Pekan Keluarga Wari 4 : Tantangan Jabu (Ibrani 13:4-6)

PEKAN KELUARGA

GEREJA GBKP

WARI IV. RABU 5 JUNI 2013.

Introitus     :    Kerinalah kam ngergaken perjabun. Kegeluhen perbulangen ras ndehara i bas perjabun la banci melket. Dibata pagi ngukumsa kalak si erlagu la mehuli bage pe si erlua-lua (Heber 13:4).

Ogen          :    Epesus 1:3-6

Khotbah     :    Heber 13:4-6.

Tema          :    Tantangan Jabu

LATAR BELAKANG

1.    Secara umum banci sikataken kitab heber enda isuratken man kalak kristen siasalna arah Heber nari si paksa sie sangana ibas perbeben simesangat, khususna bahaya kebenen pengarapen man Kristus, janah kalak enda nggo ersura-sura mulih mulihken ku kegeluhen Yudaisme, termasuk  agama Yahudi.

2.    Penulis kitab Heber mpebetehken man perpulungen gelah perpulungen tetap nginget kalak si lit ibas penjara ras singenanami kiniseran. Enda ikataken penulis gelah perpulungen nggeluh ibas sada penggejapen, sebab paksa sie kalak kristen icurigai oleh masyarakat si la beragama kristen ras pemerintah, sebab kalak kristen paksa sie, ibas rangka njaga kemurnian kiniteken la nggit bergambung ras kelompok-kelompok si lit i tengah-tengah masyarakat siberikrar/erpadan guna ndalanken piga-piga upacara sibertentangan ras kiniteken. Emaka kalak kristen paksa sie iperlakuken alu la adil. Bagepe lit ka anggota perpulungen si ertana irampas, ntah pe itindak pemerintah sebab kalak kristen la nggit bersumpah setia ras ersembah man kaisar selaku dewa.

3.    Tole penulis mereken sada kata persinget jabu kalak kristen gelah tetap ngergaken ikaten perjabun, kegeluhen perbulangen ras ndehara la banci melket. La banci lit i tengah-tengah keluarga praktek erlua-lua sebab enda ertentangan ibas ikaten perjabun selaku keluarga kristen. Emaka ise singelakoken sibage ihukum Dibata ia pagi.

4.    Bagepe lit sada pengajaren man perpulungen kerna duit. Penulis mpersingeti gelah perpulungen ula min merangap kerna duit. Tapi erlajarlah nggeluh ibas berkecukupen, Janah tetap tek man Dibata la pernah nadingken kalak si tek man baNa. Tuhan e Tuhan simperdiateken kegeluhen anak-anakNa, emaka isampatiNa anak-anakNa ras iberekenNa kecukupen ibas ndalani kegeluhen sitep-tep wari enda. Ibas kata persinget enda, penulis mereken sada gegeh ras motivasi gelah perpulungen tetap ngandalkan Tuhan. Emaka lit min sada pengakun kiniteken man kalak sitek kerna Tuhan e Tuhan penampat  emaka la perlu mbiar.

5.    Ipihak sideban ate penulis gelah kalak sitek ngasup ngangkai kerna erta doni enda (duit). Duit la bo segalana ibas kegeluhen manusia, emaka kalak si tek ula meranggap, sebab ibas kalak sitek merangap kiniteken kalak sitek banci ceda, emaka hubungen kalak sitek ras Tuhan banci ceda ka. Kalak sitek banci nggeluh ibas pernembeh ate Tuhan. Emaka sipaling penting ibas kegeluhen kalak sitek eme ngkuasai diri ras tetap ernalem man Tuhan saja.

