Arah Dalanna Me Erdalan Kita (Yesaya 2:1-5)

KHOTBAH MINGGU TANGGAL 27 NOPEMBER 2016.

MINGGU ADVEN I

GEREJA GBKP

Invocatio    :    Emaka sikapkenlah ukurndu katawari pe.metengetlah dingen tuhu-tuhu erpengarapen nandangi pasu-pasu si pagin ibereken Dibata man bandu, sanga kerehen Jesus Kristus ku doni enda (1 Petrus 1:13).

Ogen          :    Matius 24:36-44 (Responsoria).

Khotbah     :    Jesaya 2:1-5 (Tunggal).

Tema          :    Arah Dalanna Me Erdalan Kita.

LATAR BELAKANG

1.      Sijadi bahan khotbahnta sekali enda eme, sada nubuat kerna Deleng Tuhan (Sion). I ja kerina bangsa-bangsa reh ku deleng Tuhan, Rumah Pertoton Dibata Israel guna megiken pengajaren Tuhan.

2.      Nubuat kerna masa depan deleng Tuhan ikhususkan man bangsa Yehuda (kerajaan Israel Selatan) ras ibu kotana (Yerusalem). Deleng Tuhan si meganjangna eme Sion. Janah i Sion je ipajekken Rumah Pertoton. Bagepe ibas Rumah Pertoton e je ringan Dibata.

3.      Makna Rumah Pertoton la saja ingan ersembah bangsa Juda, tapi pe ingan bangsa Israel megiken pengajaren Tuhan siarus idalanken bangsa Juda ibas kegeluhenna tep-tep wari. Ibas kehadiran rumah pertoton i Yerusalem (ibu Kota Juda), ngataken maka Tuhan hadir ibas kegeluhen bangsa Juda ras minpin bangsa Juda. Tuhan jadi raja bangsa Juda. Kepemimpinen Tuhan mereken kedamen.

4.      Deleng Sion simerupaken deleng si megajangna kal, ndatken daya tarik tersendiri man kerina bangsa-bangsa, emaka ibas kerelaanna sendiri reh bangsa-bangsa ku deleng Sion, ku Rumah Pertoton guna ersembah man Tuhan ras megiken pengajaren Tuhan nari. Kerehen bangsa-bangsa erkiteken idahna lit simehuli siilakoken Tuhan arah pengajaren ras undang-undang Tuhan, bagepe erkiteken bangsa Juda ersembah man Tuhan i deleng Sion.

5.      Ibas pengajaren Tuhan man kerina bangsa-bangsa, dungna mabai  bangsa-bangsa lanai nggit erperang. Adi bangsa-bangsa si la nandai Tuhan nggit reh ku deleng Sion, engkai maka bangsa Juda la nggit reh ersembah ras patuh nandangi pengajaren Tuhan ! Emaka iajuk Jesaya gelah bangsa Juda ersembah man Tuhan ula terjeng formalitas saja, bagepe bangsa Juda arus erdalan ibas terang siibereken Tuhan man bana. Terang siimaksudken eme, bangsa Juda arus patuh man Tuhan saja ras nggeluh ibas pertobatan (nggeluh revormasi pusuh ras perbahanen). Sebab tupung sie bangsa Juda (ibas kerina status sosial) nggo nggeluh alu erbana-bana. Lanai nggit patuh ras ndalanken kai singena ate Tuhan. Tuhu-tuhu kalak Juda nggo erdosa.  Padin bangsa Juda ernalem man manusia ras bangsa sideban guna mindo penampat, asangkan man Tuhan singgo mbebasken bangsa Israel ibas teneh perbudaken (Mesir) nari ku taneh Kanaan.

APLIKASI

            Tema sekali enda eme Arah dalanNa me erdalan kita. Lit kuan-kuan singatakenca, melala dalan ku roma, tapi kalak kristen guna ndatken keselamatan, nggeluh ibas surga dalanna sada ngenca eme tek man Yesus Kristus.

            Adven I ngatakenca kerehen Yesus Kristus peduakaliken merupaken sada kepastin, amin gia kerehenNa la siteh ndigan warina. Saja siarus siteh man banta gelah kita banci nggeluh ibas persadan ras Yesus maka lit min revormasi kegeluhen (nggeluh ibas pertobatan), gelah la saja kalak sideban sindatken keselamatan, tapi pe kita nggeluh ibas keselamatan.

            Ibas minggu Adven I (minggu penantian), Kita arus metenget ras nggeluh alu pengarapen man Tuhan, amin gia melala tantangan ras perbeben si reh man banta. Uga pa pe tantangan ras perbeben sireh man banta adi kita tetap erdalan ibas dalan Tuhan, eme ndalanken kai singena ate Tuhan maka ibas kereheNa sipeduakaliken kita tetap ras Ia. Bagepe pusuhta arus ipersiapkan gelah tetap bersih. Cian ate, perampus arus itadingken. Ibas erti kata kita arus berkomitmen, kita arus nggeluh bersih.

            Harus siteh kita kerina lit tujun nggeluh eme nggeluh ibas surga (keselamatan). Janah kita kerina nggo nggeluh ibas keselamatan. Saja uga gelah keselamatan e tetap mabai kita nggeluh ibas surga tupung kerehen Yesus Kristus peduakaliken. Gelah kita tetap nggeluh ibas keselamatan maka nggeluh ibas pertobatan arus lit bas kita. Tanda kita nggeluh ibas pertobatan eme kita tutus ku gereja guna ersembah man baNa, bagepe ndalanken kai siiperentahkenNa man banta. Tuhu-tuhu kita erdalan ibas dalanNa eme kebujuren, keadilen ras kekelengen. Bagepe kita nggeluh ibas kedamen. La nggit kita rubat ras nggit simaaf-maafkan. Bagepe adi ateta nggeluh ibas dalan Tuhan maka kita arus megiken kata Dibata ibas peribadatan minggu ras ibadah-ibadah siiaturken gereja, sebab ibas ibadah lit pengajaran Tuhan simabai kita ku dalanNa eme dalan kempak keselamatan.

Pdt. Steven Kumenit, STh.M.Min.