Begiken Perentah Tuhan (Yosua 4: 15-24).

BAHAN PJJ GEREJA GBKP

TANGGAL 4 – 10 AGUSTUS 2013.

Yosua 4:15-24.

Tema : Begiken Perentah Tuhan.

LATAR BELAKANG

1.      Salah sada tantangan (tantangan si pemena) siharus ihadapi Josua labo jelma (kalak Kanaan), tapi lau Jordan. Sebab paksa sie Lau Jordan sangana banjir, janah biasana ibas keadaan bagenda,  lau Jordan la banci terkepari, sebab launa banci seh 1 KM belangna, janah arus launa cukup  “deras”. Lau jadi banjir erkite-kiteken paksa sie sangana musim semi, emaka kerina salju simenutupi kerina deleng-deleng enggo mulai mencair, janah salju e jadi lau ras mengalir ku lau Jordan.

2.      Ngepari Lau Jordan eme dalan siharus idalani bangsa Israel gelah seh ku tanah Kanaan, khususna kota Jerikho dua jam ngenca perdalanen bangsa Israel kenca bangsa Israel ngepari lau Jordan. Erkiteken sie me Dibata mereken sada tanda sengget man bangsa Israel arah pengadi Lau Jordan. Lau Jordan ngadi erkiteken peti perpadanan siilanja para imam enggo seh i lau Jordan, ntah pe para imam nggo ndedehken nahena i lau e, maka lau e ngadi. Emaka sijadi eme lau si reh arah utara nangkih ku das jadi bendungen, tapi lau sisebelah selatan nari terus mengalir seh ku laut mati, emaka terjadi me dataran simbelang si enggo kerah sibanci idalani bangsa Israel. Kehadiren Dibata lit ibas  peti perpadanan siilanja para imam. Perbahanen Dibata (nen = tanda sengget) bali ras sanga Dibata pengadi laut Teberau paksa bangsa Israel ndarat  i taneh Mesir nari. Bagepe kepemimpinen Dibata man bangsa Israel ibas lau Jordan enggo berbeda ras paksa Dibata minpin bangsa Israel tupung bangsa Israel erdalan i taneh mesawang. I je Dibata minpin bangsa Israel arah binangun embun paksa suari ras binangun api paksa berngi, tapi tupung  ngepari lau Jordan kepemimpinen Dibata icidahken arah peti perpadanen. Enda ngatakenca suasana ras dalan enggo berbeda. Erkiteken tanda sengget siibahan Dibata enda me maka bangsa Israel banci ngepari lau Jordan.

3.      Ibas bangsa Israel enggo banci ngepari lau Jordan e, maka Yosua arah persuruhen Dibata merentah man bangsa Israel, siiwakili sada kalak tep-tep terpuk  bangsa Israel (nen = 12 suku Israel) gelah muat batu  i lau Jordan (ingan tedis para imam si ngelanja peti perpadanan), guna majekken sada tanda peringet-ingeten kerna tanda sengget siibahan Dibata ije. Ingan majekken tanda peringet-ingeten eme ibas ingan bangsa Israel  erberngi ope nerusken perdalanen ku taneh Kanaan. Tujun enda eme gelah bangsa Israel nggejapken maka ia banci ngepari i lau Jordan erkiteken Dibata. Bagepe tanda peringet-ingeten enda merupakan sada perbahanen adikodrati (nen = sada peristiwa siluar biasa si la banci ibahan manusia). Perlu siteh lebe tanda peringet-ingeten enda ipajekken alu 12 batu simerupaken tanda 12 suku Israel.

4.      Ipihak sideban tanda peringet-ingeten e merupaken sada momentum guna ngajari anak-anak bangsa Israel paksa idahna batu peringet-ingeten e. Sebab paksa idahna tanda peringet-ingeten e banci saja isungkunna kerna kai etina e, emaka harus ijabab alu nuriken maka Lau Jordan ngadi maler asum Peti Perpadanen Tuhan ngepari lau e. Alu bage anak-anak bangsa Israel ngenen man Tuhan saja. Tuhan saja isembahna.

5.      Tanda peringet-ingeten siipajekken bangsa Israel i Gilgal, ingan erkemah kenca bangsa Israel ngepari lau Yordan, sada tanda Dibata tetap nemani ras mulahi  bangsa Israel ibas erbage-bage tantangan-tantangan gelah bangsa Israel bengket ku tanah Kanaan. Bagepe ngataken maka Dibata bangsa Israel eme Dibata sierkuasa man kerina tinepaNa. Alu bage kerina kesusuran bangsa Israel mbiar man Tuhan saja.

APLIKASI

            Perentah Tuhan mereken kesangapen man banta. Perentah Tuhan banci siteh arah khotbah, ngoge Pustaka Si Badia, bagepe ibas pengajaren orang tuasimehuli man anak. Tapi mekatep la sibegi ras sidalanken perentah Tuhan ibas kegeluhenta tep-tep wari. Emaka la perlu mamang ateta adi lit senina turangta erbahan si la mehuli si la ngena ate Tuhan.

            Perentah Tuhan enda la saja ngataken maka kita banci ndatken kesangapen, tapi pe ituntut gelah man Tuhan saja kita mbiar ras harus isembah. Sebab siteh ras-ras ibas perkembangen zaman sigenduari melala dibata-dibata sideban sibanci mpengaruhi perukurenta nggeluh ernalem man Tuhan. Tapi adi lalap sibegi kerna perentah Tuhan maka sijadi eme ipasu-pasu Tuhan me kita. Enda banci jadi adi tuhu-tuhu sitandai alu payo kerna kuasa ras perkeleng ate Tuhan man kita kerina manusia.

            Ipihak sideban peranan orang tua guna mpeseh kerna perentah Tuhan eme mbiar ras erkemalangan man Tuhan, bagepe ndalanken simehuli ibas kerina kegeluhenta cukup penting, emaka fungsi orang tua harus tuhu-tuhu idalanken, gelah anak-anak la terikut ibas arus doni enda, anak-anak la terlibat ibas pinakit masyarakat, tapi si jadi eme anak-anak jadi anak sierkemalangan ras mbiar man Tuhan.

Pdt. Steven Kumenit, STh, M.Min.