Kita Kap Aron Dibata (Efesus 4:1-7)

PEKAN PENATALAYANAN

GEREJA GBKP

WARI I, MINGGU 17 JANUARI 2016.

Invocatio    :    Tapi kam eme bangsa pilihen, imam-imam Raja, bangsa sikerajangen Dibata, anak-anak Dibata si ipilih guna meritaken perbahanen-perbahanen Dibata si mbelin. Dibata nggo ndilo kam ndarat ibas gelap nari ku bas terangNa si lanai kal langlang ulina (1 Petrus 2:9).

Ogen          :    Pilipi 2:1-4.

Renungan   :    Epesus 4:1-7.

Tema          :    Kita Kap Aron Dibata.

LATAR BELAKANG

1.      Sijadi bahan perenungenta sendah eme surat Rasul Paulus siikirimkenna ibas penjara nari. Janah enda mereken motivasi man man perpulungen Epesus gelah tetap nggeluh bagi tangtangna perpulungen idilo guna ngikut Kristus. Siimaksudken nggeluh bagi sitangtangna kam  idilo guna ngikut Kristus eme nggeluh selaku Imago – Dei (segambar ras Dibata), ntah pe nggeluh alu lagu langkah simehuli singena ate Tuhan.

2.      Tuhu ibas perpulungen Epesus la bo lit perpecahan, tapi Paulus tetap mpersingeti perpulungen gelah tetap nggeluh ibas persadan selaku gereja. Emaka alu kongkrit perpulungen Epesus arus mpraktekken kegeluhen alu horisontal sapih-sapih manusia eme nggeluh alu kiniteruken ukur, lemah lembut, saber, la pergelut, nggeluh ibas perdamen. Bagepe nggeluh alu vertikal eme ras Tuhan. Kegeluhen ras Tuhan arus teridah, perpulungen Epesus arus ngangkai maka sada ngenca Tuhan. Sada kiniteken, sada peridin. Sada ngenca Dibata eme Bapa kerinana sierdahin ibas kerina sinasa lit.

3.      Ibas ngangkai kegeluhen selaku gereja, maka ipersingeti Paulus tole man perpulungen maka kerina perpulungen nggo ibereken kengasupen sikhusus sue ras bagin siibereken Tuhan man anggota perpulunegen. Enda kerina iberekenna sue ras lias ate Tuhan. Ibereken Tuhan kerina enda gelah kerina anggota perpulungen muat bagin ibas pelayanan. Alu bage kegeluhen perpulungen erdewasana, sebab kerina anggota perpulunge terlibat aktif ibas pelayanan gereja.

4.      Tuhu perpulungen Epesus reh ibas erbage-bage latar belakang sosial ras budaya. Anggota perpulungen Epesus la bo kalak kristen si asalna la kalak Yahudi nari, tapi pe kalak kristen siasalna kalak Yahudi nari. Amin gia erbage-bage latar belakang, tapi perpulungen Epesus arus ngangkai maka ia kerina sada kula. Erkiteken sada kula maka tentuna kerina anggota perpulungen nggeluh ibas persadan ras kedamen, la banci nggeluh serap-serap ntah pe egois. Kerina anggota kula saling membutuhken sada ras sidebanna. Bagepe perpulunge Epesus arus ngangkai maka sada ngenca Kesah. Kesah enda me sipersadaken ia kerina. Kesah siimaksudken eme Kesah Si Badia.

5.      Pengakun perpulungen Epesus la saja terjeng ibas sada kula, sada Kesah, sada Tuhan. Tapi pe ibas sada pengarapen. Ibas sada pengarapen, ate Paulus gelah perpulungen tetap ngangkai maka nai ia nggeluh ibas kematen erkite-kiteken la nggeluh ibas persadan ras Yesus. Tapi erkiteken genduari ia nggeluh ibas persadan ras Yesus Kristus, maka perpulungen nggo nggeluh ibas keselamatan. Genduari perpulungen sangana nimai kerehen Yesus Kristus peduakaliken. Bagepe pasu-pasu Tuhan. Emaka ibas nimai enda, perpulungen arus nggeluh ibas sada kula, nggeluh ibas lagu langkah simehuli singena ate Tuhan, nggeluh ibas sada Tuhan saja ras nggeluh ibas ndahiken-dahin Tuhan sue ras pemere-pemere singgo ibereken Tuhan man kerina anggota perpulungen.

APLIKASI

            Kita kerina nggo idilo Tuhan selaku gereja, emaka selaku gereja kita arus ndahiken dahin Tuhan i tengah-tengah doni enda. Dahin siimaksudken eme dahin keselamatan. Ibas kita ndahiken dahin Tuhan berarti kita nggo jadi Aron Dibata. Erkiteken kita enda Aron Dibatamaka sipaling penting man banta eme arus lit min sada visi ras misi bas kita. Visinta eme termulia Tuhan ibas dahinta. Emaka misinta eme lit min komitmenta erdahin ras-ras. Emaka selaku aron Dibata, la banci lit bas kita egois. Selaku Aron Dibata kita kerina seri, la lit ganjang teruken, sebab kita erdahin ibas visi ras misi si seri. Bagepe kita erdahin ibas juma Tuhan siipercayaken Tuhan man banta.

            Selaku aron Dibata, berarti kita la banci sinik saja, tapi lit peranta sekalak-sekalak. Janah arus min siangkai maka sidahiken kita eme dahin Tuhan emaka guna kemulian Tuhan. Apai ka ibas tahun enda, tema gerejanta eme meningkatkan komitmen warga GBKP yang misioner untuk berpartisipasi dalam pelayanan. Jadi secara sederhana, arah tema enda ngatakenca man banta arus lit bas kita komitmen guna maju ras berkembang, emaka mari kita muat bagin ibas pelayanan. La saja cakap siiperluken tapi keterlibatenta ibas pelayanan. Adi lit sikurang ibas pelayanan, ras-ras sicakapken, gelah bertumbuh kita ibas pelayanan gereja.

Pdt. Steven Kumenit, STh.M.Min.