“Tetap Ras Paguh Ibas Erpengngarapen” (Roma 5:4-13)

KHOTBAH MINGGU 4 DESEMBER 2016

GEREJA GBKP

Invocatio    :    Jesus Kristus me si maba kita bengket ku bas lias ate Dibata erkiteken kinitekenta. Janah i bas lias ate Dibata e me kita nggeluh dingen ringan. Dage meriah ukurta sabap lit pengarapenta maka kita ikut dat bagin i bas kemulian Dibata (Roma 5:2).

Ogen          :    Jesaya 11:1-10 (Tunggal).

Khotbah     :    Roma 5:4-13 (Antiponal).

Tema          :    “Tetap Ras Paguh Ibas Erpengngarapen”

LATAR BELAKANG

1.      Secara umum, Paulus ngerana kerna Kristologi. Sebab erkiteken kalak kristen tek man Kristus maka kalak kristen (Roma) nggeluh ibas lias ate Dibata. Erkiteken Kristus maka kalak kristen nggeluh ibas kerembaken ras Dibata. kalak kristen ibenarken erkiteken tek man Yesus Kristus. Alu bage enda jadi palas man kalak kristen guna nggeluh ibas keriahen sebab kalak kristen nggeluh ibas pengarapen kerna kemuliaan Dibata. Tapi la saja nggeluh ibas keriahen erkiteken lias ate Dibata siiberekenNa man kalak kristen, tapi kalak kristen pe arus “bermegah ibas kiniseran, sebab ibas kiniseran turah saber ate, sebab ibas saber ate lit kemenangen. Situhuna ate Paulus ngataken maka ibas kiniseran situhuna i je lit pengujin. Janah kalak kristen ibas pengujin e lit pengarapan.

2.      Kenca kalak kristen tek man Yesus Kristus maka salah sada siarus idalanken eme nggeluh ibas pengarapen (bdk. 1 Kor.13:13). Janah pengarapen kalak kristen eme nggeluh ibas kemuliaan Dibata. ibas kemulian Dibata, kalak kristen ipehaga. Nggeluh mulihi imago-Dei man manusia. Alu bage kalak kristen nggeluh ibas Surga erkite-kiteken dosa lanai erkuasa man kalak kristen. Janah guna sie me Dibata ncurcurken kekelengen ibas pusuh kalak kristen (kalak si tek) gelah tetap nggeluh ibas pengarapen.

3.      Ibas keleng ate Dibata, maka Dibata perembaken diriNa ras kalak si tek erkite-kiteken Yesus Kristus. Yesus Kristus mate guna nebusi dosa-dosa manusia. Bagepe erkiteken kematen Yesus Kristus maka kalak si tek man Yesus Kristus nggo terkelin  ibas pernembeh ate Dibata. Paulus mereken sada makna teologis kerna nggeluh ibas Yesus Kristus. Nggeluh ibas Yesus Kristus berarti nggeluh ibas keselamatan. Lanai nggeluh ibas pernembeh ate Tuhan. Tuhu nai kalak si tek man Yesus, jadi imbang Dibata erkiteken dosa. Tapi erkiteken kematen Yesus maka kalak si tek iperiahken ras Dibata. Alu bage kalak si tek nggeluh ibas keselamatan.

4.      Ibas kekoten manusia, je Kristus mate. Maksudna, tupung sie manusia nggeluh ibas kedagingan/dosa janah manusia la ngasup mbebasken dirina ibas perbudaken dosa nari. Yesus Kristus nggit mate nandangi kerina manusia si nggeluh ibas dosa, je me si la ngasup ibahan manusia. Sebab manusia mesera kal mate nandangi kalak bujur, tapi nandangi kalak simehuli banci jadi lit kalak si nggit mate.  Tapi ibas lias ate Dibata, Yesus Kristus mate guna nelamatken manusia. Tuhu erkiteken Adam maka kerina manusia erdosa, janah erkiteken dosa maka manusia nggeluh ibas kematen (bdk. Roma 6:23). Janah dosa nggeluh ope denga Dibata mereken undang-undang man Musa. Tapi erkiteken lias ate Dibata, dosa singgo ngkenai kerina manusia masap erkiteken Yesus Kristus. Emaka ibas Yesus Kristus manusia nggo nggeluh ibas lias ate Tuhan (keselamatan).

