Tetap Ngelai Erkiteken Kita Enggo Ielai (Yohanes 13:1-17)

BAHAN PJJ GEREJA GBKP

TANGGAL 10 – 16 NOPEMBER 2013

Yohanes 13:1-17.

Tema : Tetap Ngelai Erkiteken Kita Enggo Ielai.

LATAR BELAKANG

1.      Cukup melala pasal ras ayat pendukung singatakan maka paksa Yesus lenga seh. Maksudna lenga seh paksana Yesus nadingken doni enda janah mulih ku Bapa (Surga). Piga-piga ayat pendungkung eme Yohanes 7:30; 8:20. Tapi siidah ibas oratenta, nggo iteh Yesus maka paksaNa nggo seh. Sebab iblis nggo erdahin ibas pusuh Yudas Iskariot. Emaka paksa Yesus mburihi nahe ajar-ajarNa nina kam kerina nggo bersih, sekalak ngenca lang. Perkatan Yesus enda itujuken man Yudas.

2.      Murihi nahe eme pendahin sekalak suruh-suruhen. Ibas dunia Israel kuno, sekalak suruh-suruhen wajib murihi nahe tuanna. Sebab paksa sie kerina dalan siidalani eme taneh ras “berdebu” emaka nahe jadi melket, emaka kenca seh i rumah maka sekalak suruh-suruhen harus lebe murihi nahe tuanna gelah bersih. Em sebabna paksa  Yesus murihi nahe Petrus, la ibere Petrus, sebab sie la wajar,  sebab iidah Petrus Yesus la bo sekalak suruh-suruhen (budak), tapi Tuhan. Dahin e eme pendahin sirendah. Arah kai siilakoken Petrus ngatakenca, maka la bo kerina ajar-ajar Yesus ngasup ngangkai kai alasen Yesus murihi nahe-ajar-ajarNa.

3.      Yesus murihi nahe ajar-ajarNa, la bo erkiteken Yesus sekalak suruh-suruhen (budak) ajar-ajar, tapi lit tujunna eme 1). Ngubah cara pandang masyarakat paksa sie eme sekalak pemimpin sierkuasa harus jadi pemimpin sidem alu keleng ate ras meteruk ukur guna ngelai. Sebab subuk pemimpin ras suruh-suruhen seri nge. La lit siganjng teruken. 2). Gelah ajar-ajar banci ngusih kai siilakoken Yesus. Amin gia bas Yesus lit kuasa, guru ras Tuhan, tapi nggit ngelai alu meteruk ukur ras dem keleng ate. 

4.       Perbahanen Yesus murihi nahe ajar-ajarNa eme perbahanen simbolik. Ija ibas Yesus nangtangi jubahNa ngataken Yesus sangana nangtangi “ke-guru-anNa, janah erperan selaku suruh-suruhen ajar-ajar. Bagepe ibentingkenna uisNa ngataken Yesus sangana mpeteruk ukurNa.

5.      Ajar-ajar harus siburih-burihen nahe gelah malem atena. Enda nerangken maka adi tep-tep wari ajar-ajar siburi-burihen nahena maka tep-tep wari ia bersih. Sebab kalak singgo ridi berarti ia nggo bersih, tapi erkiteken dalan erdebuh maka nahe saja siharus ibersihken. Enda sada simbolik singatakenca maka adi tep-tep wari ajar-ajar Yesus harus mbersihken diri ras nadingken dosa, maka ajar-ajarNa pagi nggeluh ras Yesus. Enda me sierbahanca melem ate ajar-ajar sebab nggeluh ras Yesus.

APLIKASI

            Man banta kata ngelai tentuna lanai asing man banta. Janah perlu siteh kita ngelai erkiteken nggo leben Yesus ngelai kita. Erkiteken Yesus nge maka kita nggeluh ibas jaminan keselamaten. Janah ibas keselamaten e ka maka kita harus ngelai. Kita enda jadi pancur Tuhan guna ngelai i tengah-tengah doni enda gelah doni enda nggeluh ibas keselamaten. Emaka la banci lang kita harus ngelai i tengah-tengah doni enda. Jadi la saja terjeng i gereja tapi ibas dampar kegeluhenta.

            Ngelai alu efektif eme adi silakoken alu mehuli, meteruk ukur ras dem keleng ate. Sebab ibas pendahin sibage nge ngena ate kalak man banta, janah terpuji gelar Tuhan. Lebih asangken sie malem ateta, sebab lit upahta siibereken Dibata man banta eme nggeluh ras Yesus i Pardis.

Pdt. Steven Kumenit, STh.M.Min.