Kita Ipilih Jadi Terang Man Bangsa-Bangsa (Yesaya 49:1-7)

KHOTBAH MINGGU 15 JANUARI 2017.

GEREJA GBKP

Invocatio    :     Surat enda i bas aku nari, Paulus si enggo ipilih Dibata jadi rasul Kristus Jesus. Aku isuruhNa pembarken kegeluhen si ipadanken guna ialoken i bas persadanta ras Kristus Jesus (2 Timotius 1:1).

Ogen           :    1 Korinti 1:1-9 (Tunggal).

Khotbah      :    Jesaya 49:1-7 (Responsoria).

Tema          :    Kita Ipilih Jadi Terang Man Bangsa-Bangsa.

LATAR BELAKANG

1.      Bangsa Israel eme bangsa Tuhan. Selaku bangsa Tuhan searusna min nggeluh ibas kepatuhan ras ndalanken kai siisura-suraken Tuhan. Tapi ibas kinatana, bangsa Israel nggeluh alu erbana-bana. La nggeluh ibas kepatuhan man Tuhan. Emaka merawa Tuhan man bangsa Israel. Ibas merawa Tuhan, ipakena bangsa Babel guna ngukum bangsaNa,emaka bangsa Israel nggeluh i teruh kuasa bangsa Babel

2.      Tupung bangsa Israel ibas pembuangen denga, reh nabi Yesaya mpeseh sura-sura Tuhan nandangi bangsaNa. Gelah tersehi sura-sura Tuhan, maka leben Nabi petandaken ise situhuna ia. Ia eme nabi siidilo Tuhan ibas bertin nari. Janah enda la saja ipeseh nabi man bangsa Israel saja, tapi pe man bangsa-bangsa sitading i negeri-negeri i tepi lawit. Tujunna gelah la saja bangsa Israel simeteh kerna sura-sura Dibata, tapi pe bangsa sideban.

3.      Fungsi nabi eme mpeseh berita pengarapen ras penghukumen alu make kata-kata “keras/meser” gelah bangsa Yuhuda banci nggejapken kerna kinilepakenna sedekah enda. Kata-Kata “keras/meser” enda banci “melukai” pusuh bangsa Yehuda. Enda me siianalogiken pedang ras anak panah. Jadi fungsi nabi eme mpeseh sura-sura Tuhan eme keselamatan kerina bangsa. Amin gia fungsi nabi mpeseh sura-sura Dibata gelah terkelin bangsa Israel. Tapi igejapken nabi tempa-tempa sea-sea kerina e, sebab la lit bekasna. Bangsa Israel la jera, emaka iambengken ku Babel. Amin bage gia Dibata tetap mbela perkarana, emaka lit upahna. Ibas palas enda me maka nabi la putus asa mpeseh kerna berita keselamatan man bangsa Tuhan.

4.      Kenca bangsa Israel nggeluh iteruh kekuasaan bangsa Babel. Bangsa Israel la saja nggeluh i Babel, tapi i ingan-ingan sideban eme ingan pengungsi. Ibas kecibal bangsa Israel simerap marpar enda me, Tuhan mereken tugas mulihi man nabi guna mpersadakan  bangsaNa i teruh keleng ate Tuhan. Enda me siipeseh nabi man bangsa Israel simerap marpar ras man bangsa sideban.

5.      Ibas tugas simbaru selaku nabi, la saja terjeng ngulihken bangsa Israel simerap marpar ku tanah Israel ras jadi sada bangsa simandiri, si lanai iteruh kuasa bangsa Babel. Alu bage mehaga mulihi bangsa Israel. Tapi lit sada tugas siarus ilakoken bangsa Israel eme nelamatken bangsa-bangsa sideban. Bangsa Israel arus jadi terang man bangsa-bangsa sideban gelah lit keselamatan man kerina bangsa. Ibas ndalanken ndahin enda, bangsa Israel la banci kitik ukurna,amin gia tangtangna ia ihina, igombang-gombangi, lit siciga atena man bana ras jadi budak, sebab ia kerina pagi nghamati ras nembah mungkuk man Tuhan. Emaka ibas dahin simbelin enda, bangsa Israel arus merestorasi (memulihkan keadaan) kegeluhen er-Dibata. Bangsa Israel arus patuh ras nggeluh ibas pertobatan gelah banci jadi terang man bangsa-bangsa.

APLIKASI

            Ibas gerejanta lit pendilo Tuhan secara khusus guna ndahiken dahinNa eme ngepkep ras ngajari perpulungen, gelah perpulungen tetap nggeluh ibas kerembaken man Dibata. Tugas enda idahiken Pdt, Pt ras diaken.  Bagepe lit pendilo secara umum. Pendilo Tuhan secara umum eme man banta kerina. Dibata ndilo kita kerina jadi aronNa. Emaka patut sikataken bujur man Tuhan ibas pendilona man banta jadi aronNa sebab itemani, ijagai ras ikawaliNa kita. Ibas erti kata, Kristus jine singepkep kita gelah kita tetap nggeluh la ersalah ras nggeluh badia. Bagepe selaku aron Dibata kita nggo ibekaliNa alu pengajaren-pengajaren situhu-tuhu erpalasken kataNa. Sebab ibas persadanta ras Kristus, kita nggo ipebayak ibas kai pe, ibas pengerananta ras pemetehnta. Emaka situhuna pemetehta kerna Tuhan nggo bias (bdk. Ogen). Emaka dahinta genduari eme jadi terang man bangsa-bangsa. Kita nggo ipilih Tuhan ras  nggo nggeluh ibas terang (bdk. 1 Petrus 2:9), bagepe kita nggo nggeluh ibas ulu terang e me Yesus Kristus (bdk. Yohanes 8:12).

            Ibas kita jadi terang kita arus mpeseh Berita keselamatan. Berita keselamatan enda la saja terjeng kata, tapi pe arus teridah ibas perbahanan. Siimaksudken kata ras perbahanen eme kita arus ajari ia kerna kata Dibata. janah pengajaren enda la saja terjeng konsumsi pemeteh, tapi arus jadi konsumsi keselamatan eme ngelakoken kai siiajarken (bdk. Tema program pelayana tahun 2017 eme Mengajar untuk melakukan).hh

Pdt. Steven Kumenit, STh.M.Min