Ngelumbaken Keluarga Sierkualitas (1 Korintus 11:3; 1 Timotius 3:4)

PEKAN KELUARGA

GEREJA GBKP

WARI 1, MINGGU 1 JUNI 2014.

Introitus   :    Ibuat Tuhan Dibata sitik abu taneh ijadikenNa jelma; iembuskenNa kesah kegeluhen ku bas igungna, e maka mulai me jelma ndai nggeluh (Kejadin 2:7).

Ogen        :    Kejadin 1:27-28.

Khotbah   :    1 Korinti 11:3; 1 Timotius 3:4.

Tema        :    Ngelumbaken Keluarga Sierkualitas.

LATAR BELAKANG

A.    1 KORINTI 11:3.

1.    Rasul Paulus selaku pendiri perpulungen Korinti mereken surat man perpulungen guna persinget kerna hakekat manusia, gelah perpulungen meteh kerna kedudukenna, ija takal diberu eme dilaki, janah takal dilaki eme Kristus, bagpe takal Kristus eme Dibata. Tapi enda kerina labo ncidahken kerna hubungen tuan ras hamba, sebab ibas hakekat penciptaan manusia, dilaki ras diberu la siganjang teruken. Seri ia (band. Kejadin 1:26-27; 2:7). Alu bage perpulungen banci nggeluh sue ras biakna ras norma-norma kegeluhen, subuk ibas keluarga, masyarakat bagepe ibas ersembah man Tuhan.

2.    Enda ikataken Paulus sebab i perpulungen lit sada masalah, khususna ibas kebaktin. Ibas kebaktin, lit diberu la nggit nutupi takalna asum ia ertoto ras enubuat. Padahal enda menyalahi eksistensi selaku diberu ibas kebakin, sebab sada peraturen, khususna diberu, adi ia ertoto maka ia harus nutupi takalna.  Bagepe adi sekalak diberu la nggit nutupi takalna maka ipeserina ia ras sekalak dilaki dewasa. Jadi situhuna enda tata tertib ibas kebaktin.

3.    Ibas diberu nutupi takalna tupung ertoto ras ernubuat ermakna 1). Mbedaken cara ersembah diberu kristen ras diberu kafir. 2). Ncidahken ras hormat man Tuhan. 3). Ia diberu singgo dewasa. 4). Nghamati ras menghargai perbulangen/dilaki.

B.     1 TIMOTIUS 3:4

1. Timotius eme anak Paulus ibas kiniteken. Timotius nguda denga, tapi ipercayaken Paulus guna ngepken perpulungen siipajekken Paulus gelah persadan ras kiniersadan, bagepe kiniteken perpulungen bertumbuh. Erkiteken sie me Paulus mereken piga-piga pengertin uga seharusna nggeluh ibas perpulungen, termasuk uga nggeluh selaku pemimpin perpulungen.
2. Kalak siarus jadi pemimpin perpulungen, maka kegeluhenna harus la erpandangan, termasuk terkep-kep jabuna. Sebab selaku pemimpin perpulungen ia jadi bapa nandangi perpulungen. Bagepe pemimpin perpulungen jadi citra simehuli nandangi perpulungen, gelah pemimpin perpulungen la jadi batu antuken hanya erkiteken keluarga. Jadi  pemimpin perpulungen tuhu-tuhu enggo nggeluh ibas kegeluhen simbaru, kegeluhen simbiar man Tuhan. Enda me siharus ilakoken Timotius nandangi perpulungen i Epesus.

APLIKASI

            Keluarga sierkualitas eme sada harapan gereja, sebab keluarga sierkualitas kegeluhenna nggeluh ibas kemalemen ate, sebab la saja ialokenna pasu-pasu idur Dibata nari, tapi pe kegeluhen keluargana ernanam man kalak sideban. Ibas erti kata, kata Dibata tuhu-tuhu tersuan ibas keluargana, emaka amin gia jumpa perbeben ras kiniseran ngasup ia ndalanken kegeluhenna tep-tep wari, sebab iendeskenna kerina perbeben ras kiniseranna man Tuhan. Kegiaten-kegiaten gereja tetap idahikenna.

