Persadan si Mpeturah Kemalemen Ate.(Perbahanen Rasul – Rasul 2 : 43-47)

PERPULUNGEN JABU-JABU (PJJ)

GEREJA GBKP

TANGGAL 18 – 24 JUNI 2017.

Perbahanen Rasul – Rasul 2 : 43-47.

Tema : Persadan si Mpeturah Kemalemen Ate.

LATAR BELAKANG.

1.      Nusurna Kesah Si Badia sincenepi rasul-rasul mpengasup rasul-rasul mberitaken Berita Si Meriah arah khotbah, tanda-tanda sengget ras kejadin-kejadin si mejin. Erkiteken sie lit 3000 kalak  tek man Yesus Kristus. Janah kalak si tek enda tutus pulung megiken pengajaran rasul-rasul (dogma), sierbahanca kerina kalak sitek nggeluh sikeleng-kelengen. Tandana ia nggeluh sikeleng-kelengen eme kalak si lit bas ia, idayakenna taneh ras erta-ertana, janah iberekenna man kalak musil sue ras keperlunna sekalak-sekalak. Ibas perbahanen sibagenda rupana eme tutus pulung ersembah man Tuhan ras nggeluh sikeleng-kelengen, maka alu la isadarina enda merupaken kesaksin singgeluh. Emaka ngena ata kalak man perpulungen e, si erbahan tep-tep wari itambahkan Tuhan jumlah perpulungen e.

2.      Perbahanen si mehuli siicidahken kalak sitek ibas persadanna erkite-kiteken lit pertobatan ras mbuka dirina guna ikuasai Kesah Si Badia. Alu bage kerina anggota persadan nggecapken kerina si lit bas ia milik bersama. Alu  bage kebutuhen kalak sitek tercukupi.

3.      Perlu siteh, anggota persadan sindayakan taneh ras erta-ertana eme anggota persadan sibayak, janah sidayakenna e me sebagin ngenca ibas taneh ras erta-erta e.

4.      Palas perbahanen simehuli eme tek ras nggit pulung ibas rumah pertoton guna ertoto man Tuhan, janah ibas gegeh Kesah Si Badia kerina kalak si tek ikuasai Kesah Si Badia emaka perbahanen-perbahanen simehuli singena ate Tuhan ilakokenna. Bagepe pertambahan jumlah persadan, erkite-kiteken Tuhan sinambahisa. Arah persadan simehuli, idilo Tuhan kalak si lenga tek man baNa guna bengket ibas persadan e. Alu bage kalak si reh iperidiken janah tek man Yesus Kristus selaku Tuhan ras juru selamat manusia.

5.      Perbahanen simehuli simerupaken ulih Kesah Si Badia erbahanca, nterem kalak iselamatkan. Janah kalak singgo iselamatkan lanai nggeluh sisada-sisada (egois), tapi nggeluh ibas ikatan persadan sierpalasken kekelengen.

APLIKASI

            Persadan sierpalaskan kekelengen, janah ikuasai Kesah Si Badia, erbahanca persadan e megegeh ras la nggeluh ibas keegoisan, sebab kerina nggeluh saling membutuhkan sada ras sidebanna. Ibas persadan simegegeh enda me teridah nggeluh ibas keleng ate (diakonia) ras pemberitaan Kata Dibata (Marturia).

            Gereja GBKP idilo guna keselamatan i bas doni enda. Perlu siteh ibas pelayanan siisehken gereja (kita), lit dua hal, eme:  1). Njaga keselamatan singgo ibereken Tuhan man banta. Bentuk gereja GBKP njaga keselamatan e me arah nggeluh persadan ras nggeluh ibas kekelengen. Erkiteken sie me persadan gereja GBKP icidahkan arah ertoto ras ersembah man Tuhan ibas kebaktin minggu, PJJ ras PA Kategorial, rsd. 2). Nehken pelayanan kekelengen (diakonia). Makna pelayanan diakonia enda, gelah keleng ate Tuhan banci igejapken. Pelayanan diakonia enda la saja ibereken man kalak si kurang mampu, tapi man kalak si tuhu-tuhu mbutuhken kekelengen. Emaka pelayanan diakonia enda la banci berbentuk materi, tapi mereken gegeh arah toto ras mpendampingan. Erkiteken sie me ibas tata laksana GBKP pasal 1 point 4 ikataken sebagian besar anggaran gereja subuk irencanakan, bagepe irealisasikan, iperuntukkan guna kekelengen. Enda berfungsi gelah gereja jadi gereja situhu-tuhu (gereja si ideal).

