Kiniseran, Kematen Ras Kekeken Jesus Palas Kiniteken Ras Pengarapen (Lukas 9:22)

PERPULUNGEN JABU-JABU

GEREJA GBKP

TANGGAL 20 – 26 MARET 2016.

Lukas 9 : 22.

Tema : Kiniseran, Kematen Ras Kekeken Jesus Palas Kiniteken Ras Pengarapen.

LATAR BELAKANG

1.      Yesus Kristus eme Dibata. Bagepe Ia Mesias siipadanken Dibata. Bagepe Yesus eme Anak manusia. Erkiteken sie  rusur ikatakan, Yesus seratus persen Tuhan, ras seratus persen manusia. Yesus ikataken Anak manusia, sebab Ia tubuh ibas manusia nari eme Maria. Tapi amin gia Ia Anak manusia, tapi Yesus la erdosa.

2.      Ibas perdalanan Yesus ras ajar-ajarNa ku Kaisarea Filipi ngerana Yesus man ajar-ajarNa kerna kiniseran, penulakan,  kematen ras kekekenNa. Janah enda merupakan sada nubuatan Yesus nandangi diriNa. Adi sibandingken ras Matius 16:21 je ikataken Yesus arus lawes ku Yerusalem janah ngenanami mbue kiniseran, mate ras keke. Kiniseran ras kematen Yesus erkite-kiteken, Ia itulak pemimpi-pemimpin, imam-imam simbelin, bagepe guru-guru undang-undang. Kiniseran, kematen ras kekeken Yesus jadi i Yerusalem. Perlu siteh Pemimpin-pemimpin, imam-imam ras guru-guru undang-undang nggo mbentuk sada institusi (lembaga) eme sahendrin. Janah Sehendrin enda iberi kuasa pemerintah Romawi nari guna muat keputusen ibas perkara-perkara si terjadi i Yerusalem.

3.      Lit sada hal sicukup menarik siiterangken Yesus man ajar-ajarNa. Adi sioge ayat 20, je nina Petrus kam kap Mesias siipadankan Dibata. Jadi situhuna nggo jelas ibas ajar-ajar ise situhuna Yesus. Tapi ibas oratenta (ayat 22), Yesus sendiri singataken Ia Anak Manusia. Situhuna enda la berbeda, saja ate Yesus lebih menekankan kerna peranan kerehenNa ibas doni enda. jadi, Anak manusia eme tokoh Sorgawi (band. Daniel 7:9-22). Alu bage Yesus la mpertentangkan Mesias ras Anak manusia, saja peranan Anak manusia ibas doni enda merupakan sada misi siarus idalankenNa.

4.      Nubuat Yesus kerna Kiniseran, penolakan ras kematen bagepe kekeken siikataken man ajar-ajarNa gelah ajar-ajar banci meteh ras mpersiapkan dirina menghadapi kai siikataken Yesus e. Bagepe ajar-ajar banci meteh maka amin gia Yesus arus ngenanami kiniseran, ras mate, bagepe keke ibas simate nari, tapi kerina enda ibas rangka keselamatan manusia. Bagepe ajar-ajar Yesus jadi penerus ndalankan ras ndahin keselamatan ibas doni ena.

5.      Kiniseran ras kematen Yesus, labo merupakan pendungi kegeluhen Yesus. Tapi kiniseran ras kematen merupakan bagin ibas rencana Tuhan. Emaka kenca kiniseran ras kematen, ibas wari sipeteluken keke Yesus ibas simate nari.  Perlu siteh penolakan imam-imam simbelin, pemimpin-pemimpin ras guru-guru undang-undang erkite-kiteken,  sipemena: la teralokenna Yesus eme Mesias sireh ibas sekalak diberu (Maria) nari, janah musil ka. Sipeduaken : nggo nterem singikut Yesus, emaka popularitas kalak e nggo menurun. Sipeteluken : piga-piga kali ikritik Yesus ia kerina erkite-kiteken la idalankenna kegeluhen si badia.  Erkiteken si me maka kalak enda nggo erpakat guna nangkap ras munuh Yesus. Bagepe  ipebetehken Yesus maka kuasa kematen la banci naluken kuasa Kegeluhen (Yesus). Alu bage ajar-ajar Yesus termotivasi ndahiken dahin keselamatan i tengah-tengah doni enda.