            Bagepe keluarga sierkualitas, tuhu-tuhu kegeluhen keluargana nggeluh alu harmonis. Keluarga sierkualitas banci jadi i tengah-tengah keluarganta adi Tuhan jadi takal ibas jabunta masing-masing. Bagepe tep-tep wari teridah keluarga nggeluh intim ras Tuhan arah kebaktin keluarga ras ertoto ras-ras.

            Enda me siharus ilumbaken gereja nandangi keluarga-keluarga kristen.

Pdt. Steven Kumenit, STh.M.Min.

  

Metengetlah Nandangi Sekelewetndu (Ulangan 18:9-13)

BAHAN PJJ GEREJA GBKP

TANGGAL 18 – 24 MEI 2014.

Ulangan 18 : 9 – 13.

Tema : Metengetlah Nandangi Sekelewetndu.

LATAR BELAKANG

1.      Tujun utama perdalanan bangsa Israel kenca ndarat i tanah Mesir nari eme ku tanah Kanaan. Tapi labo berarti tanah Kanaan langa erpenghuni, nggo lit. Kalak Kanaan si nggo lebei tading i je berbeda kal agama ras kebiasaan ras bangsa Israel. Erkiteken sie me ope denga bangsa Israel bengket ku tanah Kanaan, tepatna tupung bangsa Israel i dataran Moab (nen = nggo ndeher ras tanah Kanaan), ngerana Musa man bangsa Israel. Ibas Musa ngerana, i je ipersingetina mulihi kerna kai singgo pernah ikataken Tuhan man bangsa Israel paksa  bangsa Israel ngadi i deleng Sinai.

2.      Ipersingeti Musa Mulihi man bangsa Israel gelah bangsa Israel kenca bengket i tanah Kanaan ula ngikuti kebiasaan – kebiasaan  kalak Kanaan, termasuk cara ersembahna (band. Ayat 10-11). Sebab kebiasaan ras cara ersembah bangsa Israel la bage. Bagepe perbahanen-perbahanen sibage eme perbahanen si mbau, emaka la meriah ukur Tuhan nandangi perbahanen – perbahanen sibage.

3.      Piga-piga bentuk perbahanen si mbau siikataken Musa eme mpersembahken anak ku bas api. Anak itutung guna ipersembahken man dewa. Tujun persembahen e me mindo man dewa alu maksa ntah pe mpengaruhi dewa gelah ikabulken dewa pemindonna. Bagepe ibas rangka meteh sada-sada hal ertendung, ngoge tanda-tanda, make  mangmang, make guna-guna, nungkun man kalak singgo mate. Karina bentuk enda la banci ipraktekken bangsa israel, sebab erlawanan ras cara ersembah man Tuhan. Tentuna adi bangsa Israel mprakteken kegeluhen sibage, merawa Tuhan man bana.

4.      Pidato Musa enda merupaken pidato perpisahan Musa man bangsa Israel, sebab Musa la banci naruhken bangsa Israel seh ku tanah Kanaan. Bagepe bangsa Israel si tading i dataran Moab, sinandangi bengket ku tanah Kanaan eme angkatan simbaru. Emaka nggeluh badia ras mbiar man Tuhan harus ipeseh mulihi man bangsa Israel. Bangsa Israel sedekah tading i tanah Kanaan ula min terkontaminasi nandangi perbahanan-perbahanan simbau, si lit i tanah Kanaan.

5.      Lit dua alasan maka ngerana Musa man bangsa Israel eme 1). Gelah bangsa Israel tetap nggeluh ibas perpadananna ras Tuhan. I ja bangsa Israel tetap njadiken Tuhan jadi Tuhanna gelah pasu-pasu Tuhan pe tetap ras bangsa Israel. 2). Bangsa Israel harus nggeluh setia alu bulat ukur. Adi enda idalanken bangsa Israel sedekah i tanah Kanaan, maka bangsa Israel nggeluh mejuah-juah.

