Ertoto Guna Aron Dibata (1 Korintus 3:8-9)

PEKAN DOA

GEREJA GBKP

WARI VII, 23 MEI 2015

Invocatio    :    Sekalak-sekalakkam arus mperdiateken keperlun kalak sideban (Roma 12:16a)

Ogen          :    1 Petrus 2:9-10.

Renungan   :    1 Korinti 3:8-9.

Tema          :    Ertoto Guna Aron Dibata.

LATAR BELAKANG

1.      Perpulungen Korinti eme perpulungen siipanteki Paulus ibas kurang lebih tahun 50 SM,  paksa perdalanen missionaris peduaken guna nehken Berita si meriah. Tapi ibas perdalanen waktu, perpulungen Korinti nggeluh ibas kelompok-kelompok. Lit kelompok Apolos, lit kelompok Petrus/Kefas ras lit kelompok Paulus. Telu kelompok enda la sicocoken (labo Paulus, Apolos ras Petrus/kefas si la cocoken e tapi pengikut-pengikutna). Tentuna ibas situasi sibagenda banci mpengaruhi kegeluhen persadan gereja ras dungna gereja banci pecah. Padahal selaku gereja harus min nggeluh sikeleng-kelengen ras nggeluh ibas persadan. 

2.      Ibas situasi sibagenda reh surat Paulus guna mpersingeti perpulungen Korinti, gelah perpulungen Korinti banci ngangkai eksistensina  selaku kalak sierkiniteken man Tuhan Dibata. Ibas nggambarken kerna kiniteken perpulungen Korinti, Paulus ngataken maka perpulungen Korinti lenga dewasa kegeluhen pertendinna, emaka Paulus ngerana man perpulungen bagi ngerana man kalak si medanak denga kinitekenna man Kristus. Emaka susu dungna inemenna siibereken Paulus, labo nakan keras. Alu kata sideban Paulus la banci ngerana man perpulungen Korinti selaku “manusia rohani”, sebab si lit man perpulungen eme cian ate ras perselisihan. Enda ikataken Paulus erkiteken Perpulungen Korinti “kepentaren doni ras kesenangen doni siiayakina”.  Jadi memang Paulus agak kecewa, sebab kepeken perpulungen lenga berubah. Seharuna perpulungen kenca ngaloken Kristus, lit sada perubahan ibas kegeluhenna. Biak-biak daging (doni) lanai erkuasa ibas kegeluhenna, tapi enda lit denga.  

3.      Memang lit sada perbedaan ibas gaya ngelai antara Paulus ras Apolos, tapi labo berarti gaya e erbahanca perpulungen nggeluh ibas kelompok-kelompok, lang.  Harus siteh Paulus ras Apolos eme serayan Tuhan, janah erdahin sue ras “talenta” siibereken Tuhan gelah kiniteken perpulungen jadi dewasa.

4.      Guna ngambarken dahin masing-masing, Paulus makeken gambaran dunia pertanian, ija Paulus si nuan janah Apolos siniramsa, enda ate Paulus gelah perpulungen meteh maka subuk Paulus ras Apolos eme sada kesatuan ibas pelayanan. Jadi amin gia Paulus leben reh asangken Apolos, labo berarti kai sienggo isuanken Paulus bene, lang, kerina enda  lebih bertumbuh ibas pelayanan Apolos, emaka ula min perpulungen mebeda-bedaken kerina enda, terlebih nggeluh ibas sada golongan.

5.      Penekanan Paulus sipaling inti eme Dibata. Sebab penggejapen Paulus pertumbuhen perpulungen e erkiteken Dibata, Dibata sipeturahsa, labo Paulus ntah pe Apolos. Paulus ras Apolos eme sada aron, emaka la lit siganjang terukan ibas ia duana. Emaka situhuna la lit ertina pendahin Paulus ras Apolos adi Dibata la erperan.

