Nande Si Jadi Kemegahen Ibas Jabu (Amsal 31:10-31)

BAHAN PJJ GEREJA GBKP

TANGGAL 13 – 19 OKTOBER 2013.

Kuan-Kuanen 31 : 10 – 31

Tema : Nande Si Jadi Kemegahen Ibas Jabu.

LATAR BELAKANG

1.      Secara umum banci sikataken kitab Kuan-Kuanen enda eme salah sada kitab ibas Padan sindekah singerana kerna kepentaren. Janah kitab enda mekatep ikataken Kuan-kuanen Salomo, amin gia cukup melala ibas kitab enda si la bo Salomo nuratkenca.

2.      Kitab Kuan-Kuanen enda berisi bahan pendidiken tradisional siigunaken bangsa Israel sejak masa Kerajaan seh kenca pembuangen. Tujunna gelah bangsa Israel banci meteh kerna didiken ras kepentaren. Alu bage bangsa Israel nggeluh ibas kejuah-juahen, nggeluh ibas keselamaten. Emaka kitab enda cukup mbages makna teologisna.

3.      Sijadi oratenta sendah eme mpertentangken kerna kebodohen sekalak diberu/ndehara si lit ibas ayat 1-9. Ibas oratenta uga pengamsal ncidahken kerna kepentaren siirealisasiken ibas kegeluhen sinyata. Pengamsal ncidahken sekalak ndehara si erkemalangen man Tuhan si nggeluh ibas kepentaren. Pengamsal ncidahken sekalak ndehara sisempurna, sekalak ndehara silit pengendalian diri, kewaspadaan, pengertin, melumbar mere ras lit bas ia kebujuren, janah tehna tanggung jababna ibas jabuna.  Enda kerina jadi erkiteken lit kepentaren bas ndehara e, emaka geluh sekalak perbulangen tuhu-tuhu nggeluh ibas kemalamen ate.

4.      Perbahanen siilakoken ndehara tuhu-tuhu ipuji perbulangen. Tapi adi sioge alu manjar anjar, tempa lit sada kejanggalan erkiteken ijenda icidahken sekalak ndehara si erbisnis. Padahal paksa sie, dahin e (bisnis/erbinaga) eme dahin sekalak perbulangen. Emaka adi enda ilakoken ndehara, tentuna dahin perbulangen lanai lit. Tapi perlu siteh siimaksudken erbinaga ijenda eme ibas erti kepentaren. Sebab ibas dunia timur (kuno), tukur kepentaren (hikmat) sebagai transaksi dagang. Jadi kai siikataken ijenda merupaken metafora (gambaran) ibas praktek kepentaren. Janah bangsa Israel nggit nukur kai siakapna mehuli arah teologina. Jadi kerina enda gambaren kerna diberu sierkemalangen man Tuhan.

5.      Enda merupaken pengajaren si mehuli nandangi kerina diberu/ndehara ibas bangsa Israel. Ndehara sibage tuhu-tuhu iteki ras jadi sandaran perbulangenna. Alu bage ndehara lanai “isia-siaken” sekalak perbulangen, tapi tetap nggeluh ibas kesetiaan ras keharmonisen. Kerina e ibahan ndehara erkiteken kebujurenna ras tanggungjawabna ibas jabuna.

APLIKASI

            Ibas kegeluhen sigenduari tanggungjawab nande la saja terjeng ku dapur ras ngurusi anak ibas jabu, tapi pe radu ras perbulangen ertanggunjawab nandangi kerinana si lit ibas jabu. Emaka adi sinen ibas zaman sigenduari cukup nterem pernanden siterlibat ibas profesi-profesi si lit i tengah-tengah masyarakat, sinai idahiken sekalak dilaki/perbulangen. Tapi situhuna sijadi kemegahan man nande i tengah-tengah jabu, labo erkiteken keterlibatenna ibas erbage-bage profesi (politik, hukum, direktris, bisnis, rsd), bagepe ibas kegeluhen bergereja (Pertua, Diaken ras seksi-seksi), tapi ibas kerina kesibukan-kesibukan sekalak nande e ngasup denga ia ertanggungjawab selaku nande ibas jabu.