APLIKASI

            Salah sada tantangan jabu kalak kristen eme kerna duit. Sebab duit merupaken sada hal sipenting ibas kegeluhenta. Duit eme alat tukar sisah ibas doni enda. Janah duit pe banci mereken “kinihagan”, meningkatkan status sosial. Kalak si deban banci ngergai ras nghamati kita hanya erkiteken duit. Erkiteken pentingna duit ibas kegeluhen manusia i tengah-tengah doni enda, maka mekatep guna ndatken sen nggit kita erdahin 24 jam, bagepe nggit kita ku kuta/negara kalak nadingken  jabunta erkiteken erdahin. Erkiteken kesibuken e maka mekatep keluarga kristen la ku gereja bagepe la ersembah man Tuhan. Ipihak sideban erkiteken duit ka nge maka lit perbulangen ras ndehara ngelakoken si la mehuli (nen = pil ras wil). Gelah banci siergaken jabunta, maka keluarga e, perbulangen ras ndehara harus nggeluh sikeleng-kelengen ras tetap jemak perpadanen sienggo ibelasken paksa ipasu-pasu ndube i bas gereja siisaksiken perpulungen. Bagepe harus mbiar ras erkemalangen man Tuhan si enggo mpersadaen perbulangen ras ndehara ibas ikaten keluarga.

            Erta ntah duit la bo merupaken sada masalah man banta, simasalah man banta eme la terkuasai dirinta emaka merangap kita, dungna nilai-nilai moral ras etika kristiani, bagepe nggeluh mbiar man Tuhan lanai siperdiateken. Adi bagenda perbahanenta ihukum Dibata nge  kita pagi. Emaka gelah terkuasai dirinta, kita harus nggeluh ibas ernalem man Tuhan, sebab harus siteh kita enda sikerajangen Dibata kap, emaka la ate Tuhan nadingken kita ibas perbeben geluhta, isampatiNa me kita. Janah marilah erkiteken persadanta ras Tuhan, elajar kita ncukupken kai si lit bas kita gelah terpuji gelar Tuhan.

Pdt. Steven Kumenit, STh.M.Min.

Pekan Keluarga Wari 1 : Dibata Sinitetapken Jabundu (Kejadin 2:18)

PEKAN KELUARGA

GEREJA GBKP

WARI I. MINGGU 2 JUNI 2013.

Introitus    :    Jabu ipanteki erpalasken kepentaren ras pengertin (Kuan-Kuanen 24:3).

Ogen          :    Matius 19:1-6.

Khotbah    :    Kejadin 2:18.

Tema         :    Dibata Sinetapken Jabundu.

LATAR BELAKANG

1.      Si jadi bahan khotbahnta eme sada ungkapen Dibata nandangi manusia si nggeluh sisada-sisada ibas peken Eden. Erkiteken la kap mehuli manusia nggeluh sisada-sisada, maka ate Dibata njadiken teman sicocok guna nampati Adam. Janah adi sioge terdauhen maka Dibata njadiken sekalak diberu (Hawa) guna jadi teman sicocok si jadi penampat man Adam. Jadi peran sekalak diberu nandangi sekalak dilaki eme ibas rangka nampati. Siimaksudken penampat i jenda eme mereken dukungan ntah pe pergegeh gelah sekalak dilaki banci seh ku tujunna.

2.      Ibas rangka nampati manusia (Adam) e, maka konsep ras sura-sura Dibata harus si cocok ras manusia e. Emaka penampat siimaksudken i jenda labo jadi budak, tapi selaku teman si banci arih-arih ndalanken sura-sura Dibata ibas doni enda. Erkiteken sie me teman si cocok man manusia (Adam) e, la bo ibas sideban nari, tapi ibas manusia (Adam) e sendiri (band. ayat 22-23).

3.       Penampat siibereken Tuhan man manusia (Adam) e eme sekalak diberu. Emaka sekalak diberu nge sicocook jadi teman man Manusia (Adam) e, gelah ras-ras ertanggungjawab guna ndalanken sura-sura Dibata ibas doni enda. Janah siidah amin gia lit teman sicocok siibereken Dibata man manusia (Adam) e, tapi kerina ia harus bertanggungjawab man Tuhan.

4.      Ijadiken Dibata sekalak penampat man manusia (Adam), sebab sura-sura Dibata kerna kai siijadikenNa ibas doni enda mehuli, janah berdampak ku bas kegeluhen i tengah-tengah doni enda. Kegeluhen sisada-sida iidah Dibata la kap mehuli, sebab kegeluhen sisada-sada mereken sada beban nggeluh si cukup berat man manusia, subuk ibas rukur bagepe ngelakoken sada-sada dahin, emaka sekalak diberu ijadiken  jadi teman sicocok man sekalak dilaki gelah kerina jadi mehuli, bagi tinepa-tinepa Dibata si deban.

