Kiniersadan Ajar – Ajar Yesus (Yohanes 17:21-26)

PERPULUNGEN JABU-JABU (PJJ)

GEREJA GBKP

TANGGAL 26 MARET – 3 APRIL 2017.

Johanes 17 : 21 – 26.

Tema : Kiniersadan Ajar – Ajar Yesus.

LATAR BELAKANG

1.      Sada wari ope wari raya Paskah kalak Yahudi, Yesus ras ajar-ajar man ras-ras. Jenari kenca dung man Yesus ngerana man ajar-ajarNa, sebab keleng kal ateNa ajar-ajarNa seh ku kedungenna. Janah ibas palas keleng ate eme gelah Yesus la sirang ras ajar-ajarNa, ertoto Yesus man BapaNa i surga.

2.      Yesus ertoto man BapaNa i Surga, sebab iteh Yesus nggo seh paksana Yesus nadingken doni enda. Yesus ipermuliaken. Yesus ipermuliaken arah kematenNa. Erkiteken sie me salah sada siitotoken Yesus eme kerna kerina kalak sitek man baNa. Kerina kalak si tek man Yesus arus nggeluh ibas persadan. Siimaksudken nggeluh ibas persadan eme, ersada sapih-sapih ia kalak sitek, bagepe ersada kerina kalak sitek ras Yesus Kristus. Persadan arus megegeh ras la terpisahken sada ras sidebanna, bagi Bapa ersada ras Yesus Kristus (model persadan).

3.      Persadan kalak si tek, la saja terjeng persadan organisasi, tapi persadan keleng ate. Janah ibas persadan keleng ate enda sipatna misioner. Emaka keleng ate arus teridah ibas persadan. Ibas kata sideban persadan e  arus irakut ibas keleng ate, gelah doni enda tek maka Yesus Kristus tuhu-tuhu isuruh Dibata ku doni enda. Sebab bagi siteh nterem kalak Yahudi la tek maka Yesus eme Mesias si ipadanken Dibata. Erkiteken sie me atena munuh Yesus.

4.      Persadan kalak si tek man Yesus Kristus arus berbeda ras persadan doni enda. Persadan si lit ibas doni enda la bo erpalaskan keleng ate. Emaka adi idahna kerna persadan sierpalasken keleng ate situhu-tuhu mehuli, maka tek ia man Yesus ras nggeluh me ia ibas persadan kalak si tek man Yesus Kristus e.

5.      Pertoton Yesus nandangi kerina kalak si tek la saja terjeng ibas doni enda. Tapi pe gelah kalak si tek banci nggeluh ras Yesus ibas surga. Tujunna gelah kalak si tek tuhu-tuhu ngidah kemuliaan siibereken Bapa man Yesus. Idah kerina kalak si tek, maka Yesus tuhu-tuhu keke ibas si mate nari, janah nangkih ku surga ras nggeluh ibas surga.

APLIKASI

            Pertoton Yesus enda memotivasiken gereja-gereja gelah tetap erdalan sebage gereja eme nehken kai singena ate Tuhan. sebab siidah genduari mekatep gereja tergoda ku bas nggeluh erbana-bana, emaka lit gereja pecah. Bagepe seh genduari, tempah teridah mesera gereja nggeluh ibas persadan. Enda erkiteken dogma simbedakenca. Emaka ula min kita “terpenjara” ibas dogma masing-masing. Tapi kita arus nggeluh ibas saling menghargai ras saling mengakui.

            Kita enda ajar-ajar Yesus, emaka selaku ajar-ajar Yesus siarus siperdiateken man banta eme persadan. Janah persadan enda la saja terjeng persadan lahiriah ntah formal ngenca, sebab adi enda sidalanken, maka sijadi bas gereja eme perpecahan. tapi persadan sierpalasken keleng ate ngerakut kita guna sitedehen ras sikeleng-kelengen. Janah ibas persadan  erpalasken keleng ate enda arus teridah ibas perbahanen-perbahanen.