APLIKASI

            Ibas rangka keselamatan i tengah-tengah doni enda, maka ibas keleng ate Tuhan, reh Ia ku doni enda ibas rupa manusia, eme Yesus Kristus. Situhuna kerehen Yesus eme pengrealisasian padan Tuhan man manusia (bangsa Yahudi). Tapi erkite-kiteken kerehen Yesus la bagi siniarapkenna eme atena reh min Yesus ibas surga nari la make kelang-kelang Maria nari. Bagepe ibas pelayanan keselamatan, rusur pemimpin-pemimpin, imam-imam simbelin ras guru-guru undang-undang ndat kritik ibas Yesus nari maka nembeh atena man Yesus. Kritikan Yesus, labo la lit alasenna, lit. Erkite-kiteken pemimpin-pemimpin, imam-imam simbelin ras guru-guru undang-undang la ngelakoken simehuli singena ate Tuhan.

            Erkiteken terjadi penolakan maka Yesus arus ngenanami kiniseran ras kematen. Tapi kepeken enda bagin ibas rencana Tuhan. Sebab ibas rangka keselamatan i tengah-tengah doni enda Tuhan muat sada keputusen guna ngkurbankan Anak siikelengiNa eme Yesus Kristus. Tuhu teridah ibas kiniseran ras kematen Yesus bali ras siinanami manusia pada umumnya, khususna kalak jahat. Sebab ibas penghukumen pemerintah Romawi nari. Kalak jahat si la terampuni pelanggaran-pelanggarenna, ia arus ihukum salib. Yesus ipeseri ras kalak jahat. Tapi simbedaken Yesus ras manusia pada umumnya eme kekekenNa. Sebab ibas wri sipeteluken Yesus keke ibas simate nari. Alu bage ngatakenca, Yesus eme tuhu-tuhu Tuhan, ras la lit kuasa ibas doni enda, termasuk kuasa kematen si banci naluken kuasa Tuhan. Erkiteken sie me maka kita tek man Yesus Kristus, sebab kalak si tek man Yesus Kristus ndatken kegeluhen sirasa lalap. Tek man Yesus Kristus arus icidahkan ibas kegeluhenta tep-tep wari alu ndalanken kai simehuli singena ate Tuhan. Bagepe tek pe kita ibas padanNa maka Yesus si keke e ras sinangkih ku Surga reh sekali nari ku doni enda guna ngelegi kita kerina gelah nggeluh ras Ia i Surga. Emaka tetaplah kita nggeluh ibas pengarapan, janah gegeh pengarapen enda tetap lah nggeluh bas kita.

Pdt. Steven Kumenit, STh.M.Min.

Ersurak Erkiteken Erpengarapen (Lukas 19:28-40)

KHOTBAH MINGGU

TANGGAL 20 MARET 2016.

GEREJA GBKP

Invocatio    :    Adi pengarapenta nandangi Kristus terjeng kegeluhen i bas doni enda ngenca, maka kita me si liahna i bas kerina manusia (1 Korinti 15:19).

Ogen          :    Jesaya 50:4-9a (Tunggal).

Khotbah     :    Lukas 19:28 – 40 (Tunggal ).

Tema          :    Ersurak Erkiteken Erpengarapen.

LATAR BELAKANG

1.      Yerusalem eme kota Raja, pusat pemerintahan, bagepe pusat keagamaan kalak Yahudi sebab i je lit rumah pertoton. Erkite-kiteken i je lit rumah pertoton, janah memang kin lit piga-piga hari raya keagamaan kalak Yahudi, iantarana eme wari raya Paskah ilakoken/ipusatken i Yerusalem, emaka kerina kalak Yahudi si merap i belang-belang doni enda reh ku Yerusalem guna ngerayaken wari raya e. Yesus pe ersura-sura ku Yerusalem guna ngerayaken wari Paskah. Bagepe, ate Yesus gelah Ia ngajar ras nehken keselamaten i Yerusalem. Amin gia situhuna nggo iteh Yesus melala tantangan i je, sebab imam-imam simbelin ras kalak Farisi nggo ermomo guna nangkap Yesus (band. Yohanes 11:57).

