Beritaken Barita Si Meriah (Roma 1:16-17)

PERPULUNGEN JABU-JABU

GEREJA GBKP

Roma 1 : 16 – 17.

Tema : Beritaken Barita Si Meriah.

LATAR BELAKANG

1.      Sada sura-sura Paulus man kalak Roma eme gelah ia banci reh ku Roma guna mberitaken Berita Si Meriah man kalak Roma, sebab Berita Si Meriah eme kuasa Dibata guna nelamatkan kerina kalak si tek man Yesus Kristus. Berita si meriah eme sada kuasa siipake Tuhan guna nelamatkan kerina manusia, termasuk perpulungen Roma. Tapi perlu siteh keselamatan e situhuna labo ibas kuasa Berita Si Meriah, tapi ibas tek man Yesus Kristus selaku Tuhan ras Juru Selamat. Berita Si Meriah mereken pengangkan kerna keselamatan. Keselamatan banci sialoken adi tek man Yesus Kristus. Bagepe ibas Berita Si Meriah, kalak si tek man Yesus Kristus, tehna kai siarus ilakokenna ibas kegeluhenna tep-tep wari, eme ndalanken kai singena ate Tuhan. Lit kepentaran ibas Dibata nari bas ia.

2.      Paulus la mela ibas nehken Berita Si Meriah, sebab enda pilihan Paulus, tupung ia idilo Tuhan peseh Berita si Meriah. Bagepe adi Paulus mela ngakuken Yesus Kristus selaku Tuhan ras ulu keselamatan ibas jelma sinterem, berarti Tuhan pe mela ngakuken ia tupung reh pagi Yesus Kristus peduakaliken ibas doni enda (band. Lukas 9:26). Bagepe kalak si mela ngakuken Yesus selaku Tuhan man jelma sinterem berarti ia nggo mersoken Yesus ibas jelma sinterem, emaka Yesus pe pagi mersoken ia i lebe-lebe Bapa i Surga (band. Matius 10:33).  Ibas palas enda me maka Paulus nehken Berita Si Meriah, amin gia ia arus ngenanami kiniseran. Sebab man Paulus enda kerina sada keuntungan man bana.

3.      Berita si Meriah eme gegeh Dibata guna nelamatkan kerina jelma. Maksudna ibas Berita Si Meriah e lit gegeh Dibata. Sebab ibas Berita Si Meriah, i je ituriken kerna uga Dibata nelamatkan kerina isi doni enda arah Yesus Kristus. Bagepe ibas Berita Si Meriah ngatakan uga Dibata naluken gegeh dosa ras mereken kegeluhen man kerina manusia, ras nggeluh ibas kejuah-juahen ras Dibata, bagepe nggeluh ibas pengarapen kerna kerehen Yesus Kristus peduakaliken. Bagepe ibas Berita Si Meriah e, kalak sitek man Yesus Kristus erwarina erdewasana kinitekenna.

4.      Paulus mereken sada pengangkan kerna keselamatan. I ja, Keselamatan ibereken Tuhan man kerina jelma, amin gia tangtangna man kalak Yahudi, jenari man kerina kalak sideban si labo kalak Yahudi. Maksud rasul Paulus nuriken enda gelah perpulungen Roma sianggotana siasalna ibas kalak kristen Yahudi nari ras kalak si labo kalak Yahudi nari meteh kerna karya Dibata nandangi ia. Memang tangtangna Dibata ndilo bangsa Israel (kalak Yahudi) guna jadi alatna nelamatkan kerina manusia ras doni enda. Tapi ibas penolakan nterem kalak Yahudi nari man Yesus selaku Mesias, maka keselamatan man kalak si labo kalak Yahudi erpedasna.

5.      Bagepe ibereken Paulus sada pengangkan kerna keselamatan man kerina jelma. Keselamatan e labo erkiteken gegeh ntah pe upaya manusia, khususna kalak Yahudi alu ngikuti ras ndalankan aturan agama eme Taurat (sunat), tapi kerina erkite-kiteken Tuhan jine simperembakkan diriNa kempak manusia. Arah Yesus Kristus reh Tuhan ku doni enda guna nelamatkan manusia. Emaka ise sitek man Yesus ras ndalankan singena ateNa ibas kegeluhenna tep-tep wari ndatkan kegeluhen situhu-tuhu.

