Ola Merangap (Lukas 12:13-15)

PERPULUNGEN JABU-JABU

GEREJA GBKP

TANGGAL 18-24 SEPTEMBER 2016.

Lukas 12: 13-15.

Tema : Ola Merangap.

LATAR BELAKANG

1.      Eksistensi Yesus sierkuasa, nggo mbar i daerah Yerusalem ras daerah-daerah sideban, termasuk daerah Batabara. Kuasa Yesus erbahanca nterem kalak mbiar ras mehamat man baNa. Ibas palas enda me, tupung Yesus ras jelma sinterem, reh sekalak ibas jelma sinterem nari ngerana man Yesus nina o Guru katakenlah man seninangku maka erbagi kami kerna erta-erta siitadingken bapa kami. Ate sekalak dilaki enda, makeken kuasa ras dolat Yesus guna ngerunggui soal erta tading-tadingen orang tuana. Sebab seninana la mbagiken erta tading-tadingen orang tuana. Alu bage ia banci dat erta pembagin ibas erta tading-tadingen orang tuana. situhuna sekalak dilaki enda kalak banyak nge.

2.      Ibas agama Yahudi lit hukum-hukum ntah pe aturen kerna erta warisan. Ibas aturen agama Yahudi, adi lit keluarga ntah pe siersenina rubat kerna erta tading-tadingen orang tua, maka ia arus mindo penampat man guru-guru agama selaku hakim guna ngerunggui masalah erta tading-tadingen e. Bagepe ibas budaya/adat kalak Yahudi, abang la wajib membagiken erta tading-tadingen orang tua man seninana (agina).

3.      Kerna hukum agama bagepe budaya/adat agama Yahudi nggo iangka kalak bayak enda, emaka la ia reh man guru-guru agama Yahudi, sebab sia-sia akapna. Dalan satu-satuna reh ia man Yesus. Sebab ibas pusuhna adi reh Yesus ku seninana(abangna), pasti ibegiken abangna, janah minter ibagiken abangna erta tading-tadingen orang tuana. tapi sura-surana iteh Yesus. Sebab ibas pusuh kalak bayak enda lit kerangapen. Emaka ijabab Yesus ise kin singangkat Aku ngerunggui kam duana. Labo dahinKu ngurusi erta-ertandu.

4.       Ikataken Yesus bage, sebab kerehen Yesus ibas doni, labo guna ngerungui erta-erta doni. Tapi lit si lebih mendasar ras penting eme keselamaten. Janah enda me si la lit man kalak bayak e. Ibas erti kata kalak bayak ras seninana e kalak merangap.

5.      Kejadin enda ipakeken Yesus guna ngajari ras mereken persinget man jelma sinterem bagepe ajar-ajarNa gelah metenget ras ola merangap nandangi kai pe. Sebab merangap eme sada dosa. Alu bage kita banci sirang ibas keselamatan. Kegeluhen ras keselamatan manusia labo itentuken erta doni, tapi itentuken pengenalan kerna keselamatan situhu-tuhu ras ndalanken kegeluhen simbiar ras erkemalangan man Tuhan ibas kegeluhen sitep-tep wari.

APLIKASI

            Kita enda eme Imago-Dei, janah ibas Tuhan namakan kita ibas doni enda, nggo isikapkenNa kerina kebutuhenta. Arah tinepa sideban, kebutuhen manusia nggo tercukupi, janah la lit bas diri manusia biak merangap. Tapi erkite-kiteken dosa nggo ngkenai diri manusia (kita), maka tempa-tempa la erpuas-puas kai si lit bas kita. Emaka adi enda la terkuasai kita maka si lit bas kita eme merangap. Kai si la jadi sikerangenta sibuat alu korupsi, nangko, nipu, rsd. Adi siperdiateken lit senina turangta merangap, labo erkiteken la lit bas ia, tapi ekiteken la puas kai si lit bas ia.

