Sembahlah Dibata Saja (Keluaran 20:1-5)

PERPULUNGEN JABU-JABU

GEREJA GBKP

TANGGAL 10 - 16 JULI 2016.

Keluaren 20 : 1- 5.

Tema : Sembahlah Dibata Saja.

LATAR BELAKANG

1.      Kenca bangsa Israel ndarat ibas bangsa Mesir nari selaku bangsa si bebas, lanai jadi bangsa budak, seh me bangsa Israel i deleng Sinai. I deleng Sinai terjadi me ikaten perpadanen Dibata ras bangsa Israel. Bangsa Israel jadi bangsa Dibata, janah guna jadi bangsa Dibata, bangsa Israel arus ngikutken ras matuhi perpadanen.

2.      Ibas rangka ikaten perpadanan bangsa Israel ras Tuhan nggeluh, maka Tuhan ndilo Musa nangkih ku deleng Sinai, janah ibereken Tuhan 10 pedah Dibata gelah enda ipatuhi bangsa Israel.

3.      Sijadi oratenta sendah eme pedah Tuhan sipemena ras peduaken ibas 10 pedah Dibata. Ibas oratenta sendah tuhu Dibata ngataken man bangsa Israel gelah Ia saja siisembah, ras la banci lit gana-gana man bangsa Israel. Bangsa Israel arus tuhu-tuhu patuh man Dibata saja singgo mpedarat ia ibas bangsa Mesir nari. Bangsa Israel la banci erbahan gana-gana siseri ras Tuhan, janah enda jadi palas bangsa Israel nembah man Tuhan saja. Tuhan la banci ipeseri ibas bentuk ntah pe rupa sideban janah isembah. Sebab Tuhan eme Tuhan sierkuasa ras tetap nggeluh man bangsa Israel.

4.      Ibas pedah Tuhan Tuhan enda, leben Dibata ngerana man bangsa Israel kerna kelepasan/pembebasan bangsa Israel i Mesir nari. Kerina e erkiteken Tuhan, labo lit peranan ise pe. Enda kerina erkiteken keleng ate Tuhan man bangsa Israel. Jenari erkiteken bangsa Israel nggo erpadan ngikuti ras ndalanken perpadanan, maka sipaling utama ibas kegeluhen bangsa Israel eme ngakui Tuhan ras Tuhan saja siisembah. Adi enda la ilakoken bangsa Israel maka penghukumen Tuhan seh man bangsa Israel. Janah penghukumen Tuhan seh ku kesusuren peempatkan. Jadi bangsa Isreal isuruh nggeluh ibas monoteisme. Ersembah man sada Tuhan saja, eme Tuhan singgo mpedarat bangsa Israel i Mesir nari.

5.       Bangsa Israel la banci erbahan gana-gana ras erjimpuh ku je. Perlu iteh, ibas zaman kuno, lit sada pengangkan maka banci saja ibas patung eme ingan tading tuhan, janah patung e banci mewakili Tuhan. Janah enda me siilakoken kalak kafir. Perbahanen sibage, njadiken Tuhan terikat ntah pe statis ras terbatas. Padahal Tuhan e dinamis ras bebas ras la banci iperentah ise pe.

APLIKASI

            Adi siidah ibas kegeluhenta genduari, subuk perkembangan ekonomi, i ja nggo ergampangna ndatken kebutuhen-kebutuhen keluarga, janah murah ka. Bagepe semakin meningkatna kebutuhen keluarga. Bagepe situasi ras keadaan alam siekstrim, sierbahanca, lit gagal panen, ntah pe lit si la banci nuan erkiteken nggo ndekah lego, rsd. erbahanca nterem anak-anak Tuhan stres ras putus asa.

            Ibas situasi sibage, kinitekenta tempa iuji. Ngasup kah kita ngalaken kerina perbeben ras kiniseran e ntah lang. Tapi siidah nterem kalak kristen la ngasup ngalaken perbeben e. Sebab lit nge ibas memenuhi kebutuhen ekonomi pribadi ras keluargana  maka isembahna dibata sideban, siakapna banci mereken keuntungen man bana.

            Melala bentuk ersembah man dibata-dibata sideban iantarana : reh ku bas kerangan ersembah i batang kayu si galang, erlau-lau mindo gelah udan nusur. Njemak barang-barang siakapna banci nguntungken bana, make barang pelaris, rsd. Enda kerina bentuk okultisme. Janah kerina enda la sue ras kinitekenta. Sebab kinitekenta ngatakenca kita la banci ersembah man dibata-dibata sideban. Tuhan saja siarus isembah kita. Adi nggo lit dibata sideban bas geluhta, berarti kita nggo ersembah man 2 tuan, emaka la bo teneng geluhta. Bagepe enda me sierbahanca nembeh Dibata man banta. Emaka kai pe masalah ras perbebenta, reh saja man Tuhan. Pindolah penampat man baNa. Sebab Tuhanta e perkeleng ras melias. Bagepe iperdiatekenNa kegeluhenta. Saja siipindona man banta eme ernalem ras ersembah man Tuhan saja. Tuhan trinitas arus jadi Tuhan sada-sadana ibas kegeluhenta.

Pdt. Steven Kumenit, STh.M.Min.