            Bagepe keselamatan siisehken gereja eme nandangi kalak si lenga tek man Tuhan (njalai kalak si lenga tek man Yesus Kristus – memenangkan petobat baru). Janah enda ilakoken gereja ibas dua hal : 1). Ber PI. GBKP arah pelayananna nehken berita simeriah ku ingan-ingan si i je lit kalak si lenga tek man Yesus Kristus. Genduari GBKP sangana melayani i suku anak dalam (Palembang). 2). Pelayanan kekelengen nandangi kerina jelma.

            Persadan eme alat pelayanan, emaka siarus ibahan gereja (PJJ) eme ernanam min persadan e. Gelah ernanam man anggota persadan, siarus ilakoken PJJ eme 1). Nggeluh ibas gegeh Kesah Si Badia. 2). Tutus pulung. 3). Cian ate arus iambengken. 4). Ibas nehken kekelengen (diakonia) ula rayo-ayo. 5). Diakonia ula jadi alat hukuman. Sebab diakonia berbeda ras STM. Diakonia berfungsi nehken pelayanan alu kekelengen. Jadi amin gia lit senina turangta kurang aktif ibas persadan, janah ibas sada paksa kita arus mereken pelayanan diakonia man bana, maka arus sisehken tanggungjawab gereja man bana.

            Ibas pelayanan persadan sibage rupana, tentuna ernanam man banta ras man kalak sideban. Emaka anggota persadan e nggeluh ibas kemalemen ate sebab kerina irakut ibas sada gegeh Kesah Si Badia.

Pdt. Steven Kumenit, STh.M.Min.

Jadi Terang Doni (Matius 5:13-16)

KHOTBAH TANGGAL 18 JUNI 2017.

GEREJA GBKP

Invocatio      : KataNdu kap tendang man nahengku, nerangi dalan sikudalani (Mazmur 119:105).

Ogen        :    Johanes 17:20-23 (Tunggal).

Khotbah   :    Matius 5: 13-16 (Tunggal).

Tema        :    Jadi Terang Doni.

LATAR BELAKANG

1.      Sijadi bahan khotbahnta sekali enda eme bagin ibas khotbah Yesus i datas uruk. Ibas khotbah enda Jesus ngerana kerna  kalak si tek arus bagi sira. Fungsi sira eme mereken ketabehen/nanam ras mencegah makanan gelah la macik, bagepe anti septik. Emaka kalak si tek arus ernanam, jadi teladan ras ngelawan perbahanen-perbahanen si la mehuli. Bagepe terang eme kalak sitek arus ncidahken perbahanen-perbahanen si mehuli si jadi penuntun jelma sinterem. Jadi kalak si tek arus lit pengaruhna ibas kegeluhenna tep-tep wari, amin gia jumpa kiniseran. Alu jadi sira ras terang maka teridah jati diri ajar-ajar Yesus ras jelma sinterem simegi khotbah Yesus e.

2.      Perlu siteh i Palestina garam ibuat ibas kolam-kolam  si dangkal ras laut mati nari. Sira enda siberupa “batu” e banci jadi tawar, janah biasana kenca lanai masin, batu e iambengken saja. Kerna lampu. I daerah Palestina lampu itamakan i ruangan galang, ruangan sipake bersama, janah i tamakan i datas. Tujunna gelah lampu banci nerangi ruangen e. Bagepe melala rumah-rumah i datas uruk, maka terang lampu banci teridah.