            Memang ibas perkembangan IPTEK, melala tawaran-tawaran siergana murah, bagepe keinginan-keingan daging sibanci mereken kupasan man banta. Tapi enda kerina terjeng kepuasan ras kehagan doni enda ngenca. situhuna banci similiki kai si lit ibas doni enda, adi e guna kebutuhen si prinsip ibas keluarga bagepe pribadi. Sebab enda kerina bekas pemere Dibata. Dibata mereken kepentaren man manusia nciptaken piga-piga produk guna kebutuhen anak-anakNa. Tapi merawa Dibata adi kita salah ngartikenca ras gunakenca. Emaka gelah kita la merangap, sipenting bas kita eme spiritualitasta mehuli. Ibas erti kata adi mehuli spiritualitas maka terkuasai kita keinginan-keinginan dagingta. Yesus pernah ngataken man iblis, tupung ia igoda iblis i padang gurun, nina : manusia nggeluh labo arah roti saja, tapi arah tep-tep kata siibelasken Dibata (Matius 4:4). Alu bage ngatakenca man banta, adi kita ndeher ras Tuhan, janah sibegiken kataNa, maka ijagai ras icukupiNa kita. Emaka ula aru ateta nggeluh ibas doni enda. sebab kearun ate la pernah meregen kegeluhen man banta (band. 6:27).

            Adi merangap kita, maka kita nggo erdosa. Alu bage hubungenta ras Tuhan nggo ceda. Banci ipehuli adi kita ngakuken salah ras dosanta man Tuhan, jenari lanai siprangkteken kegeluhen simerangap.

Pdt. Steven Kumenit, STh.M.Min.

Totokenlah Serayan Tuhan (Kolose 4:2-6)

KHOTBAH MINGGU

TANGGAL 18 SEPTEMBER 2016.

GEREJA GBKP

Invocatio :    Sedangken perik tuan pe lit rumahna, kalimpines enggo dat asar. Itamakenna anakna i deher batar-batarNdu, TUHAN si Mada Kuasa, Rajangku dingen Dibatangku (Mazmur 84:4).

Ogen        :    Perbahanen Rasul_arsul 12:4-12 (Tunggal).

Khotbah   :    Kolose 4:2-6 (Anthiponal).

Tema        :    Totokenlah Serayan Tuhan.

LATAR BELAKANG

1.      Bahan khotbahnta sekali enda eme, pedah Paulus man perpulungen Kolose, tupung Paulus ibas penjara. Ibas pedah enda, Mindo Paulus gelah perpulungen ertoto alu tutus, bagepe notoken ia, gelah Paulus banci meritaken Kata Tuhan ras nuriken  rahasia Kristus. bagepe gelah perpulungen ngerana ras ngelakoken simehuli singena ate Tuhan.

2.      Imotivasikan Paulus gelah perpulungen tuhu-tuhu tutus ertoto, janah sangana ertoto ersikaplah ras ngataken bujur, gelah Tuhan mereken kepentaren man bana. Alu bage perpulungen Kolose meteh kerna kebenaren keselamatan situhu-tuhu. Sebab tupung sie berkembang pengajaren sipapak, si banci beneken ntah pe nirangken kalak kristen ibas persadanna ras Kristus Yesus. Sebab ngelawan pengajaran sipapak la banci makeken gegeh ras kepentaren manusia, tapi arus make gegeh ras kepentaren Tuhan.

3.      Ibas perpulungen ertoto, berarti perpulungen ngerana (komunikasi) ras Tuhan, bagepe megiken kai sura-sura Tuhan. Alu bage ibas perpulungen ertoto alu tutus maka terjadi me pertumbuhen kiniteken man perpulungen, bagepe sura-sura Tuhan saja siibegiken ras idalanken perpulungen. Emaka perpulungen ndatken kepentaren. Alu bage subuk ngerana bagepe perbahanen, ngena ate kalak man perpulungen. Bagepe ibas kepentaren singgo ibereken Dibata, maka perpulungen ngasup njabab erbage-bage persoalen alu mehuli ras tepat. Emaka penting man perpulungen tutus ras ersikap ertoto.

4.      Pemindon Paulus man perpulungen Kolose gelah perpulungen notoken ia, gelah Dibata mereken kesempaten simehuli guna meritaken kataNa, guna nuriken rahasia Kristus. perlu siteh melala rahasia-rahasia Kristus siarus ipeseh man perpulungen, tapi lit kendala siihadapi Paulus eme ia ipenjarakan. Janah ibas pengarapen man Tuhan, Paulus erpenggejapen lit kuasa Tuhan sibanci mbebasken ia ibas penjara nari. Alu bage banci ituriken Paulus kerna Yesus Kristus situhu-tuhu. Sebab tupung sie, ibas perpulungen kolose berkembang kerna eksistensi Yesus Kristus man kalak kristen, Yesus eme salah sada dalan kempak keselamatan ngenca. Keselamatan sideban banci idatken alu ndalanken praktek agama Yudaisme (patuh nandangi ajaran agama Yahudi eme sunat, mantangken pangan tertentu, ras memelihara hari raya Yahudi ras wari sabat, rsd). Bagepe ersembah man malekat alu paksaan, meteruk ukur alu pekula-kula, ras nakiti kula (band. Kolose 2:23). Bagepe ibas penggejapen Paulus, pelayananna arus isampati, sebab melala tantangan-tangan siarus man alanken, termasuk ia ipenjaraken.

