Enggo Ku Angka Perbahanen Dibata (2 Korintus 12:7-10)

PERPULUNGEN JABU – JABU

GEREJA GBKP

TANGGAL 12 – 18 MARET 2017.

II Korinti 12 : 7-10.

Tema : Enggo Ku Angka Perbahanen Dibata

LATAR BELAKANG

1.      Secara umum surat 2 Korinti, ibas rangka mereken ketetapan ukur man man perpulungen Korinti, sebab idah Paulus perpulungen Korinti nggeluh ibas persoalan, khususna kerna Rasul. Sebab tupung rasul Paulus ngelai i perpulungen Korinti, reh rasul-rasul palsu singataken maka eksistensi kerasulan Paulus iraguken. Bagepe itonjolkanna kerna pengalaman-pengalaman rohanina ras itonjolkenna surat kuasa i Yerusalem nari. Emaka turah penungkunen man perpulungen eme ise rasul situhu-tuhu e.

2.      Ibas situasi enda me rasul Paulus la saja mbela diri tapi sekaligus nerang imbang-imbangna. Siikataken Paulus eme situhuna lit potensi man Paulus guna meganjang ukur, sebab lit pengalaman rohani Paulus eme litna pengenehenenna empat puluh empat tahun si lewat sekalak kristen terangkat ku surga (situhuna Paulus ngerana kerna dirina sendiri), janah enda merupaken pengenehenen si mejin. tapi lit duri ibas daging simerupaken persuruhen si iblis, gelah la ia meganjang ukur. Sebab duri e mereken man Paulus kelemahan. Siimaksudkan kelemahan eme Paulus ndatken pinakit, kesukaran-kesukaran ibas pelayanan, kiniseran, rsd. Enda merupakan persuruhen si iblis gelah Paulus banci nadingken kerasulenna ras la nggit ngelai.

3.      Bagi Paulus enda merupakan sada kendala ibas pelayanan, erkiteken sie me telu kali Paulus ertoto man Dibata, gelah Dibata mpedauh kerina e. Tapi jawaban Tuhan eme cukup kap lias ateKu man bandu, sebab gegehKu sertakap ibas gegeh sikurang. Ibas erti kata Tuhan tetap nemani ras mereken gegeh, bagepe kengasupan man Paulus guna ngelai. Erkiteken sie me meriah ukur Paulus ngaloken gegeh sikurang e, gelah Kristus ipeganjangkan ibas pelayanan-pelayanan Paulus, bagepe ibas diri Paulus sendiri. Ibas erti kata gelah Paulus la jadi kalak simeganjang ukur. Janah ibas keadaan sibagenda rupana me Paulus meganjang ukur. Labo ibas kelebihan-kelebihan.

4.      Ibas bahan oratenta sendah ate Paulus mereken penjelasan man perpulungen Korinta kerna : 1). Rasul-rasul Palsu la perna nggejapken kerna kiniseran-kiniseran ibas pelayanan, si bali inanami Paulus. 2). Lit pemere-pemere Kesah man diri Paulus eme pengenehenen. 3). Meganjang ukur kerna kehebatan la lit ertina. 4). Adi sisadari ras sigejapken kerna kelemahanta, janah kerina e iendesken man Tuhan, maka kita banci jadi kalak kristen si sejati.

5.      Ibas Paulus mereken sada argumen kerna ise ia, khususna kerna kelemahan-kelemahanna (duri ibas daging), terdauhen ate Paulus ngataken gegeh Dibata teridah ibas kelemahan manusia. Sebab Dibata tetap nemani ras mereken kengasupan man manusia guna ngasup megegeh ngalaken kerina perbeben ras kiniseran. jadi Paulus banci megegeh amin gia lit duri ibas daging, erkite-kiteken gegeh Kristus si lit ibas dirina.

APLIKASI

            Enggo ku angka perbahanen Dibata, enda min penggejapan ibas kegeluhenta. Emaka amin gia kita nggeluh ibas perbeben ras kiniseran, la ateta kiam ku ingan-ingan sideban, tapi tetap kita megenggeng, sebab ibalik perbeben ras kiniseran lit sura-sura Tuhan bas kita.