5.      Ijadiken Dibata sekalak diberu janah ibabaNa ku Adam, merupaken sada pembentuken keluarga si pemena i peken Eden.

APLIKASI

            Erbage-bage cara ras bentuk maka terjadi keluarga. Tapi kai pe cara ras bentukna e, selaku kalak kristen harus ngataken e kerina ibas pengaturen Dibata kap, emaka gelah erteguhna  ikataken jabu e, ipasu-pasu Dibata jabu e. Janah kita pe erpengangkan maka ibas pemasu-masun Dibata saja nge kita banci nggeluh selaku keluarga kristen simehuli ras singena ate Dibata. Janah si dua e, nggo jadi sada kula kap. Bagepe kai singgo ipersada Dibata la banci isirangken manusia. Erkiteken sie me jabu sisirang (cerai), ia ersalah ras erdosa man Tuhan. Tapi ibas perdalanen waktu konsep enda “terkikis”, enda banci siidah nterem keluarga kristen sirang. Sirangna keluarga-keluarga kristen erkite-kiteken erbage-bage sebab, tapi sijadi persoalen i jenda eme lanai keluarga-keluarga e mbiar ibas penghukumen siibereken gereja, terlebih ibas Dibata nari.

            Memang adi siperdiateken ibas zaman Musa pe nggo lit keluarga cerai, janah Musa selaku perpanjangan tan Tuhan ngueken (merestui) alu pedarat surat cerai. Enda jadi erkiteken kinikengen ukur keluarga-keluarga e si ate sirang.

            Keluarga sierkemalangen man Dibata tentuna labo nggit jabuna gagal, emaka ibas perkembangen sigenduari nggo nterem keluarga-keluarga singikuti konseling pasca perkawinan, bagepe ngikuti seminar-seminar kerna keluarga bahagia gelah jabuna banci langgeng. Tapi situhuna inti ibas keluarga eme ikaten persadan ras Dibata. Keluarga harus njadiken Yesus jadi kepala keluargana, gelah keluargana ipasu-pasu Tuhan , emaka tambah warina tambah pengertin keluarga e ntah pe keluarga e nggeluh ibas kepentaren. Keluarga tuhu-tuhu ernalem man Tuhan saja.

Pdt. Steven Kumenit, STh.M.Min.

Pekan Keluarga Wari 2 : Jabu Eme Gereja (Matius 16:13-20)

                                                 PEKAN KELUARGA

GEREJA GBKP

WARI II. SENIN 3 JUNI 2013.

Introitus :    Janah Kukataken pe man bandu: Kam kap Petrus, batu si enteguh, janah i babo batu palas enda me Kupajekken perpulungenKu, si la tertaluken aminna pe alu kinirajan kematen (Matius 16:18).

Ogen       :    Epesus 2:20-22.

Khotbah      : Matius 16:13-20.

Tema       :    Jabu Eme Gereja

LATAR BELAKANG

1.      Pelayanen Yesus ibas doni enda guna nelamatken manusia, siicidahkenna arah keleng ate ras dem mujizat, tapi pelayanen Yesus e mpereh pengangkan sierbeda-beda i tengah-tengah jelma sinterem. Enda teridah paksa Yesus nungkun man ajar-ajarNa, sangana Yesus ras ajar-ajarNa i daerah Kesarea Pilipi. Lit singatakenca Yesus eme Yohanes Peridikin (nen. Matius 14:1-2). Lit singatakenca Yesus eme Elia sebab lit tersurat ibas pustaka si badia kerna sekalak siiutus Tuhan guna bangsa Israel (nen Maleaki 4:5), lit ka ngatakenca Yesus eme Yeremia ntah pe sekalak ibas nabi-nabi sideban.

2.      Pengangkan jelma sinterem kerna ise Yesus la ipersoalkenNa, tapi situhuna sijadi tujun utama Yesus eme ajar-ajarNa, sebab ajar-ajar nggo cukup ndekah ras Yesus, bagepe ajar-ajar nggo nggelari Yesus eme Guru. Erkiteken sie me isungkun Yesus man ajar-ajarNa, tapi iakapndu ise kin Aku enda ? Simon Petrus simewakili ajar-ajar kerina ngatakenca Kam kap Mesias Anak Dibata si Nggeluh. Pengakun Petrus enda ngatakenca, Petrus nggo nandai Yesus, sebab la lit jelma ibas doni enda si lit hubungenna ras Dibata seakatan Yesus.

