Beritakenlah Kiniulin Dibata (“Berita Si Meriah”). (2 Timotius 4:1-5)

PEKAN PENATALAYANAN

GEREJA GBKP

WARI IV, RABU 20 JANUARI 2016.

Invocatio    :    Aku ibahan Dibata jadi si erdahin guna perpulungen. Dahin ibereken Dibata man bangku guna keperlunndu. Dahin e mpembarken kata Dibata alu serta (Kolose 1:25)

Ogen          :    Jesaya 48:2-21

Renungan   :    II Timotius 4:1-5.

Tema          :    Beritakenlah Kiniulin Dibata (“Berita Si Meriah”).

LATAR BELAKANG

1.      Secara umum kitab Timotius enda igolongkan ibas kitab Pastoral, sebab bentukna eme mpegegehi semangat ras kiniteken Timotius ibas ngelai i perpulungen Epesus.

2.      Ibas kata pergegeh enda Paulus ngataken man Timotius maka reh denga pagi Jesus, janah ibas kerehenNa berhubungen ras pengadilan. Kalak situtus ndalanken kai singena ate Tuhan me sindatken keselamatan, tapi si la ngelakoken singena ate Tuhan ihukum. Janah ula erpengakap maka adi nggo mate nggo dung sikerajangenta. Tapi arus sikataken maka Tuhan e la saja Tuhan nandangi kalak singgeluh, tapi pe nandangi kalak simate. Emaka amin gia nggo mate pe, pagi tetap nge iadili Tuhan. Erkiteken sie me maka Timotius arus mpeseh kerna Kinirajaan Tuhan (Keselamaten).

3.      Persoalan siihadapi Timotius eme pengajaran si papak. Tekanan-tekanan banci erbahanca kendor kiniteken Timotius, sebab nguda denga ia. Emaka ibas situasi siugapa pe, termasuk si la bagi ukur, Berita Simeriah arus ipeseh/pembarken. Janah salah sada bentuk pembarken Berita simeriah eme ncidahkan salah kalak ras mpersingeti ia. La terjeng je, adi nggo sicidahkan ras sipersingeti maka tugas selanjutna eme mpegegehisa alu pengajaren situhu-tuhu. Enda idalaken alu kesabaren. Ibas ndalanken sie, lit sada arapan gelah perpulungen Epesus nggeluh ibas keselamaten, sebab lit pertobaten.

4.      Kesempaten siibereken Dibata man Timotius guna ngelai i Epesus arus mpergunakan waktu alu mehuli, sebab sada paksa lit kari kalak lanai nggit megiken pengajaran situhu-tuhu. Adi nggo bage maka tentuna keselamatan lanai jadi sekerajangenna. Padahal, Jesus erkeleng ate man kerina manusia. Tanda keleng ate  Tuhan e, berekenna kesempatan man kerina manusia guna jera. Enda me dahin Timotius.

5.      Ate Paulus man Timotius, amin gia melala tantangan-tantangan ibas pelayanan, tapi kata Dibata arus tetap ipeseh. Kata Dibata eme mabai perpulungen gelah tetap nggeluh ibas persadan ras Yesus Kristus. Bagepe perpulungen tetap ngkelengi Kata Dibata, emaka nggit ia megiken Kata Dibata. Ibas perpulungen megiken Kata Dibata, perpulungen banci ngukurisi suari ras berngi (band. Mazmur 1:3), jenari idalankenna. Emaka perpulungen lanai atena megiken pengajaran si la tuhu siibaba guru-guru palsu, sibanci erbahanca perpulungen sirang ras Tuhan.

APLIKASI

            Dahin mberitaken Berita si Meriah eme dahinta ras. Jadi la saja dahin serayan Tuhan,tapi dahin kerina warga gereja. Tujun ndahiken Berita Si meriah gelah kerina kita nggeluh ibas keselamatan. Persoalenna nterem denga warga gereja la muat bagin ibas ndahiken dahin enda. padahal adi sioge ibas 1 Petrus 2:9, kerina kita ertanggungjawab nehken Berita Si Meriah sebab enda respon kiniteken erkite-kiteken kita nggo iselamatkan Tuhan. Bagepe gelah kalak sideban pe nggeluh ibas keselamatan. Apai ka menaken tahun 2016 enda tanggungjawabta eme mpetetap ukur warga gereja gelah ia tetap njemak kata Dibata ibas ndalani tahun enda. Bagepe kita arus pang ngataken sibenar ibas kegeluhenta, sebab nterem denga warga gereja mpraktekken kerna si la mehuki si langena ate Dibata.

