Tutus Ras Bujur Ibas Pendahin (Matius 25: 14 - 30)

PERPULUNGEN JABU – JABU

GEREJA GBKP

TANGGAL 22 – 28 JULI 2018.

Matius 25 : 14-30.

Tema : Tutus Ras Bujur Ibas Pendahin.

LATAR BELAKANG

1.     Tupung Yesus ras ajar-ajar kundul i uruk seton, isungkun ajar-ajar man Yesus kerna tanda-tanda kerehen Yesus peduakaliken ras tanda kedungen jaman. Gelah jelas ras ngasup ajar-ajar ngangkaisa, Yesus make perumpamaan kerna telu kalak juak-juak (oratenta sendah).

2.     Kerehen Yesus peduakaliken ras kedungen jaman bali ras Kinirajan Surga. Sebab inti kinirajaan Surga eme pemerintahen Yesus. Yesus jadi Raja ibas Kinirajaan Surga e. Emaka kenca seh Kinirajaan Surga e, je me terealisasi Kinirajaan Surga situhu-tuhu janah kalak sindalanken sura-sura Dibata ngenca sibanci bengket ibas Kinirajaan Surga. Maksudna Yesus la mereken sada jawaban sipasti kerna wari, tanggal kerehenNa pagi, tapi alu perumpamaan enda ate Yesus ngatakenca gelah ajar-ajar harus erjaga-jaga ras erdahin ibas nimai Kerajaan Surga.

3.     Ibas perumpamaan kerna Kinirajan Surga teridah ise sibanci bengket ibas Kinirajan Surga eme tutus ras bertanggungjawab ndalankenna pemere Dibata (Tuan). Janah perlu siteh talenta siimaksudken ibas ogenta eme “pendahin/kengasupen” siibereken Tuhan man sesekalak jelma guna ipake alu bertanggungjawab ras guna keselamatan ibas doni enda. Emaka “pendahin/kengasupen” banci berbeda-beda siibereken Tuhan. Lit 5 talenta, lit 2 talenta ras 1 talenta. Amin gia teridah nominal (5,2,1), labo berarti nuduhken sada kehebaten sesekalak jelma, ntah pe Dibata rayo-ayo man manusia tinepaNa. Tapi siitekanken i jenda eme pemanfaatan pemere Dibata ibas kegeluhen manusia tep-tep wari. Emaka amin gia lit sidat 5, lit sidat 2 ras lit sidat 1, i lebe – lebe Tuhan seri nilaina.

4.     Ibas kerehen Yesus peduakaliken simerupaken nggeluh ibas Kinirajan Surga i je lit pengadilen. Ibas pengadilen siilakoken Yesus, pagi kalak situtus ndahiken persuruhen Dibata (Tuan) singgeluh ibas ibas Kinirajan Surga. Janah nggeluh ibas Kinirajan Surga, nggeluh alu meriah ukur ras senang sebab nggeluh ras Yesus Kristus. Tapi kalak si la tutus, si la nggit ndalanken persuruhen Dibata (Tuan), ihukum Dibata. Jenis penghukumenna eme : a). Ia igolongkan kalak jahat ras perkisat. b). la terpake. c). Talenta siibereken Tuanna ndube ibuat Tuanna mulihi. d). Isampetken ku ingan sigelap.

5.     Keselamatan siibereken Tuhan man manusia tergantung kegeluhen manusia ibas mempertanggungjawabkan kesempatan ras pemere Dibata man manusia e.

APLIKASI

            Harus sigejapken lit talenta siibereken Tuhan man banta, janah erbage-bage talante siibereken Tuhan man banta. Bagepe la seri mbuena talenta siibereken Tuhan man banta. Ibereken Tuhan talenta sue ras kengasupenta. Janah labo kita sinentuken talenta e, tapi Tuhan. Idah Tuhan piga talenta singasup kita ndahikenca. Jadi enda merupaken hak preogatif Tuhan. Emaka la banci kita kecewa ntah pe nembeh man Dibata. Sipenting man banta sipergunaken talenta e guna kemulian Tuhan. Gelah paksa reh Yesus pagi, kita banci nggeluh alu senang ibas surga. 

            Temanta sendah eme Tutus ras bujur ibas pendahin. Banci saja kita erpengakap maka bahan PJJnta sendah khusus man kita si umurna produktif denga. Lang. Memang sada pihak kita siproduktif denga ibas erdahin harus tutus ras bujur. Sebab tupung kita tutus ras bujur maka teridah bekas pendahinta mejile, alu bage banci saja kita ngaloken upah simehuli, apakah kenaikann pangkat ntah jabatan, ntah hasil sicukup melala. Tapi ketika kita la tutus ras la bujur, maka kita lanai ipercayakan guna ndahiken dahin sideban, ntah kita ipecat, ntah kita itangkap KPK erkiteken korupsi. Ipihak sideban kita harus ngenen kerna pelayanan secara umum, khususna ibas gereja GBKP. Ibas gereja GBKP subjek pelayanan eme kerina anggota perpulungen. KAKR, Permata, Moria, Mamre, Saitun harus ikut ibas pelayanan. Jadi kai talenta siibereken Tuhan man banta harus sidahiken alu tutus ras bujur. Emaka ibas kerehen Yesus Kristus pagi, kita banci atan ibas Kerajaan Surga.

