Tuhan Si Peturahsa, Erdangkenlah”! (Yesaya 30:19-24)

KHOTBAH MINGGU, 16 JULI 2017.

GEREJA GBKP

Invocatio    :    Saber ia nimai udan si reh nandangi merdang ras udan si reh kenca rumpah page (Jakup 5:7c).

Ogen          :    Kejadin 3:17-19 (Tunggal).

Khotbah     :    Jesaya 30:19-24 (Tunggal).

Tema          :    Tuhan Si Peturahsa, Erdangkenlah”!

LATAR BELAKANG

1.      Bangsa Yehuda (Israel) eme bangsa Tuhan. Bangsa Juda ipilih lako nelamatkan bangsa-bangsa si deban. Eme selaku bangsa Tuhan, bangsa Juda arus ncidahken kegeluhen siernalem man Tuhan, nggeluh badia. Tapi kinatana, bangsa Juda nggeluh alu erbana-bana, lanai megiken kai siikataken Tuhan. Apai ka kenca igejapna nggo terancam ia, erkite-kiteken bangsa Asur simerupakan bangsa simegegeh nandangi nerang ia. Emaka padin ia mindo penampat man bangsa Mesir, siakapna banci menyaingi gegeh bangsa Asur, asangkan mindo penampat man Tuhan. Bagepe nabi-nabi simerupaken persuruhen Tuhan guna ngataken sibenar, ilawanna. Isuruhna gelah nabi-nabi ula ngerana kerna sibenar (bdk. Ayat 10). Bagepe ipajekkenna gana-gana guna isembahna. Padahal ope denga bangsa Israel bengket ku taneh Kanaan, ibas perdalanen denga, tepatna tupung bangsa Israel ngadi i deleng Sinai, ibereken Tuhan 10 pedah. Janah pedah sipemenah ras sipeduaken, Dibata merentahken gelah  ola dibata-dibata sideban seakan Tuhan, ras ula bahan gana-gana si seri ras Dibata, bagepe ula nembah man bana (bdk. Kel. 20:3-4). Tuhu-tuhu bangsa Tuhan enda nggo erdosa.

2.      Kinilasetiaan bangsa Juda serusna ndatken hukumen ibas Tuhan nari. Tapi ibas perkuah ate Tuhan, ate Tuhan tetap nelamatken bangsaNa. Erkiteken sie me ngerana nabi Yesaya man kalak si tetap ndalanken kai singena ateNa kerna keselamatan sinandangi ibereken Tuhan man bana gelah bangsa Juda jera ras ndalankan kai singena ateNa. Ibas rangka mpegegehi kiniteken kalak si setia, nina nabi Yesaya ibas kiniseran siinanami kalak si setia man baNa, je kap Tuhan. Sebab Tuhan kap sierbahanca kalak si setia man baNa mentasi paksa-paksa kiniseran. Emaka adi tangis bangsa Juda man Tuhan guna mindo penampat, ialoi Tuhan ras isampati Tuhan.

3.      Siimaksud Tuhan sierbahanca paksa-paksa kiniseran eme penghukuman Tuhan nandangi bangsa Juda nandangi seh. Tuhan makeken bangsa Asur lako nerang bangsa Juda.  Janah kalak si setia pe ngenanamisa, sebab penghukuman e, merupaken penghukuman universal. Tapi ibas kiniseran e je Tuhan, Tuhan tetap nampati kalak si setia man baNa. Ituduhken Tuhan dalan kempak kebenaren ras keselamatan.  Erkite-kiteken Tuhan tetap ras ia, janah tetap Tuhan nampati ia, maka lit sada pengakap man kalak si setia man Tuhan, kepeken sia-sia me ernalam man gana-gana, emaka iambengken janah “ninta” olanai kam kuidah. Enda kerina iambengken sebab kerina e merupakan barang si najis.

4.      Ibas litna kebadiaan nggeluh, maka kalak Juda ndatken pasu-pasu Tuhan. Bangsa Juda simerupakan bangsa perjuma, ipasu-pasu Tuhan jumana. Emaka adi merdang kalak Juda ipesusur Tuhan udan gelah kai sierdangken kalak Juda banci berhasil. Melala ulih man peranin. Bagepe lembu kalak Juda dat gagatan sicukup, sebab mbelang mbalmbal ibereken Tuhan.