APLIKASI

            Salah sada persoalen si seh genduari jadi kebiarenta eme kerna pemaken obat-obat terlarang ras HIV/AIDS.  Penakit sosial enda  melala memakan korban. Pinakit sosial enda ngkenai kerina lapisan masyarakat. Pinakit sosial enda tumbuh subur ibas masyarakat, mekatep alu la sisadari lit ibas sekelewetta.

            Perlu siteh maka seh asa genduari pinakit HIV/AIDS lenga lit tambarna. Janah salah sada penyebab rehna pinakit HIV/AIDS enda eme arah pemaken obat-obat terlarang. Erkiteken nggo kecanduan make obat-obat terlarang e, maka la akapna dalih  make jarum suntik berganti-gantian, padahal banci jadi jarum suntik e nggo teripeksi HIV/AIDS e.

            Keamanan lingkungan isekelewetta lanai banci sikataken enda jadi tanggungjawab pemerintah saja, tapi enda pe nggo jadi tanggungjwabta ras - ras. Kita sendiri nge siharus njaga keamanan lingkungenta, khususna ibas penyebaran obat terlarang ras HIV/AIDS e. Emaka selain njaga anggota keluarganta alu mpegegehi pendidikan anak ibas kerohanian, mbiar man Tuhan, bagepe keluarga harus nggeluh harmonis. Isamping sie kita harus tuhu-tuhu mperdiateken ras megermet nandangi keadaan i sekelewetta. Adi lit kecurigaan-kecurigaan maka harus pedas sitangani. Jadi kita pe selaku masyarakat harus tuhu-tuhu ngelawan pinakit sosial e gelah la minter menyebar ras la ertambahna jumlah korban.

Pdt. Steven Kumenit, STh.M.Min.

Budaya Karo Ibas terang Kata Dibata (Lukas 13:10-17)

BAHAN PJJ GEREJA GBKP

TANGGAL 11 – 17 MEI 2014.

Lukas 13 : 10 – 17.

Tema : Budaya Karo Ibas terang Kata Dibata.

LATAR BELAKANG.

1.      Tujun kerehen Yesus ibas doni enda eme gelah manusia nggeluh ibas keselamatan. Siimaksudken nggeluh ibas keselamatan , salah sadana eme manusia lanai ibas kuk/ikuasai iblis. Emaka adi lit manusia siikuasai iblis/ maka manusia e harus ipulahi ibas iblis nari. Apai ka erbahanca manusia e jadi sakit, maka setan e harus ipelawes gelah manusia banci malem ibas pinakitna nari. Enda me siilakoken Yesus man sekalak diberu singgo sepuluh waluh tahun iulahi setan, erbahanca diberu e bangger. Pinakit e erbahanca diberu e mbengkung  dingen la banci tedis pajek.

2.      Pelawes setan ras nehken keselamatan siilakoken Yesus man diberu e  ibahan Yesus kenca Ia ngajar  i rumah pertoton, janah paksa sie tepat wari Sabat. Emaka amin gia ngerana pengulu rumah pertoton kerna aturen wari sabat man jelma sinterem, tapi situhuna katana e itujuken man Yesus, janah ipudi katana e lit unsur merawa.  Alasenna merawa man Yesus erkiteken ibas aturen agama Yahudi,  wari sabat la banci erkai pe seakatan ersembah man Tuhan. Apai ka keadaan diberu e labo ibas keadaan simembahayaken  (nen = nandangi mate). Sebab wari Sabat eme wari pengadin Tuhan njadiken doni enda ras kerina isina. Bagepe sada perintah gelah bangsa Israel mpebadiaken wari sabat ras ibas wari e la banci erdahin (band. Kel. 20:8-11).  Emaka ibas Yesus mpepalem kalak sakit ras mpelawes setan ibas diberu e nari, merupaken sada pelanggaran hukum agama.

3.      Lit peraturan agama kerna wari Sabat sikontradiksi. Sada pihak ngelarang kalak erdahin, tapi ipihak sideban banci tetap kalak erdahin, khususna ibas peluar lembu ras kelede guna ibere minem.