            Memang siidah mekatep la kita ngasup ngaloken ntah pe lit duri lit ibas daging, erkiteken sie me mekatep jungut-jungut, merawa, bagepe nggeluh ibas keputus asaan. Enda arus siinget, la mabai kita nggeluh ibas kedamen, kemalemen ate, khususna keselamatan.

            Tuhu lemah kita, tapi la bo berarti la banci kita erkai pe, khususna la ngasup kita ngalaken perbeben ras kiniseran. siingetlah Tuhan siisembah kita eme Tuhan sierkuasa ras tetap ngkawali kita. Emaka gegeh kuasa Tuhan ngasup bebasken kita ibas erbage-bage perbeben ras kiniseran gelah kita tetap nggeluh ibas persadan ras Ia. Bagepe siinget ibas kita banci bebas ras pulah ibas perbeben ras kiniseran nari, labo erkite-kiteken gegeh ras kengasupta sendiri, tapi enda erkiteken penampat Tuhan, sebab Tuhan ngkelengi kita. Emaka marilah kita nggeluh ibas positif thingking, gelah ibas kita jumpa perbeben ras kiniseran la kita putus asa ras mpersalahkan kalak sideban, ntah pe Tuhan.

            Duri si lit ibas daging adi sinen arah kaca mata kiniteken eme gelah sigejapken kita enda manusia lemah, banci kita megegeh adi Tuhan sinampati kita. Emaka adi sakit kita, marilah sipindo penampat man Tuhan, janah tetap megenggeng ras sabar nimai penampat Tuhan. sebab siteh arah pinakit, kita banci mpermuliakan Tuhan.emaka amin gia sakit kita, ula luntur kita ngerembakken diri man Tuhan.

            Khusus man banta, adi lit temanta sisakit, maka tanggungjawabta, ras keterpanggilenta eme ngapuli (mereken semangat), totoken ras nampati (materi) ia.

Pdt. Steven Kumenit, STh.M.Min.

Tuhan Kap Sekawalku (Mazmur 121:1-8)

KHOTBAH TANGGAL 12 MARET 2017.

GEREJA GBKP

Invocatio      :    TUHAN Dibata kami maba kami ras bapa kami i bas perbudaken nari i Mesir, janah idah kami tanda kuasa si ibahanNa. IjagaiNa kami gelah terkelin ku japa pe kami mentas arah tengah-tengah bangsa-bangsa si ibentasi kami (Josua 24:17)

Ogen             :    Johanes 3:1-17 (Responsoria).

Khotbah       :    Mazmur 121:1-8 (Tunggal).

Terma           :    Tuhan Kap Sekawalku

LATAR BELAKANG

1.      Sijadi bahan khotbahta sekali enda eme igelari Mazmur Ziarah, sebab enda iendeken tupung bangsa Israel ibas perdalananen, subuk ku Yerusalem, bagepe mulih i Yerusalem naru ku inganna masing-masing. Janah sekaligus merupakan pengakun kerna kuasa ras keleng ate Tuhan nandangi bangsaNa.

2.      Pemazmur simewakili peziarah ngenen pertolongan situhu-tuhu rehna ibas Tuhan nari, labo arah deleng-deleng. Memang perlu siteh, bangsa Israel  arus reh ku Yerusalem guna ersembah ras nehken persembahan man Tuhan, minimal telu kali setahun, eme wari raya Paskah, wari raya Pentakosata ras wari raya pondok daun). Bagepe ibas perdalanen e siman bentasen eme “padang gurun ras deleng-deleng”. Tentuna enda mbaba ancaman tersendiri man peziarah. Sebab la saja ibentasina padang gurun tapi bahaya sideban, sebab banci saja i jumpaina rubia-rubia, perampok, sebab melala bekal siibaba peziarah ku Yerusalem ras mulih i Yerusalem nari ku inganna masing-masing. Bagepe cuaca siektrim. Janah cuaca enda, la saja si jadi kebiaren eme matawari, sebab tupung suari las matawari e banci mereken ”ketidak nyamanan”, tapi pe kenca berngi sinalsal bulan, banci erbahanca peziarah bangger. Perlu siteh ibas kepercayaan zaman kuno, sinalsal bulan banci kita sakit, khususna sakit jiwa. Alu igejapken peziarah ngeri kap erdalan ibas situasi ras keadaan sibage rupana. Emaka nungkun ia, ise sibanci nampati ia.