APLIKASI

            Temanta sendah eme sada pengajuk man banta gelah kita singgo tek man Yesus Kristus arus Beritaken Si Meriah subuk tengteng ras la tengteng paksana (band. 2 Timotius 4:2). Alu bage kalak Kristen la banci sinik saja. Janah perlu siteh kita enda aron Dibata guna keselamatan isi doni enda. Bagepe arus siteh Beritaken Berita Si Meriah la saja arah kata, tapi pe arah perbahanen.

            Paulus la mela Beritaken Berita Si Meriah, kita pe arus ka bage. Gelah kita pe nggeluh ras Yesus i Surga. Sebab ibas kerehenNa pagi, iakuken Yesus kita enda temanNa. Iakuken Yesus kita enda kalak situtus ndalanken kai singena ate Tuhan ibas kegeluhenta tep-tep wari.

            Ibas kita Beritaken Berita Si Meriah maka kalak silenga nandai Dibata, banci tek  man Yesus Kristus selaku Tuhan ras keselamatan manusia. Bagepe simonce-once kinitekenna, banci megegeh kinitekenna. Bagepe singgeluh ibas perbeben ras kiniseran, la ia celus ibas dosa, tapi tetap ia ernalem ras mindo penampat man Tuhan. Alu bage man kalak si tek man Yesus Kristus, nggeluh ibas kemalamen ate, sebab siteh kegeluhenta ibas doni enda eme nggeluh ibas pasu-pasu Tuhan, bagepe ibas kita nggeluh ras Yesus, kita ndatken kegeluhen situhu-tuhu. Emaka tanggungjawabta selaku kalak sitek man Yesus guna pembarken Berita Si Meriah. Mbelang man peranin tapi kurang siranisa pe.

Pdt. Steven Kumenit, STh.M.Min.

Erbuah Adi Ersada Ras Kristus (Yohanes 15:4-8).

PERPULUNGEN JABU-JABU

GEREJA GBKP

TANGGAL 10 – 16 APRIL 2016.

Yohanes 15 : 4 – 8.

Tema : Erbuah Adi Ersada Ras Kristus

LATAR BELAKANG

1.      Sada pengajaren Yesus man ajar-ajarNa kerna nggeluh persadan ras Ia. Igambarkan Yesus nggeluh persadan Ia ras ajar-ajar bali ras sada batang anggur. Yesus pokokna, janah ajar-ajarNa dahan-dahanna. Dahan  e arus erbuah meramis gelah terteh dahan-dahan e me ajar-ajar Yesus. Tapi adi la erbuah maka dahan-dahan e itek-tek si mada juma jenari iambengken ku api, sebab la erguna.

2.      Yesus gambarkan Ia batang anggur situhu-tuhu. Sebab bangsa Israel (Yahudi) igambarkan sebage batang anggur (band. Mazmur 80:9,16). Bangsa Israel  eme bangsa Dibata. Ia ipilih ibas rangka nehken sura-sura Tuhan. Tapi ibas kinataNa kegeluhen bangsa Israel ntah bangsa Yahudi lalap erbahan dosa seh pe ia iteruh kuasa bangsa Romawi. Emaka nina Yesus aku me batang anggur situhu-tuhu ngataken bas Yesus lit kebenaren ras mehuli, emaka ise singgeluh ras Yesus, nggeluh ia ibas kebenaren ras mehuli sebab ia irawat simada anggur eme Bapa.

