Tetap sipindo KepentarenNa Bas kegeluhenta (Kolose 1:1-14)

BAHAN PJJ GEREJA GBKP

TANGGAL 17 – 23 NOPEMBER 2013

Kolose 1:1-14.

Tema : Tetap sipindo KepentarenNa Bas kegeluhenta.

LATAR BELAKANG

1.      Perkembangen kiniteken perpulungen Kolose, erbahanca meriah ukur rasul paulus. Tapi lit sada kearun atena man perpulungen erkite-kiteken lit berkembang sada pengajaren si papak, sincedai pengajaren situhu-tuhu. Erkiteken sie Paulus la erngadi-ngadi notoken perpulungen Kolose gelah tetap ibas pengajaren si tuhu-tuhu. Kepentaren si lit ibas perpulungen harus ipake gelah nggeluh ibas si ngena ate Tuhan, ras lit buah simehuli janah erbagesna min penandai perpulungen Kolose kerna Tuhan. Pertoton Paulus enda ipesehna man Perpulungen, gelah perpulungen banci metenget nandangi pengajaren si la tuhu.

2.      Paulus pe mindo man perpulungen gelah perpulungen Kolose ngataken bujur man Tuhan alu ermeriah ukur, sebab erkiteken Dibata me maka perpulungen metunggung i lebe-lebe Dibata janah tentuna nggeluh ibas keselamaten. Jadi situhuna labo erkiteken gegeh ras kengasupen perpulungen, tapi erkite-kiteken lias ras perkuah ate Tuhan nge. Erkiteken Tuhan maka perpulungen lanai nggeluh ibas dosa, sebab dosa erbahanca manusia lanai metunggung i lebe-lebe Dibata, janah erkiteken dosa me maka manusia dat penghukumen Tuhan. Tapi erkiteken perkuah ate Tuhan maka perpulungen lanai nggeluh ibas dosa, sebab enggo ibersihken Tuhan arah Yesus Kristus i kayu silang. Emaka ise si tek man Yesus nggeluh ibas keselamaten. Jadi perpulungen Kolose wajib nge ngataken bujur man Tuhan saja.

3.      Isamping sie Paulus menekanken kerna kinirajaan Kristus. Alu maksud erkiteken Perpulungen Kolose enggo terbebas ibas kuasa dosa maka perpulungen Kolose enggo nggeluh ibas kuasa Kinirajaan Anak. Paulus ngerana kerna Yesus Kristus., sebab ibas Yesus Kristus, Dibata mereken kerina kuasa subuk i surga bage pe i doni (band. Matius 28:18). Jadi merupaken sada keriahen tersendiri man perpulungen erkiteken perpulungen Kolose enggo nggeluh ibas kinirajaan Yesus Kristus.

4.      Ate Paulus gelah ibas kerina kegeluhen perpulungen Kolose tetaplah nggeluh bagi sura-sura Dibata, ras tetap nggeluh ibas Yesus Kristus.

5.      Paulus sengaja ngataken man perpulungen Kolose kerna kinirajaan Terang ras kuasa sigelap. Subuk kinirajaan Terang ras kuasa gelap saling bertentangan. Janah Paulus mbukaken perukuren perpulungen Kolose, ija nai perpulungen Kolose nggeluh ibas kuasa gelap, nggeluh ibas perbudaken dosa, tapi erkiteken kuasa Dibata arah Yesus Kristus, maka genduari perpulungen nggeluh ibas kinirajaan Terang, eme keselamaten. Lanai perpulungen nggeluh ibas perbudaken, tapi enggo nggeluh ibas kemerdekaan.

APLIKASI

            Adi kita ngerana kerna kepentaren (hikmat) maka lit dua kepentaren siberkembang eme kepentaren doni ras kepentaren Tuhan. Janah dua kepentaren enda “bertolak belakang kal” ntah bermusuhen.Sebab kepentaren doni enda la ngasup ngangkai ras ngukurisa kerna kepentaren Tuhan, termasuk uga Dibata nelamatken kita manusia arah pemusilna baNa, jadi seri Ia ras manusia, janah arah kayu persilang iselamatkenna kita kerina.

            Kepentaren Tuhan mereken kemalemen ate man banta manusia. Enda me siicidahkenna arah Ia reh ku doni enda. Emaka kalak singgeluh ibas kepentaren Tuhan tehna kai siharus ilakoken ibas kegeluhenna tep-tep wari. Erkiteken sie me raja Salomo mindo kepentaren gelah tehna ngerunggui bangsa Tuhan, gelah bangsa Tuhan banci nggeluh ibas kedamen.

            Adven eme “persiapan/penantian“ Yesus Kristus. Janah ibas tradisi gerejanta, ibas masa-masa persiapan/penantian i je me kita ngelakoken perayaan Natal. Emaka mekatep erkiteken kebaktin ras perayaan natal jadi masalah, maka dungna persikapen/penantian natal jadi “kacau”. Emaka sekali enda kita ipersingeti, la dalih e ilakoken, tapi marilah makna Adven e tetap sidalanken. Gelah makna adven e lit, la banci lang kita harus nggeluh ibas kepentaren Tuhan. Emaka sipindolah kepentaren Tuhan bas kegeluhenta gelah natal bermakna ibas kegeluhenta.

Pdt. Steven Kumenit, STh.M.Min.