5.      Ate Paulus ngataken man perpulungen Roma, lias ate Dibata singgo iberekenna man manusia, babai kegeluhen simbaru man manusia, eme nggeluh ibas lias ate Tuhan. Janah kerina e erkiteken Tuhan, labo erkiteken gegeh ras kengasupen manusia. Emaka  kalak kristen ibas nggeluh ibas lias ate Tuhan arus nggeluh ibas pengarapen.

APLIKASI

            Sendah ibas minggu Adven II, isingetken uga searusna manusia nggeluh ibas lias ate Tuhan. Manusia (kita) singgeluh ibas lias ate Tuhan arus nggeluh ibas kedamen. Janah nggeluh ibas kedamen eme nggeluh ibas kemalemen ate (nen = ogen). Alu bage kita isingetken gelah kita arus nggeluh ibas kebaikan ras nggit mate nandangi kalak bujur.

            Kalak kristen arus nggeluh ibas pengarapen kerna kerehen Yesus Kristus peduakaliken. Janah kalak kristen ula mbiar sebab Dibata pasti nemani kita. Dibata nggo mereken kekelengenNa ku bas pusuhta arah Kesah Si Badia, gelah kita tetap paguh ndalani kegeluhenta tep-tep wari.      

            Ibas ogenta ngataken maka ibas paksa si reh, reh Raja dame nggo seh ibas diri Yesus Kristus. Janah ibas rangka nggeluh ibas kedamen, maka Yesus nggit ngalemi salah dosa manusia. Gelah manusia nggeluh ibas keselamatan. Jenari kalak singgeluh ibas keselamatan, nggeluh ia ibas kedamen, sebab la nggit rubat sapih-sapih manusia. Emaka kalak singgeluh ibas Raja Dame arus nggeluh ibas kedamen.

            Tetap ras paguh ibas erpengarapen. Nggeluh ibas pengarapen mabai kita nggeluh ibas kinigenggengen ras setia. Kita banci megenggeng erkiteken siteh kai siiarapken kita eme nggeluh ibas kemuliaan Dibata. Emaka amin gia melala perbeben ras kiniseran tetap kita paguh ibass erpengarapen. Enda me simehergana kal ibas kegeluhenta selaku kalak singgeluh ibas lias ate Dibata.

           

Pdt. Steven Kumenit, STh.M.Min.

Arah Dalanna Me Erdalan Kita (Yesaya 2:1-5)

KHOTBAH MINGGU TANGGAL 27 NOPEMBER 2016.

MINGGU ADVEN I

GEREJA GBKP

Invocatio    :    Emaka sikapkenlah ukurndu katawari pe.metengetlah dingen tuhu-tuhu erpengarapen nandangi pasu-pasu si pagin ibereken Dibata man bandu, sanga kerehen Jesus Kristus ku doni enda (1 Petrus 1:13).

Ogen          :    Matius 24:36-44 (Responsoria).

Khotbah     :    Jesaya 2:1-5 (Tunggal).

Tema          :    Arah Dalanna Me Erdalan Kita.

LATAR BELAKANG

1.      Sijadi bahan khotbahnta sekali enda eme, sada nubuat kerna Deleng Tuhan (Sion). I ja kerina bangsa-bangsa reh ku deleng Tuhan, Rumah Pertoton Dibata Israel guna megiken pengajaren Tuhan.

2.      Nubuat kerna masa depan deleng Tuhan ikhususkan man bangsa Yehuda (kerajaan Israel Selatan) ras ibu kotana (Yerusalem). Deleng Tuhan si meganjangna eme Sion. Janah i Sion je ipajekken Rumah Pertoton. Bagepe ibas Rumah Pertoton e je ringan Dibata.

3.      Makna Rumah Pertoton la saja ingan ersembah bangsa Juda, tapi pe ingan bangsa Israel megiken pengajaren Tuhan siarus idalanken bangsa Juda ibas kegeluhenna tep-tep wari. Ibas kehadiran rumah pertoton i Yerusalem (ibu Kota Juda), ngataken maka Tuhan hadir ibas kegeluhen bangsa Juda ras minpin bangsa Juda. Tuhan jadi raja bangsa Juda. Kepemimpinen Tuhan mereken kedamen.

4.      Deleng Sion simerupaken deleng si megajangna kal, ndatken daya tarik tersendiri man kerina bangsa-bangsa, emaka ibas kerelaanna sendiri reh bangsa-bangsa ku deleng Sion, ku Rumah Pertoton guna ersembah man Tuhan ras megiken pengajaren Tuhan nari. Kerehen bangsa-bangsa erkiteken idahna lit simehuli siilakoken Tuhan arah pengajaren ras undang-undang Tuhan, bagepe erkiteken bangsa Juda ersembah man Tuhan i deleng Sion.