3.      Pengakun ajar-ajar kerna eksistensi Yesus cukup penting ibas perdalanen kegeluhen ajar-ajar Yesus, sebab enda ibas rangka mempersiapken ajar-ajar menghadapi kegeluhen si reh, ija Yesus nandangi nggeluh ibas kiniseran ras kematen. Pengakun Petrus enda ngatakenca, kegeluhen Petrus nggeluh ibas kuasa Dibata nari, sebab kai siikataken Petrus rehna ibas Dibata nari, emaka nina Yesus malem me ate Petrus.

4.      Pengakun Petrus enda erbahanca meriah kal ukur Yesus, sebab pengakun enda berbeda kal ras pengakun Mesias ibas kalangan kalak Yahudi, sinimai Mesias terjeng mulahi ia ibas kuasa bangsa Romawi nari ngenca. Erkiteken sie nina Yesus man Petrus ibas ingan enda pajek me sada perpulungen si la tertaluken aminna pe alu kinirajan kematen. Bagepe ibere Yesus man Petrus kunci kinirajan Surga. Emaka kai siirakuti Petrus i doni,  i Surga nggo kap irakuti, janah kai siiosari Petrus i doni enda, i surga pe nggo kap iosari. Harus sipahami ate Yesus majekken perpulungenNa i babo batu palas enda, ngatakenca, ibas pelayanen Petrus simerupaken batu palas bagepe ibas pelayanen ajar-ajar Yesus kerina pagi pajek me perpulungen singakuken Yesus eme Tuhan.  

5.      Yesus melarang gelah ajar-ajar la ngataken man ise pe kerna Ia eme Mesias gelah la terjadi salah paham, sebab ibas jelma sinterem melala pengangkan siberbeda-beda kerna Mesias, terutama kalak Yahudi, emaka banci kari terjadi perubaten.

APLIKASI

            Temanta sendah em kap jabu eme gereja. Engkai ikataken jabu eme gereja. Lit dua alasen maka ikataken bage, eme 1). Jabu eme terdiri ibas piga-piga kalak si tek man Yesus Kristus, emaka ibas palas enda ikataken jabu eme persadan kalak si tek man Yesus Kristus. 2). Jabu kalak kristen ipajekken ibas kiniteken man Yesus. Ibas dua alasen enda maka jabu eme gereja si kitik, emaka fungsi jabu bali ras fungsi gereja. Jabu kalak kristen harus berperan ibas pembinaan ras pembentukan mental ras spiritual, bagepe ngajari uga ngkelengi Tuhan ras uga ndalanken kiniteken ibas kegeluhen tep-tep wari. Memang sisadari keluarga-keluarga kristen sada paksa jumpa perbeben ras kiniseran, tapi lit sada jaminen man keluarga kristen eme gelah banci megegeh, megenggeng ras pulah ibas perbeben ras kiniseran nari. Engkai ? sebab keluarga kristen ipajekken ibas ajaren simehuli ras ibas batu palas sinteguh eme Yesus Kristus (band. Matius 16:18; 1 Petrus 2:6).

Pdt. Steven Kumenit, STh.M.Min.

Pekan Keluarga Wari 3 : Jabu Si Ersembah Man Dibata (Mazmur 119:97-104)

PEKAN KELUARGA

GEREJA GBKP

WARI III. SELASA 4 JUNI 2013.

Introitus    :    Tapi keriahenna e me matuhi Undang-undang TUHAN dingen ngukurisa suari ras berngi (Mazmur 1:2).

Ogen          :    Ulangen 6:1-9.

Khotbah    :    Mazmur 119:97-104.

Tema         :    Jabu Si Ersembah Man Dibata.

LATAR BELAKANG

1.      Pemazmur secara terang ngataken man Tuhan uga riahna ngikuti undang-undang Tuhan, sebab ibas undang-undang e, pemazmur banci ndatken kepentaren ras pengertin, bagepe banci nilahken kejahaten.

