Mejingkat Erkiniteken, Mejingkat Erdahin (Kisah Para Rasul 18:1-4)

BAHAN PJJ GEREJA  GBKP

TANGGAL 5 -11 OKTOBER 2014

Perbahanen Rasul-Rasul 18: 1-4.

Tema : Mejingkat Erkiniteken, Mejingkat Erdahin.

LATAR BELAKANG

1.      Secara umum Pelayanan Paulus ikhususken man kalak si labo kalak Yahudi (Band. Perbahanen 15:12). Erkiteken sie me Paulus seh i kota Korinti guna mpeseh Berita keselamaten man kalak Korinti.

2.      I kota Korinti  Paulus erdahin ras tading ia i rumah Akwila ras Priskila si kin temanna sada pendahin erbahan tenda. Akwila situhuna tangtangna tading i Roma, tapi erkiteken kebijaken politik pemerintah Roma, maka  ipelawes  me kerina kalak Yahudi ibas kota Roma nari, sebab sapih-sapih kalak Yahudi rubat. Erkiteken sie me maka Akwila ras Priskila tading i kota Korinti. Jadi memang, Paulus tading i rumah Akwila ras Priskila erkiteken ikaten sada pendahin. Janah ibas sejarah, je ikataken maka Paulus tading i rumah Akwila ras Priskila lit 1,6 tahun. Enda mbuktiken maka keluarga Akwila ras Priskila  tuhu-tuhu nampati pelayanen Paulus.

3.      Erdahin selaku tukang tenda erkiteken la ate Paulus mberatken perpulungen, emaka hasil arah tenda enda me si jadi modal Paulus guna mbiayai dirina sendiri ras pelayanenna. Enda ilakoken Paulus gelah iteh perpulungen maka pelayanen Paulus ibas mberitaken keselamaten tuhu-tuhu murni. Bagepe ate Palus gelah perpulungen pe banci ngenen ras ngusih perbahanen Paulus eme erdahin.

4.      Tujun Paulus reh ku Korinti eme ibas rangka mberitaken keselamaten ibas Yesus Kristus erkiteken sie reh Paulus ku Rumah Pertoton tep-tep wari sabat, janah iajarina kalak Yahudi ras kalak Junani. Rumah Pertoton jadi ingan pengajaren Paulus erkite-kiteken, tep-tep wari sabat, pulung kalak Yahudi guna ersembah man Tuhan. Jadi ipake Paulus waktu ras kesempaten e guna mberitaken keselamaten. Ibas Paulus ngajar i rumah Pertoton tentuna ndatken perlawanen ibas kalak Yahudi nari, sebab lenga teraloken kalak Yahudi kerna Yesus selaku Tuhan. Tapi tetap Paulus mberitaken kerna Yesus eme Tuhan ras ulu keselamaten, alu tujun gelah kalak Yahudi banci tek.

5.      Amin gia situhuna fokus pemberitaan keselamaten siilakoken Paulus ikhususken man kalak si labo kalak Yahudi (Yunani), tapi Paulus tetap mberitaken keselamaten e man kalak Yahudi pe, emaka rumah pertoton simerupaken ingan kebaktina Kalak Yahudi idahi Paulus me.

APLIKASI

            Tutus erkiniteken man Tuhan harus teridah man kerina kalak kristen. Tutus erkiniteken la saja teridah tupung  gereja, tapi uga kita ngasup mengaplikasiken kiniteken ibas kegeluhenta tep-tep wari eme ngalo-ngalo kalak sikesilang ibas rumahta ras dalanken kekelengen. Bagepe teridah min ibas kita erdahin. Maksudna eme selaku kalak kristen harus mejingkat erdahin. Adi enda ilakoken maka enda sada bukti kita ngataken bujur man Tuhan erkiteken nggo iberekenna man banta pendahin, bagepe ateta ibas kita erdahin lit sada pemberitaan kerna Yesus, sebab tupung kita erdahin alu tutus maka kalak pe banci ngenen uga jingkatna kita erdahin erkiteken kita enda kalak kristen.

Pdt. Steven Kumenit, STh.M.Min.