3.      Ajar-ajar ras jelma sinterem iajuk gelah banci jadi sira ras terang ibas doni enda. Sebab idah Yesus doni singgo ikuasai dosa, ras nggeluh ibas kegelapan, banci mpengaruhi kegeluhen kalak si tek ku kegeluhen si la ngena ate Tuhan. Emaka ajar-ajar ras jelma sinterem idilo gelah jadi sira ras terang. Maksudna amin gia jelma sinterem ras ajar-ajar ikategoriken minoritas, bagepe si hanya memiliki ketedehen ate kerna kebenaren, ras memiliki pusuh simeciho simerupakan senjata satu-satunya arus ernanam man kalak sideban, bagepe arus ngelakoken simehuli singena ate Tuhan, gelah kalak sideban banci ngidah kerna kebenaran, kekelengen, keadilan, rsd. Janah enda merupakan lampu nandangi kalak si deban.

4.      Ajar-ajar Yesus ras jelma sinterem arus jadi sierguna nandangi jelma sinterem, sebab adi la erguna maka ajar-ajar Yesus ras jelma sinterem la iperhitungken kalak, sebab nggo bene masinna. Bagepe adi terang la ersinalsal maka ajar-ajar ras jelma sinterem la jadi terang nandangi jelma sinterem. Alu bage fungsi terang la lit. Padahal adi terang e ersinalsal maka jelma sinterem muji Dibata si i Surga.

5.      Khotbah Yesus siisina mereken pengajaran ras ndilo jelma sinterem ras ajar-ajar Yesus jadi sira ras terang doni. Sebab searusna min guru-guru agama, imam simbelin, kalak farisi simeteh surat arus ndalanken fungsi sebage sira ras terang doni la ndalankenna. Padahal kalak Israel (Yahudi) idilo ibas rangka nehken keselamatan i tengah-tengah doni enda arah kata ras perbahanen.

APLIKASI

            Jadi terang doni la segampang bagi kita ngerana, sebab enda perlu irealisasikan ibas kegeluhenta tep-tep wari. Jadi terang doni berarti banci jadi penuntun man kalak sideban arah perbahanenta tep-tep wari si ngena ate Tuhan. Sebab arah perbahanen simehuli kita nggo nerangi man doni enda sidem alu keguluten (gelap). Kita banci jadi terang adi kita nggeluh ibas ulu Terang e, eme Yesus Kristus. Sebab nina Tuhan Yesus “ Aku kap Terang doni” (Yohanes 8:12). Perlu siteh ibas kita nggeluh ras ulu Terang berarti kita nggeluh ibas persadan ras Yesus Kristus. Emaka nggeluh ibas persadan ras Yesus berarti nggit kita nggelakoken perbahanen kerna persadan simehuli, bagepe ncidahken kekelengen, kebujuren, keadilen, rsd. Bagepe erkiteken kita nggeluh ersada ras Yesus maka, siarus lit man banta eme megiken ras ndalanken kataNa. Sebab ibas kita ndalanken kataNa maka enda sinerangi kita nggeluh tep-tep wari. Kita ngasup meteh kerna kebujuren ras kebenaren siarus sidalanken.

Alu bage kita banci mereken nanam ras nuduhken dalan man jelma sinterem, gelah idalankenna perbahanen-perbahanen simehuli singena ate Tuhan. Perbahanen-perbahanen simehuli sibage me dungna  nggo ia muji Tuhan. Jadi kegeluhen si gelap ibas doni enda, simbaba kematen man banta, tapi erkiteken kita mbaba terang man doni enda, maka kegeluhen sialoken kita.

            Kita simerupaken gereja arus nggeluh secara inklusif, la banci nggeluh sisada. Ibas nggeluh siinklusif berari kita nggo nggeluh “larut” gelah amin gia la idah kalak, tapi banci ernanam man jelma sinterem. Bagepe jadi terang amin  gia ndarat nari kita, tapi banci jadi petunjuk arah perdalanen si mehuli. Janah enda pe banci jadi intropeksi man kita. Alu bage perbahanen si la mehuli salih jadi simehuli, termasuk pe kita jadi simehuli. Bagepe me kita selaku gereja (GBKP) si tergabung ibas UEM, ncidahken gereja GBKP la nggeluh ibas eksklusif, tapi inklusif. Ibas erti kata radu ras gereja sideban saling erlajar sapih-sapih gereja, jenari radu jadi sira ras terang ibas doni enda.

