Mejehe Ateku Kam O Dibatangku (Mazmur 42:2-3)

BAHAN PJJ GEREJA GBKP

TANGGAL 18-24 NOVEMBER 2012.

Mazmur 42:2-3.

Tema : Mejehe Ateku Kam O Dibatangku

LATAR BELAKANG

1.      Sijadi oratenta sendah eme sada bagin ibas pasal 42, janah merupaken sada perngandungen ibas pemazmur nari. Jadi penungkunen engkai maka bage ? Sebab tedeh atena Tuhan, bagepe pemazmur sangana “iejek” kalak, tapi pemazmur erpengakap masalahna banci terdungi adi jumpa ia ras Tuhan. Enda me sada pertoton pengarapen pemazmur siiendeken bani korah nari. Bani Korah eme sada kelompok ibas kaum Lewi nari. Perlu siinget Terpuk Lewi eme siitugasken Dibata khusus ngelai Tuhan ibas rumah pertoton.

2.      Ibas ketertekanan jiwa erkiteken pemazmur “iejek” kalak (kalak kafir), sebab pemazmur tading isekelewet kalak kafir, iinget pemazmur sibanci mereken kemalemen ate adi ia reh ibas rumah pertoton. Rumah pertoton lit i Yerusalem, i gunung Sion. Rumah pertoton la saja ingan ersembah ras muji Tuhan, tapi pe i je Tuhan ringan. Rumah pertoton eme rumah Tuhan. Jadi ibas pemazmur reh ku rumah pertoton, maka pemazmur banci jumpa ras Tuhan.

3.      Ketedehen ate pemazmur jumpa ras Tuhan ibas rumah pertoton, igambarkenna bagi belkih mejehe nandangi lau. Belkih sisangana mengembara i uruk-uruk si la lit dukut-dukutna ras lau i je. “Kelegaan”, gegeh bagepe kegeluhen seekor belkih banci lit adi jumpa ia ras lau maler. Bageme pemazmur erpengakap maka kegeluhenna tergantung man Tuhan saja.

4.      Ipihak sideban ketedehen ate man Dibata, bagepe mbuktiken maka Tuhan e lit adi pemazmur reh ku rumah pertoton. Janah enda jadi sada penungkunen man pemazmur sendiri kerna banci kin ia reh ku rumah pertoton jumpa ras Dibata.

5.      Pemazmur ndauh ibas kota Yerusalem nari simerupaken ingan rumah pertoton, emaka tempa ndauh ibas keterasingken, nggeluh radu ras bangsa si la nandai Dibata, tapi kiniteken pemazmur la mobah. Pemazmur tetap mengandalkan Tuhan ibas kegeluhenna ras ketedehen ate banci reh ku bas rumah Tuhan. Sebab pemazmur nggejapken kegeluhenna lit ibas ketergantungen man Tuhan saja.

APLIKASI

            Selaku kalak sierkiniteken man Tuhan tedeh ate nandangi Tuhan merupaken sada keharusan, sebab tedeh ate nandangi Tuhan sada tanda maka kita enda nggeluh ibas ketergantungen man Tuhan. Janah ketedehen ate nandangi Tuhan banci teridah ras tergejapken arah hubungenta ras Tuhan. Ibas erti kata, erkiteken la ateta sirang ras Tuhan maka ibas kegeluhenta tep-tep wari kegeluhenta tuhu-tuhu berkenan man baNa saja. Kegeluhenta reh ku perpulungen/kebaktin minggu, bage nggeluh ibas kebaktin pribadi/keluarga.

            Ketedehen ateta nandangi Tuhan merupaken sada pasu-pasu tersendiri man banta, sebab sie banci saja la lit man kalak sideban. Tedeh ateta man Tuhan, sebab tek kita Tuhan ngenca ampang-ampang geluhta ras kegeluhenta lit bas tanna. Pasu-pasu Tuhan kap  sierbahanca

Kegeluhenta nggeluh ibas kemalemen ate. Amin gia situhuna i tengah-tengah doni enda melala tantangan si mengahalangi kita nggeluh ras Tuhan, tapi pusuhta tetap ertedeh ate nandangi Tuhan.

            Tuhu melala sibanci ibereken doni enda man banta, tapi e kerina la mbaba kemalemen ate situhu-tuhu man banta. Bagepe melala dibata-dibata ibas doni enda simereken tawaran-tawaran gelah kita banci nggeluh ibas kemalemen ate, Tapi e kerina kemalamen ate la tuhu-tuhu. Dibata ngenca sibanci mereken kemalemen ate situhu-tuhu man banta. Emaka mejehe min pusuhta nandangi Tuhan.

            Ibas minggu-minggu Adven enda, merupaken minggu-minggu nimai kerehen Yesus (Natal). Bagepe ibas pihak sideban, kita isingetken ibas mingu-minggu nimai kerehen Yesus Kristus peduakaliken. Tentuna ibas minggu Adven enda mejehe min ateta nandangi kerehen Yesus, emaka sabar ras megenggeng kita ibas pengarapen kerna kerehen Yesus e. Ibas mejehe kita nandangi Dibatanta, sibahanlah simehuli singena ateNa janah tetaplah sijaga  kebadiaan geluhta.

Pdt. Steven Kumenit, STh, M.Min.