            Ibas minggu enda Moria berumur 56 tahun. Ibas sejarah gereja GBKP cukup melala peranen Moria ibas perkembangen gereja GBKP, termasuk mpeturah kiniteken anggota Moria ras isi jabuna, bagepe ibas perkembangen pemeteh Moria. Tentuna enda harus iapresiasi (iergaken). Emaka selaku perbulangen ras anak harus min tetap mendukung nande guna tetap terlibat ibas kegiaten-kegiaten Moria, gelah erbeluhna ras iangka Moria min kerna tanggungjawabna selaku nande ibas jabuna, ras nggit tetap mengembangken kiniteken anak jabu.

Pdt. Steven Kumenit, STh.M.Min.

Erdiate Man Kalak Si Medanggel (Matius 25:31-45)

BAHAN PJJ GEREJA GBKP

TANGGAL 6 – 12 OKTOBER 2013.

Matius 25 : 31-45.

Tema : Erdiate Man Kalak Si Medanggel.

LATAR BELAKANG

1.      Ibas kerehen Yesus Kristus peduakaliken ku doni enda radu ras penghakiman alu universal. La lit sitading ibas penghukumen e. Ibas penghakiman e, Yesus Kristus mpeserap kalak si setia ras kalak si la setia man Yesus, bagi sekalak permakan sinerapken biri-biri ras kambing ope denga bengket kubas karang. Biri-biri merupaken lambang nandangi kalak sitek man Yesus Kristus, sebab biri-biri e biakna patuh  man tuanna, janah biakna melemuk. Sedangken kambing merupaken lambang nandangi kalak si la tek man Yesus Kristus. Sebab kambing e mekeng (keras kepala), janah mesera man aturken, la nggit patuh man tuanna.

2.      Sijadi oratenta merupaken klimaks ibas pengajaren Yesus man ajar-ajarNa, janah penekanenna eme sedekah Yesus lanai ras ajar-ajar ibas doni enda maka ajar-ajar harus ndalanken perbahanen simehuli singena ate Dibata, sebab enda mpereh pasu-pasu Tuhan man bana. Tanggungjawab pelayanen ibas doni enda, khususna kerna keleng ate harus idalanken ajar-ajar.

3.      Yesus nuriken man ajar-ajarNa kerna siterjadi ibas wari pendungi, eme Ia sendiri sireh guna mengadili doni enda (manusia). Janah perbahanen simehuli mpereh keselamaten. Perbahanen simehuli e erkiteken buah ibas kinitekenna nari, labo erkiteken keterpaksaan. Sijadi perhatin eme kalak marginal (yang dipinggirken, sirusur la iperdiateken kalak). Ise simperdiateken kalak sibage, eme mere man simelihe, mereken ingan kesilang man kalak pertandang, mere uis man si la ruis,nandangi kalak sakit iadep-adep bagepe man kalak siipenjara, idahi. Enda merupaken perbahanen-perbahanen nandangi Yesus Kristus. Tapi sebalikna kalak sila ngelakoken sibage e me si la setia man Tuhan.

4.      Yesus menggambarkan, situhuna ibas kalak simenderita ije Ia hadir. Ntah pe Yesus nggeluh ersada ras kalak si nggeluh ibas perbeben ras kiniseran. Emaka perbahanen simehuli la banci pekulah-kulah, ntah pe ngenen status sosial, tapi harus ngenen perbahanen e tempa-tempa ngelai Yesus.

5.      Pemisahan biri-biri ku kemuhen, ngataken maka kalak si benar i lebe-lebe Yesus iperkenanken Yesus guna bengket kubas kinirajaan Surga, tapi kalak si la patuh ras la ndalanken perbahanen simehuli erpalasken keleng ate ibas Kristus nari, iambengken ku bas ingan penghukumen sila erkeri-kerin (kambing).