            Keselamatan eme milik kerina jelma. Tapi banci saja keselamatan lanai jadi sikerajangenta erkite-kiteken kita ngelakoken si la mehuli si langena ate Tuhan. Jadi banci saja lit warga gereja nggo ntabeh akapna ngelakoken si la mehuli si la ngena ate Tuhan, janah la akapna salah e. Tuhu-tuhu nggo ikuasai dosa, maka si la mehuli si la ngena ate Tuhan, nggo benar akapna. Je me tugasta mpersingeti ia. Bagepe arus kita kerina ngelai alu persada arihta ibas nehken kata Dibata. Alu bage pendilo Tuhan nandangi kita kerina nggo ipeseh, emaka kita jadi alat Tuhan ras pancur pasu-pasu Tuhan nandangi kalak sideban.

Pdt. Steven Kumenit, STh.M.Min

Kerina Guna Kerinana (“semua Untuk Semua”). (Kisah Para Rasul 2:43-47)

PEKAN PENATALAYANAN

GEREJA GBKP

WARI III, SELASA 19 JANUARI 2016.

Invocatio    :    Andiko ulina ras senangna adi kalak ersenina ersada perarih (Masmur 133:1).

Ogen          :    Jahanes 17:20-23.

Renungan   :    Perbahanen Rasul-Rasul 2:43-47.

Tema          :    Kerina Guna Kerinana (“semua Untuk Semua”).

LATAR BELAKANG

1.    Lit piga-piga wari raya bangsa Yahudi, salah sadana eme wari raya pentakosta. Ibas wari raya pentakosta enda, ntah pe wari raya pitu minggu eme wari raya “sindabuh ibas wari pe lima puluhken kenca Paskah kalak Yahudi. Ibas wari raya enda,  kalak Yahudi harus ngataken bujur man Tuhan i rumah pertoton  i Yerusalem. Sebab man bangsa Yahudi Dibata ringan i Rumah pertoton i Yerusalem. Emaka selain wari raya Paskah, Wari Raya Pentakosta pe, kalak Yahudi harus reh ku Yerusalem. Paksa sie me i Yerusalem pulung kalak Yahudi si reh ibas erbage-bage daerah/bangsa nari. Jadi wari raya Pentakosta tangtangna la bo iertiken kerna nusurna Kesah Si Badia. Tapi wari raya kenca rani.

2.    Ibas paksa sie rempet lit sora terbegi reh ibas langit nari bagi sora angin rembus erdeso ndemi ingan pulung rumah kalak si tek. Kenca sie lit bagi dilah api merap ku jah-kujeh  ncinepi kalak si tek sada-sadai. Emaka kalak si tek idemi Kesah Si Badia, janah ngasup ia kerina ngerana alu erbage-bage cakap. Emaka mamang ate kalak Yahudi si reh ibas erbage-bage bangsa sipulung i je. Sebab kalak sitek ngasup ngerana alu bahasana jine. Tapi memang lit ka sinawaisa janah nina mabuk kap ia (ayat 12).

3).  Ibas pengangkan si salah enda me (nen = kalak sinawaisa), tedis Petrus janah nina,  kalak enda la mabuk, sebab enda jam siwah denga, tapi enda eme perbahanen Dibata. Dibata ncurcurken KesahNa man kerina anak manusia (band. Ayat 17). Emaka iterusken  Petrus ngerana, janah intina Petrus ngerana ntah pe khotbah eme kerna Yesus Kristus. Petrus ngerana ise kin Yesus e ras engkai maka Ia mate, rsd. Ibas penghujung khotbah Petrus e, iajuk petrus gelah kalak Yahudi e jera, sebab kalak Yahudi enda me si la ngasup ngaloken Yesus selaku Mesias,  emaka ibunuh ras ipakukenna Yesus i kayu persilang i uruk Golgota.  Nterem kalak simegi kata Petrus jadi jera ras mindo gelah iperidiken. Ibas wari e lit kira-kira telu ribu kalak tambah ku bas perpulungen e.

