Aku Me Sindilo Kam Guna Jadi Terang (Yesaya 42:6-9)

BAHAN PJJ GEREJA GBKP

TANGGGAL 10 – 16 AGUSTUS 2014.

Yesaya 42 : 6 – 9.

Tema : Aku Me Sindilo Kam Guna Jadi Terang

LATAR BELAKANG

1.      Sijadi bahan oratenta sendah eme nubuat nabi Yesaya man bangsa Israel, paksa bangsa Israel nggeluh ibas pembuangen i Babel.

2.      Yesaya alu terang ngataken kerna erti pemilihan bangsa Israel ndube. Pemilihan Tuhan man bangsa Israel eme hak preogatif Tuhan, janah pemilihan e ibas rangka keselamatan kerina bangsa.  Jadi bangsa Israel ipake Tuhan guna jadi alatNya.

3.      Bangsa Israel  i taneh pembuangen i Babel nggejapken Tuhan la erkuasa i je, erkiteken sie, Tuhan la banci nampati ia. Ibas pemikiran bangsa Israel, kuasa Tuhan terbatas ngenca i Israel. Kuasa Tuhan la seh ku Babel. Ibas situasi sibagenda me reh nabi Yesaya ngataken kerna kuasa ras keleng ate Tuhan man bangsa Israel ras man kerina bangsa. Yesaya mereken sada pengangkan mulihi kerna kehadiran bangsa Israel ibas doni enda. Alu ngataken maka Tuhan similih bangsa Israel, ras sinegu-negu bangsa Israel ibas kegeluhenna tep-tep wari. Penegu-negu Tuhan man bangsa Israel tentuna seh ku Babel. Tuhan la pernah ingkar kerna perpadanenNa ras bangsa Israel. Bagepe isingetken Yesaya maka selaku alat Tuhan, lit siharus idahikenna, janah enda sura-sura Tuhan man kerina jelma ras bangsa. Tugas simereken terang (keselamatan) man bangsa-bangsa. Pemedakken mata kalak pentang, mulahi kalak sitertutup ibas penjara sigelap.  Alu bagenda ibahan bangsa Israel maka igejapken kerina jelma/bangsa Tuhan e mehuli (band. Mazmur 145:9a).

4.      Bangsa Israel ibas kegeluhen i taneh pembuangen, babel, nggejapkenken lit sada hambatan ibas ia ersembah man Tuhan, enda erkiteken beban kiniseran siinanamina ibas taneh pembuangen.  Bagepe lit penggejapen sisalah bas bangsa Israel, eme ija lit sierpengakap maka Tuhan nggo nadingken ia. Erkiteken sie me maka nggo nterem kalak Israel ersembah man gana-gana bangsa Babel. Erkiteken sie me ipersinngeti Yesaya bangsa Israel kerna Tuhan. Tuhan bangsa Israel sada ngenca. Erkiteken sie bangsa Israel ersembah man Tuhan ngenca, la banci lit dibata-dibata sideban man bangsa israel.

5.      Kemulian hanya milik Tuhan, la lit man gana-gana. Ibas erti kata sinjadiken doni enda Tuhan ngenca, ras sinelamatken bangsa Israel, Tuhan ngenca. Gana-gana sitik pe la ikut muat bagin ibas sie. Emaka kemulian e milik pribadi Tuhan. Erpalasken enda, maka bangsa Israel harus ersembah man Tuhan saja.

APLIKASI

            Pendilo kalak sitek ibas doni enda eme jadi Terang i tengah-tengah doni enda. Pengertin jadi Terang eme kita jadi alat Tuhan guna nelamatken doni enda. Arah  kita kalak sideban banci ngidah keselamatan situhu-tuhu. Emaka sipaling penting bas kita, gelah kita nggeluh ibas terang, maka kegeluhenta nggeluh min ersada lebe  ibas Terang situhu-tuhu eme Yesus (band. Yohanes  9:5).