APLIKASI.

         Pelayanen kekelengen eme salah sada tugas ras tanggungjawabta sebab enda la saja merupaken bentuk kepedulian kita selaku kalak sitek nandangi temanta manusia, si khususna kalak simedanggel, tapi pe merupeken sada aplikasi  kinitekenta.

            Adi siperdiateken ibas isekelewetta cukup nterem kalak simedanggel, janah enda situhuna la atena nggeluh ibas medanggel, mekatep situasi ras keadaan sierbahanca ia bage. Lepas ibas kai penyebabna ia medanggel, kita isuruh guna peduli nandangi kalak simedanggel. Adi terjeng mekuah ate, kalak sideban pe dorek nge, tapi kai perbahanenta. Adi lit perbahanenta simehuli nandangi kalak simedanggel ibas kegeluhenna, jana ilakoken alu la pekulah-kulah maka situhuna e perbahanen si ngelai Tuhan. Sebab Tuhan njadiken kalak simedanggel ibas geluhna selain seninaNa, tapi pe Tuhan nggeluh ibas kegeluhen kalak si medanggel. Bunda Theresa keluar ia ibas lingkungan biara ras ngelai man kalak simedanggel ibas geluhna erkite-kiteken inenna lit ayo Yesus man kalak e. Emaka kita seharusna idilo Tuhan guna mulahi senina turangta si terbelenggu ibas erbage-bage persoalen geluhna termasuk kemisikinan.

            Secara institusi (gereja) pe harus ncidahken uga peranen gereja mediate ras erdiate nandangi kalak simedanggel. Gereja, ikataken gereja adi lit pelayanenna. Janah salah sada bentuk pelayanen ntah pe kepedulian gereja eme mulahi kalak simedanggel. Emaka diakonia gereja harus aktif.

Pdt. Steven Kumenit, STh.M.Min.

Bagi Tua-Tua Ridap, Reh Tuana Reh Gersingna (Lukas 2:25-29)

BAHAN PJJ GEREJA GBKP

TANGGAL 29 SEPTEMBER – 5 OKTOBER 2013.

Lukas 2: 25-29.

Tema : Bagi Tua-tua Ridap, Reh Tuana Reh Gersingna.

LATAR BELAKANG

1.      Ibas kegeluhen bangsa Yahudi lit sada peraturan agama siharus iikutina eme tep-tep anak dilaki siberumur walu wari harus isunatken (Kej.17: 11-12). Bagepe tep-tep anak sintua dilaki harus ipersembahken man Tuhan. Makna mpersembahken tep-tep anak sintua dilaki eme gelah anak sintua dilaki e nggo jadi sikerajangen Tuhan. Makna sideban eme sada ikaten perpadanen antara bangsa Israel ras Tuhan (band. Keluaran 34:10-19). Gelah bangsa Israel tetap jadi bangsa Dibata, janah Tuhan tetap jadi Tuhan bangsa Israel.

2.      Ibas rangka sie me maka Yusuf ras Maria selaku keluarga Yahudi sipatuh mbaba Yesus singgo berumur walu wari,  janah Yesus pe eme anak sintua dilaki ibas keluarga Yusuf ras Maria ku rumah pertoton guna mpersembahken Yesus man Tuhan. Ingan rumah pertoton enda i Yerusalem, sebab i je ringan Dibata.

3.      I Yerusalem lit sekalak bapa sibujur dingen sierkemalangen man Dibata eme Simeon. Ibas kegeluhenna ertima-tima ia kerna kerehen sekalak Mesias. Sebab memang ibas padan Dibata man bangsa Israel (Yahudi) reh me pagi sekalak penampat eme Mesias. Mesias enda me simereken keselamaten man bangsa Israel (band. Yesaya 40:1; 49:13; Miha 5:2-5).