APLIKASI

            Adi  ngerana kita kerna gereja maka kita ngerana kerna persadan, emaka biak kegeluhen ibas gereja eme nggeluh ras-ras, labo nggeluh sisada-sisada. Kegeluhen nggeluh ras-ras lebih banci mbue terdahiken ras mpercepat dahin-dahin gereja tersehi. Emaka kegeluhen sisada-sisada (egois),  simementingken diri sendiri ntah pe kelompok harus iambengken. Sebab kegeluhen sibage peturah perpecahen ibas persadan gereja.

            Kegeluhen bersinergi (kegiatan yang dilakukan secara bersama-sama), e harus nggeluh ibas gereja, sebab ibas pelayanan gereja banci sikataken kerina berhubungen. Emaka subuk seksi-seksi silit, bagepe kategorial ras perpulungen jabu-jabu harus lit kerja sama ibas pelayanan. Janah enda me siikataken Aron Dibata.

            Arus siinget Fungsi gereja eme menghadirkan Syalom Tuhan i tengah-tengah doni enda. Ntah pe menhadirkan Kerajaan Tuhan ibas doni enda. Erkiteken sie me kita selaku Aron Tuhan (kalak si tek) arus la erngadi-ngadi ras la ermedu-medu ndalanken ras mpraktekken keleng ate Tuhan i tengah-tengah doni enda. Sebab selain kita Aron Tuhan, kita enda eme bangsa pilihen Tuhan singgo iselamatken guna mberitaken perbahanen-perbahanen Tuhan simbelin. Alu bage kita manusia nggeluh ibas keselamaten.

 Pdt. Steven Kumenit, STh.,M.Min.

Ertoto Guna Program Pelayanan GBKP (Mazmur85:9-14)

PEKAN DOA

GEREJA GBKP

WARI VI, JUMAT 22 MEI 2015.

Invocatio    :    Adi kam tetap ibas aku dingen katangKu tetap nggeluh ibas kam, banci ipindondu kai pe atendu, janah ialokenndu me kai siipindondu e (Jahanes 15:7).

Ogen          :    Matius 5:13-16.

Khotbah     :    Mazmur 85:9-14.

Tema          :    Ertoto Guna Program Pelayanan GBKP

LATAR BELAKANG

1.      Secara umum banci sikataken Mazmur 85 enda eme Mazmur perngandungen, erkite-kiteken kenca bangsa Israel mulih ibas taneh pembuangen nari eme Babel. Idapeti bangsa Israel taneh kemulihenna nggo ceda.ibas suasana sibage ertoto pemazmur simewakili bangsa Israel gelah Tuhan mperdiateken kegeluhen bangsaNa.

2.      Pemazmur tek maka Tuhan tading denga i Israel, janah nggo ersikap guna ngkelengi kalak situtus. Perlu siteh siimaksudken Tuhan tading denga i Israel erkite-kiteken rumah pertoton Tuhan i Sion, i Yerusalem, janah Rumah Pertoton e,  je me Tuhan ringan.

3.      Ibas pengakun Pemazmur banci lit pemulihen man bangsa Israel adi bangsa Israel jera ibas dosa nari, ras tutus ndalanken kai singena ate Tuhan. Pemazmur ngidah, Pemulihen hanya banci lit adi bangsa Israel megiken kai siisura-suraken Tuhan. Erkiteken sie me ersura-sura kal pemazmur megiken Kata Tuhan ras dalankenca. Je me ketedehen ate Pemazmur nandangi Kata Tuhan. Sebab sada ngenca sura-surana eme nggeluh ibas pemulihen. Sebab ibas pemulihen, lit i je kedamen ras kemalemen ate. Ipihak sideban, iinget pemazmur denga kerna padan Tuhan. Padan Tuhan eme berekenna kedamen man bangsa Israel adi bangsa Israel nadingken dosa-dosana. Enda ikataken Tuhan sebab la kal ate Tuhan bangsaNa nggeluh ibas dosa ras la lit ibas kedamen.

4.      Keleng ate Tuhan la ibereken Tuhan bage-bage saja, tapi iberekenNa adi bangsa Israel nggit jera ras ndalanken kataNa.  Jadi kalak simbiar ras nggit nggeluh ibas keselamatan saja ibereken Tuhan keleng ateNa e, khususna keadilan ras kedamen.