2.      Undang-undang Tuhan man Pemazmur merupaken sada petunjuk bagepe sumber guna banci meteh kai-kai saja sibanci ilakoken gelah ia tetap jadi sikerajangen Tuhan. Sebab ibas penggejapen pemazmur la lit undang-undang bas doni enda siseri ras undang-undang Dibata (taurat).

3.      Undang-undang Tuhan la saja jadi konsumsi pemeteh man pemazmur, tapi igejapken pemazmur undang-undang e mereken pengenalan si payo kerna erti kegeluhen selaku sikerajangen Tuhan, emaka ibas kegeluhen pemazmur undang-undang Tuhan enda ipekusur-kusur ibas ukur pemazmur, emaka iajari undang-undang e pemazmur, erkiteken sie kepentarenna ngelebihi guru singajari ia, bagepe orang tua. Pemazmur mbandingken kerna makna undang-undang adi tuhu-tuhu jadi bagin si la terpisahken ibas kegeluhen manusia eme ndatken kepentaren sisejati. Enda teridah nina pemazmur melebihi guru singajari ia ras orang tua. Guru ras Orang tua ianggap pentar sebab pengalamenna, tapi siidah i jenda kepentaren pemazmur ngelebihi kepentaren orang tua.

4.      Kepentaren ibas pengangkan bangsa Israel banci sidat arah dua dampar eme 1). Kepentaren situhu-tuhu ibas Dibata nari, emaka iberekenNa man ise saja sierkemalangen man baNa (band. Kuan-Kuanen 1:7). 2). Kepentaran Dibata banci sidat arah undang-undang Tuhan (taurat). Erkiteken sie me keluarga-keluarga bangsa Israel berkewajiban ngajarken anak-anakna erpalasken taurat (band. Ulangan 5:16; 6:4-9). Emaka erpalasken dua dampar enda, dat sada pengertin maka kepentaren Dibata mereken penampat bagepe mereken cicio (perlindungan).

5.      Pemazmur “bersandar” man taurat sebab igejapken pemazmur arah taurat e iajari Tuhan ia, emaka kai siilakoken pemazmur ngena ate Tuhan, bagepe ibas kegeluhen pemazmur ciga atena kerna si la tuhu.

APLIKASI

            Ersembah man Tuhan eme sada perintah Tuhan, emaka keluarga si la ersembah man Tuhan berarti la ia patuh ras mbiar man Tuhan. Sebab ibas keluarga kristen ersembah man Tuhan berarti lit sada kepatuhan ras pelayanen man Tuhan. Bagepe ibas kita ersembah man baNa berarti kita hanya ersembah man Tuhan saja si nggo nelamatken kita arah Yesus Kristus.

            Ersembah man Tuhan la saja terjeng ibas seremonial kebaktian, tapi pe harus teridah ibas kegeluhenta tep-tep wari. Alu kata sideban ibas aktivitas tep-tep wari e merupaken sada bentuk aplikasi  uga kita tuhu-tuhu erkemalangan man Tuhan. Ipihak sideban adi kita ersembah man Tuhan secara seremonial maka sidat ije  pengajaren kerna Kata Dibata, alu bage sidat pengertin uga seharusna kita selaku keluarga kristen nggeluh i tengah-tengah doni enda. Emaka situhuna ibas ersembah man Tuhan, minimal lit telu aspek eme 1). Litna penggejapen mbiar man Tuhan. 2).  Pusuh si meciho. 3). Keleng ate. Sebab arah telu enda maka kita alu pusuh siersuruh reh kita ku kebaktin ibas gereja ras ibas kebaktin-kebaktin sideban. Tapi ibas kinatana melala denga keluarga-keluarga kristen la ku gereja, termasuk nterem anak-anak permata si la nggit ku gereja, adi ku gereja pe ia madin akapna ku ingan sideban, la ia ku GBKP. Kerna sie keluarga-keluarga kristen harus jadi perhatin, sebab ibas kita ersembah man Tuhan maka kegeluhenta nggeluh ibas kemalemen ate, sebab ipasu-pasu Tuhan kita.  Emaka orang tua harus ngajarken anak jabuna guna erkemalangen man Tuhan arah reh ku kebaktin minggu ras kebaktin sidebanna.

Pdt. Steven Kumenit, STh.M.Min.