            Persadan gereja arus ngikuti aturen siberlaku i tengah-tengah gereja singgo iputusken ras-ras. La banci ngikuti aturen sendiri, la banci nggeluh egois, nggeluh sektoral/partikularis. Emaka penting bas kita selaku ajar-ajar Yesus nggeluh ibas persadan gereja arus lit bas kita eme keleng ate Kristus ras nggeluh ibas kiniteruken ukur, ras patuh ibas aturen persadan gereja. Tuhu ibas kita lit perbedaan cara rukur, karakter, status sosial, tapi labo berarti enda simabai kita ibas perbedaan prinsip nggeluh ibas gereja. Tapi justru gereja si mpersadaken kerina perbedaan e. Gelah ersada kita kerina (Ut Omnes Unum Sint).

            Nggeluh ibas persadan gereja situhu-tuhu sierpalasken keleng ate, kita arus termotivasi nggeluh ibas persadan situhu-tuhu, janah ras-ras ngelakoken simehuli, kebujuren ras kekelengen, gelah doni  meteh maka persadan enda erkiteken Yesus. Alu bage ngena ate kalak nggeluh ibas persadan e. Bagepe ibas kita ndalanken persadan gereja alu mehuli maka kita pasti nggeluh ras Yesus i surga. Kita pe ikut ipermuliaken.

Pdt. Steven Kumenit, STh.M.Min.

Kam Ipilih Dibata, Meriahlah (1 Samuel 16:1-13)

KHOTBAH TANGGAL 26 MARET 2017.

GEREJA GBKP

Invocatio    :    Tapi nina TUHAN , "Ola nehen kuga gedangna ras kuga jilena rupana. La ia Kupilih, sabap pertimbangenKu la bali ras pertimbangen manusia. Adi manusia inehenna si teridah arah darat, tapi Aku Kupernehen pusuhna (1 Samuel 16:7).

Ogen          :    Epesus 5:8-14 (Responsoria).

Khotbah     :    1 Samuel 16 :1-13 (Tunggal).

Tema          :    Kam Ipilih Dibata, Meriahlah.

LATAR BELAKANG

1.      Saul selaku raja Israel nggo itulak Tuhan. Erkadiola Tuhan ngangkat Saul jadi raja (bdk. 1 Samuel 15:10), emaka itulak Tuhan ia erkite-kiteken la ia patuh megiken perintah Tuhan. Lit dua alasan engkai maka Saul itulak Tuhan : a). Saul selaku raja mpersembahkan korban bakaran man Tuhan. Situhuna nehken korban bakaran eme dahin imam, labo dahin raja. emaka hak iman nggo itangko raja Saul erkite-kiteken mbiar ia (bdk. 1 Samuel 13:9-14). b). Isuruh Tuhan gelah kerina kalak Amalek, termasuk rajana (Agag) ibunuh, bagepe la ibunuh Saul biri-biri ras lembu simehuli,bagepe ibuat Saul barang-barang simehuli (bdk. 1 Samuel 15:8-9).

2.      Perlu siteh, raja bangsa Israel la saja terjeng jadi kepala pemerintahan, tapi pe raja bangsa Israel arus patuh ras erkemalangan man Tuhan. Raja bangsa Israel arus jadi figur simehuli nandangi kerina rakyatna. Emaka selaku raja, la saja ia merentah nandangi rakyatna terjeng politik, tapi pe arus ibabana rakyatna erkemalangan man Tuhan. Adi enda la idalanken raja maka Tuhan selaku pemilik bangsa Israel berhak nulak raja bangsa Israel. Alu kata sideban Tuhan similih ras pengadi bangsa Israel. Kerina enda merupaken hak preogatif Tuhan, sebab sistim pemerintahan bangsa Israel eme teokrasi (Dibata simerintah bangsa Israel).

3.      Kenca Tuhan pengadi Saul, janah nggo isikapken Tuhan sekalak pengganti Saul, nembeh ras ceda ate Samuel man Saul, sebab Samuel isuruh Tuhan guna nangkuhken Saul jadi raja ndube. Palas nembeh ras ceda ate Samuel man Saul erkite-kiteken Saul nggo nadingken Tuhan ras lanai ikutkenna Pedah Tuhan (bd. 1 Samuel 15:10).

