Dibata Singkawali (Gereja Bagi Nande) PerpulungenNa (Roma 11:33-36)

BAHAN PJJ GEREJA GBKP

TANGGAL 6 – 12 JULI 2014

Roma 11: 33-36.

Tema : Dibata Singkawali (Gereja Bagi Nande) PerpulungenNa

LATAR BELAKANG

1.      Perpulungen Roma labo Paulus simantekisa, tapi amin bage gia persoalen si lit ibas perpulungen Roma i tehna, khususna uga kalak kristen asal Yahudi la siangkan ras kalak kristen siasalna la kalak Yahudi nari. Inti persoalenna eme kerna keselamatan. Kalak Kristen asal Yahudi erpengakap gelah selamat maka harus mantangken piga-piga pangan bagi siipantangken kalak Yahudi. Tapi kalak kristen siasalna la kalak Yahudi nari lanai mpertentangken sie, sipenting eme geluhna nggo iselamatken Yesus. Erkiteken sie me Paulus mereken sada pengangkan kerna ise kalak Yahudi ras ise ka  kalak si la kalak Yahudi ibas rencana keselamatan Dibata.

2.      Litna kalak  si la kalak Yahudi ibas keselamatan Dibata, enda kerina ibas rencana Tuhan. Memang tangtangna keselamatan e ibereken Tuhan man kalak Yahudi tapi erkiteken ipermersikna ukurna, itulakna Berita Si Meriah maka keselamatan e iterusken Tuhan man kalak si labo kalak Yahudi si nggit ngaloken Berita Si Meriah e. Tapi labo berarti kenca kalak kristen si asalna la kalak Yahudi ialoken Tuhan, maka labo berarti kalak Yahudi lanai ialoken Tuhan, tetap nge kalak Yahudi jadi teman Tuhan adi kalak Yahudi erkemalangan man Tuhan. Enda me kepentaren Tuhan si la terukuri manusia, khususna kalak Yahudi.

3.      Keselamaten singgo ibereken Tuhan man sesekalak jelma eme sada keputusen Tuhan, janah la lit sada jelma siikut campur tan ibas keputusen e. Bagepe la lit sada jelma pe singasup nerangken keputusen e. Ibas erti kata ngkai maka bage keputusen TUhan. Sebab tangtangna ipilihna bangsa Yahudi (Israel), janah seharusna min arah bangsa Israel, bangsa si deban ndatken keterkelinen, tapi dungna la bage. Minter nusur Tuhan ku doni enda erdahin guna keselamatan manusia.

4.      Keselamatan singgo ibereken Tuhan man manusia, e sada kebayaken Tuhan, emaka kalak singgo ndatken keselamaten e banci inanamina alu meriah ukur. Jadi situhuna Paulus la saja ngerana soal kebayaken,  sibas pengangkan manusia eme soal erta benda. Tapi lebih asangken sie eme kerna keselamaten. Bagepe keselamaten singgo ibereken Tuhan man kerina jelma alu la erdobahan eme sada kepentaren Tuhan, janah kepentaren manusia la ngasup ngukurisa, erkiteken sie me kepentaren Tuhan jadi imbang ibas kepentaren manusia/doni. Sabab adi siukuri kerna perbahanen singgo ilakoken kalak si la kalak Yahudi, tentuna alu erpalasken kepentaren manusia, maka ia la banci selamat erkiteken lagu langkah si la sue ras peraten Tuhan. Tapi erkiteken perkuah ate Tuhan maka ise saja sitek man Yesus, tentu nggeluh ibas keselamaten. Enda siimaksudken Paulus kerna kebayaken ras kepentaren.

5.      Tujun puji-pujin Paulus enda, gelah perpulungen banci meteh kerna eksistensi Tuhan ras karya keselamaten siibereken Tuhan man perpulungen. Alu bage perpulungen Tuhan nggeluh ibas kekelengen ras ibas persadan ras Tuhan.

APLIKASI

            Nina Calvin, gereja eme nande. Maksudna gereja e harus nggeluh bage nande. Gereja harus mereken sada perlindungen, pengajaren ras ingan ngadu-ngadu anggota perpulungen. Tujunna gelah anggota perpulungen tetap nggeluh ibas keselamatan ras nggeluh ibas kekelengen.

            Fungsi gereja harus tuhu-tuhu idalanken i tengah-tengah perpulungen Tuhan. Gereja la saja ngajari kerna keselamaten tapi pe harus jadi ingan cicio anggota perpulungen, gelah anggota gereja tetap ersada maka ia eme ring-ring siharus nggeluh ibas ikaten keleng ate Tuhan. Bagepe anggota perpulungen harus nggeluh ibas kebayaken ras kepentaren Tuhan eme keselamaten. Adi bage maka kegeluhen anggota gereja tep-tep wari harus tuhu-tuhu ijaga, gelah ula nggeluh ibas dosa, termasuk uga selaku perpulungen nggeluh ibas ikatan persadan, emaka adi lit masalah, banci idungi ibas gereja. Bagepe tuhu-tuhu anggota perpulungen lit nggejapken kemalemen ate nggeluh selaku anggota gereja. Jenda me peranen serayan Tuhan (Pdt, Pt ras Dk). Sebab serayan Tuhan itempatken i tengah-tengah gereja gelah ngajari, ngasuhi, simperrmakani  ras njaga kiniteken anggota perpulungen.

Pdt. Steven Kumenit, STh.M.Min.