Pdt. Steven Kumenit, STh.M.Min.

                        

Doni Seh Kal Ulihna (Mazmur 104: 1 - 24)

PERPULUNGEN JABU – JABU

TANGGAL 1 – 7 JULI 2018.

GEREJA GBKP

Masmur 104 : 1-24.

Tema : Doni Seh Kal Ulihna.

LATAR BELAKANG

1.      Pemasmur kenca inenna alam raya ras kegeluhen doni enda, maka respon kinitekenna eme Tuhan sinjadiken kerina enda. Erkiten sie pemasmur ngajuk tendina guna muji Tuhan. Gelah tendina muji Tuhan pencipta langit ras doni kerina.

2.      Ijadiken Tuhan langit bagepe kerina isina tuhu-tuhu mejile janah ibabo lau i datas langit lit rumah Tuhan. Bagepe embun ras angin situpung sie kalak Kanaan tek dewa singendarai ras simereken udan, tapi kerina enda ipake Tuhan guna jadi suruh-suruhenNa. Kai siisuruh Tuhan em siilakoken embun ras angin. Adi kin lit udan ras angin, berarti e erkiteken Tuhan sinuruhsa. Kerina ia patuh man Tuhan.

3.      Langit doni ras kerina isina ijadiken Tuhan   mehuli kerina, kerina saling membutuhken ras lit fungsina. Erkiteken mehuli ras lit fungsina, maka kerina nggeluh alu dame. Bagepe kebutuhen-kebutuhen mahluk hidup, subuk asuh-asuhen ras manusia  tercukupi. Manusia erdahin alu la ncedai tinepa Tuhan sideban.

4.      Tuhu mehuli ras mejile tinepa Tuhan. Enda kerina ijadiken Tuhan alu kepentarenNa. Tuhu-tuhu Tuhan merupaken arsitek Agung.

5.      Mazmur puji-pujin enda selain ncidahken kerna keagungan ras kuasa Tuhan, tapi pe ngataken la lit kuasa dewa, bagepe kuasa angin, lawit ras ibas doni enda, manusia la banci nembah man tinepa Tuhan sembahlah Tuhan pencipta langit ras doni.

APLIKASI

            Situhuna masmur 104 enda merupaken bahasa puisi ibas kejadin 1 nari. Tuhu mejile kerina. Erkiteken sie ijadiken Tuhan manusia gelah kita sinjagai tinepa Tuhan sideban. Tapi sijadi genduari eme manusia alu keegoisan ras kerangapenna, kai simehuli siijadiken Tuhan nggo ceda. Emaka kita ka singenanamisa.

            Adi siperdiateken, labo hutan, terumbuh karang si nggo ceda saja, tapi pe lapisan oson simerupaken pelapis atmosfir nggo bocor. Emaka adi las wari, tuhu-tuhu melas kal, sebab lapisan oson simerupakan “penahan” sinar matahari langsung nggo bocor, emaka sinar matahari lanai sinahansa.

            Langit bagepe doni enda nggo ceda erbahanca musim – musim nggo berganti, lanai tentu musim-musim e. Biasana ibas bulan-bulan tertentu je musim perudan, genduari lanai tentu. Janah adi udan pe la bancir, sebab lau e nggo lit inganna.  Emaka kita nggeluh lanai dame ras teneng. Jadi penungkunen man banta. Apakah tetap kita nggit nggeluh bage?. Tentuna lang. Emaka harus sipehuli doni  singgo ceda enda. adi la kita ise nari. Tuhu enda butuh waktu, tapi adi nggo mehuli mulihi ras mejile tentuna kita ras anak kempunta singenanamisa.

            Guna pehuli tinepa Tuhan singgo ceda harus imulai ibas diri kita sendiri. Ibas erti kata, arus lebe kita mbiar man Tuhan, ras ngertiken tuhu ibereken Tuhan kerina enda man banta, tapi labo berarti  guna icedai, tapi ijaga ras irawat. Ipake Tuhan kita guna njagai tinepaNa. Tuhu “kerina e” guna kebutuhen kita, emaka mari sijaga. Ula erkiteken kebutuhen ekonominta maka ceda siban lingkungenta.

Pdt. Steven Kumenit, STh.M.Min.  

Tuhan Sikapken Taneh Mehumur, Erdangilah (Mazmur 107:33-43)

KHOTBAH MINGGU

TANGGAL 1 JULI 2018

GEREJA GBKP

Invocatio :     Kidekah doni enda lit denga, lalap lit paksa nuan ras paksa rani, paksa mbergeh ras mokup, paksa perudan ras paksa perlego, lit suari ras berngi (Kejadin 8:22).