3.      Alu pengajaran (kata) Yesus, ajar-ajar Yesus nggo ibersihkan. Maksudna ajar-ajar nggo meteh kerna pendilona ras nggo tek man Yesus. Emaka gelah erbuah meramis iajuk Yesus gelah ajar-ajarNa tading ntah pe tetap ersada ras Ia. Sebab dahan banci erbuah adi ersada ras batang. Tapi ajar-ajar la terjeng i suruh gelah erbuah meramis ngenca. Ibas erti kata arus melala ngelakoken keleng ate, kebenaren, keadilen, rsd. Tapi ibas ajar-ajar erbuah, kerina e ibas rangka kemulian Bapa, labo guna kemulian ajar-ajar. Jadi Bapa sinisurga ipermuliakan arah perbahanan-perbahanen simehuli siilakoken ajar-ajar Yesus.

4.      Dahan-dahan banci erbuah meramis sebab irawat Dibata. Janah buah siimaksudkan eme ngelakoken kai singena ate Tuhan, khususna kerna keleng ate. Ajar-ajar arus melala ncidahkan ras mpraktek keleng ate ibas kegeluhen tep-tep wari, gelah nterem sitek man Tuhan Yesus ras nggeluh ibas keselamatan. Perbahanan sibage eme perbahanan ajar-ajar Yesus. Sebab selaku ajar-ajar, kenca ibegina pengajaran ibas Yesus nari, maka idalankenna ibas kegeluhenna tep-tep wari. Tapi adi la idalankenna kai singgo iajarkan Yesus berarti, ajar-ajar Yesus la erbuah. Adi la erbuah maka dahan-dahan e la erguna, emaka itek-tek  dahan e ibas batang nari, jenari kerah dahan e, jenari iambengken ibas api. Maksudna ajar-ajar si la ngelakoken kai singena ate Tuhan, ia arus iserapkan ibas Yesus nari, jenari ihukum ibas api (neraka).

5.      Ersada ras Yesus la saja erbahanca ajar-ajar erbuah meramis, tapi pe lit sada jaminen kegeluhen, subuk ibas doni enda bagepe i surga. Emaka ajar-ajar la perlu aru atena, sebab nina Yesus adi ersada ras Ia, kai pe siipindondu, ibereken Yesus. Sebab kalak singgeluh ersada ras Tuhan, berarti nggit ia ngelakoken simehuli singena ate Tuhan. Emaka adi pindona sie, tentuna ibereken Tuhan.

APLIKASI

            Kita enda nggo ibersihkan arah Kata Dibata, bagepe arah kematen Yesus Kristus.  Kita enda nggo tek man Yesus. Bagepe kita enda eme ajar-ajar Yesus. Bagepe kita nggo nggeluh ibas persadan ras Yesus Kristus. Erkiteken kegeluhenta nggo ras Yesus, maka searusna min lit buah ibas kita nari. Buah siimaksudken eme ngelakoken simehuli singena ate Tuhan.

            Gelah kita erbuah meramis, maka ibas keleng ate Tuhan, subuk secara langsung, ntah arah gerejaNa kita irawatNa. Perawatan Tuhan man banta eme banci saja Tuhan ngerana langsung man banta. Bagepe arah gerejaNa ipersingetiNa kita arah kebaktin minggu, PJJ, PA ras sidebanna. Emaka ibas penggejapanta lit salah dosa siibahan kita sengaja ntah la sengaja simabai kita ngakuken kesalahan ras dosanta man Tuhan. Jadi lit pengakun dosanta. Alu bage ialemi Tuhan dosa-dosanta.

            Jadi penungkunen man banta ngasup nge kita erbuah, janah buahnta meramis ? ngasup nge. Sipenting kegeluhenta ersada ras Yesus. Sebab ibas Yesus lit gegeh ras kepentaren. Emaka pindolah man Tuhan gegeh ras kepentaren gelah erbuah kita. Janah buahnta e ibas rangka kemulian Tuhan.

Pdt. Steven Kumenit, STh.M.Min.

Kehamaten, Kemulian Ras Kuasa Man BaNa Rasa Lalap (Wahyu 5:11-14)

KHOTBAH TANGGAL 10 APRIL 2016.

GEREJA GBKP

Invocatio    : Sabap Ia kap Dibatanta, kita bangsa si ikelengiNa. Kita desken rarasen biri-biri si ipermakaniNa (Mazmur 95:7).