5.      Kata pergegeh enda ipeseh nabi Yesaya gelah kalak si setia ndalanken kai singena ate Tuhan la surut kinitekenna adi nggo seh paksana Tuhan ngukum bangsa Juda. Tapi tetaplah nggeluh ibas kebadiaan nggeluh.

APLIKASI

            Erdahin eme persuruhen Dibata guna ngusahai doni enda, ras arah erdahin manusia banci dat kegeluhen arah e. Tapi kenca manusia ndabuh ku bas dosa maka ersusana manusia erdahin. Alu kata sideban, erdahin   labo merupaken hukuman Tuhan. Tapi erdahin merupakan pendilo ras perentah Tuhan gelah njagai ras ngusahai kerina tinepa Dibata. Memang, kenca manusia ndabuh ku bas dosa maka itafsirkan erdahin sebage hukuman, sebab teridah sebagai beban. Padahal erdahin erkiteken keriahen ndalanken perentah Tuhan.

            Ibas minggu merdang, kita isingetken maka ibas kita merdang, kita arus mindo penampat man Tuhan. Sebab kerina e, Tuhan sipeturahsa ras mereken hasil simehuli. Alu bage ketergantungenta man Tuhan arus teridah ibas kita merdang. Jadi ibas kita merdang lit pengharapan man Tuhan saja, gelah sidat hasil. Erkite-kiteken kita arus merdang, maka sipaling penting bas kita eme kita arus erdahin sue ras singena ate Tuhan. Ibas erti kata gelah ndatken hasil simehuli,  ula kita makeken gana-gana. Tuhu ibas paksa sigenduari melala tantangan ibas kita erdahin, sierbahan tempa-tempa kita apatis, mbiar, emaka lit senina turangta erdahin si la ngena ate Tuhan, lit sierjudi, nangko, KKN rsd. Tapi kita isingetken ula mbiar sebab Tuhan pasti masu-masu kita ibas kita erdahin alu payo.

            Guna ndatken hasil si mehuli, selaku kalak si tek man Tuhan arus ncidahken etos kerja simehuli sitergantung man Tuhan saja. Tuhu mberat sitik kita erdahin, tapi adi ertoto kita man Tuhan, ras tetap ndalanken kai singena ateNa, maka ipasu-pasuNa dahinta. Kita arus ndarami kai singena ate Tuhan maka si deban ibereken Tuhan (bdk. Matius 6:33).

            Siimaksud kerja keras eme kita arus tuhu-tuhu erdahin ras mengandalkan Tuhan. Emaka ibas kita, penting kepeken nandai Tuhan alu payo. Sebab ibas kita nandai Tuhan alu payo, maka Tuhan saja siandalkan ibas kerina kegeluhenta, termasuk ibas kita erdahin. Tuhu-tuhu ibas kita erdahin, amin gia latih siakap, kita tetap mindo penampat man Tuhan saja. La sipake kerna hal-hal si la ngena ate Tuhan. Janah perlu si teh hasilta, Tuhan sinentukenca. Alu bage lit bas kita selaku kalak sitek, sada pengakun, maka adi Tuhan la ikut erdahin ras masu-masu pendahinta, sia-sia kerina (bdk. Mazmur 127:2).

           

Pdt. Steven Kumenit, STh.M.Min.

Ulih Judi Eme Kemusilen (1 Timotius 6:7-10)

PERPULUNGEN JABU-JABU (PJJ)

GEREJA GBKP

TANGGAL 16-22 JULI 2017.

1 Timotius 6:7-10.

Tema : Ulih Judi Eme Kemusilen.

LATAR BELAKANG

1.      Secara umum banci sikataken surat Paulus man Timotius eme surat Pastoral situjunna mereken pengelayasi man Timotius sisangana erdahin i Epesus. Khusus ibas oratenta Paulus mereken Pengelayasi man Timotius gelah Timotius  ngajarkan man perpulungen Epesus kerna kiniteken situhu-tuhu.