3.      Ibas penungkunen pemazmur enda, i nenna Tuhu melala deleng-deleng siman bentasen, deleng-deleng e tuhu tempa megegeh, sebab nai deleng-deleng si lit i Yerusalem ras sekitarna, banci jadi ingan cebuni, cicio, ras ingan ersembah. tapi kerina e la mereken jaminan keselamatan. Sibanci mereken keselamatan eme Tuhan saja. Sebab Tuhan sinjadiken kerina si nasa lit (langit ras doni). Perlindungan Tuhan erbahanca peziarah aman, emaka banci ia seh i rumahna alu mejuah-juah. Perlindungan Tuhan man peziarah, erkite-kiteken peziarah enda bangsa Israel. Bangsa Israel eme bangsa Tuhan, emaka  Tuhan sijadi pengawal man bangsana guna mbebasken bangsaNa ibas kerina marah bahaya nari.

4.      Ende-enden ziarah enda mereken sada ketetapan ukur man peziarah gelah peziarah la perlu mbiar ibas ngelakokan perdalanan, subuk reh ku Yerusalem guna ersembah ras mereken persembahan, bagepe tupung peziarah mulih ku inganna.

5.      Ate pemazmur gelah bangsa Israel ibas kegeluhenna, khsususna ibas perdalanan arus mengandalkan Tuhan. sebab Tuhan banci mereken perlindungan ras kegeluhen man bangsa Israel.

APLIKASI

            Tuhan kap sekawalku, eme ngataken maka Tuhan mereken jaminan ibas kegeluhenta tep-tep wari. Tuhu melala perbeben ras kiniseran sibanci sijumpai. Tapi erkiteken kita anak-anakNa (bangsaNa), maka ikawalina kita gelah la kita guling, ntah pe nggeluh ibas dosa.

            Tek kita, Tuhan siisembah kita eme Tuhan sierkuasa ras Tuhan singkawali kita (berimanuel). Alu bage la lit Dibata sideban siseri kuasana ras Tuhan siisembah kita. Memang siidah ras sibegi, lit kalak ersembah ibas deleng-deleng bage ibas ingan-ingan sideban (karangen, batu sigalang ras pohon sigalang), termasuk matawari ras bulan. Tapi kerina e la mereken ketenangan ras kedamen. Tuhan ngenca simereken keselamatan man banta, emaka sia-sia kalak siersembah ras mindo penampat ibas ingan-ingan tertentu.

            Yesus Kristus eme Tuhan (Imanuel) eme ulu keselamatan. Alu bage la lit keselamatan i luar Tuhan. enda me siigejapken Nicodemus. Erkiteken sie me reh ia man Yesus. Tapi guna ndatken keselamatan arus tubuh pedua kaliken. Ibas erti kata arus nggeluh ibas pertobatan.

            Kita patut ngataken bujur man Tuhan, sebab ibas keleng ateNa nggo mbebasken  kita ibas perbudakan iblis nari (bdk. Invocatio), kita nggo nggeluh ibas keselamatan. Janah tek kita, Ia ngenca sibanci mereken keselamatan (totalitas kegeluhen manusia) ras ngkawali kita. Emaka tek lah kita man Tuhan gelah kita tetap nggeluh ibas keselamatan. Janah man Tuhan saja kita ersembah.

Pdt. Steven Kumenit, STh.M.Min.

Kesangapen Sekalak Diberu (Hakim-Hakim 4:4-10)

PERPULUNGEN JABU-JABU

GEREJA GBKP

TANGGAL 5 – 11 MARET 2017.

Hakim – Hakim 4 : 4-10.

Tema : Kesangapen Sekalak Diberu.

LATAR BELAKANG

1.      Bangsa Israel selaku bangsa Tuhan nggo erdosa i lebe-lebe Tuhan. Erkiteken sie me Dibata mereken bangsa Israel man Jabin, sekalak raja kalak Kanaan. Iperentahna bangsa israel alu kejam, janah mesui kal ate bangsa Israel ibahanna. Emaka erlebuh bangsa Israel mindo penampat man Tuhan.