5.      Kata Dibata eme kata kebenaren, janah inti Kata Dibata eme Yesus Kristus. ibas Yesus Kristus lit keselamatan. Bagepe kalak singgeluh ibas Yesus Kristus berarti ia nggeluh ibas Kinirajaan Dibata. Ibas penggejapen Paulus Kata Dibata eme gegeh Dibata sibanci nelamatken kerina jelma. Erkiteken sie me perpulungen arus nampati Paulus arah pertotonna.

APLIKASI

            Minggu enda igelari minggu notoken serayan Tuhan. Enda arus isingetken mulihi man perpulungen, tupung serayan Tuhan itangkuhken ilebe-lebe perpulungen nina pendeta man perpulungen eme totoken serayan Tuhan singgo ipilih. Enda pengendesen man perpulungen ( band. 1 Tesalonika 5:12). Bagepe mpersingeti mulihi man warga gereja kerna makna ras kuasa toto, eme gelah terjadi mujizat-mujizat ibas pelayanan, khususna ibas pelayanan serayan Tuhan. Bagepe gelah perpulungen tutus ertoto.

            Jadi serayan Tuhan melala tantangan-tantangan, subuk pribadi (karakter serayan tempa kurang mehuli ibas pelayanan, pendahin, status sosial, kesehaten) keluarga bagepe ibas pelayanan i gereja, janah enda merupaken persoalan (rante) siarus ilepasken, emaka perlu penampat ibas perpulungen nari, khususna notoken serayan Tuhan sitep-tep wari ngepkep perpulungen, subuk arah toto, bagepe ibas pelayanan. Sebab fungsi perpulungen notoken serayan Tuhan, gelah serayan Tuhan tehna tanggungjawabna melayani ras notoken perpulungen, bagepe pentar ibas pelayanan, termasuk ibas ngerana. Janah perlu pe isingetken kami gelah perpulungen tutus ras ersikap ibas ertoto, gelah jadi bagi siisuraken Tuhan. Emaka ertotolah ibas kiniteken.

            Ate ibas kesempaten enda ipersingeti mulihi man kerina warga gereja ibas ngelai man Tuhan arus sepengoda – sepengole. Alu bage kita kerina nggeluh ibas persadan. Khususna ibas perpulungen notoken serayan Tuhan maka serayan Tuhan la saja ndatken gegeh, tapi kepentaren guna ngelai. Alu bage perpulungen banci meteh kerna rahasia Kristus, eme keselamatan si lit ibas Kristus Yesus. Emaka lit ketedehen ate man perpulungen guna tetap ersembah man Tuhan ibas gereja ras tetap nggeluh ngataken bujur man Tuhan amin gia jumpa perbeben ras kiniseran. Bagepe perpulungen ngasup ntaken sibenar ras tuhu-tuhu. Jadi perpulungen tuhu-tuhu nggeluh ibas kepentaren.

Pdt. StevenKumenit, STh.M.Min.

Radikalisme (Kisah Para Rasul-Rasul 8:1-3)

PERPULUNGEN JABU-JABU

GEREJA GBKP
TANGGAL 11-17 SEPTEMBER 2016.
===========================================================

Perbahanen Rasul-Rasul 8:1-3

Tema : Radikalisme

LATAR BELAKANG

1.      Perkembangan kekeristenan kenca Yesus nangkih ke surga tuhu-tuhu ndatken perbeben simesangat, sebab imam-imam kepala, pemimpin-pemimpin kalak Yahudi, bagepe nterem kalak Yahudi, termasuk Saulus la nggit kalak kristen berkembang.

2.      Istepanus sekalak diaken siipilih kerina kalak sitek guna ngelai kalak singgo mbalu, khususna kalak Yahudi simake cakap Yunani (band. Pasal 6:1-5), ibunuh. Padahal Istepanus sidem Kesah Si Badia, janah melala tanda-tanda sengget siibahanna, tapi erkiteken lit piga-piga kalak Yahudi si la ngasup ngaloken kai siikataken Istepanus maka isogokna piga-piga kalak guna ngataken maka Istepanus nggo ncekuraki Musa ras encuraki Dibata, emaka Istepanus itangkap janah ibaba ku Sahenderin (pengadilan agama), tapi i lebe-lebe Sahendrin Istepanus ngataken maka kalakYahudi mekeng ras la nggit jera. Kalak Yahudi la nggit megiken kai siikataken Kesah Si badia. Ibunuh pemimpin-pemimpin agama Yahudi ise singerana kerna kerehen persuruhen Dibata. Megelut Sahendrin emaka ibunuhna Istepanus.