4.      Tuhan nggo nikapken ise sijadi pengganti raja Saul. Pengganti raja Saul eme ibas sekalak anak Isai si asalna i Betlehem nari. Samuel eme alat ras persuruhen Tuhan ngenca. Emaka amin gia tangtangna mbiar ia man Saul, sebab banci saja adi iteh Saul kerna si enda, ibunuhna Samuel. Sebab adi berkat Samuel i Rama nari ku Betlehem, la banci lang mentas arah ibu kota Saul eme Gibea, emaka pasti iteh Saul. Janah salah sada biak Saul eme nggit mbalas dendam. Tapi erkiteken  Tuhan sinuruhsa, janah lit dalan keluar siibereken Tuhan man bana, maka berkat Samuel ku Betlehem. Kenca seh i Betlehem pemimpin-pemimpin kuta e mbiar. Palas kebiaren eme adi reh sekalak imam ntah pe nabi, banci saja imam ntah pe nabi e mpeseh kerna berita simehuli, ntah pe berita si la mehuli, khususna kerna pernembeh ate Tuhan.

5.      Samuel terjeng ngikuti perentah Tuhan, la lit hak Samuel nentuken ise sibanci jadi raja bangsa Israel. Bagepe pemilihen Tuhan berbeda ras pemilihen manusia. Adi manusia (Samuel), terjeng ngenen lahiriah saja, tapi Tuhan ngenen seh ku pusuh manusia. Emaka akap Samuel nggo pas siipilihna, kenca Isai nuduhken sada persada pitu anakna si lit i je, tapi kepeken sada pe si lit i je la ngena ate Tuhan. Emaka isuruh Tuhan gelah Isai ngelegi Daud sisangana ermakan biri-biri, janah kenca seh Daud i lebe-lebe Samuel, nina Tuhan, enda me kalakna, tangkuhken ia. Emaka minter upacara penangkuhken raja ibenaken Samuel. Daud ipilih jadi raja bangsa Israel ngantiken Saul.

APLIKASI

            Kita selaku kalak kristen arus ngataken bujur man Tuhan ras ermeriah ukur sebab kita ipilihNa jadi bangsaNa (1 Petrus 2:9) ras jadi alatNa. Kita nggo jadi aron Dibata. Tuhan milih kita nggeluh ibas keselamatan, la inenNa kerna kecibalta. Kita si ndube nggeluh ibas gelap (berdosa), ipilihNa nggeluh ibas terang (keselamatan). Nggeluh ibas keselamatan berarti nggeluh  jadi perkakas Dibata. sebab kita ipilih ibas rangka ndalanken sura-sura Tuhan guna keselamatan manusia ras doni enda. Perbahanen anak-anak Terang arus teridah (Letare).  Bagepe nggeluh jadi perkakas Tuhan berarti lit kepatuhan man Tuhan. Tapi amin gia situhuna kita nggo nggeluh ibas keselamatan (terang), tapi adi la kita patuh ibas kerina perentah Tuhan, maka ibas kerehen Yesus pedua kaliken, kita la atan ibas ingan singgo isikapken man kalak si tek man baNa eme surga (bdk. Saul itulak Tuhan)

            Nggeluh ibas terang, amin gia jumpa perbeben ras kiniseran ras kebiaren, Tuhan pasti mereken serpang pulah ras itegu-teguNa kita gelah kita banci ndalankan kai singena ateNa ibas perdalanan geluhta tep-tep wari (bdk. 1 Samuel 16:2-3).

Pdt. Steven Kumenit, STh.M.Min.

Runggu Si Metunggung (Kisah Para Rasul 15:6-12)

PERPULUNGEN JABU – JABU

GEREJA GBKP

TANGGAL 19 – 25 MARET 2017.

Perbahanen Rasul – Rasul 15: 6-12.

Tema : Runggu Si Metunggung.

LATAR BELAKANG

1.      I perpulungen Antiokia terjadi perjengilen si mesangat antara Paulus ikut pe Barnabas ras kalak si reh i Judea nari. Palas perjengilen eme kerna keselamatan. Kalak si reh i Judea nari ngataken maka keselamatan situhu-tuhu adi ia isunatken bagi iaturken undang-undang Musa. Tapi Paulus ras Barnabas ngatakenca, keselamatan e dat adi tek man Yesus Kristus selaku Tuhan ras Juruselamat manusia. Janah pridin si badia eme tanda ia tek man Yesus Kristus.