2.      Gelah ndatken kiniteken situhu-tuhu, maka Timotius arus ngajarken man perpulungen i Epesus kerna pengajaren situhu-tuhu, khususna kerna merangap. Nggeluh ibas merangap berarti kegeluhenna lanai tetap kinitekenna janah gulut ukurna ibahan erbage-bage kecedan ate. Emaka ibas eragama tuhu manusia banci jadi bayak.  Tapi siimaksud jadi bayak eme adi puas akapna erkiteken kai si lit bas ia. Enda ikataken Paulus, sebab lit guru-guru palsu sindarami keuntungan ibas eragama. Emaka tuhu ibas eragama (ersembah man Tuhan), banci ndat “kebayaken” (bdk.=  Untung), adi ilakoken alu mehuli. Bayak/untung ibas hal pertendin. Sebab adi lit kalak singgejapken ibas ia eragama/ersembah man Tuhan ndatken kebayaken/keuntungan pertendin, maka lanai iayakina kerna kebayaken material/doni. Sebab ibas kegeluhen kalak sitek, labo materi palas keselamatan, tapi erkiniteken man Tuhan ras ndalanken kai singena ate Tuhan. Alu bage kai si lit bas kita merupaken sada kebayakan sebab Tuhan si mereken gegeh ras kengasupen man banta guna ndalani kegeluhen alu erpenalem man baNa saja.

3.      Kinibayakan materi terjeng ibas doni enda ngenca. Sebab kenca manusia mate, kerina kebayaken materi la sibaba. Kerina e tading ibas doni enda. Emaka siiperluken kalak sitek eme kebayaken pertendin. Alu bage ibas kita nggecapken nggeluh ibas erkecukupen mabai kalak sitek tetap nggeluh ibas kebadiaan nggeluh.

4.      Paulus mereken ajaran enda gelah kalak sitek ula ikuasai kegeluhen doni enda. sebab kegeluhen siikuasai doni enda mabai kegeluhen kalak sitek nggeluh ibas ukur gulut ras la teneng ibas kegeluhenna. Emaka sura-sura ndatken kebayakan alu erpalasken kerangapen merupaken kebodohen man kalak sitek, sebab ndabuh me ia ibas sura-sura sibodoh ras jahat, sierbahanca ia kernep. Siimaksudken kernep eme nggeluh ibas kematen, sebab ia nggo erdosa (bdk. Roma 6:23).

5.      Ibas pengajaren Timotius man perpulungen Epesus, gelah perpulungen Epesus tetap nggeluh ibas kiniteken situhu-tuhu, ula nila ibas kiniteken erkite-kiteken merangap. Marangap nandangi duit eme sumbul kerina kejahaten. Emaka gelah perpulungen la nggeluh ibas kematen, perpulungen arus tetap ncikep pengajaran situhu-tuhu eme nggeluh ibas kiniteken ras tetap erpengarapen man Tuhan.

APLIKASI

            Harus siteh Judi eme sada permainan dengan memakai uang atau barang berharga sebagai taruhan (nen = Kamus besar bahasa Indonesia). Alu bage banci sisimpulkan, judi eme siilarang Tuhan.

            Adi siperdiateken ibas kegeluhen manusia, judi nggo ncedai kegeluhen moral manusia. i ja pa pe pasti sijumpai kalak erjudi. Melala model ras bentuk judi. Janah adi sisungken man kalak perjudi, apakah arah judi kita banci jadi bayak ? pasti nina lang. Tapi sebalikna nterem kalak sierjudi jadi musil.

            Erkite-kiteken judi enda la mehuli, maka kalak sierjudi nggo erdosa man Tuhan. emaka kalak sierdosa man Tuhan tentuna ibas kerehen Yesus Kristus peduakaliken, gedap, kernep ia. Ihukum Tuhan ibas doni kematen.

            Tuhu ibas situasi ras keadaan sigenduari, sicukup mesera kita erdahin, tapi kebutuhen keluarga mbue. Bagepe banci jadi kita frustrasi ras stres erkite-kiteken kerina siidahiken kita tempa-tempa la berhasil si dungna sidarami cara sispekulasi eme erjudi. Bagepe erkiteken salah pengangkanta kerna makna nggeluh. Siakap duit banci ngkuasai doni enda ras mereken ketenangen nggeluh, maka erjudi kita.