4.      Mpelawes setan siilakoken Yesus labo merupaken sada pelanggaren agama, sebab adi lembu pe banci ipeluar guna ibere minem ibas wari Sabat, tentuna diberu  siipenjaraken setan e pe banci ibebasken. Memang labo diberu e simindosa, tapi Yesus sendiri siterdilo guna ngelakoken keselamatan, sebab iidah Yesus pinakit silit bas diberu e, labo pinakit kula biasa, tapi pinakit erkite-kiteken pengelako setan  (pinakit rohani). Yesus sendiri sindilo diberu e, janah ipelawes Yesus me setan sibas diberu e.

5.      Iidah Yesus situhuna pengulu rumah pertoton la banci merawa sebab enda pendahin keselamatan siibahan Yesus. Tapi erkiteken merawa ia, maka ialoi Yesus alu ngataken maka pengulu rumah pertoton e pekulah-kulah. Alasanna, sebab lembu ntah kelede saja banci ipeluar guna ibere minem, tapi ngkai maka manusia la banci ipelepas ibas kuasa setan si lit ibas daging kulana nari.  Jadi mpepalem ras mpelawes  setan si lit ibas diberu e la saja banci, tapi merupaken sada kewajiban.

APLIKASI

            Selaku manusia, kita la banci pulah ibas budaya nari, termasuk budaya Karo, sebab enda pe merupaken sada ciptaan manusia. Fungsi budaya eme untuk ngaturken kegeluhen manusia guna nggeluh ras bertindak ibas kiniraturen ras kiniulin geluh sapih-sapih manusia ras ibas ndalani kegeluhen enda.  Bagepe salah sada hakekat budaya eme sada aturen simereken kewajiban-kewajiban guna ilakoken manusia. Erpalasken sienda me, maka ise singelanggar norma-norma budaya, kalak e banci ihukum.

            Budaya tetap berkembang sue ras situasi ras keadaan, termasuk budaya Karo. Emaka adi sinen kerna budaya kalak Karo, melala kal nggo berkembang sue ras jamanna, termasuk ibas budaya kerna kepaten ras nereh empo.

            Kehadiran gereja GBKP ibas doni enda eme pepinter ntah pe nerangi budaya siilakoken manusia, khususna singgo bergeser ku si la mehuli, sierbahanca kita nggeluh ibas “keterikatan”. Alu bage budaya e banci  erdalan alu normal janah la lit i je unsur pekulah-kulah ras simberati kita manusia.

Pdt. Steven Kumenit. STh.M.Min.

           

Permakan Si Melias Dingen Dem Kekelengen (Mazmur 23:1-6)

KHOTBAH TANGGAL 11 MEI 2014

GEREJA GBKP
=================================================================

Introitus   :    I bas wari e pagi, ikelini TUHAN me bangsaNa bali ras permakan ngkelini rarasenna i bas bahaya nari. Bangsa e ersinalsal i bas negerina bali ras permata i bas mahkota (Sakaria 9:16).

Ogen        :    1 Petrus 2 : 19-25 (Tunggal).

Khotbah   :    Mazmur 23:1-6.

Tema        :    Permakan Si Melias Dingen Dem Kekelengen.

LATAR BELAKANG

1.      Ope denga Daud jadi raja, kegeluhen Daud eme permakan. Emaka penjagan ras perlindungan Tuhan man bana igambarkenna selaku permakan nandangi biri-birina.

2.      Tanggungjawab selaku permakan, khususna ibas paksa kegeluhen Daud sada pendahin sicukup mesera, emaka perlu kal ketutusen, sebab selaku permakan harus tehna ija ingan lau ras mbal-mbal simeratah ibas paksana. Janah enda harus ibabaina biri-birina e ndalani ingan sicukup ndauh ras pindah-pindah arah sada ingan ku ingan sideban. Bagepe ingan siidalanina mekatep berbahaya kal nandangi keselamatan biri-birina. Jadi dahin permakan la saja mereken nakan ras minem man biri-birina tapi pe mereken keselamatan nandangi biri-birina e.