2.      Erkiteken nggo terjadi perjenggilan, janah pe perpulungen Antiokia nggo bigung, dungna ersada arih perpulungen guna mbaba persoalen enda ku Yerusalem emaka iutusna Paulus, Barnabas ras piga-piga anggota perpulungen. Yerusalem eme pusat agama kristen, janah rasul-rasul tading i je. Alu bage rasul-rasul banci ersidang guna mutusken apai situhuna sibenar kerna keselamatan. Apakah pengajaren kalak sireh ibas Yudea nari ntah Paulus ras Barnabas.

3.      Guna mutusken kerna pengajaren keselamatan e, la banci itentuken sekalak jelma saja, emaka ersidang me rasul-rasul. Tapi erkiteken ibas sidang e lalap la lit keputusen, maka tedis Petrus, ngerana ia nina : 1). Si labo kalak Yahudi pe iakui Dibata. 2). La erdobahen si kalak Yahudi ras si la kalak Yahudi i lebe-lebe Dibata. 3). Ibersihken Dibata ukurna erkiteken ia tek man Yesus Kristus. 4). Ula cubai Dibata alu namaken beban si mberat man ajar-ajar e. Nininta nai ras kita la bo ngasup mersansa beban e. 5). Lias ate Tuhan Yesus Kristus sierbahanca kita terkelin, bali ras kalak si la kalak Yahudi.

4.      Adi oge terdauhen, maka dat sada kesimpulan, janah enda merupaken keputusen sidang eme kalak si labo kalak Yahudi pe iakui Dibata. kalak si labo kalak Yahudi pe la perlu isunatken, saja lit piga-piga hal siarus idalanken ras ipatuhi kalak si labo kalak Yahudi eme ola pan pangan si enggo ipersembahken man dibata-dibata palsu; ola pan dareh; ola pan asuh-asuhen si mate la igeleh; janah ola erlagu la mehuli. Adi ipatuhindu enda maka kam enggo erbahan si mehuli.

5.      Sidang i Yerusalem merupaken sisidang simeganjangna, janah kerina peserta sidang banci mereken pendapatna, tapi kenca dat keputusen, maka peserta sidang menghormati ras ngergai keputusen e. Emaka rasul-rasul simerupaken kalak Yahudi lanai mpersoalken keselamatan siidat kalak si labo kalak Yahudi, sebab enda kerina merupaken sura-sura Dibata. Enda kerina erkiteken lias ate Tuhan.

APLIKASI

            Ibas gerejanta GBKP sitandai piga-piga sidang sue ras tingkatenna eme sidang majelis runggun, siilakoken minimal sada kali sebulan. Sidang majelis klasis, ilakoken enam bulan sekali, ras sidang majelis sinode siilakoken sada tahun sekali. Bagepe lit ka sidang BPMR, sidang BPMK ras Sidang Moderamen. Bagepe bas kita lit musyawarah anggota sidi runggun siilakoken sada tahun sekali. Kerina enda tujunna guna ncakapken pelayanan-pelayanan i tengah-tengah gerejanta, gelah pelayanan enda banci erdalan alu mehuli. Ngenen persidangan enda, kepeken Pdt, Pt ras Dk ngenca siersidang, kecuali musyawarah  anggota sidi runggun. Ngatakenca maka anggota perpulungen nggo mereken kepercayaan man majelis (Pdt, Pt, Dk) guna ersidang. Sidang enda la saja ncakapken kerna pelayanan-pelayan, tapi pe ncakapken adi kune lit persoalan-persoalan i tengah-tengah runggun ras anggota runggun.

            Pelayanan-pelayanan ras persoalan-persoalan i tengah-tengah runggun la banci idungi sesekalak jelma saja eme pendeta, ntah sekalak pertua ras sekalak diaken. Ntah pe BPMR saja. Tapi arus icakapken ibas sidang majelis runggun, ntah sidang majelis klasis, ntah sidang majelis sinode.

            Runggu simetunggung adi ibas persidangan e qorum, janah keputusen-keputusen e erpalasken percakapan si turah ibas sidang e.