2.      Dibata megiken pemindon bangsa Israel, emaka isuruhNa Debora, sekalak nabiah guna mbebasken bangsa Israel. Emaka Debora si nggo dat perentah Tuhan e, nuruh si Barak anak Abinoam gelah muat sepuluh ribu kalak ibas suku Naptali ras Sebulon nari guna erperang ras Sisera puanglima Jabin. Tapi tempa-tempa barak la percaya diri, emaka ipindona gelah Debora pe ikut. Tapi nina Debora la bo kam kari si dat kehamatan tapi aku (Debora).

3.      Amin gia isuruh Tuhan Debora ras Barak erperang ngelawan puanglima Sisera, tapi labo berarti kemenangan sibakal idat Debora ras Barak erkiteken kepentarenna, tapi erkiteken kuasa ras kehebaten Tuhan. Debora, Barak ras tetera e alat Tuhahn ngenca.

4.      Kehebatan kai pe siimiliki puanglima Sisera, adi Tuhan nggo muat sada kepetusen guna mbebaskan bangsaNa, ise pe la banci nahansa.

5.      Debora eme alat Tuhan guna mpeseh sura-sura Tuhan. Janah tujun Tuhan gelah bangsana nggeluh ibas kebebasan. Erkiteken sie maka Debora patuh man Tuhan, emaka erkiteken Tuhan berpihak man bangsa Israel, janah sura-sura Tuhan mbebasken bangsa Israel, maka pang Debora mimpin tentera guna ngelawan puanglima Sisera.

APLIKASI

            Temanta kesangapan sekalak diberu eme ketika diberu banci ncidahkan ras mengeksplore eksistensina ibas kegeluhenna tep-tep wari. Isamping sie diberu eme jadi ibu rumah tangga simehuli, ngasup ndungi masalah-masalah si lit (rumah tangga), bagepe jadi teman si cocok man perbulangan ibas ndalankan kai singena ate Tuhan. Jadi ezer (penolong).

            Kesangapan si deban man sekalak diberu eme adi deberu mereken kesempatan ras menghargai man dilaki ibas ndahiken dahin-dahin tertentu, simerupakan dahin dilaki. Tapi kesangapan simbelin man sekalak diberu eme ibas kepatuhen man Tuhan Dibata.

           

Pdt. Steven Kumenit, STh.M.Min.

Nggeluh Ibas Perkuah Ate Dibata (Roma 5:12-19)

KHOTBAH MINGGU TANGGAL 5 MARET 2017.

GEREJA GBKP

Invocatio    :    Ia kap Dibata si dem perkuah ate. Labo kam itadingkenNa, labo kam ikernepkenNa. La Ia lupa perpadanen si ipadankenNa jine ras nini-ninindu (Ulangan 4:31).

Ogen          :    Mazmur 32:1-11 (Tunggal).

Khotbah     :    Roma 5:12-19 (Anthiponal).

Tema          :    Nggeluh Ibas Perkuah Ate Dibata.

LATAR BELAKANG

1.      Bahan khotbahnta sekali enda ngerana kerna salah sada teologi Paulus eme kerna perkuah ate (pembenaran - Sola Gratia). Ibas teologi Paulus enda, ate Paulus ngataken maka keselamatan manusia erkiteken perkuah ate Tuhan, la bo erkiteken gegeh ras kengasupen manusia.

2.      Pembenaren/Sola Gratia ibereken Tuhan erkite-kiteken manusia kenca nggeluh ibas dosa, manusia la ngasup nelamatken diri, ntah pe nggeluh ibas keselamatan. Erkiteken manusia nggo erdosa, maka manusia e nggeluh ibas kematen. Sebab manusia la  ngasup la erbahan dosa.