3.      Gambaren sideban kerna Tuhan eme Tuan rumah simehuli singalo-ngalo temuena alu meriah ukur. Ijenda raja Daud ngambarken ibas rumah Tuhan ngenca lit perlindungan ras keamanan, sebab Tuhan eme Tuhan sierkuasa, la lit kuasa ibas doni enda singasup naluken kuasa Tuhan, emaka imbang-imbang Tuhan la pang ganggu pemazmur erkiteken pemazmur eme temue Tuhan, janah la saja temue sibiasa, tapi temue sipenting.  Bagepe ibas pemazmur i rumah Tuhan, ndatken pasu-pasu ibas Tuan rumah nari (nen = namaken minak ku takal pemazmur). Ibas pengalo-ngalo Tuhan simehuli, bagepe keleng ate Tuhan sitetap, maka lit sada ketedehen ate man pemazmur gelah tetap ringan ibas rumah Tuhan.

4.      Bageme gambaran pemazmur kerna pengkelengi Tuhan kempak dirina. Jadi paksa pemazmur ndatken ancaman bahaya, termasuk uga raja Saul siatena munuuh ia, bagepe imusuhi kalak, Tuhan tetap njaga ras  mbimbing pemazmur emaka igejapkenna lit sada keamanan.

5.      Penampat Tuhan man pemazmur, tuhu-tuhu igejapken pemazmur ibas kegeluhenna, emaka ibas kegeluhen pemazmur, Tuhan ngenca siiandalkenna, subuk ibas perlindungen kegeluhenna, bagepe ibas ndatken keriahen. Bagepe pemazmur nggejapken maka nggeluh ibas Tuhan la perlu mbiar ndatken cilaka ntah pe kematen, sebab Tuhan tetap ngingetken ntah pe mpersingeti pemazmur gelah tetap nggeluh ibas kebujuren, njaga kegeluhen pemazmur maka kegeluhen e jadi tenang.  Jadi, situhuna bahan oratenta eme sada penjelasan uga pengkelengi Tuhan nandangi anak-anakNa situtus ras setia man baNa.

APLIKASI

            Sigejapken maka erkiteken dosa kita ndauh, sirang  ras Tuhan. Janah enda la meriah ukur Tuhan. Emaka ibas lias ras perkuah ateNa ibabaiNa kita arah Paskah gelah ndeher ras nggeluh mulihi ras Tuhan.

            Kegeluhen ibas keselamatan kepeken la bagi kita erdalan ibas dalan tol sibebas hambatan, tapi lit tantangan. I ja iblis tetap denga ngerim-rim guna nirangken kita ras Tuhan. Keadaan enda nggo iteh Tuhan Yesus, emaka ertoto Ia man BapaNa sinisurga gelah Tuhan nemani  ras ngkawali kalak sitek (band. Yohanes 17:15). Bagepe uga rasul Petrus mereken sada persinget ras motivasi man kalak kristen simerap ibas tanah perlajangan gelah tetap metenget (band. 1 Petrus 5:8). Erkiteken sie me Tuhan njagai ras mbimbing kita gelah  kita tetap nggeluh ibas persadan ras Tuhan. Jadi gelah kita nggeluh mejuah-juah ibas doni enda, ras tetap ndalanken singena ate Tuhan, maka Tuhan jadi permakan ibas kegeluhenta. Bagepe erkiteken Tuhan eme Permakanta maka adi “bene” kita, maka idaramiNa seh dat, gelah mulih kita kempak Tuhan.

            Memang ibas kita ndalanken kebenaren, banci saja kita ndatken perbeben ras kiniseran, tapi teklah, adi erkiteken kebenaren maka kita ndatken perbeben ras kiniseran ipasu-pasu Tuhan me kita.

            Harus siinget kita enda biri-biri Tuhan, tentuna ijagai ras ikawaliNa kita ibas maraklesa nari. Sipenting man banta teklah man Tuhan selaku Permakanta. Bagepe nggeluhlah ibas ketedehen ate ibas rumah Tuhan gelah kita tetap ndatken keriahen, pangan ras inemen siriba-iba, bagepe pasu-pasu Tuhan. Alu bage kekelengen Tuhan tetap ras kita.

Pdt. Steven Kumenit, STh.M.Min.