3.      Sidang Sahendrin ibahan terbuka, emaka ise saja banci reh megiken ras ngenen perdalanen sidang e. Saulus ikut ibas persidangan e, janah ia setuju Istepanus ibunuh. Pembunuuhen Istepanus erkite-kiteken lit penggejapen man kerina angota sahendrin ia ihina, bagepe kai siikataken Istepanus la tuhu.

4.      Saulus ndatken kuasa ibas pemimpin-pemimpin agama Yahudi, bagepe pemerintah guna ndarami ras ngayaki kalak si tek man Yesus Kristus. Atena gelah “itumpas” seh ku akar-akarna. Alu bage la erkembang kalak si tek man Yesus Kristus ibas doni enda.

5.      Penghambatan nandangi kalak si tek man Yesus Kristus erkite-kiteken ibas pengakap pemimpin-pemimpin agama  kalak si tek man Yesus nggo papak, janah mengancam kegeluhen agama Yahudi. Tapi amin gia litna penghambatan, tetap denga kalak sitek la mbiar, sebab Kesah Si badia tetap ngarak-ngarak kerina kalak si tek.

APLIKASI

            Temanta sekali enda eme radikalisme. Siimaksudken radikalisme eme sada paham ntah aliran si ekstrem (Fanatik). Radikalisme lit erkite-kiteken lit kelompok siatena erbahan perubahan alu pedas (drastis) alu make kekerasan. Janah radikalisme enda la saja lit ibas politik, sosial, tapi pe nggo lit ibas beragama.

            Ibas beragama biasana lit sada kelompok sijemak idiologi/dogma agama siakapna enda tuhu, janah agama sideban lang. Emaka ipaksakenna gelah ajaren/dogmana ialoken kalak sideban, alu make kekerasan. Enda me situhuna si jadi ibas perkembangan agama kristen ibas jaman Saulus. Agama Yahudi simerupakan agama singgo mapan tupung sie, erpengakap maka agama ras idiologi/dogmana, bagepe ajarenna si tuhu-tuhu, agama sideban lang. Emaka kenca turah kalak sitek man Yesus Kristus, mis ihambatna alu kekerasan ras pembunuhan. Sebab akapna aliran simenyesatkan.

            Tuhu gereja butuh perubahan-perubahan secara fundamental (mendasar) khususna kerna ersembah man Tuhan. I ja kalak sitek man Tuhan arus tuhu-tuhu icidahkenna kinitekenna arah kata ras perbahanen. Ibas erti kata adi tek man Yesus Kristus maka arus itadingken kegeluhen doni enda. tapi labo berarti kalak sierpengakap nggo “seh” ku  tingkat spiritualitas simeganjang ngenen kegeluhen gereja, siakapna lambat maju, arus irubah alu ektrem. Enda la banci, sebab ibas pelayanan gereja tentuna lit aturen-aturen siarus iikuti kerina warga gereja.

            Payo kita arus fanatik ibas erkiniteken man Tuhan Yesus, tapi labo berarti kefanatikenta “membutakan” kita guna ngenen kalak sideban la mehuli ras la benar. Apai ka seh memberontak man pemerintah ras erbahan kekerasan. Tapi kefanatikenta man Tuhan arus icedahken ibas pelayanan-pelayanan i tengah-tengah gerejanta.

            ISIS (Islam State Irak Syriah), bagepe FPI (Front Pembela Islam), contoh radikalisme singgeluh ibas doni enda, termasuk i Indonesia. Ia akapna situhu.

            Tuhu radikalisme mengancam kegeluhen kedamen ibas berbangsa ras beragama, tapi labo berarti kita arus mbiar. Siimaksudken la perlu kita mbiar, labo berati kita arus mbalas kai siibahan kelompok radikalisme e, lang. Kita arus tetap sabar, sebab enda kerina pengujin man banta selaku kalak kristen. Emaka siarus ibahan eme kita tetap megeggeng ras ertoto man Tuhan. Sitotoken kelompok radikalisme enda gelah ia jerah ras lanai ilakokenna kekerasan. Teklah Tuhan tetap ras kita. Ijagaina anak-anakNa ras gerejaNa ibas rangka keselamatan ibas doni enda.

Pdt. Steven Kumenit, STh.M.Min.