3.      Paulus nuriken kerna asal usul dosa. Awalna dosa ngkenai sekalak manusia (Adam) tupung Adam itamaken Tuhan i Peken Eden. I peken Eden nggo ilarang Tuhan gelah Adam la banci pan pohon simereken pemeteh kerna sibujur ras sijahat  (Kej.2:16-17). Larangan e ibas rangka nguji kerna kepatuhen manusia, sebab ibas kepatuhenna e teridah Adam patuh nandangi perentah Dibata. tapi enda la teridah man Adam.  Adam la patuh man Tuhan. Adam ndabuh ku bas dosa. Emaka tempas Dibata man manusia (Adam) ceda. Erkiteken Adam manusia si pemena nggo erdosa, dungna kesusurenna ikut erdosa (dosa turunan). Emaka ibas manusia nggo erdosa maka kegeluhen manusia lalap mpraktekkan si la ngena ate Tuhan. Yohanes Calvin ibas bukuna Institutio ngataken : dosa turunan adalah suatu kerusakan dan kebejatan kodrat kita yang turun temurun, yang sudah tersebar ke semua bagian jiwa, dan membuat kita pertama-tama layak ditimpa kemurkaan Allah, kemudian menimbulkan dalam diri kita perbuatan-perbuatan yang oleh Alkitab dinamakan “perbuatan-perbuatan daging”.

4.      Erkiteken dosa maka manusia nggeluh ibas kematen (bdk. Roma 6:23), tapi erkiteken lias ras perkuah ate Tuhan, ibereken Tuhan sada pemere man manusia, siarusna la metunggung manusia ngalokenca eme manusia ibenarken. Manusia i benarken ibas kematen Yesus Kristus (Adam si peduaken). Ibas kematen Yesus Kristus, kerina dosa manusia lanai iperhitungken Tuhan. Tuhan lanai ertaktak ibas kerina dosa-dosa manusia.

5.      Ibas manusia ibenarken berarti manusia nggo ialoken Tuhan. Jadi pembenaren simerupaken lias ate Tuhan man manusia merupaken sada keselamatan man manusia, sebab dosa-dosa manusia nggo ialemi Tuhan. ibas erti kata ibas kepatuhen Yesus Kristus nandangi Bapa sinuruh Ia, maka manusia nggo iperembakkan ras Dibata.

ALIKASI  

            Perlu siteh adi kita ngerana kerna dosa, la lit istilahna kitik ntah mbelin, janah dosa eme simereken kematen man banta. Alu bage kita lanai nggeluh ibas keselamatan. Tapi kita banci tetap nggeluh ibas keselamatan, adi kita jera ibas dosa-dosa nari. Tapi arus siteh lebe ibas lias perkua ate Tuhan kita nggo nggeluh ibas keselamatan. Adi nai kegeluhenta nggeluh ibas pernembeh ate Tuhan, tapi erkiteken kita nggo ibenarken arah Yesus Kristus maka kita nggo nggeluh ibas kebenaren.

            Perlu siteh perbahanen si la ngena ate Dibata (dosa), tentuna lit hukumenna, tapi erkiteken perkuah ate Dibata, kita iselamatkan. Emaka kita singgo nggeluh ibas perkuah ate Dibata arus ikuti kai siisura-suraken Dibata. Bagepe kita singgeluh ibas perkuah ate Dibata arus pe sikataken arah kata ras perbahanen, gelah kalak sideban pe meteh kerna keselamatan singgo ibereken Tuhan man banta. Emaka ipraktekkenna nggeluh ibas perkuah ate eme la egois, cian, rsd.

            Kalak singgeluh ibas perkuah ate Tuhan, berarti la atena sea-sea ken kerna kegeluhenna, nggeluh ibas pengataken bujur. Sebab  kita enda nggo ceda, kita situhuna la ngasup ndatken keselamatan, janah tek kita adi nggeluh ibas dosa, maka kita nggeluh ibas kiniseran, ras la lit kemalemen ate/kesangapan. Siakuken i lebe-lebe Dibata ras jera ibas dosa-dosa nari ras ialemi Dibata dosanta maka kita banci nggeluh ibas kesangapan. Tapi ipersingeti man banta adi nggo ialemi Dibata dosanta, maka ula nari sibahan dosa ibas kegeluhenta.

            Uga pa pe mbelinna dosa, hebatna dosa, tapi mbelinen perkuah ate Tuhan, sebab perkuah ate Tuhan mpereh keselamatan. Tapi dosa mbabai kita lalap ersalah si banci mabai kita la saja sakit, tapi lebih asangken sie eme kematen. Emaka ula kita menganggap enteng ibas kita nggeluh ibas dosa.

Pdt. Steven Kumenit, STh.M.Min.