           

Pdt. Steven Kumenit, STh.M.Min.

GegegehNdu Kap Gegehku (Yohanes 14:26-27)

PERPULUNGEN JABU-JABU (PJJ)

GEREJA GBKP

TANGGAL 11 – 17 JUNI 2017.

Yohanes 14: 26-27.

Tema : GegegehNdu Kap Gegehku.

LATAR BELAKANG

1.      Sijadi oratenta eme kata pergegeh Yesus man ajar-ajarNa ope denga Yesus nangkih ku surga, tepatna kenca dung Yesus man ras ajar-ajarNa. Ibas kata pergegeh enda, Yesus ngerana kerna Kesaha Si Badia ras fungsina nandangi ajar-ajar Yesus. Ajar-ajar arus meteh, Yesus nangkih ku Surga, labo berarti Yesus nadingken ajar-ajar sisada ibas doni enda, tapi lit Kesah Si Badia sinemani ajar-ajar seh rasa lalap ibas mberitaken kerna kebenaren, sebab Kesah Si Badia pe ersaksi kerna kebenaren.

2.      Kata pergegeh siibereken Yesus gelah ajar-ajarNa la mbiar ibas doni enda ras pang ndalanken tanggungjawabna simbaru eme nerusken pelayanan i tengah-tengah doni enda. Memang tuhu kesirangen Yesus ras ajar-ajarNa, mbaba kecedan ate man ajar-ajar Yesus. Tapi ibas penampat Kesah Si Badia, ajar-ajar Yesus la perlu mbiar, sebab Kesah Si Badia sinemani ajar-ajar.

3.      Pengajaren Yesus kerna keselamatan nggo idengkehken ajar-ajar, tupung Yesus ngerana ras ncidahken man ajar-ajar kerna kai siarus idalanken ibas doni enda, gelah doni enda nggeluh ibas keselamatan. Pengajaren enda me siarus iberitaken ajar-ajar man doni enda. labo pemeteh ras kepentaren ajar-ajar jine siarus ipeseh nandangi doni enda. Arus siteh melala pengajaren Yesus singgo ipesehNa man ajar-ajarNa, banci saja la inget ajar-ajarNa. Tapi erkiteken Kesah Si Badia, maka Kesah Si Badia e singajari ajar-ajar guna mpeseh kai singgo iajarken Yesus man bana. Maka ajar-ajar lanai perlu mbiar.

4.      Biasana kesirangan mbaba kecedan ate, tapi ibas kesiringan Yesus ras ajar-ajarNa, erkite-kiteken Yesus arus ipermuliaken, Yesus mulih ku asalna eme Surga, maka nina Yesus malem me ate kam ku tadingken. Perlu siteh kemalem ate siibereken Yesus, la seri ras kemalemen ate siibereken doni enda. emaka kemalemen ate e labo la lit perang, ntah pe aman ras tentram sue ras ukuren doni, tapi kemalemen ate siibereken Tuhan eme keselamatan ras kegeluhen si erpalasken keleng ate Tuhan. Tapi kemalemen ate e ibereken man kalak si tek ras ndalanken kataNa ibas kegeluhenna tep-tep wari. Bagepe kemalemen ate enda, erkite-kiteken ajar-ajar meteh kelawesen Yesus eme ku surga. Singatakenca maka Yesus eme Tuhan ras erkuasa, bagepe reh ibas surga nari. Jadi kemalemen ate siibereken Tuhan man kalak si tek eme lebih asangkan siinanami manusia eme puas, senang ntah pe la lit konflik, tapi  kemalemen ate si kuh (lahir dan batin).

5.      Alu litna kata pergegeh enda, maka ajar-ajar Yesus termotivasi ras pang ndalanken kebenaren, sebab Kesah Si Badia ras ia kerina.