Ogen          :    Mazmur 30:2-13 (Resposoria)

Khotbah     :    Ketangkasen 5:11-14 (Tunggal).

Tema          :    Kehamaten, Kemulian Ras Kuasa Man BaNa Rasa Lalap.

LATAR BELAKANG

1.      Sijadi bahan khotbahta eme sada pengenehenen Yohanes i Pulau Patmos, kerna Yesus Kristus (Anak biri-biri), siigeleh (isalibkan), tapi nggo nggeluh ras tedis ibas kinirajan ras Dibata, bagepe ndatken puji-pujin ibas malekat ras kerina mahluk subuk i langit, i doni, i teruh doni ras si ibas lawit.

2.      Enda ikataken gelah kalak kristen sisangana ndatken perbeben ras kiniseran erkite-kiteken penganiayaan ras penghambatan ersembah man Tuhan gelah tetap megegeh dingen paguh kinitekenna. Sebab tupung sie,  lit sada perbeben si cukup mberat man kalak kristen eme lit sada perintah  ibas kerajaan Roma nari gelah kerina rakyat arus ersembah man Kaisar (Domitianus). Kerina penduduk ibas kerina wilayah kekaisaran Romawi iwajibkan minimal sada kali sebulan reh ku kuil si nggo itentuken guna ersembah i lebe-lebe patung kaisar, bagepe ngataken kaisar eme Tuhan. Adi la lakokenna maka ia ianggap pembangkang ras arus ihukum mati.

3.      Ngangkai bahan khotbahta arus oge ayat sada nari, kerna ise kin simetunggung ngagui materai ras ras nalangi kitab si lit ibas tan kemuhen kalak sikundul ibas kursi kinirajaan. Sibanci ngagui ras nalangi kitab e eme Singa ibas suku Yuda nari. Tapi siidah Yohanes labo Singa tapi Anak biri-biri. Jadi penungkunen bali kin Singa ras Anak biri-biri. Secara harafiah banci ikataken beda, tapi secara teologis seri, sebab subuk Singa ras Anak biri-biri gambarken kerna Yesus Kristus. Ikataken Singa sebab suku Juda ikataken anak singa (band. Kejadin 49:8-9). Yesus Kristus reh ibas suku Yuda nari. Bagepe Yesus igambarkan Anak biri-biri (band. Yohanes 1:29).

4.      Yesus singgo mate ras tedis i tenga-tengah kursi kinirajaan (Surga) singasup mbuka kitab e. Erkiteken sie me Yesus (Anak biri-biri) ndatken puji-pujin ibas Malekat ras kerina singgeluh ibas sinasa lit. Erti ras makna ende-ende siiendeken subuk malaikat, bagepe mahluk singgeluh ibas si nasa lit eme Yesus Kristus metunggung ngaloken kuasa ras kinibayakan, kepentaren, gegeh, kehamaten, kemuliaan ras puji-pujin. Bagepe kuasa Yesus seh rasa lalap. Enda ialoken Yesus erkite-kiteken karya keselamatan singgo ilakoken Yesus i tengah-tengah doni enda. Karya keselamatan Yesus ilakokenNa, erkite-kiteken kesetiaan/kepatuhenNa nandangi persuruhen BapaNa si  i Surga.

5.      Mahluk si empat sidem alu mata ngaloi  amin,  ras pertua-pertua erjimpuh dingen ersembah man Anak biri-biri (Yesus). Empat mahluk e eme bagi singa, bagi lembu jenggina, bagi manusia, bagi rajawali kabang. Janah keempat mahluk enda melambangkan kehamatan, gegeh, kepentaren  ras nggesit.

APLIKASI

            Kehamatan, kemuliaan ras kuasa eme sikerajangan Tuhan ngenca. Alu bage selaku kalak singgo iselamatkan, bagepe nggo itemaniNa kita ibas kerina kegeluhenta,  arus nghamatiNa ras memuliakan Tuhan. Sebab sigejapken ope denga Yesus Kristus mate ras keke ibas simate nari kita situhuna nggeluh ibas kematen. Ngkai maka kita nggeluh ibas kematen. Erkite-kiteken kita nggeluh i kuasai dosa. Emaka kita nggeluh ibas pernembeh ate Tuhan. Bagepe  upah dosa eme kematen (Band. Roma 6:23).