            Kegeluhen terang singgo ibereken Tuhan man banta, teridah min ibas kegeluhenta tep-tep wari. Ibas perbahanen simehuli singena ate Tuhan; ndalanken kebujuren, keadilan i tengah-tengah kita berbangsa ras bernegara merupaken sada bukti terang nggo ersinalsal isekelewetta.

            Kegeluhen terang merupaken sada bentuk guna mpehuli ras mbaba bangsa Indonesia ku kegeluhen silebih mehuli ras sejahteran.

            Marilah kita jadi terang i tengah-tengah bangsa indonesia, gelah kemerdekaan Indonesia banci sinanami alu meriah ukur. Bagepe marilah sitotoken gelah bangsa Indonesia enda nggeluh ibas kedamen ras kemajun.

Pdt. Steven Kumenit, STh.M.Min.

Kelengi Ras Pekena-Kena Rumah PertotoN (Ezra 8:24-30)

BAHAN PJJ GEREJA GBKP

TANGGAL 3 – 9 AGUSTUS 2014.

Esra 8 : 24 – 30.

Tema : Kelengi Ras Pekena-Kena Rumah Pertoton.

LATAR BELAKANG

1.      Kenca Kerajaan Babel italuken Kerajaan Persia, emaka alu ijin raja Kores (Raja Persia), bangsa Israel mulih ku Yerusalem. Tapi kota Yerusalem eme tembok Yerusalem bagepe  Rumah Pertoton nggo ceda. Padahal dua bangunan enda penting kal man bangsa Israel, khususna Rumah Pertoton. Rumah pertoton e ceda paksa agresi bangsa Babel ku Yerusalem. Bagepe la saja Rumah Pertoton e icedaken bangsa Babel, tapi kerina perkakas-perkakas si lit ibas rumah pertoton e ibuatna.

2.      Rumah Pertoton man bangsa Israel eme “jati diri” Israel, sebab Rumah Pertoton la saja ingan Dibata (Rumah Dibata), Tapi tanda maka bangsa Israel eme bangsa Tuhan, janah bangsa Israel lit ibas penjagaan Tuhan. Bagepe erkiteken i je Rumah Pertoton maka, bangsa Israel la nggeluh ibas adat, budaya ras agama bangsa sideban, sebab adi enda sijadi maka banci mpengaruhi ketutusa  bangsa Israel ersembah man Tuhan. Janah enda situhuna sipernah jadi, emaka bangsa Israel itaban/iambengken ku Babel.

3.      Ibas rangka mpekena-kena Rumah Pertoton, maka idilo Esra me imam-imam guna mereken pirak, emas ras kerina perkakas-perkakas rumah pertoton siisumbakenken raja Kores, pegawai-pegawai kerajaan Persia ras kalak Yahudi sendiri guna ipake ibas Rumah Pertoton. Fungsi kerina e me guna nampati pelayanan ibas Rumah Pertoton. Janah kenca nggo seh i Yerusalem, itimbang me kerina, jenari  ibereken man pengulu Imam, pengulu-penglu kalak Lewi, bagepe man pengulu-pengulu kalak Israel. Emaka ibaba imam-imam e kerina erta ras perkakas-perkakas Rumah Pertoton e.

4.       Emas, pirak ras perkakas-perkakas Rumah Pertoton nggo ibadiaken. Erkiteken kerina e nggo ipebadiaken, maka kalak sijaga barang-barang e harus ka kalak singgo ipebadiaken Tuhan, erkiteken sie me Idilo Esra imam-imam guna njaga ras mbaba barang-barang e seh ku Rumah Pertoton i Yerusalem, sebab i Yerusalem me pusat Rumah Pertoton.

5.      Emas, Pirak ras perkakas-perkakas Rumah Pertoton harus itimbang, gelah siteh barang-barang si lit ibas Rumah Pertoton e, emaka pengulu rumah pertoton harus njaga ras ngerawatsa.

APLIKASI

            Rumah Pertoton ntah pe gereja harus sipahami la saja sebagai ingan ersembah, tapi pe jadi sada simbol ketutusan kalak si tek man Tuhan. Sebab i je teridah, kalak situtus man Tuhan tentu reh ia ku gereja guna ersembah man Tuhan.