4.   Kenca ia enggo iperidiken, tutus ia ibas pengajaren rasul-rasul, janah nggeluh ibas sikeleng-kelengen bagi siersenina. Kalak si enggo tek, eme kira-kira 3000 kalak ras-ras ia ncepik-ncepik roti ras ertoto man Dibata. Maksud enda kerina eme tanda sada peringeten kerna keleng ate Yesus si mbelin siisehkenNa man manusia. Jadi enda merupaken sada pengajaren kerna keselamaten siibahan Yesus arah  ncepik-ncepik roti.

5.    Kalak Jahudi si nggo tek man Jesus Kristus terjadi perubahan karakter nggeluh, eme nggeluh ibas sada arih ras sikeleng-kelengen, bagepe nggeluh ibas sada kula, emaka lit sada penggejapen kerna kegeluhen. Ibas palas enda me maka kalak si lit buatenna nggejapken guna nampati senina turangna sikekurangen. Emaka lit me tep-tep wari ndayaken ertana, janah ibagiken man kalak sikurang mampu. Ibas perbahanen pulung ras-ras, ertoto ras-ras, nggeluh sikeleng-kelengen ras nggeluh ibas sada arih, muji Dibata alu meriah ukur ras meteruk ukur, erbahanca ngena ate Tuhan, emaka kerina kalak erngena ate man perpulungen, emaka tep-tep wari itambahi Tuhan ku perpulungen kalak siiselamatken.

APLIKASI

Nggeluh ibas sada perpulungen arus nggejapken kita enda eme sada kula, emaka lit min bas kita sada penggejapen guna sikeleng-kelengen, sebab karakter sikeleng-kelengen eme karakter Tuhan kap. Kerna keleng ate simerupaken karakter Kristus, labo terjeng konsep saja, tapi arus ipraktekken. Karakter sikeleng-kelengen e mabai kita terdilo guna nampati kalak sideban situhu-tuhu membutuhken penampatta.

Ipihak sideban arus siangka nggo lit bas kta pemere-pemere Tuhan sipelain-lein. Pemere sipelain-lainenda arus sipake guna kemulian Tuhan. Arus siinget maka kita selaku kalak sitek idilo Tuhan ibas sada persadan ibas rangka nehi kata Dibata i tengah-tengah perpulungen Tuhan. Jadi arus siangka tujun pendilo Tuhan gelah kita ras senina turangta tetap nggeluh ibas keselamatan. Emaka sipaling penting man banta eme merealisasiken pemere-pemere Dibata si lit bas kita ibas pelayanan i perpulungen. Erbeda-beda pemere-pemere Tuhan man banta. Tapi adi sipersada kerina e ibas pelayanan mejile bekasna. Kita enda aron Dibata kap. Fungsi aron eme erdahin gelah simada juma malem atena. Jadi ibas kita kerina erdahin ras-ras, maka kita kegeluhenta ibas sada perpulungen nggeluh ibas kiniersadan, sebab kerina terlibat langsung ibas nehi Kata Dibata sue ras pemere Tuhan si lit bas kita sekalak-sekalak, enda me siikataken kerina guna kerinana. Alu kata sideban kerina guna kerinana la bo berarti kai si lit bas kita (ekonomi) eme milik bersama, lang. Tapi pemere Tuhan subuk ekonomi bagepe talenta  sipersada arihta guna ras-ras ipake guna ngelai Tuhan. Alu bage la saja sada perpulungen sierngena ate man banta, tapi pe kalak si i darat perpulungen sierngena ate, terlebih Tuhan.

                                                        

Pdt. Steven Kumenit, STh.M.Min.

Lanai Atendu Keleng Bagi Sigel-gel (Wahyu 2:1-7)

PEKAN PENATALAYANAN

GEREJA GBKP

WARI II, SENIN 18 JANUARI 2016.

