Sukat-Sukat Pemimpin Si Ngena Ate Dibata (Ulangan 17:14-20)

PERPULUNGEN JABU – JABU

GEREJA GBKP

TANGGAL 8 – 14 APRIL 2018.

Ulangan 17 : 14 – 20.

Tema : Sukat-Sukat Pemimpin Si Ngena Ate Dibata.

LATAR BELAKANG

1.      Tupung bangsa Israel ngadi-ngadi i dataran Moab, Dibata ngerana man bangsa Israel erkelang-kelangken Musa. Musa ngerana kerna jabatan raja i tengah-tengah bangsa Israel kenca bangsa Israel bengket ku taneh Kanaan.

2.      Ibas prinsipna bangsa Israel eme bangsa Dibata. Dibata jine simimpin bangsana. Dibata jine si jadi raja man bangsa Israel (bdk.Teokrasi). Tapi bangsa Israel nggeluh ibas ikaten perpadanen, janah ikaten perpadanen jadi sada pengharapen bangsa Israel. Lit telu unsur palas pengharapan bangsa Israel ibas ikaten perpadanen eme : a). Njadiken Israel selaku bangsa milik Dibata. b). Lit hak waris nandangi taneh siijanjiken Dibata man nini-nini bangsa Israel. c). Pengukuhen kerajaan.

3.      Mengantisipasi kegeluhen bangsa Israel kenca bengket ras tading i taneh Kanaan, janah nggo jadi bangsa sendiri, sitentuna sada paksa merincuh bangsa Israel bali ras bangsa isekelewetna eme lit sekalak raja sijadi pemimpinna,  maka isuruh Tuhan gelah Musa ngerana man bangsa Israel kerna “kriteria” ras kai siarus ilakoken sekalak raja bangsa Israel. Lit piga-piga hal siarus ilakoken bangsa Israel ras raja bangsa Israel eme : a). Kalak si ate ipilih bangsa Israel jadi raja eme kalak singgo ipilih Tuhan. b). la banci ibas bangsa sideban nari. c). Raja e la banci melala kudana guna ipake tenterana. d). la banci isuruhna rakyatna nukur kuda ku Mesir. e). la banci melala ndeharana, sebab e banci erbahanca ia nundalken Tuhan.  f). la banci ipebayak bana alu pirak ntah emas. g). sanga ia jadi raja arus maka ibahanna sada salinen kitap undang-undang ras pengajaren Dibata siisalin ibas aslina nari siisimpan imam-imam kalak Lewi. h). Kitab e arus ndeher rusur ras raja ras iogena gedang-gedang geluhna gelah erlajar ia pehaga Dibata ras ngikutken perentah – perentah si lit ibas kitab kitab e alu tutus.

4.      Kriteria sekalak raja bangsa Israel gelah raja bangsa Israel tuhu-tuhu mbiar ras ersembah man Tuhan, bagepe mengandalkan Tuhan saja. Emaka “unsur-unsur” simengandalkan i luar Tuhan arus ibeneken (bdk. ula melala kuda ras kuda itukur i Mesir). Bangsa Israel la banci nulih, enta ku Mesir mulihi ras mengandalkan gegeh manusia. Bagepe sekalak raja la banci melala ndehara, sebab banci saja ndehara simpengaruhi raja e ersembah ku dibata-dibata sideban.     

5.      Raja merupaken wakil Dibata ibas doni enda, janah fungsi raja la saja terjeng ngerajai secara politik, tapi sekalak raja harus njaga spiritualitas/kerohanian bangsa. Emaka sekalak raja harus patuh ras ndalankan undang-undang siberlaku (sah). Alu bage la saja kedamen ras kesejahteraan siinanami bangsa Israel, tapi pe kegeluhen erkemalangen man Tuhan saja.

APLIKASI

            Pemimpin eme wakil Tuhan ibas doni enda. Janah tanggungjawab pemimpin eme mbaba masyarakat nggeluh adil ras makmur. Bagepe pemimpin eme dahin si meherga.

            Ibas negaranta jadi pemimpin harus arah proses pemilihan, sebab Dibata make kita selaku masyarakat milih pemimpinta, gelah ia banci ngerajai kita alu mehuli. Erkiteken harus arah pemilihen, maka jadi penungkunen, pemimpin si uga nge siarus sipilih. Tentuna pemimpin siateta ipilih eme secara umum singena ateta. Kepeken adi sinen ibas pengalaman berbangsa ras bernegara, palas pemilihen ngena ate manusia akibatna la mehuli. Emaka siarus ipilih kita arus singena ate Dibata. Sebab adi ngena ate Dibata, uga pa pe ngena ate manusia. Emaka sukat-sukat pemimpin singena ate Dibata eme : 1). Pemimpin e harus sierkemalangen man Tuhan. 2). La meduit. Erkiteken pemimpin i SUMUT meduit (KKN), maka ia ipenjaraken. 3). Patuh nandangi undang-undang. 5). Ndalanken kebujuren. Rsd.

Pdt.Steven Kumenit,STh.M.Min.