5.      Keleng ate Tuhan simbaba kedamen ras keriahen ukur, la saja man manusia saja, tapi pe man teneh. Sebab taneh banci mereken hasil, emaka sampur hasil juma bangsa Israel. Alu bage kai sipernah inanami bangsa Israel ndube kerna kesejahteraan, bagepe keadilan ras kedamen nggeluh mulihi.

APLIKASI

            GBKP eme alat Tuhan guna nelamatken manusia ras doni enda. Ibas rangka sie me maka gereja GBKP, subuk tingkat Sinodal, Klasis ras Runggun arus erbahan program. Janah program enda banci nggeluh adi idalanken runggun gereja, bagepe anggota perpulungen. Memang secara klasik, program pelayanan la erdalan erkite-kiteken keuangan la lit. Tapi situhuna adi sinen terdauhen, masalahna labo ibas keuangan, tapi ibas kita. Mekatep la erdalen program e erkite-kiteken la nggit kita dalankenca. Erkiteken sie me merupaken sada kearusen man banta guna notoken program pelayanan gereja gelah banci erdalan alu mehuli. Ibas program enda erdalan maka adi anggota perpulungen ngikuti alu mehuli ka maka kiniteken  anggota perpulungen erdewasana, bagepe secara umum kita banci muat bagin ibas program-program sosial eme nampati senina turangta sikena musibah banjir, taneh longsor, gunung meletus, rsd.

            Bagepe ibas kita ertoto guna program pelayanen gereja, gelah program-program gereja tuhu-tuhu menyentuh pelayanan anggota perpulungen ras guna keselamaten jelma sinterem.

Pdt. Steven Kumenit, STh.M.Min.

Ertoto Guna Orat Nggeluh Si Maba Kejuah-Juahen (Rut 4:1-12)

SERMON PKEN DOA

GEREJA GBKP

WARI V, 21 MEI 2015.

Invocatio    :    Tapi man kerina kalak si ndalanken si mehuli, ibereken Dibata me kemulian, kehamaten ras kemalemen ate, leben man kalak Jahudi, bagepe man kalak sideban (Roma 2:10).

Ogen          :    Johanes 2:1-10.

Renungan   :    Rut 4: 1-12.

Tema          :    Ertoto Guna Orat Nggeluh Si Maba Kejuah-Juahen.

LATAR BELAKANG

1.      Ibas bangsa Israel lit sada peraturen kerna taneh. Taneh eme tading-tadingen, emaka taneh la banci idayaken. Taneh  ibereken man bangsa Israel gelah  lit sumber pencarinna. Tapi adi taneh keluarga ate idayaken, maka siarus nukur taneh e me senina (keluarga sindeher) ku simada taneh e. Sipemena senina sada bapa ras sada nande, emaka senina sembuyak bapa, rsd. Jadi taneh la banci idayaken man kalak sideban. Erpalasken sie me, Boas sipaksa kundul i kerabangen kuta ndilo senina Elimelek sisangan erdalan i je. Jenari ikatakenna kerna sura-sura Naomi ndehara Elimelek guna ndayaken Taneh tading-tadingen keluarga. Erkiteken taneh tading-tadingen keluarga maka siarus lit hakna nukur eme senina Elimelek. Tangtangna nggit senina Elimelek nukursa, tapi erkiteken arus ikut Rut ibuat guna jadi ndeharana, maka lanai ia nggit nukursa, sidungna Boas me sinukursa, janah Rut jadi ndehara.

2.      Perlu siteh karabangen kuta erfungsi guna piga-piga hal eme 1). Ingan transaksi (jual beli). 2). Ingan runggu. Erkiteken sieme lit pertua-pertua i je. Bagepe tanda barang e nggo idayaken, maka simada taneh e harus buka sepatuna janah merekenca man sinukursa.

3.      Senina Elimelek la nggit nukursa, erkite-kiteken adi Rut ikut, berarti Rut jadi ndeharana, jenari adi lit anakna arah Rut, maka sebagin ibas ertana arus ka man Rut ras anak-anakna. Sebab Rut banci denga mupus.