            Gelah malem ate kalak sireh kubas gereja guna ersembah maka ilitken me perkakas-perkakas ibas rumah pertoton eme perkakas guna lakon persadan ras lakon peridin, Saund system, alat musik, bangku, meja, rsd. Tapi siidah lit denga nge kita silenga terdilo guna ngerawat Gereja ras iventaris si nggo lit ibas gereja. Memang ibas perpulungen nggo lit pengurus gereja (Runggun Gereja), janah tanggungjawab pengurus gereja antara lain eme mpekena-kena rumah pertoton ras iventarisna, tapi kita  kalak sitek, lit tanggungjawabta guna njaga ras mpekena-kena Rumah Pertoton e, janah enda merupaken sada pendilo kiniteken. Jadi lit tanggungjawab runggun gereja, tapi lit ka tanggungjawab anggota perpulungen. Alu bage terjaga ras terawat me Rumah Pertoton e.

            Gereja ras iventaris la seri ras rumah pribadi, emaka harus sijaga ngelebihi rumah pribadita.

Pdt. Steven Kumenit, STh.M.Min.

Nggeluh Alu Mehuli (Titus 3: 6-11)

BAHAN PJJ GEREJA GBKP

TANGGAL 27 JULI – 2 AGUSTUS 2014.

Titus 3 : 6-11.

Tema : Nggeluh Alu Mehuli.

LATAR BELAKANG

1.      Surat Paulus man Titus eme sada pengelayasi ras mereken sada motivasi man Titus sisangana erdahin i Pulau Kreta gelah Titus tetap ngajarken kerna kiniteken situhu – tuhu, ras membimbing perpulungen ibas moral situhu-tuhu gelah nggeluh sue ras peraten Tuhan.

2.      Ibas rangka nggeluh erkiniteken man Tuhan, maka isingetken Paulus man Titus gelah igegehi Titus ngajarken kerna makna keselamatan singgo ialoken perpulungen. Erkiteken perpulungen nggo tek man Yesus maka Dibata mereken keselamatan man bana. Bagepe gelah perpulungen tetap nggeluh ibas keselamatan maka Kesah Si Badia ngarak-ngarak perpulungen gelah nggeluh sue ras peraten Dibata. Kegeluhen si sue ras peraten Dibata mabai perpulungen tetap nggeluh rembak ras Tuhan, emaka perpulungen ndatken kegeluhen situhu-tuhu si la erkeri-kerin. Sebab ibas pengangkan sibenar kerna keselamatan ras pengarak-ngarak Kesah Si Badia ibas kegeluhen perpulungen maka sijadi eme perpulungen  tutus erdahin ras metunggung i lebe-lebe Dibata bagepe geluhna erguna man manusia. Lebih asangken sie isilahken perpulungen kerna kai si la mehuli ras sisia – sia ibas kegeluhenna eme terombo nini-nini nai, rubat, ersoal jabab kerna undang-undang. Ibas kata persinget enda, ate Paulus gelah arah Titus, perpulungen banci ngangkai kegeluhen simbaru singgo jadi sikerajangenna.

3.      Ibas kegeluhen perpulungen lit pengajaras sipapak siatena “menggorogoti” kegeluhen kiniteken perpulungen eme kerna terombo nini-nini nai. Pengajaran sipapak enda ibabai guru-guru palsu sierdahin labo guna pelayanan tapi guna ndatken sen.Apai ka pengajaran siiajarkenna, kususna kerna terombo la mbangun kiniteken, tapi erbahanca turah perubatan, sebab ibas pengajaren e rusur jadi soal jabab, sebab i je rusur ncakapken kerna garis keturunan manusia ras generasi penerus.

4.      Pengajaran sipapak sideban eme kerna Yudaisme ntah pengajaren kerna undang-undang (hukum Taurat). Ibas pengajaren e lit ikatakenna soal mantangken piga-piga pangan. Ibas pengajaren e pe rusur terjadi la siangkan, emaka enda pe harus isilahi perpulungen. Sebab keselamten sialoken perpulungen labo arah undang-undang tapi arah perkuah ate Tuhan.