5.      Ibas pengajaren Tuhan man kerina bangsa-bangsa, dungna mabai  bangsa-bangsa lanai nggit erperang. Adi bangsa-bangsa si la nandai Tuhan nggit reh ku deleng Sion, engkai maka bangsa Juda la nggit reh ersembah ras patuh nandangi pengajaren Tuhan ! Emaka iajuk Jesaya gelah bangsa Juda ersembah man Tuhan ula terjeng formalitas saja, bagepe bangsa Juda arus erdalan ibas terang siibereken Tuhan man bana. Terang siimaksudken eme, bangsa Juda arus patuh man Tuhan saja ras nggeluh ibas pertobatan (nggeluh revormasi pusuh ras perbahanen). Sebab tupung sie bangsa Juda (ibas kerina status sosial) nggo nggeluh alu erbana-bana. Lanai nggit patuh ras ndalanken kai singena ate Tuhan. Tuhu-tuhu kalak Juda nggo erdosa.  Padin bangsa Juda ernalem man manusia ras bangsa sideban guna mindo penampat, asangkan man Tuhan singgo mbebasken bangsa Israel ibas teneh perbudaken (Mesir) nari ku taneh Kanaan.

APLIKASI

            Tema sekali enda eme Arah dalanNa me erdalan kita. Lit kuan-kuan singatakenca, melala dalan ku roma, tapi kalak kristen guna ndatken keselamatan, nggeluh ibas surga dalanna sada ngenca eme tek man Yesus Kristus.

            Adven I ngatakenca kerehen Yesus Kristus peduakaliken merupaken sada kepastin, amin gia kerehenNa la siteh ndigan warina. Saja siarus siteh man banta gelah kita banci nggeluh ibas persadan ras Yesus maka lit min revormasi kegeluhen (nggeluh ibas pertobatan), gelah la saja kalak sideban sindatken keselamatan, tapi pe kita nggeluh ibas keselamatan.

            Ibas minggu Adven I (minggu penantian), Kita arus metenget ras nggeluh alu pengarapen man Tuhan, amin gia melala tantangan ras perbeben si reh man banta. Uga pa pe tantangan ras perbeben sireh man banta adi kita tetap erdalan ibas dalan Tuhan, eme ndalanken kai singena ate Tuhan maka ibas kereheNa sipeduakaliken kita tetap ras Ia. Bagepe pusuhta arus ipersiapkan gelah tetap bersih. Cian ate, perampus arus itadingken. Ibas erti kata kita arus berkomitmen, kita arus nggeluh bersih.

            Harus siteh kita kerina lit tujun nggeluh eme nggeluh ibas surga (keselamatan). Janah kita kerina nggo nggeluh ibas keselamatan. Saja uga gelah keselamatan e tetap mabai kita nggeluh ibas surga tupung kerehen Yesus Kristus peduakaliken. Gelah kita tetap nggeluh ibas keselamatan maka nggeluh ibas pertobatan arus lit bas kita. Tanda kita nggeluh ibas pertobatan eme kita tutus ku gereja guna ersembah man baNa, bagepe ndalanken kai siiperentahkenNa man banta. Tuhu-tuhu kita erdalan ibas dalanNa eme kebujuren, keadilen ras kekelengen. Bagepe kita nggeluh ibas kedamen. La nggit kita rubat ras nggit simaaf-maafkan. Bagepe adi ateta nggeluh ibas dalan Tuhan maka kita arus megiken kata Dibata ibas peribadatan minggu ras ibadah-ibadah siiaturken gereja, sebab ibas ibadah lit pengajaran Tuhan simabai kita ku dalanNa eme dalan kempak keselamatan.

Pdt. Steven Kumenit, STh.M.Min.

Nggeluh Sehat (Daniel 3:3-16)

PERPULUNGEN JABU-JABU

GEREJA GBKP

TANGGAL 6 – 12 NOPEMBER 2016.

Daniel 3:3-16.

Tema : Nggeluh Sehat.