APLIKASI

            Perlu sisadari gegehta terbatas ibas ndalanken kai singena ate Tuhan ibas doni enda. bagepe banci kita erdosa adi kita jumpa perbeben ras kiniseran. Tapi patut sikataken bujur man Tuhan, sebab Kesah Si Badia simerupaken Tuhan sendiri mereken gegeh man banta guna banci naluken erbage-bage siterjadi man banta, termasuk si la bagi ukurta. Kita banci ndatken serpang pulah ibas erbage-bage perbeben ras kiniseran e. Janah megegeh ndalanken kai singena ate Tuhan. Alu bage teridah ras tergejap man banta, erkiteken keleng kal ate Tuhan man banta, janah la ateNa kita sirang ras Ia, maka gegeh Kesah Sibadia mereken gegeh ras mpengasup kita guna nggeluh i teruh perkuah ate Tuhan.

            Ibas pengalaman kegeluhen kalak si tek, kenca sipake gegeh ras kepentaren manusia guna ndalani kegeluhenta, maka siibahan kita eme si la ngena ate Tuhan. Bagepe adi sipake gegeh ras kepentaren manusia guna naluken erbage-bage perbeben ras kiniseran, talu kita. Kita banci nggeluh ibas dosa. Ibas kitab Jakup, je ikataken adi la lit kepentaren bas kita, ertotolah  man Tuhan (Jakup 1:5). Bagepe adi la kita ngasup ertoto erkiteken mberat siakap mersan kiniseran e, maka Kesah Si Badia nampati kita guna ertoto man Tuhan (Roma 8:26). Jadi ibas gegeh Dibata ibas kita, maka kita jadi megegeh nggeluh ras ndalanken kai singena ate Tuhan. Persoalenna genduari nterem denga kalak kristen la mereken dirina ipinpin Kesah Si badia. Nterem kalak kristen la makeken gegeh Kesah Si Badia bas ia, emaka kegeluhen si la ngena ate Tuhan me siidalanken. Emaka bagi siikataken Paulus siilakoken kita eme ula ambati pendahin Kesah Si Badia (1 Tesalonika 5:19).

Pdt. Steven Kumenit, STh.M.Min.  

Keleng ate Tuhan La Erkerin-Kerin (Ratapan 3:22-24)

PERPULUNGEN JABU-JABU (PJJ)

GEREJA GBKP

TANGGAL 4 – 10 JUNI 2017.

Perngandungen 3 : 22-24.

Tema : Keleng ate Tuhan La Erkerin-Kerin.

LATAR BELAKANG

1.      Sijadi oratenta sendah eme kata pengapul ras pergegeh man dirina sendiri erkite-kiteken kota Yerusalem ras rumah pertoton ceda. Sebab perlu siteh subuk kota Yerusalem ras rumah pertoton eme simbol kegeluhen bangsa Yehuda. Kota Yerusalem eme pusat kota ras pemerintahen, i je nari raja selaku wakil Tuhan merentah. Raja merentah la saja ibas bidang politik, sosial, tapi pe merentah gelah kalak Yehuda nggeluh ibas erkemalangen man Tuhan. Bagepe Rumah pertoton eme pusat peribadaten kalak Yahudi. Emaka adi siperdiateken, lit 3 kali setahun (Paskah, Pentakosta, Sapoh-sapoh), kalak Yahudi arus reh ku Yerusalem ersembah man Tuhan i Rumah Pertoton. Bagepe rumah pertoton e me rumah Dibata.

2.      Ibas cedana kota Yerusalem ras rumah pertoton. Bagepe ibegi Yeremia kerna tangis ras ngandung  pernanden- pernanden kenca idahna anak-anakna mate ras ndarami anakna si bene. Bagepe idahna tuhu Dibata merealisasikan padanna guna ngukum bangsaNa singgeluh la nai setia ras erkemalangan man bana. Tuhu-tuhu turah kecedan ate man Yeremia. Tapi amin bage gia, ibas perenungen pribadi Yeremia, janah enda merupaken pengapul ras pergegeh Yeremia man dirina sendiri. Nina Yeremia lenga bo keri keleng ate Tuhan. Keleng ate Tuhan tetap nge lit. Keleng ateNa mbincar tep-tep erpagi-pagi, bali tetapna ras matawari si pultak arah timur. Janah uga pa pe perbahanen Tuhan man bangsaNa, Tuhan tetap baginna ras man Tuhan saja ia ernalem.