2.      Amin gia Yerusalem pusat pemerintahan ras kota kalak Yahudi, tapi situhuna simemerintah i je eme kerajaan Romawi. Emaka kalak Yahudi secara politik iteruh kekuasaan kerajaan Romawi. Erkiteken sie me ersura-sura kalak Yahudi gelah ia banci pulah ibas kuasa kerajaan Romawi nari.

3.      Pengarapen pembebasen secara politik iidah kalak Yahudi lit man Yesus Kristus. sebab idahna bas Yesus lit kuasa Ilahi; ibas Yesus lit kuasa pepalem kalak sakit, mpekeke kalak si nggo mate ras mpelawes setan, bagepe ibere Yesus man 5 ribu kalak, rsd. Emaka tupung Yesus bengket ku Yerusalem, nterem kalak Yahudi nggo nimai Ia, bagepe nterem kalak (ajar-ajar sinterem – band. Lukas 19:37) siikut ras Yesus, emaka ikimbangkenna uis ibas pasar. Bagepe nterem kalak Yahudi ngikuti Ia alu ersurak-surak. Bagepe alu sora megang ipujiNa Dibata nina :  "Ipasu-pasu gelah Raja si reh i bas Gelar Tuhan! Keriahen i Surga ras pujin man Dibata!"

4.      Kerehen Yesus ku Yerusalem labo guna majekken kerajaan politik, situhuna enda la salah, tapi kerehen Yesus ibas rangka majekken Kerajaan Surga. Bagepe sura-sura jelma sinterem nggo iteh Yesus, emaka perdalanen Yesus ku Yerusalem make Kelede si lenga i ersak kalak. enda merupaken penggenapen ibas Zakaria 9:9. Bagepe, enda situhuna merupaken simbol singatakenca, kerehenNa labo bersifat politik doni, tapi bersifat rohani, sebab kerehen Yesus selaku Raja Dame, janah ajar-ajarNa pe la make senjata. Alu bage kalak Yahudi banci merubah cara ras bentuk pengarapen si terjeng doni enda ku pengarapen si lebih mbelin eme pengarapen keselamaten situhu-tuhu.

5.      Keriahen ukur jelma sinterem la isenangi kalak Farisi, emaka ipindona gelah Yesus ngelarang jelma sinterem siersurak-surak. Tapi la ilakoken Yesus, tapi nina Yesus adi sinik jelma sinterem enda, batu-batu banci ersurak. Ibas erti kata pediat saja jelma sinterem ersurak sebab enda merupakan ekspresi keriahen jelma sinterem.

5.

APLIKASI

            Ersurak sekalak-kalak jelma eme luapan emosi ntah ekspresi keriahen. Selaku kalak kristen kita arus ersurak erkiteken lit pengarapenta si jelas, eme keselamatan. Emaka situhuna pengarapenta eme pengarapen simehuli erkiteken nggeluh ibas kinirajan Surga. Pengarapen ibas doni enda merupaken pengarapen si semu. Emaka kita me sinilahna adi pengarapenta terjeng ibas doni enda ngenca. Jadi penungkunen man banta uga cara ras bentuk kita ersurak. Apakah alu sora megang ntah uga ? tapi ersurak alu ngelakoken simehuli singena ate Tuhan erkite-kiteken nggo sijemak kerna pengarapen nandangi Yesus Kristus. Yesus si nggeluh.

            Ibas temanta situhuna labo kerna ersurak siarus itonjolkan kita, tapi kai pengaruh pengarapen ibas kegeluhenta. Ibas erti kata seh i ja pengarapen man Yesus membentuk kegeluhen kita selaku kalak kristen. Arus siinget selaku kalak kristen, kita megegeh ibas doni enda, erkite-kiteken pengarapenta nandangi kegeluhen sirasa lalap ras Yesus. Emaka kalak simegegeh pengarapenna ngasup ngelakoken simehuli singena ateNa, amin gia lit bas kita perbeben ras kiniseran. Jadi amin gia lit perbeben ras kiniseran, la kita kecewa. Ula erkiteken situasi eme nggeluh ibas perbeben ras kiniseran dungna sambar kinitekenta ras la kita la nggeluh ibas pengarapen nandangi kerehen Yesus pedua kaliken ku doni enda.

