Sada Aron Ndahiken Dahin Tuhan (1 Korintus 3:5-16)

PERPULUNGEN JABU-JABU

GEREJA GBKP

TANGGAL 27 MEI – 2 JUNI 2018.

1 KORINTI 3: 5-16.

Tema : Sada Aron Ndahiken Dahin Tuhan.

LATAR BELAKANG

1.      Perpulungen Korinti Rasul Paulus simantekisi, tapi ibas perkembangen perpulungen lit bahaya  perpecahan. Bahaya perpecahan enda labo erkiteken ajaran tapi erkite-kiteken lit 4 kelompok ije eme  kelompok Paulus, kelompok Apolos, kelompok Petrus ras kelompok Kristus (bdk. 1 Korinti 1:12). Janah kelompok Paulus ras kelompok Apolosme silebih menonjol saling mengidolakan “guru” ras saling “mengejek”. Kelompok Apolos ngataken maka hebatan Apolos adi ibandingken ras Paulus. Sebab pemberitaan Paulus sederhana ras minter ku tujun. Akapna kurang adi ibandingken ras pidato/pemberitaan Apolos siterhias alu rapi. Kata-katana mejile ras penuh semangat. Enda jadi erkite-kiteken perpulungen Korinti simerupakan kalak Yunani imanjagakan alu kata-kata filsafat si mejile.

2.      Bahaya perpecahan erkiteken terjadi kelompok-kelompok ibas perpulungen Korinti inen Paulus harus ipersada, adi lang persadan gereja pecah emaka tujun gereja terhambat. Sebab gereja idilo ibas rangka nehken keselamatan, emaka anggota gereja harus nggeluh ibas persadan gelah iidah kalak kegeluhen gereja simehuli/harmonis ras nggeluh ibas keleng ate.

3.      Gelah lanai lit perpulungen nggeluh ibas kelompok-kelompok rasul Paulus mereken sada ajaren kerna pertumbuhen kiniteken. Pertumbuhen kiniteken labo erpalaskan jelma ras mengidolaken salah sada “guru”. Bagepe makna kehadiran Paulus ras Apolos man perpulungen Korinti. Kehadiran Paulus ras Apolos labo guna ndarami pengikut, tapi seri tujunna amin gia karakterna berbeda. Tuhu Paulus leben reh asangken Apolos, tapi labo berarti kerehen Paulus guna ndarami pengikut. Tapi Paulus ras Apolos lit tujun si seri eme keselamatan perpulungen. Keselamatan perpulungen eme adi tek man Yesus Kristus. Emaka perpulungen harus megiken kata Dibata ras ndalanken pengajaren situhu-tuhu. Enda me fungsi ras tujun Paulus ras Apolos. Erkiteken si eme gelah perpulungen ngangkai kerna kerehen Paulus ras Apolos, Nina Paulus: Aku sinuanca Apolos siniramsa. Maksudna erkiteken leben Paulus reh, Paulus me sinuan Kata Dibata maka kalak Korinti tek. Janah kerehen Apolos eme njaga ras mendewasakan perpulungen alu pengajaren-pengajaren situhu-tuhu erpalaskan kata Dibata, maka Apolos siniramsa. Sinuanca ras siniramsa la penting, sebab adi Dibata la peturahsa sia-sia me kerina e. Emaka inti kerina enda eme Dibata. Janah Paulus ras Apolos eme serayan Tuhan.

4.      Paulus ras Apolos eme serayan Tuhan. Tuhan erdahin arah serayanNa. Pertumbuhen ras perawatan kiniteken eme pendahin Dibata. Adi la erkiteken Dibata sia-sia pendahin serayanNa (Paulus ras Apolos). Paulus ras Apolos eme sada,  saling melengkapi ras aron Dibata. Paulus ras Apolos ndahiken dahin Dibata alu erbage-bage fungsi. Paulus ras Apolos ndahiken dahin ibas persuruhen Dibata.

5.      Ipihak sideban Paulus ngataken perpulungen Korinti ipajekken alu palas Yesus Kristus janah kalak sideban (Apolos) mbangunca ibas palas e. Bangunan siibangun erpalaskan palas simegegeh tentuna enteguh, janah ialokenna upah eme keselamatan. Tapi kalak sibangunanna ibangun erpalaskan la mehuli upana eme kekecewaan, tapi adi jera ras tetap tek man Jesus, tetap ndatken upah keselamatan.