            Perlu siteh, judi ipake iblis gelah kita sirang ras Tuhan. Emaka banci saja, sada dua kali kita menang, sierbahanca kita tertarik ras terlena erjudi (bdk = jadi candu). Yesus Kristus pernah ngingetken man jelma sinterem : metengetlah maka ola kam merangap nandangi kai pe sebab kegeluhen manusia situhu-tuhu labo erpalasken erta-erta si lit ibas ia, amin gia uga gia  ia bayakna (Lukas 12:15). Enda ngatakenca duit la mereken kemalemen ate ras kegeluhen situhu-tuhu man banta. Alu bage arus nggeluh ibas erkiniteken ras erpengarapan man Tuhan, gelah ikuasai Kesah Si Badia kita. Adi merangap kita nandangi duit, berarti kita nggo ikuasai duit, emaka adi la lit duit, janah la terkuasai kegeluhenta, je me kita erbahan kejahatan-kejahatan, iantarana nangko, erbinaga ganja, KKN, rsd.

Pdt. Steven Kumenit, STh.M.Min.

Benaken Ibas Gelar Tuhan (Yakobus 4:13-17)

PERPULUNGEN JABU-JABU (PJJ)

GEREJA GBKP

TANGGAL 9 -15 JULI 2017.

Jakup 4:13-17.

Tema : Benaken Ibas Gelar Tuhan.

LATAR BELAKANG

1.      Sijadi bahan oratenta sendah eme kata persinget man kalak kristen (kalak perbinaga) gelah ula meganjang ukur. Kalak kristen arus mengandalkan Tuhan ibas erdahin, sebab kegeluhen manusia Tuhan singaturkenca. Manusia la lit hakna nandangi dirina sendiri. Bagepe masa depan manusia, la itentukan manusia, tapi itentukan Tuhan. Manusia banci ersura-sura tapi Tuhan sinentukenca (bdk. Kuan-Kuanen 16:9).

2.      Ersura-sura  la salah, tapi adi sura-sura erpalasken kiniganjangan ukur ras mengandalkan gegeh manusia, enda me si salah ras erdosa. Sebab Dibata njadiken manusia gelah manusia banci ngenen karakter Dibata eme meteruk ukur (bdk. Pilipi 2:6-8). Janah Yesus Kristus pe pernah ngingetken gelah manusia ula meganjang ukur, sebab wari sipepagi la iteh manusia. Kegeluhen manusia e ermasap-masap kap, enda me sierbahanca keterbatasan nggeluh manusia, bagepe kegeluhen manusia ibas pengaturen Tuhan (bdk. Lukas 12:16-21).

3.      Kata persinget enda, gelah kalak kristen meteh maka  kegeluhenna eme nggeluh ibas pertobatan ras nggeluh ibas ketergantungan man Tuhan saja. Alu bage mengandalkan Tuhan ibas kerina kegeluhenta penting ras merupaken sada kearusen. Sebab ibas kita ngandalkan Tuhan ibas kegeluhenta, termasuk ibas ersura-sura ras pendahinta, maka ipasu-pasu Tuhan kerina e.

4.      Ngandalken Tuhan la bo terjeng ngataken mbera-mbera (isya Allah) maka kerina banci berhasil, tapi siimaksudken mangandalkan Tuhan eme endesken kerinana man Tuhan. Sebab la bo kata-kata sipenting, tapi kita arus mereken ingan nandangi kuasa ras rancangan Tuhan ibas pusuh peratenta, bagepe ibas kerina sura-sura si ate iibahan ras iputusken kita. Kita arus nungkun arah pertoton, kain kin sura-sura Dibata man banta anak-anakNa (bdk. Eka darma Putra: Iman Dalam Perbuatan – hal. 113).

5.      Kalak kristen ipersingeti gelah ula lupaken Dibata, sebab adi lupaken Dibata, maka kalak kristen jadi meganjang ukur. Adi nggo meganjang ukur berarti dirina nggo dibatana, alu bage ia nggo erdosa man Tuhan. Searusna kiniteken kalak kristen arus teridah ibas perbahanen tep-tep wari, eme mengandalkan Tuhan ras nggeluh iteruh sura-sura Tuhan.

APLIKASI

             Perlu siteh, ateta kai siibahan kita “berhasil” kerinana. Maka tentuna selaku kalak kristen ula mengandalkan diri sendiri ntah pe keegoisan ras kesembongan. Sebab keberhasilen manusia la itentukan ibas kejagon ras kehebatan manusia. Tapi kerina ibas pasu-pasu Tuhan.