4.      Tangtangna senina Elimelek nggit nukursa erkite-kiteken akapna adi iempoina Naomi la jadi masalah, sebab Naomi lanai banci mupus erkite-kiteken umur Naomi nggo metua. Tapi erkite-kiteken arus ngempoi Rut maka senina Elimelek la nggit,

5.      Ibas Boas nukur taneh tading-tadingen Elimelek maka lit 2 hal eme 1). Ibas Boas ngempoi  si Rut, emaka gelar Elimelek tetap terjaga. 2). Ibas Boas nukur taneh e, berarti Boas mengembalikan taneh man keluarga Elimelek.

APLIKASI

            Ibas kegeluhenta tentuna lit tradisi-tradisi  ntah pe orat nggeluh. Litna orat geluh enda mehuli situhuna, sebab selain menjaga ras melestarikan tradisi e, fungsi sideban eme kekelengen ras ikaten kekeluargaan tetap terpelihara. Memang lit orat nggeluh siarus iambengken erkite-kiteken la sue ras kinitekenta.

            Kita sebagai kalak kristen arus tetap njaga orat nggeluh simehuli simerupaken warisan nini-nininta ndube. Memang seh genduari lit siersura-sura mbeneken orat nggeluh, alu alasen kerina  e berban animisme. Arus siteh labo kerina animisme. Adi kin pe lit animismena, maka kita singgo tek berkewajiban guna mbeneken ntah pe mereken warna simbaru eme warna kristen. Tapi adi  si la lit animismena maka arus tetap sijaga ras silestariken. Bagi Jesus, tupung Ia i kuta Kana. Ikut nge Yesus ibas tradisi nereh empoh. Jadi Jesus la anti budaya, tapi ikut Jesus melestarikan budaya e.

Pdt. Steven Kumenit, STh.M.Min.

Ertoto Guna Erlajar Segedang Geluh (Amsal 8:1-10)

PEKAN DOA

GEREJA GBKP

WARI IV, RABU 20 MEI 2015.

Invocatio :    Ruratlah kam ibas Ia, geluhkenlah geluhndu ibas Ia, janah reh gegehna lah min kinitekenndu bagi siniajarken man bandu. Rusurlah ngataken bujur man Dibata (Kolose 2:7).

Ogen          :    1 Korinti 13.4-11

Renungan      :           Kuan-Kuanen 8:1-10.

Tema         :    Ertoto Guna Erlajar Segedang Geluh

LATAR BELAKANG

1.      Adi ngertiken kerna kepentaren, situhuna kepentaren e la bo siberwujud ntah pe jelma, tapi ibas bahan oratenta sekali enda ncidahken maka kepentaren e iumpamaken sebage jelma, emaka banci ia ngerana ras erlebuh.

2.      Kepentaren merupaken sada hal sipenting ibas kegeluhen bangsa Israel, sebab kepentaren ibas Dibata nari. Erkiteken sie me raja Salomo paksa Dibata ngataken man bana pindolah kai siatendu Kubereken man bandu. Siipindoken raja Salomo eme kepentaren. Janah adi sinen fungsi kepentaren eme gelah dat hasil simehuli, bagepe menyusun sada rencana simehuli gelah ndatken hasil bagi nisurakenna. Erkiteken sie me ingan kepentaren ibas pusuh, sebab i je nari me reh simehuli janah idalanken ibas kegeluhen tep-tep wari. Jadi kepentaren mpereh kerina  simehuli ras guna kiniulin sendiri ras jelma sinterem, sebab i je lit kemalemen ate ras kedamen. Emaka ise singgeluh ibas kepentaren ras ndalanken kepentaren e, man bana nggeluh ibas keriahen ras kemalemen ate.