APLIKASI     

            Temanta eme Sada Aron ndahiken dahin Dibata. ngangkai tema enda kita harus ngangkai ibas 2 hal eme 1). Gereja GBKP eme sada aron ras gereja-gereja silit ibas Indonesia ras doni enda. Gereja GBKP radu ras gereja-gereja si deban subuk ibas lokal, nasional ras internasional ras-ras ndahiken keselamatan, emaka kegeluhen ibas sada aron eme nggeluh sisampat-sampaten ndahiken dahin Tuhan, subuk ajaran bagepe keleng ate (diakonia). 2). Kerina warga gereja GBKP eme sada aron. Sebab perlu siteh tema pelayanan 5 tahun enda eme GBKP aron Dibata guna jadi pasu-pasu man isi doni enda. Bagepe sue ras tata gereja GBKP, warga GBKP eme subjek pelayanan. Ibas erti kata kerina warga gereja, mulai usia KAKR, Permata, Moria, Mamre ras Saitun ikut terlibat ibas pelayanan. Kerina merupaken pelaku-pelaku ibas ngelai. Emaka kita kerina eme sada aron Dibata. Fungsi ras tujun sada aron Dibata eme gelah banci menahang pendahin e ras gereja GBKP seh ku gereja siideal/ dewasa/misioner. Emaka selaku aron Dibata la banci meganjang ukur ras dirina saja siiukurina. Aron Dibata lit solidaritas simegegeh.

Pdt. Steven Kumenit, STh.M.Min.  

Ulih Pendahin Kesah Si Badia (Perbahanen Rasul-Rasul 11:19-30)

PERPULUNGEN JABU-JABU

GEREJA GBKP

TANGGAL 20 – 26 MEI 2018.

Perbahanen Rasul-Rasul 11:19-30.

Tema : Ulih Pendahin Kesah Si Badia.

LATAR BELAKANG

1.      Perkembangan kalak sierkiteken man Tuhan cukup pesat. Enda erkite-kiteken Kesah Si Badia sipengasup ajar-ajar mberitaken Berita Si Meriah. Tambah sie sistim pelayanan nandangi kalak sierkiniteken man Yesus Kristus nggo mulai terorganisir, erbahanca ngena ate kalak pelayanan ras persadan kalak si tek man Yesus. Tapi pemimpin-pemimpin kalak Jahudi ngidah enda merupaken sada bahaya, emaka harus ibeneken ntah pe imasapken seh ku akar-akarna. Cara beneken ntah pe masapken eme alu peniksaan, penjaraken ras pembunuhen. Istepanus sibaru terpilih jadi diaken, siihamati ras ibegiken perpulungen ibunuh.

2.      Nterem kalak sierkiniteken man Yesus Kristus kiam menyelamatkan diri. Merap ia kerina ku kuta-kuta sideban seh ku Antiokia. I Antiokia kalak singgo tek meritaken Berita Si Meriah ka, la saja man kalak Jahudi tapi pe man kalak si la kalak Jahudi, emaka ntarem kalak Antiokia tek man Jesus Kristus.

3.      Reh nteremna kalak si tek man Jesus seh ku Jerusalem. Yerusalem eme ingan rasul-rasul. Emaka isuruhna Barnabas ku Antiokia guna ngenen perkembangan kalak si nggo tek man Jesus. Bagepe guna mereken pelayanan ras bimbingan, ras pengajaren tole kerna  uga nggeluh selaku kalak sierkiniteken man Jesus Kristus. Barnabas iutus erkiteken kepribadian Barnabas simehuli ras dem Kesah Si Badia. Bagepe tutus ngelem pengajaren rasul-rasul (bdk. orang yang tegas ras kokoh dalam memegang pengajaran rasul-rasul). Ibas bimbingen ras pelayanan Barnabas, kalak si nggo tek man Jesus erdewasa kinitekenna, emaka persadanna mehuli. Persadan kalak si nggo tek man Jesus tuhu-tuhu nggeluh. Ngidah sienda Barnabas alu persetujun perpulungen berkat ku Tarsus njumpai Saul. Saul enda me siikut ibas pembunuhen Istepanus ras singayak-ngayak kalak singgo tek man Jesus guna ihukum, ipenjaraken, isiksa ras ibunuh. Tapi erkiteken perkuah ate Tuhan, Saul tek man Jesus. Janah alu tutus Mberitaken Berita Si Meriah man kalak si la kalak Jahudi. Sada tahun dekahna ia ras perpulungen iajarina perpulungen kerna Berita Si Meriah sierbahanca persadan kalak si nggo tek man Jesus nggeluh alu mehuli. Erkiteken sie me kalak si tek igelari kristen (umat Kristus).   