Invocatio    :    Kalak si megombang dingen meganjang rukur, nggit mandangi dingen jago akapna bana (Kuan-Kuanen 21:24).

Ogen          :    Jesaya 1:21-23.

Renungan   :    Ketangkasen 2. 1-7.

Tema          :    Lanai Atendu Keleng Bagi Sigel-gel

LATAR BELAKANG

1.      Sijadi oratenta sendah eme salah sada bagin ibas pengenehehen Johanes kerna uga pemeliharaan Tuhan nandangi gerejaNa, khususna perpulungen i Epesus. Tuhan sitading ibas ingan simaganjangna ras Badia eme surga, nempatken malaekatNa guna erjaga i perpulungen Tuhan eme Epesus. Amin gia lit Malaikat i je, tapi Tuhan tetap mperdiateken ras meteh kerna kecibal perpulungen. Kai sijadi ras siibahan perpulungen iteh Tuhan kerina. Erkiteken sie memaka isuruh Tuhan Malekat si lit i Epesus gelah nuratken  kerna kai siidah ras iteh Tuhan. Janah enda arus ipeseh man perpulungen.

2.      Penemani ras pengkawali Tuhan man pitu perpulungen, termasuk perpulungen Epesus ilambangkan alu njemak bintang si pitu ibas tanNa sikemuhen, sierdalan i tengah-tengah nahe lampu emas sipitu. Penemani ras pengkawali Tuhan man perpulungen i Epesus erkite-kiteken perpulungen e Tuhan simadasa.

3.      Erkite-kiteken perpulungen Epesus Tuhan simadasa, janah tetap Tuhan mperdiateken perpulungen e, maka kerina siterjadi ibas perpulungen iteh Tuhan. Gelah perpulungen Epesus meteh kerna kecibalna maka nina Tuhan, sipemena : situasi ras keadaan perpulungen sitetap njemak keselamatan erbahanca perpulungen tetap nggeluh ibas kiniteruken ukur, saber, la terpengaruh ku bas pengajuk rasul-rasul palsu, bagepe tetap megenggeng amin gia perpulungen ngenanami kiniseran. Sipeduaken : kata persinget Tuhan nandangi perpulungen. Nina Tuhan genduari lanai perpulungen e ngkelengi Tuhan. Erkiteken sie me isuruh Tuhan gelah perpulungen nginget mulihi kerna pendilo Tuhan nandangi ia. Sebab marenda perpulungen Epesus ndauh ibas Tuhan nari. Perpulungen lalap erbahan dosa. Tapi erkiteken keleng ate Tuhan, maka iselamatkan Tuhan perpulungen e, emaka perpulungen nggo tek man Tuhan. Erkiteken sie maka perpulungen arus jera.

4.      Isuruh Tuhan perpulungen Epesus Jera sebab perpulungehn nggo ngelakoken si lamehuli, si la ngena ate Tuhan. Situhuna tujunna mehuli, eme mpertahanken ajaran simurni, singgo iajarkan rasul-rasul. Tapi erkite-kiteken ketatsa dungna perpulungen saling menghakimi ras menghukum sada ras sidebanna. Sapih-sapih ia nggo jadi polisi kiniteken simengawasi temanna, emaka dungna nggo lit saling mencurigai, ras menghukum. Perbahanen sibage nggo lanai mehuli. Ibas bahasa sideban lanai lit kekelengen, khususna perpulungen lanai ngkelengi Tuhan. Sebab adi perpulungen ngkelengi Tuhan, maka perpulungen arus mbiar ras mehamat man Tuhan. Labo anggota perpulungen siarus menghakimi perpulungen, tapi Tuhan. Erkiteken sie me perpulungen arus jera, adi lang maka ibuat Tuhan nahe lampu ibas inganna nari. Maksudna lit penghukuman man perpulungen.