3.      Amin gia kerina e merupaken perbahanen Tuhan, tapi labo berarti Tuhan nggo nadingken bangsaNa. Penghukumen Tuhan man bangsa Yehuda eme bagin ibas keleng ate Tuhan. Emaka la lit palasna Yeremia ntah pe bangsa Yehuda kiam ndarami Dibata si deban guna mindo penampat ras ersembah man bana. Tuhan e tetap ngkelengi bangsaNa.

4.      Ikataken Yeremia kerna keleng ate Tuhan sitetap rasa lalap, ras tetap ia erpengarapen man Tuhan saja, sebab ibas sejarah kegeluhen bangsa Israel, ibas masa-masa si sulit Tuhan tetap nemani bangsana. Tuhan mereken serpang pulah man bangsaNa ibas erbage-bage permasalahan siihadapi bangsaNa. Alu sada catatan bangsa Tuhan arus tetap patuh man baNa. Palas enda me, Yeremia la nggit kiam ibas Dibata nari ras ernalem man Dibata sideban. Tetap Yeremia tetap erpengarapan man Tuhan, sebab ibas sada paksa Tuhan mereken serpang pulah ras nampati ia ras bangsaNa.

5.      Alu lit respon kiniteken simehuli, ngenen kerina kejadin si la bagi ukur si icidahken Yeremia, maka bangsa Yehuda tetap ernalem ras erpengarapen man Tuhan saja. Dibata tetap jadi baginna. La lit Dibata sideban ibas pusuh ras kegeluhen kalak Yehuda, seakan Tuhan Dibata saja.

APLIKASI

            Ibas kegeluhenta tep-tep wari, mekatep jumpa si la bagi ukurta. Kita ndatken pebeben ras kiniseran. Ibas kita jumpa perbeben ras kiniseran, mekatep stres kita, ntah lit senina turangta nggeluh pesimis/ masa bodoh, apai kah perbeben ras kiniseran siinanami kita ndekah. Bali si terjadi nandangi senina turangta sikorban bencana alam deleng Sinabung.

            Khusus siterjadi man senina turangta sikorban bencana alam, lit teman-temanta simengklaim, e kerina jadi erkite-kiteken rawa Dibata. Erkite-kiteken dosa siibahan senina turangta e maka Dibata menghukum alu mpereh erupsi deleng Sinabung. Kerina enda salah. Erupsi deleng Sinabung, labo erkiteken merawa Tuhan, tapi erkite-kiteken nggo seh paksa erupsi deleng Sinabung e. Terlepas ibas kerina e, banci sisungkun bas pusuhta sekalak-sekalak, apakah keleng ate Tuhan nggo keri ? emaka lit senina turangta ersembah man dibata-dibata sideban. Ntah ceda ateta erkite-kiteken seh genduari lenga keri erupsi deleng Sinabung. Keleng ate Tuhan tetap nge lit. Emaka ibas situasi ras keadaan siugapa pe. Ibas kita jumpa perbeben ras kiniseran, mari reh kita man Tuhan. Perlu siteh kita enda anak-anakNa. La ateNa kita nggeluh ibas perbeben ras kiniseran, emaka adi reh kita man Tuhan ras tetap erpengarapan man Tuhan, iberekenNa gegeh ras serpang pulah man banta. Bagepe ibas kejadin singkenai kita, mari sinen alu kaca mata kiniteken sipositif ras positif thingking kita. Sebab alu ngenen arah kaca mata kiniteken ras positif thingking kita maka bas ukurta, pasti lit kesimpulan eme lit ate Dibata mereken man banta. Termasuk erupsi deleng Sinabung, tentuna ibas wari ku lebe lit siterulin si bakal ialoken kita. Emaka kai pe si jadi bas kita ula bene kinitekenta, emaka tetaplah kita ernalem ras erpengarapen man Tuhan saja.

Pdt. Steven Kumenit, STh.M.Min.