Engkelengi Orang Tua (Keluaran 20:12; Kuan-Kuanen 23 : 22-25).

PERPULUNGEN JABU - JABU

GEREJA GBKP

TANGGAL 11 – 17 OKTOBER 2015.

Keluaran 20:12; Kuan-Kuanen 23 : 22-25.

Tema : Engkelengi Orang Tua

LATAR BELAKANG

A.      Keluaran 20:12.

1.    Sijadi oratenta enda, eme sada bagin si la terpisahkan ibas ayat 1 nari, singerana kerna sepuluh pedah Dibata. Sepuluh pedah Dibata enda ipeseh Dibata man Musa gelah iterusken Musa man bangsa Israel. Sepuluh pedah Dibata enda ialoken Musa i deleng Sinai. Tupung sie bangsa Israel sindarat i Mesir nari ku taneh Kanaan. Janah kenca seh i gurun pasir Sinai, idilo Tuhan Musa. Ibas perjumpan e ngerana Tuhah. Janah kai siikataken Tuhan e me siigelari sepuluh pedah Dibata. Bagepe salah sada sepuluh pedah Dibata, ntah pe pedah si pelimaken eme  Mehamatlah man bapandu ras nandendu, gelah banci kam ndekah nggeluh i bas negeri si Kubereken man bandu pagi.

2.    Erkiteken bentukna pedah maka anak-anak wajib mehamat man orang tuana. Mehamat man orang tua berarti anak-anak ndatken pasu-pasu i tanah Kanaan. Bentuk mehamat man orang tua la saja terjeng ngergai tapi lit kepatuhan nandangi orang tua. Sebab orang tua ipercayakan Tuhan guna ndidik anak-anak gelah erkemalangan man Tuhan. Adi anak-anak la mehamat man orang tuana seh pe pek-pek ras numpahina maka anak-anak e ndatken hukumen eme arus ibunuh (Kel. 21:15, 17).

3.    Mehamat man orang tua berarti anak-anak patuh man Tuhan, sebab pedah enda ibereken Tuhan.

B.       KUAN-KUANEN 23: 22-25

1.                 Sijadi oratenta sendah eme salah sada bagin ibas pengajaran kepentaren ibas raja

Salomo nari. Kata ajar enda gelah anak-anak banci erkemalangan man Tuhan. Tuhan jadi ulu kegeluhenna. Alu bage la lit dibata-dibata sideban siisembahna. Erkiteken sie me anak-anak arus megiken kai siiajarkan orang tua.

2.                 Perlu siteh orang tua, khususna bapa ibas kegeleluhen keluarga kalak Israel merupakan sentral pendidikan. Bapa bertanggungjawab ndidik anak-anakna. Isamping sie, erkiteken bapa nggo leben ngenanami kegeluhen i doni enda (band. Sudah banyak makan asam dan garam). Emaka persinget man anak-anak gelah anak-anak megiken ranan bapa, bagepe ngergai sekalak nande adi nande nggo metua. Kepatuhen anak-anak megiken ranan bapa bagepe ngergai nande si nggo metua banci nggeluh ibas kemalamen ate. Sebab alu ndalanken sie berarti anak-anak nggo ndalanken sepuluh pedah Dibata, khususna pedah sipelimaken. Bagepe anak-anak nggo nggeluh ibas erkemalangan man Tuhan, emaka ipasu-pasu Tuhan anak-anak e.

APLIKASI

       Tanggungjawab selaku anak eme ngkelengi orang tua. Ngkelengi orang tua labo erkite-kiteken orang tua lebih tua asangkan anak, ntah pe erkiteken orang tua maka anak lit bas doni enda. Tapi ibas anak-anak ngkelengi orang tua, maka anak-anak mbiar ras erkamalangan man Tuhan. Bagepe idalankenna sepuluh pedah Dibata ras  nggeluh ibas keleng ate.

       Ngkelengi orang tua berarti nggit megiken kai siikataken orang tua, bagepe nggit anak-anak nampati orang tua ras mpehagaken orang tua.

       Ibas anak-anak megiken kai siiajarkan orang tua maka anak-anak banci tehindar ibas situasi ras  keadaan doni enda eme kepentaren doni enda.

                Perlu siteh kesuksesan anak, erkiteken orang tua, emaka sada kewajiban man anak guna ngkelengi orang tua. Tapi la terpungkiri, erkiteken kesuksesan anak, dungna tempa-tempa perhatin anak nandangi orang tua, khususna orang tua singgo metua terabaikan. Emaka gelah lit singurussa, la saja perpan tapi pe kesehatenna, maka lit anak naruhken orang tua ku YAPOS. Jadi penungkunen apakah enda salah ? Situhuna ngidah persoalan enda me, maka gereja GBKP mbangun YAPOS (Yayasan Pelayanan Orang Tua Sejahtera). Janah situhuna naruhken ku Yapos labo merupakan hal sisalah, tapi situasi nge sierbahanca anak bage. Tapi sebage persinget man anak, labo berarti kenca orang tua nggo i YAPOS tanggung jawab anak lanai lit. Tanggungjawab anak tetap lit eme mperdiateken, mengunjungi ras sekali-kali mbaba orang tua ku rumah mulihi.

Pdt. Steven Kumenit Tarigan, STh.M.Min.