5.      Ibas rangka keselamatan perpulungen, maka perpulungen arus megiken kai siikataken Kesah Dibata. Sebab ibas perpulungen Epesus megiken kai siikataken Kesah Dibata, maka perpulungen banci meteh kai siarus ilakokenna. Amin gia lit perbeben ras kiniseran, tapi  perpulungen nggeluh ibas kemenangan. Erkiteken perpulungen nggeluh ibas kemenangan maka perpulungen ibere Tuhan man batang kayu kegeluhen siturah ibas Pardis. Perpulungen ngenanami kemalemen ate sebab perpulungen man buah-buah kegeluhen si lit ibas surga.

APLIKASI

            Keleng ate nandangi Yesus Kristus selaku Tuhan, ngasup ncidahken ketutusen nggeluh simehuli singena ate Tuhan i tengah-tengah doni enda. Emaka ibas kegeluhenta, siilakokenta eme sibujur, keleng ate ras kadilen, rsd. Tapi adi keleng ateta nandangi Tuhan la lit maka sebalikna me siibahan kita. Adi enda siibahan kita maka sijadi eme penghukuman Tuhan nandangi kita. Ibas sejarah keselamatan bangsa Israel. Erkite-kiteken bangsa Israel lanai nggeluh bagi bangsa si nggo iselamatkan Tuhan, maka ihukum Tuhan ia. Bagepe perbahanen perpulungen Epesus isuruh jera, gelah keselamatan singgo ibereken Tuhan tetap jadi sikerajangan perpulungen. Bage me kita selaku kalak singgo iselamatkan arus nggeluh ibas komitmen maka kita arus nggeluh ibas ketetapan ukur. Amin gia jumpa perbeben ras kiniseran, kita arus tetap ngkelengi Tuhan, gelah Tuhan pe ngkelengi kita. Alu bage kita banci nggeluh ibas kemenangan. Perlu siteh kegeluhenta genduari arus erjuang, sebab iblis tetap ngerimrim kita gelah kita ndabuh ku bas dosa, janah kita lanai nggeluh ibas persadan ras Tuhan. Tapi erkiteken kita tetap ncikep keselamatan, janah adi lit salah ras dosa siibahan kita, reh kita man Tuhan, jera kita, maka tetap kita ikelengi Tuhan. Emaka ibas kerehenNa peduakaliken,  kita banci atan ras Yesus, emaka kita banci man buah kegeluhen si lit i Pardis.

Pdt. Steven Kumenit, STh.M.Min.

Kita Kap Aron Dibata (Efesus 4:1-7)

PEKAN PENATALAYANAN

GEREJA GBKP

WARI I, MINGGU 17 JANUARI 2016.

Invocatio    :    Tapi kam eme bangsa pilihen, imam-imam Raja, bangsa sikerajangen Dibata, anak-anak Dibata si ipilih guna meritaken perbahanen-perbahanen Dibata si mbelin. Dibata nggo ndilo kam ndarat ibas gelap nari ku bas terangNa si lanai kal langlang ulina (1 Petrus 2:9).

Ogen          :    Pilipi 2:1-4.

Renungan   :    Epesus 4:1-7.

Tema          :    Kita Kap Aron Dibata.

LATAR BELAKANG

1.      Sijadi bahan perenungenta sendah eme surat Rasul Paulus siikirimkenna ibas penjara nari. Janah enda mereken motivasi man man perpulungen Epesus gelah tetap nggeluh bagi tangtangna perpulungen idilo guna ngikut Kristus. Siimaksudken nggeluh bagi sitangtangna kam  idilo guna ngikut Kristus eme nggeluh selaku Imago – Dei (segambar ras Dibata), ntah pe nggeluh alu lagu langkah simehuli singena ate Tuhan.

2.      Tuhu ibas perpulungen Epesus la bo lit perpecahan, tapi Paulus tetap mpersingeti perpulungen gelah tetap nggeluh ibas persadan selaku gereja. Emaka alu kongkrit perpulungen Epesus arus mpraktekken kegeluhen alu horisontal sapih-sapih manusia eme nggeluh alu kiniteruken ukur, lemah lembut, saber, la pergelut, nggeluh ibas perdamen. Bagepe nggeluh alu vertikal eme ras Tuhan. Kegeluhen ras Tuhan arus teridah, perpulungen Epesus arus ngangkai maka sada ngenca Tuhan. Sada kiniteken, sada peridin. Sada ngenca Dibata eme Bapa kerinana sierdahin ibas kerina sinasa lit.