Cara kita nghamati ras mpermuliakan Tuhan, tentuna teridah arah perbahanenta tep-tep wari. Ija kita ngasup ngataken bujur man Tuhan amin gia kita lit ibas perbeben ras kiniseran. Bagepe la kita mbiar ndalani wari-wari enda sebab siteh lit Tuhanta sierkuasa, singasup naluken kerina kuasa si lit ibas doni enda. Alu bage, Tuhan saja siisembah kita.

            Perlu siteh kerina kuasa i surga ras i doni nggo ibereken man Yesus (band. Matius 28:18). Emaka sada keriahen ras kemalamen ate man banta sebab la sia-sia kita ersembah man baNa. Sebab ibas kuasaNa ngasup ipulahiNa kita ibas erbage-bage perbeben ras kiniseran. Alu bage, enda jadi pengapul ras pergegeh man banta guna ndalani kegeluhenta tep-tep wari.

           

Pdt. Steven Kumenit, STh.M.Min.

Tek Dingen Iperidiken (Markus 16:16)

PERPULUNGEN JABU-JABU

GEREJA GBKP

TANGGAL 3 – 9 APRIL 2016.

Markus 16 : 16.

Tema : Tek Dingen Iperidiken.

LATAR BELAKANG

1.      Yesus kalak Nasaret si lit kuasa ibas kata ras perbahanan subuk iakap Dibata bagepe kerina manusia (band. Lukas 24:19) nggo mate. Erkiteken sie me maka kegeluhen ajar-ajar Yesus nggeluh ibas kebiaran ras putus asa. Sebab lit sada pengarapan jelma sinterem, bagepe ajar-ajar Yesus, gelah Yesus banci mulahi kalak Yahudi ibas kuasa bangsa Romawi nari. Sebab paksa sie bangsa Yahudi sangana iteruh kuasa bangsa Romawi. Bagepe mbiar ajar-ajar Yesus nandangi imam-imam simbelin, guru-guru agama ras penguasa bangsa Romawi, emaka cebuni ia kerina. Janah adi pulung ia, pulung alu cebuni-cebuni.

2.      Kuasa kematen la ngasup naluken kuasa Dibata, emaka ibas wari sipeteluken ipekeke Dibata  Yesus ibas simate nari (band. 1 Korinti 6:14). Kenca Yesus keke ibas simate nari, Yesus ncidahkan baNa man ajar-ajarNa, janah ajar-ajar enda singataken man teman-temanna kerna kekeken ras Yesus nggo nggeluh. Tapi erkite-kiteken mbiar ras putus asa, bagepe pengangkai kerna kematen si leket denga man ajar-ajar Yesus, maka la ia tek. Thomas alu pang ngatakenca, adi lenga ku idah, janah langa ku tamakan tanku ibas awakNa, lenga ku tek (band. Yohanes 20:25). Sebab tupung sie, manusia la banci pulah ibas kematen nari. Lenga lit sejarah ibas kalak Yahudi, manusia banci keke ibas simaten nari. Memang lit si keke ibas si mate nari, tapi e erkiteken Yesus sipekekesa eme Lazarus (band. Yohanes 11:43-44). Padahal nggo piga-piga kali ikataken Yesus kerna kekekenNa. Tuhu Yesus arus ngenanami kiniseran, mate, tapi ibas wari siperteluken keke Yesus ibas simate nari (Matius 16:21).

3.       Dungna Yesus ncidahken diriNa man ajar-ajarNa sisepuluh sada kalak (nen = Yudas Iskariot lanai i je), tupung ajar-ajarNa e sangana man ibas salah sada rumah. Yesus ncidahken diriNa erkite-kiteken ajar-ajarNa singaloken berita kekekenNa kurang tek, emaka la pang ajar-ajarNa mberitaken kekeken Yesus ku jelma sinterem. Erkiteken sie me ipandangi Yesus ia kerina.