Tema : Kiniulin Tinepa Dibata (Mazmur 104:1-35)

PERPULUNGEN JABU-JABU

GEREJA GBKP

TANGGAL 28 AGUSTUS – 3 SEPTEMBER 2016.

Mazmur 104 :1-35.

Tema : Kiniulin Tinepa Dibata.

LATAR BELAKANG

1.      Sijadi oratenta sendah eme “kekaguman” pemazmur kerna tinepa Dibata, emaka ibas kinitekenna pemazmur ngerana kerna tinepa Dibata alu bahasa puisi.

2.      Pemazmur  nuriken kerna kuasa Dibata sinjadiken doni ras kerina isina, janah tinepa Dibata enda la saja mejile tapi kerina lit fungsi ras maknana. Kerina tinepa Dibata iatur khusus guna kebutuhen tenepaNa. Erkiteken sie me kerina patuh man Tuhan.

3.      Pemazmur ngajuk man tendina gelah muji Tuhan. Palas muji Tuhan eme erkiteken Dibata e mulia, emaka ate pemazmur kidekah geluhna rende atena man Tuhan. Janah pengarapen pemazmur gelah puji-pujinna ialoken Tuhan.

4.      Ibas pemazmur  ngataken kerna uga jilena tinepa Tuhan, bagepe Dibata jine sinjadiken kerina e, maka ate Dibata ngataken man manusia, la lit Dibata si deban si seri ras Dibata siisembahna. Bagepe la lit Dibata sideban ntah tan manusia siikut muat bagin ibas Dibata njadiken doni ras kerina isina. Emaka Dibata sinjadiken doni ras kerina isina e siarus isembah.

5.      Kerina siitepa Dibata mejile.erkiteken sie ipindoken pemazmur gelah Dibata ngkernepken kalak perdosa ras kalak jahat. Sebab erkiteken kalak perdosa ras kalak  jahat me maka kiniulin Tuhan e banci ceda. Kalak perdosa ras kalak jahat la ngergai tinepa Tuhan ras la mehamat man Tuhan, erkiteken sie la ia mbiar erbahan sijahat i lebe-lebe Tuhan, khususna ncedai kai singgo ibahan Tuhan. Ibas cedana tinepa Tuhan maka mpengaruhi kai singgo iaturken Tuhan man tinepaNa.

APLIKASI

            Adi siperdiateken kerna tinepa Dibata, janah sibandingken kai siikataken ibas kejadin 1, maka dat kesimpulan, kerina tinepa Dibata mejile. Janah kerina tinepa Dibata  saling berhubungan sada ras sidebanna. Enda ibahan Dibata gelah kita manusia banci nggeluh ibas doni enda, dat kebutuhen guna nggeluh ibas tinepa Dibata nari. Tapi kegeluhen manusia la terjeng e saja, tapi tugas manusia (kita) eme njaga ras ngusahai tinepa Dibata e (band. Kejadin 1:28).

            Kiniulin tinepa Dibata arus arus sikataken bujur, sebab Dibata siisembah kita e, Dibata sierkuasa ras Dibata siperkeleng. Arah tinepaNa kita banci nggeluh. Tapi pengataken bujurta man Tuhan, la saja terjeng perkatan, tapi arus arah perbahanan. I ja kita arus njaga ras melestarikan tinepa Tuhan si mejile e. Tapi siidah nterem denga kita si la nggit njaga tinepa Dibata simejile e, sebab lit denga penebangan-penabangan kayu i karangan secara liar (ilegal loging), mbuang sampah sembarangan, rsd. Situhuna perbahanen sibage eme perbahanan sila mbiar man Tuhan. Erkiteken sie me tugas ras tanggungjawabta eme ertoto man Tuhan gelah Tuhan mpersingeti ia, gelah ngadi ibas perbahanen sibage. Bagepe arus pang kita ngataken man senina turangta gelah ula nari erbahan si la mehuli, sincedai tinepa Tuhan. Sebab adi mpediat senina turangta tetap ncedai, bagepe la lit tanggungjawabta njaga tinepa Tuhan, maka kita sirugina, sebab sada paksa terjadi banjir, persediaan lau  berkurang, janah banci ka keri, bagepe lapisan oson singgo bocor banci ergalangna, alu bage panas matawari lanai lit penghalangna, sierbahanca ngisa kita tading ibas doni enda. Jadi guna njaga kiniulin Dibata arus lit tanggungjawabta, bagepe kegeluhen simbiar man Tuhan.

Pdt. Steven Kumenit, STh.M.Min.