5.      Kata persinget sideban siibereken Paulus man Titus eme gelah Titus mpersingeti pengajar-pengajar sipapak seh dua kali, janah adi la jera maka sirangi saja ia. Memang harus siteh nggeluh jera ras ndalanken kai singena ate Tuhan tetap ibereken man kalak simaba ajaren sipapak, tapi adi la nggit ia jera, berarti ia simbaba dirina ibas dosa ras penghukuman Dibata nari ibas wari pendungi pagi, sebab ia nggo ersalah ras erdosa.

APLIKASI

            Kalak kristen idilo Tuhan guna nehken kerna kai simehuli ras benar ibas kegeluhenna tep-tep wari, janah enda tanda maka kalak kristen nggeluh ibas keselamatan. Nehken simehuli ras sibenar la saja arah kata, tapi teridah arah perbahanen. Kalak kristen ibas perbahanenna tep-tep wari harus ncidahken karakten kalak kristen situhu-tuhu.

            Ibas zaman sigenduari enda siidah cukup melala perbahanen-perbahan si la mehuli, tapi selaku kalak kristen ula ikut ibas perbahanen-perbahanen si la mehuli e, sebab e la orat nggeluh kalak kristen. Emaka gelah nggeluh selaku kalak kristen situhu-tuhu maka sipaling penting eme bagi siikataken rasul paulus eme nggeluh ibas pengarak-ngarak Kesah SiBadia, sebab ibas pengarak-ngarak Kesah Si Badia berarti kegeluhen kalak kristen nggit patuh man Tuhan ras nggit nggeluh mehuli ibas kegeluhenta tep-tep wari.

Pdt. Steven Kumenit,STh.M.Min.

Rurat, turah Ras Erbuah Ibas Kristus Jesus (Kolose 2: 6-10)

BAHAN PJJ GEREJA GBKP

TANGGAL 20 – 26 JULI 2014.

Kolose 2 : 6 – 10.

Tema : Rurat, turah Ras Erbuah Ibas Kristus Jesus.

LATAR BELAKANG

1.      Sijadi oratenta sendah eme surat Paulus simereken pergegeh man perpulungen i Epesus gelah tetap nggeluh ibas Kristus. Maksusna adi perpulungen nggo tek man Yesus selaku Tuhan, maka konsekwensina eme perpulungen ula terpengaruhi ibas ajaran-ajaran sipapak, tapi perpulungen harus tetap njemak kai siiajarken rasul-rasul (Paulus), sebab e pengajaren situhu-tuhu kerna keselamatan.

2.      Kata pergegeh ras motivasi siibereken Paulus enda, sebab paksa sie cukup kompleks permasalahan, bagepe ajaran-ajaran sipapak (band. Ayat 8).  Sebab arah kata-kata simehuli, lit piga-piga kalak siatena mpengaruhi perpulungen. Situasi enda harus ihindari perpulungen sebab enda la reh ibas Kristus nari. Erkiteken sie me pengajaren sipapak enda igelari Paulus eme  kepentaren si la erguna (band. = filsafat kosong).

3.      Enda harus ihindari Perpulungen, sebab kegeluhen perpulungen singgo tek man Yesus, ula icampur baurkan ibas pengajaran-pengajaran i luar Kristus, sierbahanca perpulungen bingung, janah adi nggo bingung, perpulungen lanai meteh apai sibenar ras apai si la benar, emaka perpulungen alu la isadarina nggo erbahan dosa. Padahal perpulungen nggo ibebasken Tuhan Yesus ibas dosa-dosa nari. Tuhu perpulungen nggo tek man Yesus Kristus selaku ulu keselamatan manusia, tapi enda awal ngenca, sebab perpulungen harus rurat ras nggeluh ras Yesus, gelah perpulungen Kolose lit pertumbuhan kiniteken. Rurat ras nggeluh ras Yesus, maka perpulungen ndatken kepentaren situhu-tuhu, sibanci mbedaken apai sisalah ras apai sibenar. Erkiteken sie me ipersingeti Paulus gelah perpulungen rurat ras nggeluh ibas Yesus. La e saja, tapi pe perpulungen harus nggeluh ngataken bujur man Dibata. Perpulungen harus rusur ngataken bujur man Dibata, sebab ibas perkuah ate Tuhan maka perpulungen Kolose banci nggeluh ibas keselamatan, janah ibas rusurna perpulungen ngataken bujur, maka ipasu-pasu Tuhan perpulungen ras tetap itemani ras ijagai Kesah Si Badia, sebab bentuk pengataken bujur eme berarti pepulungen nggit nggeluh meteruk ukur ras Tuhan saja siisembahna.