3.      Ibas ngangkai kegeluhen selaku gereja, maka ipersingeti Paulus tole man perpulungen maka kerina perpulungen nggo ibereken kengasupen sikhusus sue ras bagin siibereken Tuhan man anggota perpulunegen. Enda kerina iberekenna sue ras lias ate Tuhan. Ibereken Tuhan kerina enda gelah kerina anggota perpulungen muat bagin ibas pelayanan. Alu bage kegeluhen perpulungen erdewasana, sebab kerina anggota perpulunge terlibat aktif ibas pelayanan gereja.

4.      Tuhu perpulungen Epesus reh ibas erbage-bage latar belakang sosial ras budaya. Anggota perpulungen Epesus la bo kalak kristen si asalna la kalak Yahudi nari, tapi pe kalak kristen siasalna kalak Yahudi nari. Amin gia erbage-bage latar belakang, tapi perpulungen Epesus arus ngangkai maka ia kerina sada kula. Erkiteken sada kula maka tentuna kerina anggota perpulungen nggeluh ibas persadan ras kedamen, la banci nggeluh serap-serap ntah pe egois. Kerina anggota kula saling membutuhken sada ras sidebanna. Bagepe perpulunge Epesus arus ngangkai maka sada ngenca Kesah. Kesah enda me sipersadaken ia kerina. Kesah siimaksudken eme Kesah Si Badia.

5.      Pengakun perpulungen Epesus la saja terjeng ibas sada kula, sada Kesah, sada Tuhan. Tapi pe ibas sada pengarapen. Ibas sada pengarapen, ate Paulus gelah perpulungen tetap ngangkai maka nai ia nggeluh ibas kematen erkite-kiteken la nggeluh ibas persadan ras Yesus. Tapi erkiteken genduari ia nggeluh ibas persadan ras Yesus Kristus, maka perpulungen nggo nggeluh ibas keselamatan. Genduari perpulungen sangana nimai kerehen Yesus Kristus peduakaliken. Bagepe pasu-pasu Tuhan. Emaka ibas nimai enda, perpulungen arus nggeluh ibas sada kula, nggeluh ibas lagu langkah simehuli singena ate Tuhan, nggeluh ibas sada Tuhan saja ras nggeluh ibas ndahiken-dahin Tuhan sue ras pemere-pemere singgo ibereken Tuhan man kerina anggota perpulungen.

APLIKASI

            Kita kerina nggo idilo Tuhan selaku gereja, emaka selaku gereja kita arus ndahiken dahin Tuhan i tengah-tengah doni enda. Dahin siimaksudken eme dahin keselamatan. Ibas kita ndahiken dahin Tuhan berarti kita nggo jadi Aron Dibata. Erkiteken kita enda Aron Dibatamaka sipaling penting man banta eme arus lit min sada visi ras misi bas kita. Visinta eme termulia Tuhan ibas dahinta. Emaka misinta eme lit min komitmenta erdahin ras-ras. Emaka selaku aron Dibata, la banci lit bas kita egois. Selaku Aron Dibata kita kerina seri, la lit ganjang teruken, sebab kita erdahin ibas visi ras misi si seri. Bagepe kita erdahin ibas juma Tuhan siipercayaken Tuhan man banta.

            Selaku aron Dibata, berarti kita la banci sinik saja, tapi lit peranta sekalak-sekalak. Janah arus min siangkai maka sidahiken kita eme dahin Tuhan emaka guna kemulian Tuhan. Apai ka ibas tahun enda, tema gerejanta eme meningkatkan komitmen warga GBKP yang misioner untuk berpartisipasi dalam pelayanan. Jadi secara sederhana, arah tema enda ngatakenca man banta arus lit bas kita komitmen guna maju ras berkembang, emaka mari kita muat bagin ibas pelayanan. La saja cakap siiperluken tapi keterlibatenta ibas pelayanan. Adi lit sikurang ibas pelayanan, ras-ras sicakapken, gelah bertumbuh kita ibas pelayanan gereja.

Pdt. Steven Kumenit, STh.M.Min.