            Kita selaku kalak kristen ula bali ras jelma sinterem si lit i Yerusalem, termasuk jelma sinterem siikut Yesus si ersurak-surak erpengarapen terjeng doni enda ngenca, tapi arus siinget, kita nggo iselamatkan, bagepe nggeluh ibas pengarapen nandangi Yesus Kristus, emaka kita arus konsisten ibas keriahen kerna Yesus, seh ku kerehenNa pedua kaliken. Kerehen Yesus eme sada kepastin, amin situhuna waktu lenga siteh.

Pdt. Steven Kumenit, STh.M.min.

Meteruk Ukurlah (Yohanes 13:1-17)

PERPULUNGEN JABU-JABU

GEREJA GBKP

TANGGAL 13 -19 MARET 2016.

Yohanes 13 : 1-17.

Tema : Meteruk Ukurlah

LATAR BELAKANG

1.      Erkite-kiteken dosa nggo ngkenai kerina manusia, emaka patut nge manusia ndatken hukumen ibas Tuhan nari, tapi erkite-kiteken keleng kal ate Tuhan man manusia, maka reh Tuhan ibas rupa manusia sitergelar Yesus Krisus ku doni enda. Tujun kerehen Tuhan, gelah manusia simerupaken sikerajangenNa banci ngenen Imago Dei situhu-tuhu (manusia si seri ras tempas Dibata). Bagepe pengajaren ras kuasa siicidahken Yesus, banci manusia jera ras nggeluh selaku Imago Dei situhu-tuhu. Tapi kepeken la bage, nterem manusia si la ngasup ngaloken Yesus selaku Tuhan, emaka itulakna Yesus. Khususna pemimpin kalak Yahudi, guru-guru agama, kalak Farisi erbage-bage cara ipakena gelah Yesus kena sidingna, alu bage Yesus ihukum mate. Jadi penungkunen apakah kenca Yesus mate maka nggo dung kegeluhen Yesus ibas doni enda? lang.

2.      Kematen Yesus eme dalan siipake Tuhan gelah Yesus nadingken doni enda guna mulih ku asalNa eme Surga. Janah enda nggo igejapken ras iteh Yesus kerna kematenNa nggo ndeher. Bagepe nggo ipake iblis si Judas selaku ajar-ajar Yesus gelah rencana iblis seh, janah enda iueken Tuhan, gelah keselamatan man isi doni enda banci tersehi. Amin gia Yesus jadi kurbanna.

3.      Pemilihan ajar-ajar Yesus sehubungan ras kinirajaan Surga siate ipanteki Tuhan i tengah-tengah doni, labo gelah ajar-ajar jadi kalak sierkuasa bagi kerajaan doni, tapi gelah ajar-ajar banci jadi serayanNa guna nerusken dahin keselamatan ibas doni enda singgo icidahken ras iajarken Yesus. Erkite-kiteken sie me lit terjadi perubaten i tengah-tengah ajar-ajar Yesus erkite-kiteken nggit jadi kalak sierkuasa. Kuasa ras pangkat simeganjangna ibas ukuren doni enda, adi ia ndeher ras Yesus. Tuhu-tuhu ajar-ajar Yesus lenga ngangkai kerna makna pendilo jadi ajar-ajarNa.

4.      Erkite-kiteken nggo terjadi perubaten ibas ajar-ajar Yesus emaka sangana man berngi tedis Yesus, ope wari paskah, itangtangina jubaNa, jenari ibantingkenna uis, itamakenNa lau ku bas sambung, jenari iburihiNa nahe ajar-ajarNa, janah ielapNa alu uis  si ibentingkenNa. Seharusna min sue ras budaya ngalo-ngalo temue kalak Yahudi, isi meterukna siburihi nahe kerina si lit i je. Bagepe selaku budak wajib burihi nahe tuanna. Tapi ajar-ajar Yesus la nggit mpeteruk bana, kerina ia atena jadi sierkuasa. Erkiteken sie me maka Yesus singelakoken sie. Padahal nggo iteh Yesus, Dibata nggo mereken kerina kuasa man baNa. Ibas palas enda searusna min ajar-ajar Yesus siarus burihi nahe Yesus. Tapi sebalikna ibahan Yesus gelah ajar-ajar Yesus banci ngusi perbahanenNa, janah banci nggeluh alu meteruk ukur.