Ogen        :     Kejadin 26:12-18 (Tunggal).

Kotbah    :     Masmur 107:33-43 (Responsoria).

Tema       :     Tuhan Sikapken Taneh Mehumur, Erdangilah.

LATAR BELAKANG

1.      Sijadi bahan khotbahnta sekali enda eme ende-enden pujin bangsa Israel tupung ia ersembah man Tuhan. Ende-enden pujin enda lit erkite-kiteken kiniulin Tuhan siigejapken bangsa Israel.

2.      Bagepe ibas bahan khotbahnta sekali enda teridah uga kerna kuasa, kiniulin ras keadilan Tuhan siisehkenNa nandangi manusia. Lit telu hal ibas bahan khotbahta eme : a.  Kuasa Tuhan. Tuhan ngenca singasup erbahanca lau mbelin jadi kerah, ulu lau jadi taneh kerah. Taneh simehumur jadi taneh masin. b). Tuhan menghukum kalak sierbahan kejahaten. c). Tuhan masu-masu ras mereken keriahen nandangi kalak si setia ras patuh man baNa. Ipulahi Tuhan ia ibas kiniseran nari.

3.      Pasu-pasu Tuhan nandangi kalak sipatuh man bana. Pasu-pasu Tuhan teridah ibas : a). Ibas gurun pasir lit lau silebih asa cukupna. b). Kalak sikelihen dat kebutuhenna, emaka lanai perlu idaramina nakan ibas ingan-ingan sideban tapi ibas sada ingan nggo isikapken Tuhan, emaka je me ia manteki sada kuta ras tading  i je. c). Taneh siianina mereken kesuburen emaka ngerdang ras suanna batang anggur, ras mereken ulih si seh kal buena. d). bangsaNa erteremna ras asuh-asuhen reh buena. e). Adi lit bangsa sideban nerangi bangsa Tuhan, maka Tuhan jadi benteng ras singelawan bagepe naluken bangsa e.

4.      Pemasmur ngidah manusia la ngasup ngelakoken sie, bagepe la lit Dibata sideban singasup ngelakoken sie emaka meriah ukur pemasmur. Igejapken pemasmur Tuhan siisembahna eme Tuhan sierkuasa, perkeleng ras adil. Erkiteken meriah ukur pemasmur maka ipujina Tuhan. Beda ras kalak jahat. Kalak jahat la ngasup ngidah kerna kiniulin Tuhan emaka la ngasup ia ermeriah ukur ras ngataken bujur man Tuhan.

5.      Pemasmur ngajuk gelah kalak sipentar harus ngidah kerna kiniulin ras kuasa Tuhan, janah harus ngakui kerna kuasa ras kiniulin Tuhan e merupaken bentuk keleng ate Tuhan nandangi manusia.

APLIKASI

            Kerina si lit ibas doni enda Tuhan si njadikenca, termasuk taneh ras musim-musim. Ijadiken Tuhan kerina e gelah kegeluhen manusia tercukupi. Siimaksudken tercukupi i jenda eme kita harus erdahin guna ndatken kebutuhen-kebutuhenta.

            Ibas prinsipna la ate Dibata kita nggeluh ibas kekurangen ntah pe kelihen (musil). Tapi ate Dibata gelah kita kerina nggeluh ibas kecukupen bagepe kelebihen. Guna ndatken sienda tentuna kita harus erdahin.

            Temanta sekali enda eme Tuhan nikapken Taneh mehumur, erdangilah. Tentuna tema enda tempa-tempa ikhususken man kalak perjuma ngenca. Tapi situhuna man banta kerina singgit erdahin ras ndatken hasil simbue.   Memang khusus man kalak perjuma, secara umum adi kin ngerdang harus mperdiateken musim-musim si lit. Tapi musim-musim e la bo berarti nentuken kesuksesanta, sebab teneh siisuan kita merupaken taneh pemere Dibata, janah taneh e mehumur, emaka banci sidat hasil adi ngerdang kita.  Kita banci dat hasil simehuli ras melala adi sirawat ras tutus kita erdahin. Emaka ula kita mbiar ntah aru ateta, sipenting man banta eme tutus kita erdahin.

            Genduari nggo paksana kita ngerdang, ingan erdahinta eme taneh simehumur. Maksudna nggo  paksana kita erdahin ras pepulung sen guna kebutuhen-kebutuhenta. Adi Tutus kita erdahin ras pentar kita pepulung sen (ngaturken keuangenta) maka kita banci dat hasil simelala si banci membiayai kebutuhen-kebutuhen keluarga bagepe guna pelayanan gereja. Erkiteken tutus kita erdahin ras pentar kita pepulung sen, erbahanca kalak sideban cian man banta. Amin lit kalak si cian man banta ula kita mbiar,  ula surut motivasi ras kejingkatenta erdahin.

            Banci kita erdahin ntah pe ngerdangerkite-kiteken Tuhan, emaka harus kita ngataken bujur man Tuhan.

Pdt. Steven Kumenit, STh.M.Min.