3.      Gelah tuhu-tuhu lit kedamen ras keadilen i tengah-tengah bangsa Israel maka bangsa Israel nggeluh ibas kepentaren, erkiteken sie me kepentaren erlebuh ibas ingan-ingan sipenting ibas bangsa Israel, ingan erbahan sada keputusen guna ngadili sada-sada perkara. Ikataken  i jenda kepentaren  erlebuh ras pemeteh erdilo i datas uruk i tepi dalan, ertina  sada ingan selain ingan majekken rumah pertoton, tapi sada ingan gelah ibas ingan simeganjang kalak banci megi kai siikataken kepentaren. Bagepe ibas serpang-serpang dalan. Sebab ibas serpang-serpang dalan ingan transaksi barang, emaka ate kepantaren, ibas bertransaksi kebenaren ras  kebujuren  irealisasiken. Bagepe kepentaren erlebuh ras pemeteh erdilo ibas pintu gerbang kota, sebab ibas pintu gerbang kota ingan erbahan sada-sada keputusen.

4.      Kepentaren la saja erlebuh ras pemeteh erdilo man masyarakat sierpemeteh (pedagang ras pengadilan) tapi man kalak lenge, gelah kalak lenge ndatken kepentaren. Emaka man kalak lenge harus erlajar ndatken kepentaren. Uga carana gelah kalak lenge ndatken kepentaren ? Lit piga-piga hal  gelah ndatken kepentaren eme arah  megiken kai siiajarken guru ras kalak silebih tua,  ntah pe silebih perpengalaman asangken kita. Bagepe erlajar ibas kegeluhen sitep-tep wari, alu ngenen simehuli, sibujur ras adil, rsd.

5.      Gelah nggeluh ibas kepentaren maka sipentingna eme begiken ras nggeluh ibas kepentaren e sendiri, jenari ergaken kepentaren e lebihen asangken kai si lit ibas doni enda. Adi enda idalanken maka keputusen simehuli, nggeluh ibas kebujuren,  jadi kalak pentar bagepe mpraktekken simehuli ras erlagu langkah simehuli jadi sikerajangenta. Jadi adi kepentaren lit bas manusia, maka si lit bas manusia eme ciga atena kerna si la mehuli ras sijahat. Tapi guna ndatken kerina enda bangsa Israel harus nggeluh ibas erkemalangen man Tuhan. Sebab bena-benana kepentaren eme mbiar ras erkemalangen man Tuhan (Kuan-Kuanen 1:7).

APLIKASI

            Erlajar la lit batasna. Emaka seh genduari lit nge senina turangta amin gia umurna nggo metua, tapi tetap denga ia erlajar, eme sekolah ibas sekolah formal.

            Salah sada tujun kita erlajar gelah kita banci pentar, la kita gampang itokohi kalak. Bagepe ibas kita erlajar gelah kita ngasup ngangkai erti kegeluhen manusia, emaka gelah kita banci ngelakoken singena ate Tuhan.

            Erlajar lit dua bentuk, eme secara formal ras non formal. Secara formal eme i sekolah-sekolah, tapi erlajar secara non formal eme i luar sekolah. Banci saja arah kita nggit diskusi kerna hal-hal si mehuli, nggit kita nggoge majalah/koran, megi berita i TV ras radio, rsd.

            Erlajar ula saja ibas pengetahuan umum, tapi pe kerna kata Dibata. Erlajar Kata Dibata ras pengetahuan umum cukup berbeda. Sebab mekatep lit kita simekisat erlajar kerna kata Dibata eme arah ngoge Pustaka Si Badia ras ngoge buku-buku teologi. Padahal erlajar kata Dibata la saja mereken kepentaren man banta, tapi pe banci mpegegehi kinitekenta. Bagepe erpayona kita ngangkai Tuhan ras sura-suraNa.  Erkite-kiteken Kesah Si Badia mereken kepentaren man banta maka ngasup kita erlajar, khususna mpraktekken kegeluhen singena ate Tuhan ibas kegeluhenta tep-tep wari. Sebab adi la kita ngasup erlajar ibas kegeluhenta tep-tep wari, maka kita banci ketadingen ibas kegeluhen sirusur berubah tep-tep wari. Emaka marilah kita ertoto gelah kita tutus erlajar ras Dibata mereken Kesah Si Badia gelah kita la bosan-bosan erlajar, subuk pengetahuan umum, bagepe kerna Kata Dibata.

Pdt. Steven Kumenit, STh, M.Min.