            Genduari kita sangana mpersiapkan musyawarah anggota sidi runggun. Ibas tata gerejanta ngataken maka musyawarah anggota sidi runggun simelawenna bulan Maret. Gelah metunggung musyawarah anggota sidi runggun, siarus ilakoken BPMR eme mpersiapken kerina bahan laporan secara tertulis, termasuk laporan keuangan, jenari BPMR mengundang peserta musyawarah anggota sidi runggun. Janah peserta siarus hadir eme anggota runggun siaktif ibas bergereja, sebab adi la ia aktif, la tehna ncakapken kerna pelayanan-pelayanan ibas runggun, khususna singgo idalanken Majelis. Bagepe ibas musyawarah e ipinpin BPMR. Janah i buka ibas gelar Dibata Bapa, AnakNa Yesus Kristus ras Kesah Si Badia. Percakapan-percakapan ibas Musyawarah anggota sidi runggun arus erpalasken kepentaren si rehna ibas Dibata nari. Janah kerina peserta arus saling menghargai sada ras sidebanna. Janah perlu siteh, musyawarah anggota sidi runggun labo merupakan alat/sarana pengambilan keputusan, tapi merupakan sada alat/sarana gereja guna mindo masukan-masukan anggota runggun kerna pelayanan-pelayanan. Alu bage anggota runggun ikut terlibat aktif ibas kerina pelayanan-pelayanan gereja.

Pdt. Steven Kumenit, STh.M.Min.

Jesus Me Ulu Lau Kegeluhen (Yohanes 4:5-26)

KHOTBAH MINGGU 19 MARET 2017.

GEREJA GBKP

Invocatio    :    Bagi belkih mejehe nandangi lau maler si malem, bage me tedehna ateku Kam, o Dibata (Mazmur 42:2).

Ogen          :    Keluaren 17:1-7 (Tunggal).

Khotbah     :    Johanes 4: 5-26 (Responsoria)

Tema          :    Jesus Me Ulu Lau Kegeluhen

LATAR BELAKANG

1.      Sijadi bahan khotbahnta sekali enda eme percakapen Yesus ras diberu Samari i sumur Jakup, tupung Yesus ibas perdalanen ku Galilea.

2.      Tupung Yesus kundul i tepi sumur Jakup, reh sekalak diberu Samaria siatena muat lau i je. Erkiteken wari e nggo ciger, nina Yesus man diberu Samaria e, ntah lau ndu sitik. Labo lau siibereken diberu Samaria tapi sada “statmen” nina, kam kalak Jahudi, aku kalak Samaria ngkai maka ipindondu lau man bangku. Perlu siteh, ilebe-lebe kalak Jahudi, kalak Samaria eme kalak perdosa, bodoh ras najis, emaka la nggit kalak Jahudi “bergaul” ras ia. Padahal adi sinen sejarah, Samaria eme bagin ibas bangsa israel. Saja tupung Rehabeam, anak Salomo jadi raja, Kerajaan Israel pecah jadi dua kerajaan, eme kerajaan Israel Utara (Samaria) ras Kerajaan Israel Selatan (Yerusalem). Tupung Kerajaan Israel utara (Samaria) ras Kerajaan Israel Selatan itapan i Babel, terjadi me kawin campur i je, khususna Kerajaan Israel Utara (Samaria), emaka bangsa Samaria nggo jadi bangsa campuran. Ibas beragama, kalak Samaria berpegang ibas versi Taurat siberbeda ras taurat Yahudi. Bagepe kalak Samaria lanai ersembah i bas rumah pertoton i Yerusalem, tapi ibas kuil i datas deleng Geresim. Ibas percakapan Yesus ras diberu Samaria,  nina Yesus, adi tehndu kerna pemere Dibata ras itandaindu ise simindo lau e man bandu, tentuna ipindondu man bana lau si mereken kegeluhen. Perlu siteh man kalak Samaria, sumur Jakup eme sumur simereken kegeluhen man bana, sebab amin gia paksa perlego, lau sumur e la keri, emaka kerina muat lau i je, termasuk mereken inemen man  asuh-asuhen. Emaka nina diberu Samaria lit kin siterbelinen asangken sumur Jakup enda ? nina Yesus aku me lau kegeluhen, Ia me siipadanken Tuhan. Ate Yesus ngataken sie, gelah diberu Samaria (Sikhar) meteh kerna pasu-pasu Tuhan siterbeleinen. Tuhu, sumur Jakup e merupaken pasu-pasu Tuhan, tapi lit siterbelinen pasu-pasu Tuhan e, eme Yesus Kristus.