             Lit 2 hal sibanci mbuka pengangkan ise situhuna kita. Sipemena : Kita enda manusia siermasap-masap. Alu bage lit keterbatasan nggeluh manusia ibas doni enda. bagepe kegeluhenta ibas wari sipepagi la siteh. Sebab la kita sinentukan kegeluhenta, tapi Tuhan. Kegeluhenta ibas doni enda nggo itentukan Tuhan (bdk. Jop 14:5; Pengerana 8:7). Sipeduaken : Kerina sinasa lit ibas doni enda Tuhan siempuna, bagepe kai si lit ibas kita Tuhan simerekensa. Emaka adi ipasu-pasu Tuhan berarti ngena ateNa man banta. Perlu siteh la ate Tuhan kita nggeluh ibas kekerungan ras la berhasil ibas kerina sura-sura simehuli. Ate Tuhan gelah kita nggeluh ibas bercukupan ras berhasil kerinana.

            Ngenen enda tentuna kita arus mengandalkan Tuhan            . Ibas erti kata, kerina siidahiken kita arus ibenaken ibas gelar Tuhan. Makna benaken ibas gelar Tuhan eme, sipemena : siendesken man Tuhan. Sebab siteh, kita la ngasup erbahan kai pe adi la ipasu-pasu Tuhan (bdk. Roma 6:28). Sipeduaken : Gelah lit ketuahen/ kemalemen ate bas kita. Sipeteluken : Banci berhasil.

            Siendesken man Tuhan berarti sipediat Tuhan ngelakoken kai siisuara-surakenNa bas kegeluhenta. Jadi kita arus mpediat kai sijadi bagin Tuhan guna  ngelakoken kai sura-sura Tuhan ibas kerina rencananta. Amin gia, banci saja ibas Tuhan erdahin, la bagi siisura-suraken kita. Emaka adi sipisahken, kai sijadi baginta ras bagin Tuhan, maka banci sikataken baginta eme ngerencanaken ras notoken kai siirencanakenta, bagepe siendesken man Tuhan. bagin Tuhan eme Pasu-pasu ras ngelakoken kai si ate Tuhan mehuli akapNa. Emaka kita banci nimai alu meriah ukur ras dem kesabaran, bagepe kemalemen ate, sebab kerina dahin ibenaken ibas gelar Tuhan.

Pdt. Steven Kumenit, STh.M.Min.     

Ajarlah Anakndu Alu Disiplin (Ibrani 12:5-8)

KHOTBAH MINGGU, TANGGAL 9 JULI 2017.

GEREJA GBKP

Invocatio :    Si la ngeligas anakna la kap atena keleng anakna, adi keleng atendu, ola kam alang-alang ngukumsa (Kuan-Kuanen 13:24).

Ogen          :    Kuan-Kuanen 15:10-14 (Responsoria).

Khotbah    :    Heber 12:5-8 (Tunggal).

Tema         :    Ajarlah Anakndu Alu Disiplin.

LATAR BELAKANG

1.      Sijadi bahan khotbahta sekali enda eme kata pergegeh man kalak kristen asal Yahudi sisangana ngenanami kiniseran sierbahanca kendor kinitekenna. Kalak kristen tupung sie lit ibas bahaya kebenen pengarapenna.  Enda teridah ibas putus asa, tempa-tempa bene kinitekenna, ras lanai aktif pulung ibas persadan. Kiniseran siinanami kalak kristen eme  kerina kalak kristen si lit i Roma ipelawes pemerintah Roma (Kaisar Kladeus). Bagepe igejapkenna tempa-tempa Tuhan la ras ia. Emaka kalak kristen nggo nggeluh ibas ketedehen ate nandangi kegeluhen bangsa Israel nai, eme kehadiren Dibata tuhu-tuhu inanami, ras pe tanda kehadiren Tuhan eme rumah pertoton.

2.      Ibas rangka mpegegehi kiniteken kalak kristen, penulis mereken erti/makna kerna kiniseran siinanami kalak kristen. Makna kiniseran eme sipemena : merupaken sada didikan sekalak bapa nandangi anakna. Alu bage ibas kalak kristen ndatken kiniseran, maka kalak kristen banci meteh kerna statusna selaku anak Dibata. Emaka ula kitik ukur kalak kristen adi ngenanami kiniseran. Siimaksudken ula kitik ukur eme ula bene kiniteken ras pengarapen kalak kristen man Tuhan. Sipeduaken : kalak kristen arus megenggeng ibas ngenanami kiniseran.

