Biak Kegeluhen Sirasa Lalap (Matius 25:31-46)

KHOTBAH MINGGU 26 NOPEMBER 2017

GEREJA GBKP

Invocatio   :     Tapi kam kap o Tuhan raja sirasa lalap, simerentah terus ku bas kedungen paksa-paksa (Perngandungen 5:19).

Ogen         :     Masmur 95:1-7a (Responsoria).

Khotbah    :     Matius 25:31-46 (Tunggal).

Tema         :     Biak Kegeluhen Sirasa Lalap.

LATAR BELAKANG

1.      Sijadi bahan khotbahnta sekali enda eme Jesus Kristus ngerana kerna wari pendungi. Ibas wari pendungi, Yesus Kristus simerupaken Anak Manusia reh selaku Raja guna menghakimi kerina manusia. Kerina manusia ipepulung i lebe-lebe Raja, janah Raja ngeranaken kerina manusia e. Penghakiman siilakoken Anak Manusia sebage Raja eme penghakiman secara universal.

2.      Ibas kerehen Anak Manusia ku doni enda radu ras penghakiman. Ibas penghakiman e iserapkan Raja manusia jadi dua kelompok, bagi sekalak permakan nerapkan biri-biri ras kambing. Perlu siteh tupung permakan baba biri-biri ras kambing ku karangna, je iserapken permakan biri-biri ras kambing. Anak Manusia simerupaken Raja, njadiken diriNa sebage permakan guna misahkan manusia ibas dua kelompok. Manusia singelakoken perbahanen simehuli singena ate Tuhan (kalak benar ras bujur) iserapken Raja ku kemuhen. Manusia si la ngelakoken perbahanen si mehuli (pasif) iserapken Raja ku kawes. Janah la saja terjeng serapkan manusia ibas dua kelompok. Tapi kelompok kemuhen dat pasu-pasu Bapa nari emaka bengket kelompok kemuhen ibas kinirajaan singgo isikapken Bapa eme kegeluhen situhu-tuhu si la erkeri-kerin. Tapi kelompok kawes bengket ku bas penghukumen sirasa lalap.

3.      Siimaksudkan perbahanen simehuli eme sada perbahanen kekelengen nandangi kalak sideban simbutuhken penampat, khususna kalak simelihe ibereken man, simuas ibereken minem, nandangi kalak pertandang sidilo ia gelah  kesilang ku rumahta, kalak simanjang anjang iuisi, kalak sakit iadep-adep (silawat/kunjungi), kalak si lit ibas penjara ikunjungi. Janah perbahanen kekelengen enda arus reh ibas pusuh siersuruh nari gelah la ngenen ise siman sampati, la erpalaskan status sosial. Kepeken perbahanen sibage  perbahanen ngelai Tuhan. Alu kata sideban: 1). Kalak sibage eme senina Jesus. 2). Yesus Kristus pebali diriNa ras kalak melihe, muas, kalak pertandang, kalak simanjang anjang, kalak sakit ras kalak si lit ibas penjara.

4.      Nehken kekelengen nandangi sapih-sapih manusia berarti nggo ndalanken hukum kekelengen (bdk. Matius 22:37-40).

5.      Pengajaren Kerna wari pendungi iterangken Jesus tupung Jesus ras ajar-ajarNa i uruk Seton. Enda ikataken Jesus gelah ajar-ajar meteh : a). Lit wari pendungi. Ibas wari pendungi e Jesus simerupaken Anak Manusia reh mulihken ku doni enda, jadi Raja man kerina manusia, bagepe jadi hakim guna ngadili kerina manusia. b). Ajar-ajar Jesus arus ngelakoken simehuli eme kekelengen ibas kegeluhenna, simerupaken perbahanen ras tanda ajar-ajar nggeluh ibas keselamatan. c). Ajar-Ajar Jesus arus ngelakoken perentah ras hukum kekelengen gelah ajar-ajar selamat tupung wari kerehen Jesus peduakaliken.

APLIKASI

            Ibas minggu pendungi tahun gereja, kita isingetken maka Jesus Kristus eme Tuhan sireh ku doni enda, janah nggo nangkih ku surga, janah pagi reh Ia mulihken ku doni enda guna ngerajai kerina manusia. Jesus reh selaku Raja simerentah doni bagepe kerina isina. Tuhan sebage Raja la saja terjeng tupung ijadikenNa doni ras kerina isina, tapi seh rasa lalap Tuhan Raja nandangi kerina doni ras isina (Ivocatio).

            Penghakiman Tuhan ibas wari pendungi la saja terjeng man kalak singgeluh denga, tapi pe man kalak si nggo mate (bdk. Pengakun kiniteken). Emaka ula siakap kalak singgo mate nggo dung sikerajangenna. Lang. Ibas penghakiman pagi, kalak singgo mate arus ikut mempertanggungjawabkan kerina perbahanen-perbahanenna (bdk. Ketangkasen 14:13).

            Perlu siteh ope denga reh Jesus Kristus mulihken ku doni enda kegeluhenta ibas doni enda lit ujungna. Kita arus mate. Janah kematen labo merupaken akhir kegeluhen manusia. Lit denga kegeluhen kenca kematen. Kegeluhen kenca kematen enda me sinentuken i ja inganta situhu-tuhu. Apakah ibas kegeluhen situhu-tuhu (surga) ntah ibas ingan penghukuman sirasa lalap (neraka).

Amin gia keselamatan nggo ibereken Tuhan man banta, tapi tanda kita nggeluh ibas keselamatan arus teridah ibas kegeluhenta tep-tep wari eme nehken kekelengen alu la rayo-ayo nadangi kalak sibutuh penampatta,  gelah iperhitungken Tuhan kita, emaka kita banci nggeluh ibas surga.

            Keputusenta sedekah enda kerna tek man Jesus Kristus nggo payo ras tuhu, sebab Ia me Tuhan ras Raja nandangi doni ras kerina isina termasuk kita. Emaka ibas kita ersembah man Jesus selaku Tuhan, ula terjeng formalitas saja, tapi tuhu-tuhu kita ngadap man Tuhan alu meriah ukur, alu ende-enden pujin ras mungkuk nembah man baNa alu tutus ras bulat ukur (nen = Ogen). Janah kegeluhen siersembah man Tuhan la saja teridah ibas kebaktin-kebaktin tapi pe arus teridah ibas perbahanenta tep-tep wari. Kita arus ngelakoken simehuli singena ate Tuhan.

            Situhuna ibas kita ngelakoken perbahanen simehuli eme kekelengen ras kebujuren enda merupakan biak kita singgeluh ibas keselamatan situhu-tuhu. Biak kegeluhen sirasa lalap.

Pdt. Steven Kumenit, STh.M.Min.