4.      La saja utusen rasul-rasul sireh ku Antiokia, tapi pe piga-piga nabi i Jerusalem nari reh ku Antiokia, janah nabi Agabus ernubuat kerna kelihen simesangat sinandangi jadi man doni enda, kususna man kalak Judea. Erkiteken sie me kalak kristen pepulung penampatna asa gegeh ras buatenna lit ntah rikutken kengasupenna sekalak-sekalak guna nampati senina-seninana i Judea. Kenca penampat siberupa duit terpepulung iberekenna man pertua-pertua guna mereken man senina-seninana i Judea.

5.      Tuhu-tuhu teridah kal ulih Kesah Si Badia eme 1). Pemberitaan kerna Yesus Kristus seh ku Antiokia, emaka kalak si la tek Man Yesus Kristus jadi tek. 2). Kegeluhen persadan kalak kristen mehuli ras nggeluh. 3). Perpulungen nggit megiken pengajaren simehuli. 4). Nggit mereken diakonia man senina-seninana si ngenanami kiniseran.

APLIKASI     

            Adi sinen kerna perkembangen kereja GBKP tentu harus sigejapken enda kerina erkiteken ulih Kesah Si Badia. Gereja GBKP la saja mereken pembinaan ras pengajaren kerna kata Dibata man warga gerejana, tapi ngeloken pelayanan PI ras diakonia. Janah adi sinen pelayanan PI siilakoken GBKP eme pelayanan PI ke luar ras ke dalam. Bagepe pelayanan gereja GBKP lanai jadi tanggungjawab serayan Tuhan, tapi nggo jadi tanggungjawab kerina warga GBKP. Warga GBKP nggo jadi subjek pelayanan lanai objek pelayanan. Ertina kerina warga GBKP, mulai anak-anak nari seh ku umurna si nggo saitun harus ikut ibas pelayanan gereja.  Bagepe pelayanan diakonia. Pelayanan diakonia siilakoken gereja GBKP la saja terjeng sapih-sapih warga gereja, tapi nandangi senina turangta si la seri kinitekenta ilayani/ibereken diakonia. Janah enda ilakoken ibas pusuh siersuruh nari.

            Pelayanan gereja igerakkan Kesah Si Badia, emaka asa ngasup ras gegeh lit, GBKP ngelakoken pelayanan-pelayanan. Gereja GBKPlamengandalkan gegeh ras kepentaren manusia, tapi mengandalkan Tuhan. Endailakoken gereja sebab gereja GBKP idilo Tuhan guna jadi pancur pasu-pasu Tuhan man kerina jelma.

Pdt.Steven Kumenit, STh.M.Min.

Jesus Nangkih Ku Surga Man Gunanta (Heber 9:23-26)

PERPULUNGEN JABU-JABU

GEREJA GBKP

TANGGAL 29 APRIL – 5 MEI 2018.

Heber 9 : 23 – 26.

Tema: Jesus Nangkih Ku Surga Man Gunanta.

LATAR BELAKANG

1.      Sijadi oratenta sendah harus ioge ibas ayat 1 (sada) nari, emaka  banci siangkai kerna bahan oratenta. Sebab ibas bahan oratenta Penulis membedakan Jesus Kristus ras barang-barang simerupaken simboli surga nari si lit ibas rumah pertoton ras imam simbelin.

2.      Perbendaan Jesus Kristus ras barang-barang simerupaken simbol surga bagepe imam si mbelin ras banci ngangkai kerna Jesus simerupaken Imam Simbelin merupaken sada keuntungen ras mereken pergegeh nandangi kalak kristen siasalna Jahudi nari sisangana nggeluh ibas penindasan ras kiniseran. Sebab penulis ngidah, kalak kristen siasalna Jahudi nggo mulai ngukuri mulihken ku agama Jahudi. Sederhana alasan mulih ku agama Jahudi, sebab adi agama Jahudi la ndatken kiniseran, kususna la itindas kalak Jahudi, ras banci ersembah alu teneng ibas rumah pertoton. Bagepe ersembah ibas rumah pertoton teridah simbol-simbol surga. Jadi man kalak enda agama Jahudi lit keuntungan.

3.      Ibas konteks rumah pertoton lit telu ruangan eme ruangan umum. Ruangan umum enda iperuntukken man kerina kalak siersembah man Tuhan. Lit ruangan badia. Ruangan badia enda, imam-imam ngenca sibanci bengket (ayat 2). Lit ruangan badia kal. Ruangan enda imam simbelin ngenca sibanci bengket, e pe sekali setahun ngenca (ayat 3). Fungsi imam simbelin eme mpersembahken kurban darah man Tuhan gelah ialemi Dibata dosa-dosaumatNa.