4.      Isingetken Paulus man perpulungen Kolose, gelah perpulungen Kolose tek man Kristus saja, sebab Kristus eme Dibata jine sireh ku doni enda ras jadi rupa manusia, emaka biak Dibata siserta e lit bas Kristus. Sebab ibas perpulungen tek saja man Yesus ras tetap bertumbuh ibas Yesus maka alu sendirina perpulungen lanai tek ibas pengajaran-pengajaran sipapak (band. Kepentaren  si la erguna).

5.      Kuasa Kristus ganjangan kap asangken kerina kuasa-kuasa si lit ibas doni enda, termasuk kuasa – kuasa ibas doni enda ras kuasa pemerentah si la eridah. Adi kuasa Kristus ganjangan asangken kerina kuasa, maka seharusna min perpulungen mengandalkan Krisus saja.

APLIKASI

            Ibas perkembangan doni sigenduari enda, cukup melala simeraguken kerna Yesus Kristus eme Tuhan. Tapi ibas pengajaren Paulus sekali enda,  kita isingetken mulihi maka Kristus eme Dibata, erkiteken sieme kita selaku kalak sitek harus tetap njemak enda ras tetap tek maka Yesus eme Tuhan jine.

            Harus siteh Yesus Kristus eme ulu kegeluhenta. Memang ibas perkembangen sigenduari lit ajar singataken maka i luar Yesus banci selamat. Pengangkan sibage harus iergai ras ihormati, tapi kita selaku kalak sitek man Yesus Kristus harus tetap nggeluh ibas Yesus, sebab nggeluh ibas Yesus lit jaminan keselamatan. Erkiteken sie me kita harus rurat ras nggeluh ibas Yesus. Sebab Yesus eme ulu kegeluhenta, emaka kalak sirurat ras nggeluh ras Yesus ndatken kegeluhen situhu-tuhu. Ibas erti kata kegeluhen kinitekenta lalap ertumbuh, sebab kegeluhenta bagi batang kayu situmbuh ideher lau anak, sindatken kecukupen lau ras nakan tep-tep wari (bnd. Mazmur 1:3).  Bagepe singgeluh ras Yesus teridah ibas kegeluhenna tep-tep wari eme ndele atena adi la ndalanken kai singena ate Tuhan, emaka nehken Berita Simehuli, subuk perbahanan bagepe perkataan) ngenca siidalankenna, gelah doni enda terkelin. Janah seharusna min kegeluhen sibage nggo teridah ibas kegeluhenta tep-tep wari, sebab selain GBKP nggo berumur 124 tahun, tapi pe GBKP nggo njayo sedekah 73 tahun. Jadi situhuna enda jadi persinget man banta, erkiteken genduari kita selaku gereja GBKP nggo njayo. Berarti teridah min kedewasaanta ras kemandirian ibas erkiniteken man Tuhan ras ndalanken tri tugas gereja. Jadi amin gia kita nggeluh ibas budaya tapi ula min kinitekenta man Yesus ercambur ras kiniteken sindekah, hanya erkiteken ndalanken pendilonta ibas budaya, termasuk budaya Karo.

Perlu pe siteh GBKP njayo eme ibas tgl 23 Juli 1941. Tanggal enda eme sidang Sinode sipemena i Sibolangit.

Pdt. Steven Kumenit, STh.M.Min.