3.      Perlu siteh, sumur Jakup, labo ingan satu-satunya si lit i je. Lit denga ingan-ingan lau sideban. Tapi diberu Samaria ndai ku sumur Jakup, erkite-kiteken diberu Samaria e, lit “si la mehuli siibahanna ibas kegeluhenna eme nggo 5 kali ia erjabu, bagepe perbalangenna sigenduari, labo perbulangenna si sah.

4.      Nina Yesus o bibi, teklah kam man bangku, sebab reh me pagi kalak lanai ersembah ibas deleng ah (ingan ersembah kalak Samaria), ras lanai kalak ersembah i Jerusalem (ingan ersembah kalak Jahudi), tapi ersembah man Dibata. Kesah Si Badia singajari uga searusna ersembah man Dibata alu payo. Emaka adi sinen terdauhen,  diberu enda jadi tek ras merubah perbahanen geluhna, jadi nggeluh si mehuli siersaksi kerna Yesus.

5.      Ate Yesus ngataken man diberu Samaria e, ersembah si payo labo itentuken arah ingan, tapi ersembah sipayo kenca iya ipinpin salu Kesah Si Badia. Bagepe Yesus mpetandakan diriNa man diberu Samaria e, gelah diberu e sadar ras jera.Alu bage erberita diberu e man kalak sideban.

APLIKASI

                   Yesus me ulu lau kegeluhen ngataken, maka Yesus me ulu kegeluhen e sendiri. Alu bage lau eme Kesah Si Badia siarus lit ibas kegeluhenta (pusuh).

                   Selaku kalak kristen arus siteh, erbage-bage cara ras bentuk Yesus reh man banta guna mpersingeti kita, gelah kita banci ngangkai kerna hubunganta ras Yesus eme penting, ras kita arus nggeluh ibas Yesus, sebab nggeluh ibas Yesus mereken kegeluhen man banta. Nggeluh ras Yesus berarti kita nggeluh ibas kemalemen ate. Janah adi jumpa perbeben ras kiniseran, banci iberekenNa serpang pulah. Tuhu banci saja kita banci ndatken perbeben ras kiniseran, tapi marih kita reh man Tuhan, guna mindo penampat (bdk. Ogen).

                   Jiwa ntah pe pertendin si kera banci erbahanca kita la nggit jumpa ras temanta sideban, sebab mela. Bagepe banci kita ngelakoken hal-hal si la ngena ate Tuhan. Tapi sekali enda, kita ipersingeti gelah uga pa pe perbeben ras kiniseran mari kita nggeluh ras Yesus. Sebab Ia me ulu kegeluhen. Adi kita nggeluh ras Yesus, maka kita bagi nggeluh ibas tepi lau anak, sikatawari pe banci erbuah ibas paksana, la kita mate (bdk. Mazmur 1:3). Jumpa ras Yesus la saja ndatken lau kegeluhen, tapi pe mereken perubahan nggeluh sisignifikan, jera ras ersaksi.

                   Nggeluh ras Yesus maka kita lanai muas. Kita la nai ndalanken kerna si la mehuli si la ngena ate Tuhan, tapi kita ndalanken kai singena ate Tuhan. Enda ilakoken erkite-kiteken pertendinta terpenuhi. Emaka kita arus ngangkai maka kebutuhen kegeluhen hanya man Yesus saja. Alu bage kita bagi belkih si mejehe kerna lau. Adi la kita nggeluh  ersada ras Yesus berarti mate me kita.

                   Lau penting ibas kegeluhenta, sebab adi kita mengkonsumsi lau maka terjadi dehidrasi ibas dagingta enda sidungna mate me kita. Bage me kita adi la bias Lau kegeluhen maka mate me kita. Gejala kalak si la lit lau kegeluhen eme ngelakoken kerna si la mehuli si la ngena ate Tuhan ras jungut-jungut, la erpuas-puas erbahan si la ngena ate Tuhan, rsd. Kita la tahan nggeluh ibas perbeben, rsd. Tapi adi kita Nggeluh ibas Lau kegeluhen berarti kita arus tetap ras Yesus, ras arus nggeluh ersaksi, bagepe nggeluh guna ndarami senina turangta gelah ia jera ras nggeluh ibas Lau kegeluhen (Yesus Kristus). bagepe nggeluh ibas pengataken bujur amin gia jumpa perbeben ras kiniseran.

Pdt. Steven Kumenit, STh.M.Min.