e. Enda me perbahanen Kesah Si Badia bas dirinta, emaka la kita “minder” guna jadi pasu-pasu man kalak sideban.

Pdt. Steven Kumenit. STh. M.Min.    

Pekan Penatalayan GBKP, Wari 4 : Kesah Si Badia Mpengasup Ngawan Ni Perpulungen Guna Ngkelengi Teman Manusia (Galati 6"1-5)

PEKAN PENATALAYANAN

GEREJA GBKP

WARI IV. RABU 23 JANUARI 2013.

Introitus   :    "Ise kin temanku manusia?" (Lukas 10:29b)

Ogen        :    Lukas 10: 25-37).

Khotbah   :    Galati 6:1-5.

Tema        :    Kesah Si Badia Mpengasup Ngawan Ni Perpulungen Guna Ngkelengi Teman Manusia.

LATAR BELAKANG.

1.      Secara umum banci sikataken, perpulungen Galati enda Paulus sendiri simantekisa. Janah anggota perpulungen enda labo kalak Yahudi. Tapi erkiteken dahin pelayanen, Paulus nadingken perpulungen enda. Kenca itadingken Paulus perpulungen Galati enda, la ndekahsa reh kalak kristen siasalna Yahudi nari. Kalak Yahudi siasalna Yahudi nari ngataken maka adi ate selamat  harus ngikuti aturen-aturen taurat.  Ntah pe guna jadi kalak kristen simehuli maka harus ngikuti kai siikataken undang-undang (taurat), Perpulungen Galati harus i sunatken ras ndalanken kai siikataken undang-undang (taurat).

2.      Khusus sijadi oratenta, Paulus ngerana kerna uga seharusna perbahanen kalak si tek man Tuhan. Kegeluhen ibas doni enda harus lit standart moral. Memang bagi kalak Yahudi standart moralna meganjang kal, janah enda simbedaken ia ras bangsa sideban. Janah enda me siitekanken kalak kristen asal Yahudi. Pengajaren kalak kristen asal Yahudi nandangi kalak kristen i perpulungen i Galati eme adi kalak kristen la ngikuti ntah pe ndalanken undang-undang (taurat) maka kalak kristen si bage la lit pedomanna erbahan simehuli (perilaku). Kegeluhen kalak kristen lanai terbedaken ras kalak si la tek man Tuhan (kalak kafir) si lit isekelewetna. Padahal selaku kalak sitek man Yesus Kristus, kegeluhenna enggo nggeluh ibas kemerdekaan, lanai nggeluh ibas kuk undang-undang. Kegeluhen kalak si tek eme ibas Yesus Kristus.

3.      Persinget Paulus nandangi perpulungen gelah perpulungen ndalanken undang-undang Kristus eme sikeleng-kelengen ras sisampat-sampaten adi lit masalah. Erkiteken sie perpulungen iajuk Paulus gelah adi lit anggota perpulungen sienggo erbahan salah, maka perpulungen la banci main hakim sendiri, tapi harus negu ia alu manjar-ajar gelah mulihken ia ku dalan simehuli. Enda berlaku man anggota perpulungen sienggo terikut ibas pengajaren si papak siibaba kalak kristen Yahudi simenekanken kerna keselamaten arah undang-undang (taurat).  Bagepe nandangi anggota perpulungen sienggo nggo ngelakoken kesalahan-kesalahan.

4.      Perbahanen siibahan kalak si tek eme nggeluh sikeleng-kelengen ras sisampat-sampaten eme sada tanggungjawab moral ras kiniteken.  Enda itekanken sebab undang-undang Kristus erdahin ibas persadan.

5.      Isamping sie, Paulus mpersingeti perpulungen gelah tetap mperdiateken perbahanen simehuli singena ate Tuhan. Bagepe tep-tep anggota lit tanggungjawabna masing-masing eme dalanken kai simehuli singena ate Tuhan. Perbahanen simehuli siidalanken kalak si tek mbabai ia ibas kinihagaan. Maksud Paulus gelah tep-tep anggota perpulungen fokus ibas perbahanen simehuli, ula mbeda-bedaken ras kalak sideban.

APLIKASI

            Santo Agustinus, sekalak bapa gereja, pernah isungkun : kai kin keleng ate e, janah uga bentuk ras rupa keleng ate e? Nina Agustinus :

Kasih memiliki tangan untuk menolong orang lain, Kasih memiliki kaki untuk menghampiri mereka yang miskin, Kasih memiliki mata untuk melihat kebutuhan-kebutuhan orang lain, Kasih memiliki telinga untuk mendengar rintihan mereka yang menderita.

            Jadi teridah i jenda Agustinus la mereken jawaban si rumit kal tapi alu sederhana, gelah banci imengerti.

            Ibas pengertin si lebih praktis, keleng ate teridah ibas perbahanen. Janah keleng ate e nggo lit bas kita selaku kalak kristen, sebab kita kerina nggeluh ibas persadan ras Kesah Si Badia. Janah harus siinget salah sada ulih Kesah Si Badia eme kekelengen (Galati 5:22).

            Man kalak kristen kekelengen la sekedar konsep ras pengajaren, tapi harus idalanken, emaka ibas kita ndalanken kekelengen i tengah-tengah perpulungenta alu la pekulah-kulah, maka kita nggo memproklamirkan man kalak sideban kita enda ipinpin Kesah Si Badia.

Pdt. Steven Kumenit. STh, M.Min.

Pekan Penatalayanan GBKP, Wari 3 : Kesah Si Badia Njemba Perpulungen Guna Ersaksi (Perbahanen Rasul-Rasul 8:26-38)

PEKAN PENATALAYANAN

GEREJA GBKP

WARI III. SELASA 22 JANUARI 2013.

