Tema : Arah Kinigenggengen Njadiken Kita Serta (Jakup 1:2-8)

BAHAN PJJ GEREJA GBKP
TANGGAL 1 – 7 JULI 2012.
================================
Jakup 1 : 2-8.

Tema : Arah Kinigenggengen Njadiken Kita Serta.

LATAR BELAKANG
1. Secara umum kitab Jakup enda ngerana kerna 1). kiniteken ibas perbahanen, erkiteken sie me adi kalak sierkiniteken la ncidahken perbahanenna, maka kinitekenna e mate. 2). Kata pengajuk gelah kalak sierkiniteken megi ras ndalanken kai siikataken Kata Dibata. Erkiteken sie surat Jakup enda itujuken man kalak si enggo tek man Jesus. Kalak si tek harus jadi sekalak pelaku Kata Tuhan ibas kegeluhenna tep-tep wari amin gia sangana ibas perbeben ras kiniseran.
2. Surat Jakup enda isuratken man kalak Kristen asal Jahudi sitading merap ipalestina, sipaksa sie ngenanami kiniseran, alu sada tujun gelah tetap megegeh ras tetap ncidahken kinitekenna. Sebab selaku kalak kristen la lit sada jaminen, maka kegeluhenna bebas ibas perbeben ras kiniseran, tapi sada paksa pasti jumpa perbeben ras miniseran. Ibas jumpa perbeben ras kiniseran enda me kalak kristen harus nggejapken sada kesangapen, sebab kalak kristen banci muat bagin ibas kiniseran Kristus. Hal sideban, ibas kalak kristen nggeluh ibas kiniseran ras tetap ncidahken kinitekenna maka kalak kristen banci mpemuliaken Tuhan ibas kiniseranna e.
3. Ibas kalak kristen ngenanami perbeben ras kiniseran situhuna lit tujunna eme gelah erdewasana kalak kristen ibas erkiniteken man Tuhan. Erkiteken sie me ibas pengangkan Jakup kiniseran enda merupaken sada percuban (bah Indo = ujian), gelah kalak kristen tuhu-tuhu jadi kalak kristen si dewasa, emaka kalak kristen harus megenggeng ibas ngenanami kiniseran e.
4. Guna seh ku bas pengangkan si bage, kalak kristen harus makeken kepentaren, tapi adi kurang kepentarenna, maka ertotolah ia man Dibata gelah Dibata mereken kepentaren. Enda ngataken guna banci lulus ibas percubaan maka kalak kristen harus makeken kepentaren ibas Dibata nari, labo kepentaren ibas doni enda. Jadi situhuna ate Jakup ngataken man kalak kristen maka percubaan siinanamina lit maknana adi enda “simaknai” alu kepentaren ibas Dibata nari, janah kepentaren ibas Dibata nari mereken kinigenggengen man kalak kristen gelah la putus asa.
5. Kepentaren ibas Dibata nari ialoken kalak kristen adi ipindona ibas pertoton arah tek. La banci alu monce-once sebab kiniteken simonce-once bali kap ras erdua ukur, janah kalak sierdua ukur labo banci ndatken kai siipindona ibas Dibata nari. Kalak kristen harus ertoto alu tek gelah idatna kai siipindona. Sebab ibas kalak kristen tek maka situhuna tek ia maka Tuhan pasti mereken kai siipindona, sebab itehna Tuhan e Tuhan sierkuasa ras perkeleng.

APLIKASI
Adi sisungkun bas pusuhta, pernah kin lit kalak kristen la ngenanami perbeben ras kiniseran?, jababna pasti kerina pernah ngenanamisa. Persoalenna genduari, pernah kin kita ngangkaisa enda kerina merupaken sada percuban man banta, gelah kita jadi kalak kristen silebih megegeh, kalak kristen singasup ncidahken kualitas kinitekenna. Tapi sangat isesalken nterem nge kalak kristen labo ngasup mbaba baban kiniseran ibas kegeluhenna, emaka siterjadi ibas kegeluhenna eme stres, putus asa, ndarami dalan pintas, ntah pe mpersalahken Dibata, rsd. Padahal adi siteh lah kerna kuasa ras keleng ate Tuhan maka ibas kita jumpa perbeben ras kiniseran minter kita reh ku Tuhan guna mindo penampat man baNa, sebab kalak si reh man baNa pasti isampatiNa. Sipentingna tek kita emaka kita ertoto. Bagepe ibereken Tuhan man banta kepentaren (hikmat) gelah megenggeng kita ibas ngenanami perbeben ras kiniseran, sebab ibas kepentaren, kita ngasup ngakai kai tujunna e. Kita ngasup ngangkai perbeben ras kiniseran, menahang ntah pe mberat merupaken sada percuban gelah kita jadi kalak kristen si serta. Emaka amin gia kita lit ibas perbeben ras kiniseran ngasup kita nggeluh ibas keriahen ras sigejapken lit kesangapen, sebab siteh : 1). Tuhan erdahin ibas kai pe (band. Roma 8:28). 2). Kita ipasu-pasu Tuhan. Bagepe kita ngasup makeken kepentaren guna erlajar uga seharusna jadi kalak kristen si patuh (taat). Enda kerina erkiteken kita miliki Tuhan sienggo leben ndalani ras ngenanami kerina e, bagepe ipakeNa kiniseranNa guna ncidahken kepatuhan man BapaNa (nen = Heber 5:8).

Pdt. Steven Kumenit, STh,M.Min.