4.      Alu jelas kerina si lit ibas rumah pertoton simbol ngenca, janah imam simbelin kelang-kelang ngenca antara Tuhan ras umat. Tapi Jesus merupaken Imam Si Mbelin situhu-tuhu. Darah ras kula Jesus merupaken persembahen man Dibata.  Janah la bagi imam simbelin ibas agama Jahudi, ia arus bengket  ku ruangan sibadia kal sekali setahun baba kurban dareh guna mindo man Tuhan gelah masapkan salah dosa umat. Alu bage ngataken maka siibaba imam simbelin e la sempurna erkiteken sie harus iulihi tep-tep tahun.  Tapi Jesus, tubuh ras darehNa siikurbankenna, janah Jesus labo bengket ibas ruang si badia kal si lit ibas rumah pertoton, tapi i surga. Janah dareh Jesus e merupaken sempurna. Emaka sekali ngenca persembahen e.

5.      Jesus bengket ku Surga gelah kita selamat. Perlu siteh ibas teologi agama Jahudi, kususna ruangan badia kal si lit ibas rumah pertoton merupakan ingan Dibata. Emaka imam simbelin reh ku ingan si badia ibas rangka jumpai Tuhan. Alu bage kenca imam simbelin jumpai Tuhan alu mbaba kurban dareh merupaken pemindon gelah Dibata mereken pengalemi dosa man umatNa. Emaka terjadi perdamen antara manusia ras Dibata. Tapi Jesus Kristus la bengket ku ingan si badia kal si lit ibas rumah pertoton e, tapi bengket ku Surga ngadap man Dibata gelah kita pe nggeluh ras Jesus i Surga. Sebab merupakan ingan kalak si badia.

APLIKASI

            Kenangkihen Jesus Kristus ku Surga ibas rangka ngadap man Dibata gelah gelah kita nggeluh ibas Surga (bdk.ayat 24). Sebab kenca Jesus Kristus mate ras keke ibas simate nari, simerupakan pegancih dareh biri-biri gelah litna pengalemi dosa, maka kita nggo ibersihken ibas kerina dosa-dosa nari, sebab dareh Jesus sibadia mbersihken kita ibas dosa-dosanta nari. Emaka kenca kita nggo nggeluh ibas keselamatan, kita iperkenanken guna nggeluh ibas surga. Jadi surga merupaken ingan kalak singgo iselamatken. Perlu pe siteh ibas Jesus ngadap man Dibata berarti Jesus sebage Imam si Mbelin. Jesus jadi kelang-kelang kita ras Dibata gelah kita singgo iselamatkan nggeluh ibas surga.  Alu kata sideban Jesus Imam Simbelin e ngadap man Dibata, baba darehNa jine man Dibata gelah ialemi Dibata kerina salah ras dosanta.

            Surga merupaken ingan kalak singgo iselamatken, emaka kenangkihen Jesus ku surga ngadap man Dibata gelah kita nggeluh i surga ras Tuhan.  Kenangkihen Jesus ku surga ibas rangka nikapken ingan man kalak si tek ras ndalanken kai singena ate Tuhan.

            Perlu siteh surga ras doni berbeda suasanana. Suasana ibas doni merupaken suasana simereken kecedan ate, ndele ate, mesui, tangis, kiniseran, rsd (Ingan simeluat). Tapi nggeluh ibas surga eme nggeluh ibas kedamen, kemalemen ate, kesenangen. Janah kegeluhen si bage me siisikapken Jesus man banta.

            Amin gia Jesus nangkih ku surga guna kita, labo berarti la lit syaratna. Syaratna eme kegeluhenta harus badia. Emaka gelah tetap badia, kita tetap ipersingeti gelah adi lit salah dosa kita, kita harus mindo pengalemi dosa ibas Tuhan nari, jenari kita harus nggeluh ibas pertobatan.

            Penungkun apakah nggeluh i surga banci sinanami kenca kita mate? banci ue, banci lang. Saja kegeluhen ibas surga banci sinanami kenca Jesus Kristus reh mulihken ku doni enda. Ibas Jesus mulihken ku doni idapetiNa lit simate ras lenga (bdk. 1 Tesalonika 4:16-17).

            Erkiteken Jesus Kristus nggo nangkih ku surga guna kita, emaka marilah sijaga kegeluhenta gelah ibas kerehen Jesus Kristus peduakaliken ibas doni enda, kita banci nggeluh ras Jesus ibas surga.

Pdt. Steven Kumenit, STh.M.Min.