LATAR BELAKANG

1.      Nebukadnesar eme raja Babilon simegegeh ras erkuasa, singasup naluken kerajaan-kerajaan isekitarna, termasuk bangsa Israel. Emaka bangsa Israel iteruh kuasa raja Nebukadnesar. Nterem kalak Israel itaban i Babilon, termasuk Daniel (Baltasar), Hananya (Saderah), Misael (Mesah) ras Asaria (Abednego). Erkiteken pasu-pasu Tuhan man Baltasar, Saderah, Mesah ras Abednego, terpilih me ia kerina jadi pegawai i kerajaan Babilon. Daniel (Baltasar) erkiteken ngasup ngantusi nipi raja, maka iangkat raja si Daniel (Baltasar) jadi penguasa propinsi Babilon ras jadi kepala kerina penasehat kerajaan Babilon.  Hananya (sadera), Misael (Mesah) ras Asaria (Abednego) iangkat raja jadi sinjujurken propinsi Babilon.

2.      Jabatan sicukup strategis ras mejile siibereken raja man Baltasar, Saderah, Mesah ras Abednego enda, erbahanca pegawa-pegawai (penguasa) sideban cian ate ras  nembeh ate. Emaka kenca dung raja Nebukadnesar erbahan sada gana-gana ibas emas nari, ipepulung raja kerina penguasa-penguasa ibas kerajaan Babilon guna penangkuhen gana-gana emas e. Ibas acara penangkuhen gana-gana emas e, kenca ersora terompet, sarune, murdap, gitar, kulcapi, ras alat-alat musik sideban, maka kerina sipulung arus mungkuk nembah man gana-gana emas e, tapi Saderah, Mesak Ras Abednego la nggit mungkuk nembah man gana-gana e. Emaka iaduken piga-piga kalak Babilon ngaduken Saderah, Mesak ras Abadnego man raja. sidungna ihukum ia teluna ku lubang singa. Tapi erkiteken kuasa ras penemani Tuhan, Saderah, Mesah ras Abednego la icerngem, ntah ipan singa. Selamat ia teluna.

3.      Saderah, Mesah ras Abednego simerupaken teman Daniel (Baltasar) la nggit nembah mungkuk man gana-gana, sebab ia teluna merupaken kalak Juda situtus ras erkemalangan man Tuhan. Kalak Juda (Israel), ilarang Tuhan erbahan gana-gana, bagepe mungkuk nembah man gana-gana (band.Kel. 20:3-5).

4.      Selaku kalak situtus ras mbiar man Dibata, la nggit kinitekenna terkontaminasi  kiniteken sideban. Emaka padin mate, asangken kiniteken simbiar man Tuhan ceda.

5.      Saderah, Mesah ras Abednego tek kal kerna penampat Dibata. janah tehna penampat Dibata seh man kalak situtus ras mbiar man baNa saja.

APLIKASI

            Kesahatan kula penting, tapi sipentingna kal eme kesehatan pertendin. Sebab kesehatan pertendin, banci mpengaruhi kesehatan kula.

            Adi siperdiateken kerna pinakit sireh man banta, reh ibas 2 bentuk eme pikiren ras pangan. Adi lalap kita stres, cian ate, emosi, rsd, banci mpengaruhi pikirenta sidungna sakit kita. Emaka lit bas Pustaka Si Badia ngataken keriahen desken tambar simereken kejuah-juahen, adi ukur serbut erbahanca daging kertang tading tulang (Kuan-Kuanen 17:22).  Bagepe arah pangan. Adi la terkuasai kita seleranta, maka sipan me melala pangan simpengaruhi kesehatan kulanta. Amin gia situhuna pangan e nggo ilarang dokter.

            Adi sakit kita, maka aktivitasta ras pendahinta terganggu. Bagepe adi sinen, ntah pe kita nggo ngenanamisa eme nggit kita ertambar seh ku Penang gelah madan kita. Bagepe  melala sen keri adi nggo reh pinakit man banta. Emaka sipenting man banta uga kita njaga kesehatenta. Lit kuan-kuan ngataken ‘sedia payung sebelum hujan’. Alu bage situhuna penting man banta njaga kesehatan. Melala kita njaga kesehatan, gelah tetap sehat. Lit deba olah raga, lit ka cek up ku dokter alu berkala, lit ka mengkonsumsi vitamin, suplemen, rsd. Enda kerina penting, tapi situhuna si lebih penting eme uga kita njaga kesehatan pertendinta. Njaga kesehaten pertendin berarti kita arus mbiar ras tutus erkemalangan man Tuhan. Sebab alu kita mbiar ras erkemalangan man Tuhan, kita banci ndatken kepentaren simabai kita rukur alu mehuli ras la nggit ncedai kulanta alu man ‘sembarangan’ pangan-pangan. Bagepe nggit kita matuhi kai siikataken dokter kerna kesehatenta.

Pdt. Steven Kumenit, STh.M.Min.