3.      Ibas pengajaren Tuhan nandangi anakNa (kalak kristen), gelah kalak kristen paguh kinitekenna amin gia ndatken kiniseran. Emaka kalak kristen arus ngenen kerna kiniseran Kristus. Kiniseran siinanami Yesus Kristus seh ku kematen. Kalak kristen lenga seh ku kematen, emaka tetaplah paguh kiniteken ras pengarapenna.

4.      Kalak kristen eme anak-anak Dibata, emaka kiniseran siinanami kalak kristen merupakan sada bagin ibas hubungan keleng ate  bapa ras anak. Maksudna kiniseran e bukti Tuhan sangana  mereken pengajaren man anak-anak siikelengiNa. Jadi kiniseran merupakan proses gelah anak-anak Dibata jadi sempurna. Ibas kata sideban, kalak kristen nggeluh ibas kebadiaan Tuhan. Tuhu ceda ate kalak kristen ibas ngenanami kiniseran, tapi situhuna kerina e guna kiniulin kalak kristen. Jadi ibas kalak kristen ndatken kiniseran gelah kegeluhen kalak kristen nggeluh ibas si ngena ate Tuhan. Emaka enda kerina merupakan sada rencana Tuhan man kalak kristen.

5.      Kiniseran merupaken proses pembentuken kiniteken siserta.

APLIKASI

            Lit dua bentuk pengajaran man anak eme alu pengajaran formal ras non formal, janah enda merupakan kewajiban orang tua. Pengajaran enda pe la saja gelah anak jadi pentar, tapi pe gelah anak nggeluh ibas disiplin. Disiplin siimaksud eme nggeluh ibas kepatuhen. Patuh ibas peraturan ntah pe pengawasan.

            Nggeluh ibas bergereja pe arus nggeluh ibas disiplin. Nggeluh ibas disiplin berarti nggeluh ibas kiniraturen. Aturen gereja situhuna nggo jelas eme ndalanken kai singena ate Tuhan ibas kegeluhenta tep-tep wari. Kalak sila ndalanken enda berarti la nggit nggeluh ibas keselamatan. Berarti ia nggo erdosa man Tuhan.  Ia hukum Tuhan. Penghukuman Tuhan erbage-bage bentukna. Banci minter irasakan, ras kenca reh Yesus peduakaliken kita ihukumNa. Sebab nina Paulus ibas Roma 6:23 : upah dosa eme kematen (bdk. Ogen). Perlu siteh fungsi disiplin gelah kita nggeluh ibas keselamatan siibereken Tuhan man banta.

            Anak perlu iajarken kerna disiplin. Ise singajarisa ? tentuna orang tua (bdk. Ulangan 6:7). Alu bage orang tua pe leben arus nggeluh ibas disiplin. Adi orang tua la nggeluh ibas disiplin, anak pe la nggeluh ibas disiplin. Disiplin siidat anak ibas pengajaren orang tua  arah kata ras perbahanen. Jadi penungkunen man banta, ngkai anak arus iajarken kerna disiplin ? secara umum banci sikataken anak merupaken tongkat estafet kepemimpinen ras kegeluhen gereja ras masyarakat. Tapi secara khusus anak eme anak pemere Dibata, janah ia anak panah (Mazmur 127:3-4). Emaka tanggung jawab orang tua njadiken anak-anak selaku bangsa Dibata (Maleaki 2:15). Emaka guna njadiken anak-anak bangsa Dibata, merupaken sada kewajiban orang tua  ngajarken disiplin man anak, tupung ia kitik denga (Kuan-kuanen 19:18). Anak eme Tunas batang saitun (Mazmur 128:3b).

            Adi anak nggeluh ibas disiplin berarti anak la saja ndalanken tanggungjawabna ibas rumah, megiken ajar orang tua, la erbahan si la ngena ate Tuhan ibas pergaulenna ibas masyarakat, bagepe  tutus ia ersembah man Tuhan. Nggit ku gereja. Alu bage  anak-anak banci terhindar ibas “maut”. Jadi penugkunen man banta banci kin ibas ngajarken anak gelah nggeluh ibas disiplin, orang tua ngeligas anakna ? adi arah pustaka si badia (invocatio) banci. Sebab ngeligas siimaksudken i jenda eme ngajarkan alu keleng ate ras labo ibas pemaksaan. Tapi adi ngeligas alu palas kekerasan, enda me siilarang undang-undang perlindungan anak ras HAM.

Pdt. Steven Kumenit, STh.M.Min.