4.      Ibas perjumpan Yesus ras ajar-ajarNa, Yesus nuruh gelah ajar-ajarNa mberitaken Berita Si Meriah, janah ise sitek dingen iperidiken terkelin ia, tapi ise si la tek ia pagi iukum. Peridin eme sada tanda maka kalak e tek man Yesus selaku Tuhan. Jadi Peridin eme sada materai kalak e nggo tek man Yesus.

5.      Peridin labo sada alat sibanci mabai manusia nggeluh ibas keselamatan. Tapi peridin eme sada tanda ntah pe materai. Emaka kalak singaloken peridin nggo tek ia man Yesus. Erkiteken sie me palas keselamatan eme tek. Emaka kalak si la tek man Yesus ia pagi iukum. Siimaksudken penghukumen eme la nggeluh ras Yesus ibas Surga.

APLIKASI

            Peridin eme salah sada sakramen siiakui gereja GBKP. Lit dua sakramen siiakui gereja GBKP eme peridin ras lakon persadan si badia. Janah ibas gereja GBKP mengenal peridin anak ras peridin dewasa. Tapi palas gereja erbahan dua sakramen enda, erkite-kiteken sakramen enda ngenca siitetapken Tuhan. Janah pengertin sakramen eme 1). Secara harafia eme perbuatan suci. 2). Secara teologis eme imeteraikan Tuhan padanNa, janah iberekenNa man banta pengalemi dosa, bagepe kegeluhen si la ermasap-masap erkite-kiteken pengurbanan Yesus i kayu persilang. Emaka sakramen itetapkan Tuhan gelah kinitekenta iarahkan ku pengorbanan Yesus i kayu persilang. Emaka situhuna sakramen eme khotbah siteridah.

            Peridin eme tanda maka kita e nggo tek man Yesus. Peridin eme simbol kita icuci alu lau gelah kita bersih. Dosa-dosa sierbahanca kita nggeluh melket nggo icuci alu dareh Yesus. Alu bage kita nggo ipebadiaken. Emaka tanda kita nggo ipebadiaken, kita arus ngelakoken kai singena ate Tuhan ibas kegeluhenta tep-tep wari. Emaka labo masalah apakah peridin e ilakoken alu ipirpiri ntah pe iselamken ibas lau.

            Lit sada persoalan si seh genduari jadi masalah man gereja-gereja sideban singelakoken peridin dewasa ngenca. Alu bage ngatakenca maka peridin anak la banci ilakoken sebab ia lenga ngangkai kerna erti peridin ras la iangkaina kerna erti tek. Gereja GBKP tetap ngelakoken peridin anak sebab : 1). Anak-anak pe nggeluh ibas ikaten padan Dibata ras anggota gereja. 2). Anak-anak eme benih si badia. Emaka anak-anak ikut ibas warisan padan-padan Dibata. Alu bage anak-anak kristen arus ibedakan ras anak-anak si la kristen. Ibas erti kata, anak-anak kristen arus isterilkan/ibadiakan ibas kegeluhen si la mehuli nari. 3). Orang tua berkewajiban pebelin-belin anakna ibas Kata Dibata. Gelah seh paksana anak-anak e ngakuken kinitekenna man Tuhan i lebe-lebe perpulungen.

            Uga ka kalak sipindah ibas gereja sideban nari, bagepe agama sideban nari. Adi sipindah ia nggo dewasa janah lenga iperidiken maka ia arus iajari lebe kerna kata Dibata, gelah tek ia man Tuhan, kenca sie maka ia iperidiken (peridin dewasa). Tapi adi nggo ia iperidiken, maka ia lanai iperidiken, tapi ia iajarken kerna pelajaran ngawan gelah ia ingawanken. Tapi adi sipindah ibas agama sideban nari maka ia arus iperidiken. Peridin siibahan gereja nandangi sipindah ibas agama sideban nari eme tanda maka ia nggo tek man Tuhan Yesus.

Pdt. Steven Kumenit, STh.M.Min.