5.      Erti ras pengangkan Yesus burihi nahe ajar-ajarNa la iangka ajar-ajarNa, erkiteken sie Petrus la nggit mere nahena iburihi Yesus, tapi kenca nina Yesus adi la kam nggit mere nahendu Ku burihi berarti kam lanai ajar-ajarKu. Erkiteken ikataken Yesus bage, dungna nina Petrus, adi bage tan ras takalku pe. Tapi nina Yesus, kalak si nggo nggo ridi nggo kap bersih kulana. Nahena saja siperlu iburihi. Maksudna, ate Yesus burihi nahe ajar-ajarNa, labo gelah nggo bersih saja. Tapi lit simbol ije, gelah ajar-ajar banci muat bagin ibas kiniseran (kehinaan) Yesus, bagepe nggeluh ibas kiniteruken ukur selaku serayan (hamba). Emaka kenca dung Yesus burihi nahe ajar-ajarNa minter ikatakenNa gelah ajar-ajarNa pe ikut ras ndalanken sie. Sebab la lit budak ganjamgan asangken tuanna i lebe-lebe Dibata.

APLIKASI

            Meteruk ukur eme karakter Tuhan (band. Yohanes 13:3-4; Filipi 2:6-8). Bagepe meteruk ukur eme ulih Kesah Si Badia (band. Galati 5:23).  Janah karakter Tuhan e lit bas kita, sebab kita enda Imago Dei (sentudu ras tempas Dibata), bagepe kita nggo nggeluh ibas persadan ras Tuhan. Ibas kita nggeluh ibas persadan ras Tuhan, nggeluh pe bas kita Kesah Si Badia. Emaka searusna min lit bas kita kiniteruken ukur, bagepe sidalanken kiniteruken ukur ibas kegeluhenta tep-tep wari.

            Memang lit denga bas kita mesera denga nggeluh ibas meteruk ukur, sebab terikut denga ibas biak ras karakter doni enda. Status sosial, subuk ekonomi ras pendidikan simekatep menghalang kita meteruk ukur. Padahal adi kita nggeluh ibas kiniganjangan ukur, kegeluhen persadan selaku gereja, bagepe nggeluh sisampat-sampaten ras sikeleng-kelengen mesera tersehi ibas kegeluhenta. Si lit eme cian ate, la siangkan bagepe nggit penonjolan pribadi. Tapi adi kita nggeluh ibas kiniteruken ukur maka kegeluhen persadan ras keharmonisan nggeluh ibas kita, jenari kita selaku gereja nggit ngelai ibas doni enda. Bagepe la saja terjeng je, tapi pe meriah ukurta banci ikut muat bagin ibas kiniseran Tuhan Yesus. Emaka gelah banci kita ngelai alu mehuli, maka sipaling penting bas kita sitangtangi status sosial doni si leket denga bas kita. Ibas kegeluhen sibagenda rupana maka kita nggo nggeluh ibas kiniteruken ukur. Bagepe nggeluh ibas meteruk ukur banci mabai kalak sideban nggeluh ibas keselamatan.

Pdt. Steven Kumenit, STh.M.Min.   

Ersada Arih Guna Muat Simehuli (Galatia 2:1-10)

PERPULUNGEN JABU-JABU

GEREJA GBKP

TANGGAL 6 – 12 MARET 2016.

Galatia 2 : 1 – 10.

Tema : Ersada Arih Guna Muat Simehuli.