4.      Erkiteken sie ipindokenna man Tuhan eme banci idahna Mesias gelah  malem atena  adi mate ia. Janah erpadan Tuhan man bana eme la ia mate ope denga iidahna Mesias. Emaka ibaba Kesah Dibata me si Simeon ku rumah pertoton janah erjumpa ia ras Yesus. Emaka minter ialo-alona Yesus janah ikataken bujur man Tuhan,  nina : genduari o Tuhan enggo isehkenNdu padanNdu, malem ateku aminna mate pe aku, sebab nggo kuidah alu matangku jine penampat sirehna ibas Kam nari. Enda me sada respon kiniteken Simeon man Tuhan. Sebab la kap mungkin itandaina Yesus selaku Mesias adi la ituduhken Kesah Dibata man bana.

5.      Adi siidah ibas ayat seterusna, kemalemen ate siicidahken Simeon kenca idahna Yesus ngataken maka kerehen Yesus labo saja guna keselamaten bangsa Israel (Yahudi), tapi pe man kerina bangsa. Emaka enda merupaken keleng ate Tuhan man kerina bangsa. Jadi lit keselamaten secara universal.

APLIKASI

            Salah sada tanggungjawab anak nandangi orang tua eme menghormati ras menghargai orang tua. Tanggungjawab enda la terbatas, tapi terus menerus seh orangtuanta idilo Dibata. Ibas kita menghhormati ras mengharagai orang tuanta, maka malem me ate orang tuanta e. Dampak ibas kita menghormati ras menghargai orang tuanta, eme kalak sideban menaruh hormat man banta. Situhuna ibas kita menghormati ras menghargai orang tuanta merupaken sada aplikasi ibas kekelengen silit bas kita. Alu bage ipasu-pasu Tuhan me kita.

            Memang salah sada kendala man banta ibas kita ngkelengi orang tuanta, tempa-tempa komunikasinta agak sulit (la nyambung), emaka mekatep orang tua ndarami kelompokna sendiri gelah ia banci ia ngerana-ngerana ras kelompokna e. Enda me sijadi pe i tengah-tengah gerejanta, emaka ibentuk sada kelompok PA lansia. Emaka kita selaku anak, adi nggo siteh lit PA lansia, maka simotivasiken orang tuanta gelah iikutkenna PA lansia. Alu bage ibas umurna singgo lansia erbagesna pengangkanna kerna kata Dibata, janah erdewasana nggeluh i tengah-tengah doni enda.

Pdt. Steven Kumenit, STh.M.Min.  

Tetap Nggeluh Badia (Matius 25: 34-40)

BAHAN KHOTBAH GEREJA GBKP

TANGGAL 29 SEPTEMBER 2013.

 =========================================================================

Introitus    :    Ikutkenlah pedah-pedah e dingen jagalah gelah tetap bersih dingen la ceda, seh ku warina Tuhanta Jesus Kristus reh peduakaliken (1 Timotius 6:14).

Ogen         :    1 Timotius 6:11-19 (Anthiponal)

Khotbah    :    Matius 25 : 34-40 (Tunggal).

Tema         :    Tetap Nggeluh Badia.

LATAR BELAKANG

1.       Ibas kerehen Yesus Kristus peduakaliken ku doni enda radu ras penghakiman alu universal. La lit sitading ibas penghukumen e. Ibas penghakiman e, Yesus Kristus mpeserap kalak si setia ras kalak si la setia man Yesus, bagi sekalak permakan sinerapken biri-biri ras kambing ope denga bengket kubas karang. Biri-biri merupaken lambang nandangi kalak sitek man Yesus Kristus, sebab biri-biri e biakna patuh  man tuanna, janah biakna melemuk. Sedangken kambing merupaken lambang nandangi kalak si la tek man Yesus Kristus. Sebab kambing e mekeng (keras kepala), janah mesera man aturken, la nggit patuh man tuanna.