Introitus :    KesahKu Kucurcurken man bangsangKu Israel, janah lanai ndigan pe ia Kutundalken. Aku, TUHAN si Erdolat enggo melasken katangKu." (Esekiel 39:29).

Ogen      :    Esekiel 36:27-30.

Khotbah     :    Perbahanen Rasul-Rasul 8: 26-38.

Tema      :    Kesah Si Badia Njemba Perpulungen Guna Ersaksi.

LATAR BELAKANG

1.    Filipus eme salah sada serayan siiangkat rasul-rasul atas usulen perpulungen guna nampati rasul-rasul ibas ngelai (band. Perbahanen 6:5-7).  Kepeken ibas perkembangen pelayanen, dahin Pilipus la saja guna ngelai meja, tapi pe nehken Berita Si Meriah. Janah enda ilakokenna i kuta Samaria. Tapi kenca dung pelayanenna i kuta Samaria atena ku Yerusalem, tapi reh sekalak malekat Tuhan ndahi Pilipus janah nina : Ersikap janah laweslah kam ku selatan, ku dalan  i Yerusalem ku Gaza, dalan enda melungun. Emaka ersikap ia jenari berkat Pilipus ku ingan siikataken malekat Tuhan. Ibas perdalanenna jumpa ia ras sekalak pegawai Etopia, kalak si lit jabatenna i Etopia (kepala bendahara Kandake, Ratu Etopia), si enggo mulih ibas ersembah i rumah pertoton i Yerusalem. Perlu si teh lebe Kandake eme gelar ratu-ratu  ibas Etopia).

2.    Kalak Etopia, beda kinitekenna ras kalak Yahudi, tapi reh ia ersembah ku rumah pertoton kalak Yahudi i Yerusalem erkite-kiteken i Etopia jumpa ia ras kalak Yahudi, janah ibegina pengajaren kalak Yahudi e, ras menteri Etopia enda enggo ngoge Pustaka Si Badia kalak Yahudi, emaka alu gegeh Kuasa Kesah Si Badia, ibabai Kesah Si Badia menteri e gelah ku Yerusalem. Tapi ibas perdalanen mulih ku Etopia alu sora megang iogena sada kata Dibata si lit ibas kitab Yesaya nari, janah ibegi Pilipus. Ibas paksa sie ka ngerana Kesah Si Badia man Pilipus, gelah Pilipus ndeheri gereta pegawai Etopia e, emaka minter ideheri ka janah isungkun Pilipus ia  iangkana kin kerna kai siiogena, tapi ijabab menteri ndai, la iangkana, emaka ituriken/jelasken Pilipus kai ertina e. Ertina eme kerna Yesus Kristus. Kai siikataken ibas kitab Yesaya e, eme sada nubuat kerna Yesus.  

3.    Erkiteken jelas kal penuriken Pilipus maka nina menteri e man Pilipus peridiken aku. Tapi nina Pilipus kam banci iperidiken adi tuhu-tuhu kam enggo tek man Yesus. Nina menteri e, aku enggo tek, emaka iperidiken Pilipus me meteri e.

4.    Perjumpan Pilipus ras menteri i Etopia nari, bagepe menteri e nggit iperidiken merupaken sada pendahin Dibata arah Kesah Si Badia. Jadi manusia la bo lit peranen kai pe. Manusia ibas hal enda Pilipus merupaken sada alat Tuhan ngenca.

5.    Keselamaten ibereken Tuhan man tep-tep manusia, adi ia tuhu-tuhu tek man Yesus Kristus. Bagepe keselamaten bersipat universal. Keselamaten la ikhususken man salah sada jelma ntah pe kelompok saja, tapi terbuka man ise saja, termasuk man kalak Etopia.

APLIKASI

            Ersaksi eme salah sada tugas gereja. Lit telu tugas gereja eme Koinonia (persadan), Merturia (ersaksi) ras Diakonia (pelayanen).  Janah dahin ersaksi eme tanggungjawab kita kerina selaku kalak si tek. Dahin ersaksi merupaken dahinta erkiteken dahin e persuruhen Tuhan man banta (band. Matius 28:18-20; 1 Petrus 2:9; rsd). Persoalenna si maketep turah bas kita, eme mekisat kita ersaksi, ntah pe kita isibukken alu erbage-bage dahinta. Emaka dahin ersaksi bagi terabaikan.    

            Adi siperdiateken ibas oratenta, Pilipus ersaksi kerna Yesus man menteri i Etopia nari, alu bage, ersaksi siimaksudken i jenda eme ersaksi ku darat. Ersaksi man kalak si lenga nandai Dibata. Janah adi siperdiateken ibas kegeluhenta, situhuna nterem jelma tehna Yesus Kristus e ise, tapi lenga kal iangkana alu mbages. Emaka dahinta jelaskenca ise Yesus e. Harus si teh kita ngasup ngelakoken dahin mberitaken Berita Si Meriah, sebab Kesah Si badia lit ras ringan bas pusuhta. Kesah Si Badia ngasup njemba kita gelah siberitaken kerna Yesus e. Janah harus ka siteh Mberitaken Berita Si Meriah ibas paksa si genduari  la saja terjeng ngerana, tapi arah perbahanen.

            Harus siinget, apai ka genduari kita ibas solidaritas eksternal. Uga bentukta ersaksi ibas bentuk solidaritas eksternal. Adi mehuli perbahanenta nandangi kalak si deban, tentuna bagi menteri i Etopia nari me kalak e, eme nggit iperidiken. Ia sendiri simindo gelah iperidiken, labo kita simindo. Tapi inget tahun solidaritas enda labo guna ndarami domba, tapi nehken simehuli singena ate Dibata, eme bentuk kita ersaksi.

Pdt. Steven Kumenit, STh, M.Min.