LATAR BELAKANG

1.      Lit perpulungen bagepe sada kelompok simpertanyakan kerasulan Paulus. Ibas erti kata lit si la ngakui kerna kerasulan Paulus. Sebab siikataken rasul eme ajar-ajar Yesus saja. Bagepe ibas pelayanan Paulus ku perpulungen-perpulungen guna majekken kula ni Kristus gelah kerina manusia nggeluh ibas keselamatan, la lit surat rekomendasi i Yerusalem nari (“sinode” tupung sie).  Ibas situasi sibage maka ituriken Paulus ise situhuna ia. Nina Paulus kenca ia itangkap Tuhan , maka ia minter ngelai nandangi kalak si labo kalak Kristen, kenca sie reh Paulus ku Yerusalem gelah erjumpa ras rasul-rasul, bagepe kalak si nggo tek i je (Band. Perbahanen rasul-rasul 9)

2.      Empat belas tahun kenca sie, mulihken ka Paulus ku Jerusalem, jumpaina rasul-rasul si i Yerusalem, termasuk Petrus, Jakup ras Yohanes. Janah ibas perjumpaan e, Paulus nuriken kerna perkembangen ulih sehna Berita si Meriah nandangi kalak si la kalak Yahudi. Tapi amin gia perkembangan kekristenan maju kal, tapi lit denga piga-piga pemimpin siatena ersura-sura gelah si la kalak Yahudi pe amin gia nggo tek man Yesus, tetap arus isunatken, termasuk Titus arus isunatken.

3.      Amin gia lit pemimpin i Yerusalem silit denga pengangkan kerna keselamatan arus arah sunat, tapi ibas hal sideban iakuina Paulus erdahin ras ngelai nehken Berita Si Meriah nandangi kalak si labo kalak Yahudi erkite-kiteken Tuhan. Tuhan sinuruh Paulus.

4.      Paulus mereken pengangkan alu teologis kerna Rasul. Emaka nina Paulus kerasulanna erkite-kiteken kuasa Dibata janah kuasa Dibata simereken dahin guna erdahin nehken Berita Si Meriah nandangi kalak si labo kalak Yahudi (band. Perbahanen Rasul-Rasul 9:1-27; Galati 2:7). Jadi labo Paulus similih jadi rasul, tapi Tuhan. Emaka Paulus ras Petrus seri eme Rasul. Saja Petrus erdahin nehken Berita si Meriah nandangi kalak Yahudi, tapi Paulus nandangi kalak si labo kalak Yahudi.

5.      Bagepe ituriken Paulus amin gia Paulus idilo guna erdahin ras ngelai man kalak si labo kalak Yahudi saja, tapi labo berarti la lit tangungjawabna, ntah pe keterikatenna ras kalak Yahudi, khususna si lit i Yudea. Emaka lit pemindon rasul-rasul gelah ibas pelayanan Paulus pe tetap nginget kerna kalak musil si lit i Yudea. Si kin paksa sie terjadi kelihen simesangat. Jadi pelayanan Paulus la saja nehken Berita si Meriah tapi pe mereken motivasi man kalak si nggo tek si labo kalak Yahudi gelah ikut muat bagin nehken kekeleng, ntah pe nampati kalak musil si lit i Yudea.

APLIKASI

            Pelayanan i tengah-tengah gereja melala kal. Janah pelayanan enda la saja terjeng idahiken serayan Tuhan, tapi kerina angota perpulungen. Sebab kita enda Aron Dibata kap. Emaka penting kal man banta ersada arih ibas pelayanan gelah seh kita kerina ku tingkat kedewasaan kristus si serta.

            Perlu siteh Dibata nggo ndilo kita gelah kita banci ndahiken dahin pelayanan i tengah-tengah gerejaNa, emaka pelayanenta erpalasken pendilo Tuhan, labo erpalasken sura-suranta. Saja pelayanenta enda arus ratur ras mejile. Janah ibas rangka ndalanken ras ndahiken dahin pelayanan perlu iarihken irungguken kerna  ise sebertanggungjawab ras dahin kai siarus idahiken sue ras program ras tujun pelayanan. Jadi fungsi runggu sibiasa igelari sidang majelis runggun, sidang BP runggun, musyawarah , sidang Sinode, SKMS, rsd ibas rangka muat simehuli. La dalih ibas kita runggu terjadi adu argumen, saja kenca iputusken berarti e simehulina, janah kita kerina arus patuh ibas keputusen e. Enda kerina banci sidalanken adi kita kerina meteh maka pelayanenta ibas rangka kemulian Tuhan, ras ibas rangka keselamatan ibas doni enda.

Pdt. Steven Kumenit, STh.M.Min.