2.      Sijadi oratenta merupaken klimaks ibas pengajaren Yesus man ajar-ajarNa, janah penekanenna eme sedekah Yesus lanai ras ajar-ajar ibas doni enda maka ajar-ajar harus ndalanken perbahanen simehuli singena ate Dibata, sebab enda mpereh pasu-pasu Tuhan man bana. Tanggungjawab pelayanen ibas doni enda, khususna kerna keleng ate harus idalanken ajar-ajar.

3.      Yesus nuriken man ajar-ajarNa kerna siterjadi ibas wari pendungi, eme Ia sendiri sireh guna mengadili doni enda (manusia). Janah perbahanen simehuli mpereh keselamaten. Perbahanen simehuli e erkiteken buah ibas kinitekenna nari, labo erkiteken keterpaksaan. Sijadi perhatin eme kalak marginal (yang dipinggirken, sirusur la iperdiateken kalak). Ise simperdiateken kalak sibage, eme mere man simelihe, mereken ingan kesilang man kalak pertandang, mere uis man si la ruis,nandangi kalak sakit iadep-adep bagepe man kalak siipenjara, idahi. Enda merupaken perbahanen-perbahanen nandangi Yesus Kristus. Tapi sebalikna kalak sila ngelakoken sibage e me si la setia man Tuhan.

4.      Yesus menggambarkan, situhuna ibas kalak simenderita ije Ia hadir. Ntah pe Yesus nggeluh ersada ras kalak si nggeluh ibas perbeben ras kiniseran. Emaka perbahanen simehuli la banci pekulah-kulah, ntah pe ngenen status sosial, tapi harus ngenen perbahanen e tempa-tempa ngelai Yesus.

5.      Pemisahan biri-biri ku kemuhen, ngataken maka kalak si benar i lebe-lebe Yesus iperkenanken Yesus guna bengket kubas kinirajaan Surga, tapi kalak si la patuh ras la ndalanken perbahanen simehuli erpalasken keleng ate ibas Kristus nari, iambengken ku bas ingan penghukumen sila erkeri-kerin (kambing).

APLIKASI

            Nggeluh badia eme sada syarat kita banci nggeluh ras Tuhan, sebab Tuhan e badia (band. Imamat 19:2; 1 Petrus 1:16). Ibas rangka sie me maka ipebadiaken Tuhan kita arah Yesus i kayu persilang. Tapi amin gia kita nggo nggeluh badia, lit denga kuasa-kuasa doni enda siatena nirangken kita ras Yesus, siatena gelah kita lanai nggeluh ibas kebadiaan. Situhuna masalah sienda nggo iteh Yesus, emaka ope denga Ia sirang ras ajar-ajarNa, ertoto Yesus gelah BapaNa sinisurga ngkawali ajar-ajarNa ibas sijahat nari (band. Yoh.17:15). Erkiteken sie me Kesah Si Badia nampati kita gelah kita tetap nggeluh badia. Tentuna penampat Tuhan ibutuhkenken, tapi peranan kita pe harus lit. Ibas erti kata lit min “upayanta” guna ngelawan kuasa jahat. Sebab adi lang, kita tetap nggeluh ibas dosa, sebab sibaba dirinta ikut sura-sura daging. Emaka gelah  sura-sura-sura daging, ntah pe kuasa jahat banci sisimbaki eme egois, la lit kekelengen, cian ate, cekurak, merangap nandangi duit, rsd maka siharus lit bas kita eme 1). Berusaha ndalanken kai singena ate Tuhan. 2).  Tutus ersembah man baNa. 3). Tetap ernalem man baNa. 4). Erlumbahlah asa gegehta ibas kiniteken gelah sidat kegeluhen situhu-tuhu e. 5). Ikutkenlah pedah-pedah Tuhan. 6). Jagalah gelah kita tetap bersih. 7). Akuilah kuasa Tuhan (band. Ogenta). Alu bage maka ibas wari kerehen Yesus Kristus pagi, kita tetap ngeluh ibas kebadiaan, emaka ingan kemuhen me inganta eme sada ingan sisenang, sada ingan siterang.

Pdt. Steven Kumenit, STh.M.Min.